Soekoe kibri na Jehovah
„Na joe, o Jehovah, mi ben soekoe kibri.” — PSALM 31:1.
1. Fa Psalm 31 e taki foe a froetrow tapoe san Jehovah man doe foe gi wi kibri?
WAN moi sten de foe jere foe wan man di, ala di a froestan èn a skin foe en weri srefisrefi, e trowe ensrefi na Jehovah tapoe. Bribi e wini, den wortoe foe a santa singi dati e taki. Ini den anoe foe na Almaktiwan di de klariklari foe jepi, a man disi e kisi kibri foe den sma di e froefolgoe en doronomo. „Na joe, o Jehovah, mi ben soekoe kibri”, na so a psalmsingi foe en e go doro. „O no meki mi kisi sjen noiti. Froeloesoe mi na ini joe regtfardikifasi.” — Psalm 31:1.
2. (a) Na tapoe a gron foe sortoe toe stonfoetoe wi kan poti froetrow tapoe Jehovah leki wi tranga? (b) Sortoe Gado Jehovah de?
2 A psalm singiman abi wán kibripresi — a moro boen wan! Sma mag tweifri na tra sani, ma a troe tori disi e tan: Jehovah na en tranga, en fortresi. A froetrow foe en e rostoe na tapoe toe stonfoetoe di no kan misi. A fosiwan, a bribi foe en, di Jehovah no sa meki kisi sjen èn a di foe toe, a regtfardikifasi foe Jehovah, san wani taki dati noiti A sa libi En foetoeboi foe ala ten. Jehovah a no wan Gado di e meki den getrow foetoeboi foe en kisi sjen; en a no wan sma di no e hori ensrefi na san a pramisi. Na presi foe dati, en na wan Gado foe waarheid èn wan sma di e pai den sma di na wan opregtifasi e froetrow tapoe en. Te foe kaba, bribi sa kisi pai! Froeloesoe sa kon! — Psalm 31:5, 6.
3. Fa a psalm singiman e gi Jehovah glori?
3 A psalm singiman e kisi krakti na inisei, foe di a e skrifi den singi foe en nanga pokoe di e bigin nanga a sori di a pokoe e sori sari nanga heloe, ma di abi heimarki di e sori froetrow. A e gi Jehovah glori foe a loyaal lobi foe En. „Blesi Jehovah”, a e singi, „bika a ben sori mi toemoesi moi lobi boen-atifasi ini wan foto di de ini banawtoe.” — Psalm 31:21.
A bigi groepoe singiman foe Kownoekondre preikiman
4, 5. (a) Sortoe bigi groepoe singiman e gi Jehovah prèise ini a ten disi èn fa den ben doe dati ini a dienstjari disi di pasa? (Loekoe a tabel na tapoe bladzijde 8) (b) Na sortoe fasi a nomroe foe sma di ben de na a Memrefesa, e sori taki moro sma wani foe moksi densrefi nanga den singiman foe Kownoekondre preikiman? (Loekoe a tabel.) (c) Sortoe groepoe ini a gemeente foe joe sa kan go moksi densrefi kande nanga den singiman?
4 Den wortoe foe a psalm dati agen wani taki ete wan tra sani ini a ten disi. No wan ogri gensman, no wan natuur rampoe noso wan heloe na ekonomia sei, kan tapoe den prèisesingi gi Jehovah; foe troe, a lobi boen-atifasi foe Jehovah kon tron wan toemoesi moi sani gi a pipel foe en. A dienstjari di pasa, wan bigi groepoe singiman, nanga wan heimarki foe 4.709.889 ini 231 kondre, ben singi a boskopoe foe Gado Kownoekondre na heri grontapoe. A tiri foe Jehovah na hemel ini den anoe foe Krestes Jesus, na wan kibripresi di no sa meki a froewakti foe den no kon troe. A jari di pasa, den Kownoekondre preikiman disi foe 73.070 gemeente ben wroko makandra 1.057.341.972 joeroe ini na evangelium wroko. Disi ben abi leki bakapisi taki 296.004 sma ben simboliseer a gi di den gi densrefi abra na Gado, nanga jepi foe a dopoe nanga watra. Èn fa ala den sma di ben fisiti a Leri foe Gado internationaal-distriktkongres, na Kiev, Oekraine, augustus di pasa, ben si wan toemoesi moi sani di den no ben e froewakti. Fositron ini a historia foe Jehovah Kotoigi, den ben si a moro bigi groepoe foe troe kresten di ben teki dopoe èn di sma skrifi wan ten! So leki fa ben taki na fesi kaba ini Jesaja 54:2, 3, dan a pipel foe Gado e gro nanga nomroe di sma no ben si noiti ete.
5 Ma moro sma di wani foe saka densrefi na a Kownoekondre foe Gado ondro, e wakti foe kan go moksi densrefi nanga den singiman. A jari di pasa, wan nomroe di e gi foe froewondroe, foe 11.865.765 sma, ben fisiti a Memrefesa foe Jesus dede. Wi e howpoe taki foeroe foe den sma disi sa de warti foe singi a Kownoekondre singi doro foe doro ini a dienstjari disi. Fa a froewakti dati moesoe foeroe a feanti foe waarheid, Satan Didibri, nanga atibron! — Openbaring 12:12, 17.
6, 7. Tjari kon na krin fa wan man di ben abi belangstelling ben wini nanga a jepi foe Jehovah, a trobi di ogri jeje ben e trobi en.
6 Satan sa proeberi foe hendri trawan foe poti den sten foe den makandra nanga di foe a bigi groepoe singiman dati. Foe eksempre, preikiman na Tailand e feni wan nomroe, di e gro nomonomo, foe sma di ogri jeje e trobi den. Ma foeroe opregti sma, ben kon fri nanga a jepi foe Jehovah. Baka di wan man ben fisiti wan obiaman, foe di a ben wani sabi sani nomonomo, a ben de ini a makti foe ogri jeje tin jari langa. A ben doe moeiti foe kon fri foe a makti foe den nanga a jepi foe wan kerki fesiman, ma a no ben ondrofeni troetroe jepi. Wan foeroeten bedinari foe Jehovah Kotoigi ben bigin wan bijbelstudie nanga a man èn ben leri en foe bijbel a wan-enkri fasi foe kon fri foe a makti foe ogri jeje — leri a soifri sabi foe waarheid, poti bribi na ini Jehovah Gado èn begi en tranga. — 1 Korentesma 2:5; Filipisma 4:6, 7; 1 Timoteus 2:3, 4.
7 A neti baka a takimakandra disi, a man ben abi wan dren pe en papa di dede, ben pramisi foe doe en wan sani efoe a no ben sa drai go wroko baka leki wan asi foe den ogri jeje. Na osofamiri foe en ben bigin pina. Foe di a man no ben wani foe gi pasi, a ben go doro nanga a bijbel leri foe en èn a ben bigin go na den konmakandra. Na wan foe den studie dati, a pionier ben tjari kon na krin, taki sontron sani di ben gebroiki gi obiawroko, kan gi den ogri jeje pasi foe trobi sma, di e proeberi foe kon fri foe a makti foe den. A man ben memre taki a ben abi pikinso oli di a ben gebroiki leki wan tapoe. Now a ben froestan taki a ben moesoe trowe en. Sensi di a trowe en, den ogri jeje no ben trobi en moro. (Teki gersi Efeisesma 6:13; Jakobus 4:7, 8.) En nanga a wefi foe en e go heri boen na fesi nanga a studie foe den èn den e go na den konmakandra doronomo foe kisi leri foe bijbel.
8, 9. Sortoe tra problema son Kownoekondre preikiman ben wini?
8 Tra problema kan tapoe a jere di sma man jere a boen njoensoe. Foe di wan bigi druk na ekonomia sei de na Gana, meki wrokoman ben lasi den wroko foe wan pisi ten. Den prijs foe sani kon hei srefisrefi, san e tjari nanga en taki a de wan troetroe problema foe bai den fosi sani di sma abi fanowdoe ini a libi. Fa a pipel foe Jehovah ben kakafoetoe gi a problema disi? Den ben froetrow tapoe Jehovah èn no tapoe densrefi. Wan dei, foe eksempre, wan man ben libi wan envelop di ben tapoe, na a receptie foe a bijkantoro. Ini na envelop ben de 200 Amerkan dala noso a moro lagi moni di sma e wroko ini dri moen. Na envelop ben kon foe wan sma di no ben skrifi en nen, ma na a dorosei foe na envelop a sani disi ben skrifi: „Mi lasi mi wroko, ma Jehovah ben gi mi wan trawan. Mi e taki en nanga a Manpikin foe en, Jesus Krestes, tangi. Foe jepi panja a boen njoensoe foe a Kownoekondre bifo a kaba kon, makandra nanga a brifi disi mi e seni wan pikin bijdrage.” — Teki gersi 2 Korentesma 9:11.
9 A go di sma e go na konmakandra, e jepi foe leri denwan di moksi densrefi nanga a bigi groepoe singiman, foe prèise Jehovah. (Teki gersi Psalm 22:22.) So boen, ini a zuidsei pisi foe Honduras, wan pikin gemeente de di nen El Jordán. San de so spesroetoe na a pikin groepoe disi? A go di den e go getrow na den konmakandra. Foe den 19 preikiman, 12 foe den moesoe koti abra wan bradi liba foe go na den konmakandra ibri wiki. Na dreiten, disi no de wan bigi problema, bika den kan abra a liba foe di den e gebroiki den klipston leki ston foe waka na tapoe. Ma na alenten a situwâsi de tra fasi. San ben de wan ten wan pisi watra di ben sori so pikin, kon tron now wan froedoe di e wasi ala sani gowe di e kon tapoe en pasi. Foe wini a problema disi, den brada nanga sisa ben moesoe de sma di sabi swen boen. Bifo den e koti a liba abra, den e poti den krosi foe den gi a konmakandra ini wan tina (wan isri bari) èn dan den e tapoe en nanga wan plastik saka. A moro tranga swenman e gebroiki a tina leki wan boei èn a e tjari a groepoe go na abrasei. Te den doro a tra sei sondro wan sani pasa nanga den, den e drei den skin, e weri den krosi èn den e doro na a Kownoekondrezaal, ala di den e prisiri èn krin srefisrefi! — Psalm 40:9.
Wan fortresi pe wi kan libi
10. Foe san ede wi kan go na Jehovah te wi e firi brokosaka?
10 Awansi den ogri jeje e fadon na joe tapoe langalanga noso joe e firi brokosaka foe tra sani ede, Jehovah kan de joe tranga. Kari en ini begi. A e arki boen srefi na den moro swaki geme foe en pipel. A psalm singiman ben kon si taki a sani disi troe èn ben skrifi: „Poti joe jesi arki mi. Froeloesoe mi esi-esi. Tron wan tranga klipston gi mi, wan tranga oso foe gi mi kibri. Bika joe na mi klipston di tanapoe leti-opoe èn mi tranga; èn foe joe nen ede joe sa tjari mi èn tiri mi. Joe sa tjari mi poeroe foe a nèt di den ben kibri gi mi, bika joe na mi fortresi.” — Psalm 31:2-4.
11. Tjari kon na krin foe san ede a fortresi foe Jehovah a no wan presi foe soso wan pisi ten nomo?
11 Jehovah no e gi kibri foe wan sjatoe pisi ten nomo, ma a de wan tranga fortresi toe pe wi kan tan ini seikerfasi. A tjari di a e tjari wi èn a tiri di a e tiri wi no ben mankeri gi a pipel foe en. A krakti foe Gado sa meki ala den triki foe Satan nanga den pikin foe en kon tron wan soso sani (Efeisesma 6:10, 11). Te wi e froetrow tapoe Jehovah nanga wi heri ati, dan a sa hari wi poeroe foe den trapoe foe Satan (2 Petrus 2:9). Ini den fo jari di pasa, 27 kondre ben erken a preikiwroko foe Jehovah Kotoigi na wet. So srefi ini kontren foe grontapoe pe den sociaal, ekonomia noso politiek kondisi e hendri a preiki foe a boen njoensoe, wan toe sma di wi kan agersi nanga skapoe ben froisi go na presi pe sma kan go na den na wan moro fri fasi. Japan na so wan presi pe den ben froisi go.
12. Fa wan pionier na Japan ben meki Jehovah kon tron en tranga?
12 Foeroe wrokoman foe tra kondre ben go wroko foe wan pisi ten na Japan, èn den ben opo foeroe gemeente di e taki wan freimde tongo. Na ondrofeni foe wan brada ini wan gemeente na Japan e sori omeni sma de foe feni ini a gebied disi pe sma e taki wan freimde tongo. A ben wani foe go dini pe a fanowdoe de moro bigi. Ma a ben e hori tin bijbelstudie kaba pe a ben de. Wan foe den mati foe en ben taki leki wan grap: „Efoe joe e go pe a fanowdoe de moro bigi, joe sa moesoe hori 20 bijbelstudie drape!” A ben kisi wan toewijzing èn a ben go na Hirosjima. Ma baka fo moen, a ben abi soso wán bijbelstudie. Wan dei a ben go fisiti wan man foe Brasionkondre di ben taki soso Potogisi. Foe di a brada no ben man taki nanga a man, a ben bai wan boekoe foe leri a Potogisi. Baka di a ben leri den moro eenvoudig wortoe foe taki nanga sma, a ben go fisiti a man baka. Di a brada ben taki a man odi ini Potogisi, a man ben froewondroe èn nanga wan bradi lafoe, a ben bradi a doro opo èn ben kari a brada kon na inisei. Den ben bigin wan bijbelstudie. Heri esi a brada ben hori ala nanga ala 22 studie, 14 na ini Potogisi, siksi na ini Spanjoro èn toe na ini Japantongo!
Preiki nanga froetrow
13. Foe san ede no wan sma moesoe proeberi foe meki wi firi sjen foe dini Jehovah?
13 A pipel foe Jehovah e singi a Kownoekondre singi na wan froetrowfasi èn nanga ala bribi taki Jehovah na a kibripresi foe den (Psalm 31:14). Den no sa kisi sjen — Jehovah no sa meki den fesi fadon, bika a sa meki a wortoe foe en kon troe (Psalm 31:17). Didibri nanga den ogri jeje kompe foe en sa kisi sjen. Foe di a pipel foe Jehovah ben kisi a komando foe preiki wan boskopoe di fri foe sjen, tra sma no man meki den firi sjen foe go preiki. Dati a no a fasi fa Jehovah noso en Manpikin wani sma moesoe anbegi En. Te na ati foe sma foeroe nanga bribi èn warderi foe a boen-ati èn a lobi boen-atifasi foe Jehovah, dan a de a boen kondisi foe na ati foe den, di e meki a mofo foe den e taki (Lukas 6:45). So boen, osortoe ten toe wi e gi ini a diniwroko ibri moen, spesroetoe efoe a ten dati de ala san wi man doe, a de wan boen sani, a no de wan sani foe sjen. A no ben de so taki Jesus nanga en Tata ben e warderi a pikinso moni foe a weduwe srefisrefi? — Lukas 21:1-4.
14. Sortoe komentaar joe kan gi ini a tori foe a pionierwroko? (Loekoe a tabel toe.)
14 Ini wan nomroe di e gro moro nanga moro foe preikiman, di e anbegi Gado nanga den heri sili, joe abi sma toe di e dini leki pionier — 890.231 ini a moen nanga wan heimarki a jari di pasa. Efoe a gro foe a jari di pasa e go doro, dan a nomroe sa pasa kande 1.000.000. Na ondrofeni di e kon now, e sori fa wan sisa na Nigeria ben tron wan pionier. A e skrifi: „Di mi ben de na a kaba foe mulo-skoro, mi ben go jepi bori gi den wan di ben go na a pionierskoro foe Jehovah Kotoigi. Drape mi ben miti toe sisa di ben owroe moro mi granmama. Di mi ben kon si taki den ben de pionier di ben go na a skoro, mi ben denki na misrefi: ’Efoe den toe sisa dati kan pionier, san e hori mi foe no go pionier?’ So boen, baka di mi ben kaba nanga skoro, mi toe ben tron wan gewoon pionier.”
15. Na sortoe fasi okasi kotoigi kan meki taki trawan kan soekoe kibri na Jehovah?
15 A no ala sma man pionier, ma den man gi kotoigi. Na België wan sisa di abi 82 jari, ben go na wenkri foe bai meti. A ben si taki a wefi foe a sraktiman ben broko en ede srefisrefi foe sekiseki di no so langa ben pasa na politiek sei. Foe dati ede a sisa poti a traktaat San Jehovah Kotoigi e bribi? ini a moni di a ben pai gi a meti. Di a sisa ben go baka na a wenkri, a wefi foe a sraktiman, sondro foe draidrai wan momenti, aksi san bijbel e taki foe a man di wan di foe dri grontapoe orlokoe man kon. A sisa tjari a boekoe Troe vrede nanga seikerfasi — Fa joe kan feni en? gi na oema. Wan toe dei na baka, di na owroe sisa kon na ini a wenkri, a wefi foe a sraktiman ben abi moro aksi gi en. A sisa ben kisi wan waran firi gi na oema disi; a ben moesoe foe pristeri en wan bijbelstudie èn na oema ben teki a bijbelstudie. Now a wefi foe a sraktiman wani teki dopoe. San wi kan taki foe a sraktiman? A ben leisi a traktaat èn now a e studeri bijbel toe.
’Wan goedoe foe boen-ati’
16. Fa Jehovah ben poti wan goedoe foe boen-ati na wan sei gi en pipel?
16 Ini den lasti dei disi nanga banawtoe, a no Jehovah „ben sori toemoesi moi lobi boen-atifasi” na den sma di ben go soekoe kibri na en? Leki wan lobi papa di e kibri den pikin foe en, Jehovah ben poti wan goedoe foe boen-ati na wan sei gi den pikin foe en na grontapoe. A ben kanti kolokoe na den tapoe na fesi foe ala sma di e tanapoe e loekoe, neleki fa a psalm singiman e taki: „Fa a boen-ati foe joe de pasa marki, di joe ben poti na wan sei leki wan goedoe gi denwan di e frede joe! Di joe ben sori na denwan di ben soekoe kibri na joe, na fesi foe den manpikin foe libisma.” — Psalm 31:19, 21.
17-19. Sortoe boen bakapisi a skrifi di wan owroe man na Gana ben go skrifi a trow foe en na wet, ben abi?
17 Dati meki, sma foe grontapoe kon si nanga den eigi ai na eerlijkfasi foe den sma di e anbegi Jehovah, èn den e froewondroe. Na Gana foe eksempre, wan man di ben abi 96 jari, ben go na wan kantoro pe den e skrifi trow na boekoe èn a ben aksi taki a trow foe en foe 70 jari, di no ben skrifi na wet, ben moesoe skrifi na boekoe now. Disi ben seki a trow ambtenari èn a ben aksi: „Joe de seiker taki disi na san joe wani doe? Na a libimarki disi?”
18 A man ben tjari kon na krin: „Mi wani foe de wan Kotoigi foe Jehovah èn abi wan prati na a moro prenspari wroko bifo a kaba foe grontapoe e kon — a wroko foe preiki a boen njoensoe foe Gado Kownoekondre. A wroko disi abi têgo libi leki bakapisi. Jehovah Kotoigi e gi jesi na wet foe lanti, san wani taki a wet foe skrifi trow na boekoe toe. Foe dati ede, grantangi, skrifi a trow foe mi na boekoe.” Na ambtenari ben froewondroe. A ben skrifi a trow na boekoe, èn na owroe man ben gowe, èn ben firi ensrefi kolokoe taki now a ben trow akroederi wet. — Teki gersi Romesma 12:2.
19 Baka dati, a man di ben skrifi a trow na boekoe, go prakseri foe den sani di a ben jere. „Jehovah Kotoigi . . . a moro prenspari wroko . . . a kaba foe grontapoe . . . Gado Kownoekondre . . . têgo libi.” Foe di a ben froewondroe srefisrefi san ala den sani disi ben wani taki ini a libi foe wan man di abi 96 jari, a ben teki a bosroiti foe go soekoe den Kotoigi foe ondrosoekoe na afersi moro fara. A ben teki wan oso-bijbelstudie èn a ben go esi-esi na fesi. Now a man disi, di e skrifi trow na boekoe, de wan dopoe Kotoigi. So boen, te wi e gi jesi na Jehovah srefi na ini san trawan e si kande leki wan pikin sani, a kan abi leki bakapisi wan lo boen sani gi wi èn gi den wan di de kotoigi foe a fasi fa wi e tjari wisrefi. — Teki gersi 1 Petrus 2:12.
20. Fa na eerlijkfasi foe wan jongoe sisa na Mianmar ben abi leki bakapisi taki wan boen kotoigi ben gi?
20 Moro owroe sma di ben meki taki a waarheid meki den kon tron eerlijk sma, e gi wan boen eksempre na den jongoe sma ini a grontapoe disi di no de eerlijk. Na Mianmar so wan jongoe sisa e libi. A komoto na wan osofamiri nanga tin pikin di ben pôti èn di ben abi sakafasi. A papa, di de nanga pensioen kaba, na wan gewoon pionier. Wan dei na skoro, a sisa ben feni wan djamanti linga, di a ben tjari go na a jufrow wantewante. Di a klas ben kon na makandra a dei na baka, a jufrow ben taigi a klas fa den ben feni a linga èn ben tjari en kon gi en, so taki a ben kan gi en baka na a sma di ben abi a linga. Ne a ben aksi a jongoe sisa foe go tanapoe na fesi a heri klas èn tjari kon na krin foe san ede a ben doe disi, ala di a ben sabi taki tra pikin ben sa froekisi foe hori a linga. A sisa ben tjari kon na krin taki a ben de wan Kotoigi foe Jehovah èn taki a Gado foe en no lobi a foefoeroe di sma e foefoeroe noso ini wan sortoe oneerlijkfasi. A heri skoro ben jere foe a tori disi, èn a ben gi a jongoe sisa foe wi wan boen okasi foe gi kotoigi na skoromeester nanga jufrow èn na studenti.
21. Fa a fasi fa jongoe sma e tjari densrefi e sori fa Jehovah de, foe di den e froetrow na tapoe en?
21 Na België wan skoromeester ben taki wan moi sani foe Jehovah Kotoigi ini klas. A ben si fa wán foe den studenti foe en, di ben de wan jongoe sisa toe, ben tjari ensrefi, èn a ben taki: „Now mi e denki tra fasi foe Jehovah Kotoigi. Foe di mi ben kroetoe sani na fesi sondro foe go ondrosoekoe a tori, mi ben denki taki den ben sa de sma di no e froedrage sani srefisrefi. Den ben sori foe de sma di e froedrage sani srefisrefi, ala di den no e meki skeki nanga den gronprakseri foe den.” Ibri jari den skoromeester nanga jufrow e gi den moro boen studenti foe den wan prijs. Na mindri trawan wan prijs de gi a kursus ini ethiek. Dri jari baka makandra kaba, a skoromeester disi ben gi pikin foe Jehovah Kotoigi den prijs gi den dri moro hei cijfer. Na so a e pasa foeroetron nanga den sma di e froetrow na wan loyaalfasi tapoe Jehovah. — Psalm 31:23.
22. San na a kefarlek moi bosroiti foe Psalm 31, èn fa dati e jepi wi ini den lasti dei foe a seti foe sani disi?
22 Psalm 31 e tapoe nanga wan kefarlek moi bosroiti: „Abi deki-ati èn meki oen ati de tranga, oenoe alamala di e wakti Jehovah” (Psalm 31:24). Foe dati ede, ala di wi e tanapoe na fesi den lasti dei foe Satan seti foe sani, na presi foe Jehovah gowe libi wi, a sa kon krosibei srefisrefi foe wi èn a sa poti en eigi krakti na ini wi. Jehovah de getrow èn a no e misi. En na wi kibripresi; en na wi toren. — Odo 18:10.
Joe e memre disi ete?
◻ Foe san ede na wan froetrowfasi wi kan meki Jehovah kon tron wi kibripresi?
◻ Sortoe boeweisi de taki wan bigi groepoe singiman e singi Kownoekondre prèisesingi nanga deki-ati?
◻ Foe san ede wi kan abi a froetrow taki a nèt foe Satan no sa hori a pipel foe Jehovah ini wan trapoe?
◻ Sortoe goedoe Jehovah ben poti na wan sei gi den wan di e soekoe kibri na en?
[Raportoe na tapoe bladzijde 8-11]
1993 DINIWROKO RAPORTOE FOE JEHOVAH KOTOIGI NA HERI GRONTAPOE
(Loekoe a tijdschrift)
[Prenki na tapoe bladzijde 12, 13]
Den sma di e soekoe kibri na Jehovah de makandra wan bigi groepoe singiman foe Kownoekondre preikiman — 4.709.889 sma!
1. Senegal
2. Brasionkondre
3. Chili
4. Bolivia