„Leki man èn leki oema a ben kria den”
„Gado ben go moro fara foe kria libisma leki a prenki foe en, akroederi a prenki foe Gado a ben kria en; leki man èn leki oema a ben kria den.” — GENESIS 1:27.
1. Fa a waarheid de wan blesi gi kresten mansma nanga oemasma?
O SWITI a de foe de na mindri a pipel foe Jehovah èn foe abi demakandra nanga mansma èn nanga oemasma, èn so srefi nanga boi èn nanga oemapikin, di a moro prenspari sani na ini a libi foe den na foe lobi Gado èn gi jesi na en! Waarheid e meki wi kon fri toe foe fasi foe denki nanga fasi fa wi e tjari wisrefi di no e plisi Jehovah Gado, èn a e leri wi fa foe libi na a fasi soleki fa kresten moesoe libi (Johanes 8:32; Kolosesma 3:8-10). Foe eksempre, sma na ala presi abi gwenti noso idea foe a fasi fa mansma moesoe sori a man-nengrefasi foe den, èn oemasma na oemasma-fasi foe den. A de so nomo taki mansma gebore nanga man-nengre fasi, èn oemasma nanga oemasma fasi? Noso tra sani de di wi moesoe go loekoe?
2. (a) San moesoe bepaal a fasi fa wi e si man-nengrefasi nanga oemasma-fasi? (b) San pasa nanga a fasi fa sma si mansma nanga oemasma?
2 Gi kresten, a Wortoe foe Gado na a makti di wi e saka wisrefi na en ondro, awansi sortoe fasi foe si sani wi persoonlijk abi, di wi kisi kande, noso fasi foe si sani na koeltoeroe sei noso na a sei foe den gwenti foe wi (Mateus 15:1-9). Bijbel no e taki finifini foe ala fasi foe man-nengrefasi nanga oemasma-fasi. Na presi foe dati, bijbel e gi pasi foe sori man-nengrefasi nanga oemasma-fasi na difrenti fasi, soleki fa wi e si dati na ini difrenti koeltoeroe. Foe de san Gado ben kria den foe de, dan mansma moesoe abi man-nengre fasi, èn oemasma moesoe abi oemasma fasi. Foe san ede? Bika boiti taki man nanga oema ben meki foe fiti na makandra na skin sei, den ben moesoe fiti na makandra nanga jepi foe den eigifasi foe man-nengre nanga oemasma (Genesis 2:18, 23, 24; Mateus 19:4, 5). Ma a fasi fa sma e si wan man noso wan oema kon kroektoe. Foeroe sma e teki man-nengrefasi poti tapoe wán lin nanga a basi di den e basi trawan na wan ogri-ati fasi, tranga-atifasi, noso nanga tranga heimemre-firi foe mansma. Na ini son koeltoeroe a ben sa de wan freimde sani noso wan sjen sani gi wan man foe krei, awansi pe sma de noso te a de en wawan. Tokoe, di Jesus ben de na mindri na ipi sma dorosei foe a grebi foe Lasarus, „Jesus ai ben lon watra” (Johanes 11:35). Dati no ben de wan sani di no ben fiti gi Jesus, foe soema wi kan taki dati en man-nengrefasi ben de volmaakti. Na ini a ten disi, foeroe sma no abi wan balansi fasi moro ini a tori foe oemasma-fasi, èn e si en soso leki wan sani di e hari sma na skin sei èn na seks sei.
Troetroe man-nengrefasi èn troetroe oemasma-fasi
3. Fa mansma nanga oemasma de tra fasi foe makandra?
3 San na troetroe man-nengrefasi, èn san na troetroe oemasma-fasi? The World Book Encyclopedia e taki: „Moro foeroe foe den mansma nanga oemasma e difrenti foe makandra, no soso ini a fasi fa a skin bow, ma so srefi ini a fasi fa den e tjari densrefi èn ini den sani di den abi belangstelling gi. Wan toe foe den difrenti disi bepaal biologis kaba. . . . Ma a e gersi taki foeroe difrenti di no e kon foe a fasi fa a skin bow, gron tapoe a ròl leki man noso leki oema di ibriwan sma aparti e leri. Sma e gebore leki man noso leki oema, ma den e leri foe abi man-nengre fasi noso oemasma fasi.” Den gen foe wi de frantiwortoe kande gi foeroe sani, ma a kweki foe a joisti man-nengrefasi noso oemasma-fasi e anga foe a leri di wi e leri san Gado e aksi èn foe san wi e froekisi foe feti na baka na ini a libi.
4. San bijbel e tjari kon na krin foe den ròl foe man nanga oema?
4 Bijbel historia e tjari kon na krin taki a ròl foe Adam ben de foe teki fesi leki edeman foe en wefi nanga den pikin foe en. A ben moesoe doe a wani foe Gado toe foe foeroe grontapoe, poti en na en ondro, èn abi ala moro lagi kriatoeroe na grontapoe na en ondro (Genesis 1:28). Na oemasma ròl na ini na osofamiri di Eva ben kisi, ben de foe de wan „jepiman” nanga „wan fitipisi” gi Adam, foe saka ensrefi na en ondro leki edeman èn foe wroko makandra nanga en foe doe san Gado abi na prakseri nanga den, di A ben meki bekènti gi den. — Genesis 2:18; 1 Korentesma 11:3.
5. Fa a matifasi di ben de na mindri man nanga oema ben pori?
5 Ma Adam no ben doe a frantiwortoe di a ben abi, èn Eva ben gebroiki en oemasma-fasi na wan fasi foe overtoigi èn kori Adam foe teki en sei foe no gi jesi na Gado (Genesis 3:6). Foe di Adam ben gi ensrefi pasi foe doe san a ben sabi taki ben fowtoe, a no ben sori troetroe man-nengrefasi. Na wan swaki fasi a ben froekisi foe teki a wortoe foe en patna di Satan ben kori, na presi foe teki den sani di en Tata nanga Kriaman ben taki (Genesis 2:16, 17). Heri esi a fosi paar ben bigin ondrofeni san Gado ben si na fesi san ben sa de a bakapisi foe trangajesi. Adam, di moro na fesi ben taki foe en wefi ini kefalek moi poewema wortoe, now ben taki sondro firi foe en leki ’na oema di joe ben gi mi’. Now na onvolmaaktifasi foe en ben pori èn tjari en man-nengrefasi go na wan fowtoe pasi, èn ben abi leki bakapisi taki a ’ben e basi en wefi’. Eva, foe en sei, ben sa abi wan „tranga lostoe” gi en masra, kande na wan fasi di de pasa marki noso di no de ini balansi. — Genesis 3:12, 16.
6, 7. (a) Sortoe kroektoe fasi foe man-nengrefasi ben bigin gro bifo a Froedoe? (b) San wi kan leri foe a situwâsi bifo a Froedoe?
6 A gebroiki di sma ben gebroiki man-nengrefasi nanga oemasma-fasi na wan fowtoe fasi ben kon de krin foe si srefisrefi bifo a Froedoe. Engel di ben gowe libi a posisi di den ben abi biginbigin na hemel, ben teki libisma skin foe abi seks nanga oemasma (Genesis 6:1, 2). A tori e taki soso foe mansma di ben kon gebore foe a sekslibi dati di ben de teige a natoeroe. Èn a e gersi taki den pikin ben de basra pikin, di no ben man meki pikin. Sma ben kon sabi den leki tranga sma, Nefilim, noso Falaman, foe di den ben sa meki trawan fadon (Genesis 6:4; foetoewortoe). Soleki fa a sori, dan den ben abi ogri-ati fasi, ben lobi foe feti, èn den no ben sori safoe sari-ati.
7 A de krin taki moi na skin sei, a fasi fa a skin bow, a bigi, noso a krakti foe a skin srefi no e gi joisti man-nengrefasi noso oemasma-fasi. Den engel di ben teki libisma skin ben moi kande. Èn den Nefilim ben bigi èn dobroe, ma a fasi foe denki foe den ben kroektoe. Den trangajesi engel nanga den pikin foe den ben foeroe grontapoe nanga seks hoeroedoe nanga ogri di e doe nanga tranga. Foe dati ede, Jehovah ben tjari a grontapoe dati kon na wan kaba (Genesis 6:5-7). Ma a Froedoe no ben poeroe a krakti di ogri jeje abi na sma tapoe, èn a no ben poeroe den bakapisi foe a sondoe foe Adam toe. Baka a Froedoe, a sori di sma ben sori man-nengrefasi nanga oemasma-fasi na wan fasi di no fiti, ben opo kon baka, èn eksempre de na ini bijbel, boenwan nanga takroewan, di wi kan leri foe den.
8. Sortoe moi eksempre foe joisti man-nengrefasi Josef ben poti?
8 A tori foe Josef nanga a wefi foe Potifar e gi wan krinkrin difrenti na mindri joisti man-nengrefasi nanga grontapoe oemasma-fasi. A wefi foe Potifar, di ben kon lobi Josef, di ben moi, ben proeberi foe kori en. Na a ten dati, no wan wet foe Gado ben skrifi di ben tapoe hoeroedoe noso soetadoe. Tokoe Josef ben lon gowe gi a hoeroe oema dati èn ben sori taki a ben de wan troetroe man foe Gado, wán di ben e sori man-nengrefasi di Gado ben feni boen. — Genesis 39:7-9, 12.
9, 10. (a) Fa oemakownoe Vasti ben gebroiki en oemasma-fasi na wan fowtoe fasi? (b) Sortoe moi eksempre foe oemasma-fasi Ester ben gi wi?
9 Ester nanga na oemakownoe Vasti ben gi oemasma wan aparti eksempre di ben de heri tra fasi foe makandra. Soleki fa a sori, dan Vasti ben denki taki a ben de so moi, dati ala ten kownoe Ahasveros ben sa doe akroederi den winsi foe en. Ma a moi foe en ben de soso na a skin nomo. A ben mankeri bescheidenfasi nanga oemasma-fasi, bika a no ben sori taki a ben saka ensrefi na ondro en masra èn kownoe. A kownoe ben poti en na wan sei èn ben teki wan oema di troetroe ben abi oemasma fasi foe de en oemakownoe, di, te joe loekoe en boen, ben abi frede gi Jehovah. — Ester 1:10-12; 2:15-17.
10 Ester e dini leki wan moi eksempre gi kresten oema. A ben abi „wan moi skin èn a ben moi”, tokoe a ben sori a prodo foe „na inisei sma foe na ati di kibri na ini a prodo foe a tiri èn safoe jejefasi di no man pori” (Ester 2:7; 1 Petrus 3:4). A no ben si prodo di e hari sma prakseri leki a moro prenspari sani. Ester ben sori takt nanga a dwengi di a man dwengi ensrefi, èn a ben e saka ensrefi na ondro en masra, Ahasveros, srefi di a libi foe a pipel foe en ben de na ini kefar. Ester ben tan tiri di a ben de wan koni sani foe doe dati, ma a ben taki sondro frede di a ben de fanowdoe èn ben de a joisti ten gi dati (Ester 2:10; 7:3-6). A ben teki rai foe en lepi neef Mordekai (Ester 4:12-16). A ben sori lobi nanga loyaalfasi gi en pipel.
A fasi fa a dorosei skin foe wi de
11. San wi moesoe hori na prakseri ini a tori foe a dorosei skin foe wi?
11 San na a sroto gi joisti oemasma-fasi? Wan mama ben taki: „Krakti foe moifasi kan de wan bedrigi sani, èn moi kan de foe soso; ma na oema di e frede Jehovah, na a wan di e kisi prèise gi ensrefi” (Odo 31:30). So boen, wan lespeki frede gi Gado de toemoesi prenspari, èn lobi boen-atifasi, prisirifasi, bescheidenfasi, nanga wan safoe tongo e jepi foe abi oemasma-fasi moro leki moi na skin sei. — Odo 31:26.
12, 13. (a) Sortoe sani, di de wan sari sani, lai na ini a taki foe foeroe sma? (b) San Odo 11:22 wani taki?
12 A de wan sari sani taki foeroe mansma nanga oemasma no e opo a mofo foe den ini koni, èn lobi boen-atifasi no de tapoe den tongo toe. A taki foe den grofoe, asranti, doti, èn den no e hori a firi foe trawan na prakseri. Son mansma e denki taki dotitaki na wan marki foe man-nengrefasi, èn son oemasma na wan don fasi e waka na den baka. Tokoe efoe wan oema moi, ma a e mankeri konifasi èn a lobi meki trobi, de asranti, noso abi heimemre, wi kan taki dati a moi na ala fasi, taki troetroe a de wan oema? „Leki wan gowtoe nosolinga ini a noso foe wan agoe, na so wan oema de di moi, ma di e drai en baka gi konifasi.” — Odo 11:22.
13 Moifasi makandra nanga taki di no krin, asrantifasi, noso a mankeri foe konifasi, no ben sa kroederi srefi nanga iniwan fasi di wan sma kan sori taki a de wan oema. Foe taki en leti, so wan godelowsoe fasi fa wan sma e tjari ensrefi ben kan meki srefi taki wan sma di e hari trawan na skin sei, sori takroe. Wi kan si makriki taki a fasi fa wan man noso wan oema de na skin sei, no kan meki foe ensrefi taki atibron, babari noso skempi taki kon boen, noso regtfardiki den. Ala kresten kan èn moesoe meki densrefi moi gi Gado nanga kompe libisma nanga a taki foe den èn a fasi fa den e tjari densrefi di abi den gron tapoe bijbel. — Efeisesma 4:31.
14. Sortoe fasi foe prodo 1 Petrus 3:3-5 e prèise, èn fa joe e feni dati?
14 Ala di warti oemasma-fasi nanga man-nengrefasi abi den gron tapoe eigifasi na jejefasi, tokoe a fasi fa wi e tjari wisrefi èn a fasi fa wi de na skin sei, so srefi den krosi di wi e weri èn a fasi fa wi e weri den, e froeteri wan sani foe wi sondro wortoe. Sondro tweifri na apostel Petrus ben abi son fosi jarihondro modo foe weri krosi èn foe sorgoe gi a skin na prakseri, di a ben gi kresten oema a rai: „No meki a prodo foe oenoe de na dorosei nanga a brei foe wiwiri èn na anga foe gowtoe moimoi-sani na a skin noso a weri foe tapoesei-krosi, sani di sma kan si, ma meki a de na inisei sma foe na ati di kibri na ini a prodo foe a tiri èn safoe jejefasi di no man pori, di warti foeroe na ini na ai foe Gado. Bika na so den santa oema foe fositen di ben howpoe tapoe Gado, ben gwenti foe meki densrefi moi toe, ala di den ben saka densrefi na ondro den eigi masra.” — 1 Petrus 3:3-5.
15. Sortoe moeiti kresten oema moesoe meki foe sori ini den krosi di den weri?
15 Na ini 1 Timoteus 2:9, 10, wi e feni a froeklari foe Paulus di a gi foe oemasma krosi: „Mi wani taki den oemasma e moi densrefi nanga krin krosi, nanga bescheidenfasi èn nanga gosontoe froestan . . . na a fasi di e fiti oemasma di e taki dati den e lespeki Gado, dati wani taki, nanga boen wroko.” Drape a ben poti krakti na tapoe a prensparifasi foe bescheidenfasi nanga krin krosi di e sori gosontoe froestan.
16, 17. (a) Fa foeroe mansma nanga oemasma na ini a ten disi gebroiki krosi na wan fowtoe fasi? (b) Na sortoe bosroiti wi moesoe kon foe a rai di de foe feni na ini Deuteronomium 22:5?
16 Efoe wan man noso wan oema, boi noso oemapikin, e tjari ensrefi noso e weri krosi na wan fasi di e wroko tapoe sma firi na seks sei, dan dati no ben sa meki man-nengrefasi noso oemasma-fasi kon kisi moro waarde, èn seiker a no e gi Gado grani. Foeroe sma na grontapoe e prodo pasa marki foe sori man-nengrefasi noso oemasma-fasi na seks sei, nanga krosi èn nanga a fasi fa den e tjari densrefi. Trawan e kibri den difrenti na mindri man nanga oema foe hoeroedoe prakseri ede. Fa wi kresten kan de nanga tangi taki bijbel e tjari kon na krin fa Gado e prakseri! Jehovah ben froeklari gi Israèl foe owroeten: „Joe no moesoe weri a krosi foe wan man di gosontoe èn tranga na skinfasi gi wan oemasma, èn wan man di gosontoe èn tranga na skinfasi no moesoe weri a krosi foe wan oemasma; bika iniwan sma di e doe den sani disi, na wan sani di Jehovah, joe Gado, e tegoe gi.” — Deuteronomium 22:5.
17 Ini a tori disi, kande joe sa prisiri foe loekoe baka san A Waktitoren foe 15 augustus 1988 ben taki tapoe bladzijde 7: „Na afersi no de ofu wan bepaalde stijl de spesrutu a modo ma efu a e fiti gi wan sma di e taki taki a de wan dinari foe Gado (Romeini 12:2; 2 Korinte 6:3). Tumsi informele friten-krosi ofu span krosi kan puru a prakseri fu sma fu na boskopu fu wi. Stijl di wantronwantron wan sma e si en èn di fu espresi e meki mansma gersi umasma èn di espresi e meki umasma gersi mansma, seiker no e fiti. (Teki gersi Deuteronomium 22:5.) A no de fu taki taki gwenti fu a wan presi e kenki fu a trawan, èn dati e anga fu na weer, a wroko di wan sma e du, nanga so moro fara, sodati na kristen gemeente no e meki faste regel gi den brada nanga sisa na a heri grontapu.”
18. Sortoe sani wi ben sa kan doe foe gebroiki bijbel rai ini a tori foe krosi èn foe a sorgoe gi wi skin?
18 Foe troe, disi na rai di de ini balansi èn di e fiti! A de wan sari sani, taki son kresten, mansma nanga oemasma, na wan breni fasi e waka na baka awansi san grontapoe e horibaka gi ini a tori foe krosi èn foe a sorgoe gi wi skin sondro foe prakseri fa a ben sa kan abi krakti tapoe Jehovah nanga a kresten gemeente. Ibriwan foe wi ben sa kan ondrosoekoe ensrefi foe si efoe a fasi fa grontapoe e denki abi krakti na wi tapoe. Noso wi ben sa kan go na wan lespeki brada noso sisa di abi ondrofeni èn aksi foe loekoe efoe wi ben sa moesoe tjari wan toe kenki kon ini a fasi fa wi e weri krosi èn baka dati wegi den rai go-kon na wan serjoesoe fasi.
Kresten mansma nanga oemasma na troetroe mansma nanga oemasma
19. Nanga sortoe krakti di wi no wani srefisrefi wi moesoe feti?
19 A gado foe a grontapoe disi na Satan, èn a krakti di a abi tapoe sma kan de foe si ini a broeja ini a tori foe man nanga oema, èn a broeja dati e go moro fara leki soso a weri foe krosi nomo (2 Korentesma 4:4). Na ini son kondre, foeroe oemasma e strei nanga mansma ini a tori foe a wroko leki edeman, èn den e poti bijbel gronprakseri na wan sei. Na a tra sei, foeroe mansma e libi den frantiwortoe di den abi leki edeman gewoon, neleki fa Adam ben doe. Joe abi den wan di e proeberi srefi foe kenki a ròl na seks sei di den abi na ini a libi, foe di den kon tron homo nanga lesbis (Romesma 1:26, 27). Bijbel no e poti wan tra fasi foe libi di Gado e feni boen. Èn iniwan sma di ben broeja ini a tori foe en ròl foe de man noso oema, noso san a lobi na seks sei bifo a ben tron kresten, kan abi a froetrow taki a sa de foe a têgo boen foe en foe libi akroederi a markitiki foe Gado, wan markitiki di ala sma di doro libisma volmaaktifasi seiker sa warderi.
20. Sortoe krakti Galasiasma 5:22, 23 moesoe abi na tapoe a fasi fa wi e si man-nengrefasi nanga oemasma-fasi?
20 Den Boekoe foe bijbel e sori taki kresten man nanga oema moesoe kweki èn sori a froktoe foe a jeje foe Gado — lobi, prisiri, vrede, langa pasensi, switifasi, boen-ati, bribi, safri-atifasi nanga a dwengi di wan sma e dwengi ensrefi (Galasiasma 5:22, 23). Na ini en bigi koni, Gado ben meki taki mansma man tranga a man-nengrefasi foe den èn oemasma na oemasma-fasi foe den, foe di den e kweki den eigifasi dati. A makriki foe lespeki wan man di e sori a froktoe foe a jeje, èn a makriki foe lobi wan oema di e doe dati.
21, 22. (a) Sortoe model Jesus ben poti gi wi ini a tori foe fasi foe libi? (b) Fa Jesus ben sori en man-nengrefasi?
21 A moro bigi man di oiti ben libi ben de Jesus Krestes, èn kresten moesoe waka na baka en fasi foe libi (1 Petrus 2:21-23). Mansma nanga oemasma moesoe sori taki den de loyaal na Gado èn gi jesi na En Wortoe, neleki fa Jesus ben doe. Jesus ben sori toemoesi moi eigifasi foe lobi, safoefasi, nanga sari-ati. Den e froewakti foe wi, leki troe kresten, foe waka na en baka, foe sori taki wi na den disipel foe en. — Johanes 13:35.
22 Jesus Krestes ben de wan troetroe man-nengre, èn wi kan si den man-nengre eigifasi foe en te wi e studeri a tori foe en libi, soleki fa a skrifi na ini den Boekoe foe bijbel. Noiti a ben trow, ma bijbel e sori taki na wan balansi fasi a ben njan boen foe demakandra nanga oemasma (Lukas 10:38, 39). Den matifasi di a ben abi nanga mansma èn nanga oemasma ala ten ben de krin èn nanga lespeki. En na a volmaakti eksempre foe man-nengrefasi. A no ben gi na no wan sma pasi — man, oema, noso trangajesi engel — foe poeroe en santa man-nengrefasi èn getrowfasi na Jehovah. A no ben draidrai foe teki den frantiwortoe foe en èn a ben doe dati sondro foe kragi. — Mateus 26:39.
23. Fa troe kresten kisi blesi na wan aparti fasi ini a tori foe den ròl foe man nanga oema?
23 A de troetroe wan prisiri sani foe de na mindri a pipel foe Jehovah èn foe abi demakandra nanga mansma èn nanga oemasma, so srefi nanga boi nanga oemapikin, di a moro prenspari sani na ini a libi foe den na foe lobi Jehovah Gado èn gi jesi na en! Sani no e skotoe wi foe di wi e gi jesi na a Wortoe foe Gado. Na presi foe dati, wi kon fri foe a grontapoe disi nanga den fasi foe en di e lagi a moi, a marki, nanga den aparti ròl foe man nanga oema. Wi kan ondrofeni a troetroe kolokoe di e kon foe a libi di wi e libi akroederi a posisi na ini a libi di wi kisi foe Gado, awansi wi na man noso oema. Ija, wi de Jehovah Gado, a Kriaman, troetroe tangi foe ala den lobi-ati sani di a seti foe a boen foe wi èn taki a ben e kria wi leki man èn leki oema!
San joe ben sa piki?
◻ Foe sortoe ròl di fiti gi mansma nanga oemasma bijbel e taki?
◻ Fa man-nengrefasi ben kon kroektoe bifo a Froedoe, èn fa a fasi fa sma e si man-nengrefasi nanga oemasma-fasi kon kroektoe na ini a ten foe wi?
◻ Sortoe bijbel rai di abi foe doe nanga wi dorosei skin joe sa proeberi foe gebroiki?
◻ Fa kresten mansma nanga oemasma kan sori taki den na troetroe mansma nanga oemasma?
[Prenki na tapoe bladzijde 17]
Ala di Ester ben moi, tokoe sma e memre spesroetoe en bescheidenfasi nanga en tiri èn safoe jejefasi
[Prenki na tapoe bladzijde 18]
Poti nofo prakseri na tapoe a sorgoe di wi e sorgoe gi wi skin ala di wi e poti moro krakti tapoe a moi foe inisei