Na Avondmaal foe Masra — Omeni tron a moesoe hori?

KRESNETI, Pasen, den dei „tapoe kerki kalender pe den e memre santa sma.” Den kerki foe krestenhèit e hori foeroe fesadei èn fesa. Ma joe sabi omeni fesa Jesus Krestes ben komanderi den bakaman foe en foe hori? A piki de: Soso wan! No wan foe den tra fesa, a Man, di bigin nanga krestendom, ben gi primisi.

A de krin, taki efoe Jesus ben seti soso wan fesa, a de wan toemoesi prenspari sani. Kresten moesoe hori en soifri fa Jesus ben komanderi. San ben de na aparti fesa disi?

A wan-enkri fesa

Jesus seti a fesa disi tapoe a dei foe en dede. Makandra nanga den apostel foe en a ben memre a djoe Paskafesa. Baka dati a ben gi den wan toe foe den Paskabrede sondro sroedeki èn a ben taki: „Disi wani taki mi skin di mi o gi foe a boen foe oenoe.” Baka dati Jesus ben gi den wan beker win èn a ben taki: „A beker disi wani taki a njoen froebontoe akroederi mi broedoe, di sa lon foe a boen foe oenoe.” A ben taki toe: „Tan doe disi foe memre mi” (Lukas 22:19, 20; 1 Korentesma 11:24-26). Den e kari a fesa disi na Avondmaal foe Masra, noso a Memrefesa. A de a wan-enkri fesa di Jesus ben komanderi den bakaman foe en foe hori.

Foeroe kerki e taki dati den e hori a fesa disi makandra nanga ala den tra fesa foe den, ma foeroe foe den e memre en tra fasi leki a fasi di Jesus ben komanderi. Kande a difrenti di e kon moro foeroe na fesi, na a hori di den e hori a fesa someni tron. Son kerki e hori en ala moen, ala wiki, srefi ala dei. Na disi Jesus ben abi na prakseri di a ben taigi den bakaman foe en: „Tan doe disi foe memre mi”? The New English Bible e taki: „Doe disi foe memre mi” (1 Korentesma 11:24, 25). Omeni tron wan memrefesa noso wan fesa foe ala jari moesoe hori? A de a gwenti, taki a de soso wán leisi wan jari.

Memre toe, taki Jesus ben seti a fesa disi èn baka dati a dede tapoe 14 Nisan foe a djoe kalender.a Dati ben de a dei foe a Paska, wan fesa di ben memre den djoe na a bigi fri di den ben ondrofeni ini Egipti ini a di foe 16 jarihondro bifo Gewoon Teri. Ini a ten dati na òfer di den ben òfer wan pikin skapoe, ben abi leki bakapisi taki den fosi geborewan foe den djoe ben kisi froeloesoe, ala di na engel foe Jehovah ben naki ala den fosi geborewan foe Egipti trowe. — Exodus 12:21, 24-27.

Fa disi e jepi wi foe froestan? We, a kresten apostel Paulus ben skrifi: „Den ben òfer Krestes wi Paska” (1 Korentesma 5:7). A dede foe Jesus ben de wan moro bigi Paska ofrandi, di e gi a libisma famiri na okasi foe kisi wan moro bigi froeloesoe. Gi kresten, foe dati ede, a Memrefesa foe Krestes dede ben kon ini a presi foe a djoe Paska. — Johanes 3:16.

A Paska ben de wan fesa di ben hori wantron wan jari. Wi kan froestan taki, na so a de toe nanga a Memrefesa. A Paska — a dei di Jesus ben dede — ala ten ben feni presi tapoe a di foe 14 dei foe a djoe moen, Nisan. Foe dati ede, sma moesoe foe memre a dede foe Krestes wán leisi wan jari, tapoe a kalender-dei di e kroederi nanga 14 Nisan. Ini 1994 a dei dati na satra 26 maart, baka te sondongo. Ma foe san ede a de so, taki kerki foe krestènheit no meki a dei disi wan spesroetoe fesadei? Wan sjatoe loekoe tapoe a historia sa gi wan piki tapoe na aksi dati.

Den gwenti foe den apostel de ini kefar

A no abi misi taki ini a fosi jarihondro Gewoon Teri, denwan di den apostel foe Jesus ben tiri, ben hori na Avondmaal foe Masra soifri fa a ben komanderi. Ma ini a di foe toe jarihondro, sonwan ben bigin kenki a ten foe a memrefesa. Den ben hori a Memrefesa tapoe a fosi dei foe a wiki (a dei di den e kari now sonde), èn no tapoe a dei di e kroederi nanga 14 Nisan. Foe san ede den ben doe dati?

Gi den djoe, wan dei ben bigin wan sani foe siksi joeroe mofoneti te kon miti a srefi ten a tra dei. Jesus dede tapoe 14 Nisan 33 Gewoon Teri, san ben waka foe fodewroko mofoneti te leki freida mofoneti. A ben opo baka tapoe a di foe dri dei, froekoe sonde mamanten. Sonwan ben wani, taki a memre foe Jesus en dede ben moesoe hori tapoe wan fasti dei ini a wiki ala jari, na presi foe a dei tapoe san 14 Nisan ben o fadon. Den ben si a dei foe Jesus en opobaka toe leki moro prenspari leki a dei foe en dede. Foe dati ede den teki sonde.

Jesus ben komanderi taki a dede foe en moesoe foe memre èn no en opobaka. Èn foe di a djoe Paska e fadon tapoe wan tra dei ala jari, ini akroederi nanga a gregoriaan kalender di wi e gebroiki now, a de wan toemoesi normaal sani, taki a srefi sani o de troe gi a Memrefesa. Foe dati ede, foeroe sma ben tan hori a fosi sani di ben seti èn den ben hori na Avondmaal foe Masra tapoe 14 Nisan ala jari. Baka wan pisi ten, sma ben kon kari den Kwartodecenniasma, san wani taki den „Tinafosma”.

Son sabiman ben si taki den „Tinafosma” disi, ben waka baka a patron, di feni en bigin na den apostel. Wan historiaman ben taki: „Ini a tori foe a dei foe hori a Paska [na Avondmaal foe Masra], doronomo a gwenti foe den kerki foe den Kwartodecenniasma ini Asia, ben de ini akroederi nanga di foe a Jerusalem kerki. Ini a di foe toe jarihondro, tapoe a Paska foe den di den ben hori tapoe a di foe 14 Nisan den kerki disi, ben memre a froeloesoe di ben kon nanga jepi foe a dede foe Krestes.” — Studia Patristica, Pisi V, 1962, bladzijde 8.

Wan kesekese e kon moro faja

Ala di foeroe sma ini Pikin Asia ben waka baka den gwenti foe den apostel, ini Rome sonde ben poti aparti foe hori a fesa. Na a pisi ten foe a jari 155 Gewoon Teri, Polycarp foe Smirna, wan man di ben teki presi gi den gemeente foe Asia, ben fisiti Rome foe taki foe a sani disi èn tra problema. A de wan sari, taki ini na afersi disi den man no ben kon agri nanga makandra.

Irenaeus foe Lions ben skrifi ini wan brifi: „Anicetus [foe Rome] no ben man overtoigi Polycarp foe a no hori san a ben hori ala ten nanga Johanes, a disipel foe wi Masra èn den tra apostel nanga soema a ben abi demakandra; èn Polycarp no ben overtoigi Anicetus toe foe hori disi, bika Anicetus ben taki dati en (Anicetus) ben moesoe hori ensrefi na den gwenti foe den owroeman di ben de fosi en” (Eusebius, Boekoe 5, kapitel 24). Loekoe boen taki, so leki fa sma e taki, Polycarp ben gron a fasi fa en ben si sani, tapoe a makti foe den apostel, ala di Anicetus ben hori ensrefi na den gwenti foe man di fosi ben de owroeman foe Rome.

Doro te na a kaba foe a di foe toe jarihondro Gewoon Teri, a kesekese disi ben kon moro faja. Na a pisi ten foe a jari 190 Gewoon Teri, den ben froekisi wan seiker Victor leki biskopoe foe Rome. A ben bribi, taki na Avondmaal foe masra moesoe foe hori tapoe sonde, èn a ben soekoe a jepi foe someni tra fesiman leki a ben man. Victor ben poti druk tapoe den gemeente foe Asia foe kenki èn seti sani gi sonde.

Polycrates foe Efeise, di ben piki en gi a boen foe denwan ini Pikin Asia, ben weigri foe saka ensrefi na ondro a druk disi. A ben taki: „Wi e tan hori a dei sondro foe kenki sani, noso foe poti wan sani na en, noso foe poeroe wan sani foe en.” Baka dati a ben kari foeroe man di abi makti foe sabi, so srefi na apostel Johanes. „Ala den man disi”, a ben horidoro, „ben hori a di foe tinafo dei gi a Paska, so leki fa na Evangelie e taki, èn na no wan fasi den ben doe en tra fasi”. Polycrates ben taki moro fara: „Mi foe mi sei, brada, . . . no e frede foe den pramisi di sma e pramisi foe doe mi ogri. Bika denwan di moro boen leki mi, ben taki: Wi moesoe gi jesi na Gado moro leki na libisma.” — Eusebius, Boekoe 5, kapitel 24.

A piki disi no ben plisi Victor. Wan historiaboekoe e taki dati a „ben jagi ala den kerki foe Asia komoto na en kerki, èn a ben seni en brifi go na ala den kerki di ben prakseri a srefi leki en, taki den no moesoe abi demakandra nanga den.” Ma, „na asranti sani di a ben doe sondro foe prakseri na fesi, no ben de wan boen sani na den koni èn serjoesoe man foe en eigi groepoe, èn difrenti foe den man disi ben skrifi en nanga krasi wortoe, èn den ben gi en a rai . . . foe tan horidoro na lobi, de ini wánfasi, èn vrede.” — Antiquities of the Christian Church foe Bingham, Boekoe 20, kapitel 5.

Denwan di no abi bribi, e seti densrefi

Ala di den man ben opo taki wan sani ini na afersi disi, den kresten ini Pikin Asia moro nanga moro ben kon tanapoe den wawan ini a tori foe oten na Avondmaal foe Masra moesoe hori. Na tra presi safrisafri den ben teki difrenti fasi foe hori a fesa. Sonwan ben hori a fesa a heri pisi ten foe 14 Nisan te go miti a tra sonde. Trawan ben hori na okasi disi moro tron — ala sonde.

Ini 314 Gewoon Teri a Konmakandra foe Arles (Fransikondre) ben proeberi foe dwengi foe sma hori sani di Rome ben seti èn a ben poti ala tra fasi di kan, na ondro. A fikapisi foe den Kwartodecenniasma ben weigri foe doe sani a srefi fasi fa den trawan ben seti den. Ini 325 Gewoon Teri, a heiden kèiser Constantijn ben kari wan konmakandra gi a skin foe kerki na heri grontapoe, a Konmakandra foe Nicea, foe seti den sani disi èn tra afersi di ben tjari prati kon na mindri denwan di ben taki krinkrin taki den na kresten ini en grontapoe tirimakti. A Konmakandra foe Nicea ben tjari wan wet foe a tiriman foe Rome kon na doro, di ben komanderi ala sma ini Pikin Asia foe agri nanga a gwenti foe Rome.

A de wan moi sani foe go loekoe wan foe den prenspari reide, di ben tjari kon na fesi foe no hori a Memrefesa foe Krestes en dede, di e kroederi nanga a dei foe a djoe kalender. A History of the Christian Councils foe K. J. Hefele ben taki: „Den ben froeklari taki a no ben abi no wan enkri waarde gi disi, a moro santa fesa foe ala den fesa, foe waka baka a gwenti (a teri) foe den djoe, di ben doti den anoe nanga ogridoe di ogri srefisrefi èn di a froestan foe den ben kon tapoe” (Pisi 1, bladzijde 322). Foe de ini so wan posisi, ben de leki te joe e „’saka joesrefi na wan sjen fasi na ondro’ a Snoga di ben hendri den kerki tiriman”, J. Juster e taki, di den poti den wortoe foe en skrifi na ini Studia Patristica, Pisi IV, 1961, bladzijde 412.

A si di sma no man si den djoe na ai! Den ben si denwan di ben hori a Memrefesa foe Jesus en dede tapoe a srefi dei di a ben dede, leki sma foe a djoe fasi foe anbegi. Sma ben frigiti taki Jesus srefi ben de wan djoe èn taki a ben meki a dei wani taki wan sani, foe di a ben òfer en libi gi a libisma famiri. Foe sensi a ten dati, den ben kroetoe den Kwartodecenniasma leki ketter èn sma di ben prati densrefi foe kerki èn sma ben froefolgoe den. Ini 341 Gewoon Teri, a Konmakandra foe Antiokia ben bosroiti taki den ben moesoe jagi den komoto na kerki. Ma tokoe, ini 400 Gewoon Teri, foeroe foe den Kwartodecenniasma ben de ete èn langa ten baka dati den ben de ete ini pikin nomroe.

Sensi den dei dati, krestenhèit no ben man drai go baka na san Jesus ben seti biginbigin. Professor William Bright ben erken taki: „Di wan spesroetoe dei, Boen Freida, ben poti makandra nanga a memre foe a Paska, a ben de toemoesi lati foe tapoe sma foe poti a Boen Freida makandra nanga a ’paska’, di St. Paulus ben meki kon de wan makandra nanga na ofrandi dede: sondro foe loekoe sani finifini, den ben poti den na a Opobaka-fesa srefi, èn wan broeja foe prakseri ben seti ensrefi ini tongo di den Griki nanga Latijn kerki foe krestenhèit e gebroiki ini den kerki-gwenti foe den.” — The Age of the Fathers, Pisi 1, bladzijde 102.

Fa a de ini a ten disi?

’Baka ala den jari disi’, joe sa aksi kande, ’a de prenspari troetroe foe sabi oten a Memrefesa moesoe hori’? Ija, a de prenspari. Tranga-ede man, di ben feti foe kisi makti, ben tjari kenki kon. Sma ben waka baka den eigi denki, na presi foe gi jesi na Jesus Krestes. A warskow foe na apostel Paulus ben kon troe na wan krinfasi: „Mi sabi taki, baka te mi no de moro, dan krasi wolfoe sa kon na oen mindri [den kresten], di no sa handri nanga na ipi tapoe wan safrifasi, èn na oen mindri srefi, man sa opo di sa taki kron sani foe hari den disipel na den baka.” — Tori foe den Apostel 20:29, 30.

A sani di e plèi, na a afersi foe gi jesi. Jesus ben seti soso wan fesa gi kresten foe hori. Bijbel e tjari krin kon na fesi pe èn oten a moesoe foe hori. Soema, dan, abi a leti foe kenki dati? Den fositen Kwartodecenniasma ben kisi hebi froefolgoe èn den ben meki den jagi den komoto na kerki, na presi foe meki skeki ini na afersi disi.

Wan sani di kan abi joe belangstelling, na foe sabi taki kresten de ete na grontapoe, di e lespeki den winsi foe Jesus èn den e memre a Memrefesa foe en dede tapoe a dei di a ben seti. A jari disi, Jehovah Kotoigi o kon makandra ini den Kownoekondrezaal foe den na heri grontapoe, baka siksi joeroe bakadina na tapoe satra 26 maart — te a di foe 14 dei foe Nisan e bigin. Den o doe soifri san Jesus ben taki foe doe tapoe a moro prenspari ten disi di wani taki wan sani. Foe san ede joe no kon hori na Avondmaal foe Masra nanga den? Te joe de drape, joe toe kan sori taki joe e lespeki den winsi foe Jesus Krestes.

[Foetoewortoe]

[Faki na tapoe bladzijde 6]

„A FROELOESOE PAIMAN DATI, DI WARTI FOEROE”

A srakti-ofrandi foe Jesus Krestes de wan sani di de moro leki soso wan leri. Jesus ben taki foe ensrefi: „A Manpikin foe libisma srefi no ben kon foe meki sma dini en, ma foe en dini sma, èn foe a gi en libi leki wan froeloesoe paiman gi foeroe sma” (Markus 10:45). A ben tjari kon na krin toe: „Gado ben lobi a grontapoe [foe libisma] so te, taki a ben gi en wan-enkri gebore Manpikin, so taki ibriwan sma di e sori bribi ini en, no ben sa kisi pori, ma ben sa abi têgo libi” (Johanes 3:16). Gi den dedewan a srakti-ofrandi e opo a pasi foe den kisi wan opobaka èn a froewakti foe libi foe têgo. — Johanes 5:28, 29.

A dede foe Jesus Krestes, di e memre na a hori foe na Avondmaal foe Masra, de prenspari gi a libi. Na ofrandi foe en doe someni! Wan oema, di ben kisi leri foe papa nanga mama di lobi Gado, ben waka ini a waarheid foe Gado foe someni tenti jari, èn a ben sori en tangi nanga den wortoe disi:

„Wi e bigin hori a Memrefesa na prakseri. Ala jari a e tron wan moro spesroetoe sani. Mi e memre di mi ben tanapoe ini na oso pe den e kibri dedeskin, 20 jari pasa, e loekoe na a dedeskin foe mi lobi papa èn mi ben kisi wan troetroe dipi firi foe warderi gi a froeloesoe paiman. Bifo dati, a ben de soso ede sabi. Ai, mi ben sabi ala den tekst èn fa foe tjari den kon na krin! Ma soso di mi ben firi san dede wani taki troetroe, dan mi ati ben djompo troetroe foe prisiri, gi san o doe gi wi nanga jepi foe a froeloesoe paiman dati, di warti foeroe.”