Meki joe trowlibi de wan banti foe wánfasi di e tan

„Den disi, di Gado ben tjari kon makandra, no wan sma moesoe prati.” — MATEUS 19:6.

1. San na a gron foe meki trowlibi waka boen na mindri troe kresten ini a ten disi?

FOEROE doesoen nanga doesoen sma na mindri a pipel foe Jehovah ini a ten disi abi trowlibi di e gi satisfaksi èn di e tan. Ma, taki sani e waka boen na ala sei, pikinmoro noiti no de wan sani di e kon foe ensrefi. A e go boen nanga kresten trowlibi te ala toe patna (1) e respeki a fasi fa Gado e si a trowlibi èn (2) e meki moeiti foe libi akroederi den gronprakseri foe en Wortoe. Te joe loekoe en boen, dan a ben de Gado ensrefi di ben meki a seti foe a trowlibi. En na a Sma ’di ibri famiri na grontapoe e tangi en nen’ (Efeisesma 3:14, 15). Foe di Jehovah sabi san de fanowdoe foe meki a trowlibi waka boen, dan wi e kisi wini gi wisrefi te wi e waka baka a tiri foe en. — Jesaja 48:17.

2. San na den bakapisi te sma e misi foe poti bijbel gronprakseri ini den trowlibi?

² Kontrari foe dati, te sma e misi foe poti bijbel gronprakseri ini den libi, dan dati kan tjari sari kon ini a trowlibi. Son sabiman tapoe a kontren foe na afersi disi e bribi taki someni leki toe foe a di foe dri pisi foe den sma di e trow ini Amerkankondre ini a ten disi, te foe kaba sa kan brokotrow. Srefi kresten no de fri foe den broko-ede nanga kwinsi foe den „moeilek ten disi di tranga foe pasa” (2 Timoteus 3:1). A kwinsi na moni sei nanga den druk foe den wrokopresi kan wroko takroe tapoe iniwan trowlibi. Den froewakti foe son kresten no ben kon troe srefisrefi, foe di den patna foe den no ben poti bijbel gronprakseri ini den libi. „Mi lobi Jehovah”, na san wan kresten wefi e taki, „ma a trowlibi foe mi lai nanga problema so wan 20 jari kaba. A masra foe mi e prakseri ensrefi nomo èn a no wani tjari no wan kenki kon. Mi abi a firi leki mi fadon go ini wan trapoe.” Foeroe kresten masra noso wefi ben taki foe den srefi sortoe firi dati. San e go fowtoe? Èn san kan jepi taki wan trowlibi no dribi go ini wan kowroe mi-no-ke fasi noso troetroe feantifasi?

A tan di wan trowlibi moesoe tan

3, 4. (a) San na a markitiki foe Gado gi trowlibi? (b) Foe san ede a tan di wan trowlibi e tan de wan reti sani èn foe san ede a abi winimarki?

³ Srefi ini den moro boen situwâsi, trowlibi na wan banti foe wánfasi foe sma di no de volmaakti (Deuteronomium 32:5). So boen, na apostel Paulus ben taki dati „denwan di e doe dati [trow] sa ondrofeni kwinsi ini a skin foe den” (1 Korentesma 7:28). Son toemoesi aparti omstandigheid kan abi srefi wan prati noso brokotrow leki bakapisi (Mateus 19:9; 1 Korentesma 7:12-15). Ma, moro foeroe kresten e poti a rai foe Paulus ini den libi: „Wan wefi no moesoe gowe libi en masra . . . , èn wan masra no moesoe gowe libi en wefi” (1 Korentesma 7:10, 11). Foe troe, a prakseri ben de taki trowlibi ben moesoe de wan banti foe wánfasi di ben moesoe tan, bikasi Jesus Krestes ben froeklari: „Den disi, di Gado ben tjari kon makandra, no wan sma moesoe prati.” — Mateus 19:6.

⁴ Gi wan sma di abi a firi taki a fadon go ini wan trapoe foe wan trowlibi pe feantifasi de noso pe lobi no de, a markitiki foe Jehovah kan sori leki a hebi èn taki a no fiti. Ma, dati no de so. A tan di a banti ini a trowlibi moesoe tan, e poesoe wan trowpaar, di e frede Gado, foe kakafoetoe gi den problema foe den èn foe soekoe foe loesoe den, na presi foe lon libi den froeplekti foe den esi-esi na a momenti te den e si problema e kon. Wan man di ben trow moro leki 20 jari kaba ben taki en so: „Oenoe no kan wai pasi gi ten foe problema. A no ala ten oenoe o de kolokoe nanga makandra. Dati na a ten pe a froeplekti di joe abi de troetroe prenspari.” A no de foe taki, dati den kresten trowpaar e firi wan prenspari froeplekti gi Jehovah Gado, a Sma di poti a seti foe a trowlibi. — Teki gersi Preikiman 5:4.

Edeman-wroko èn a saka di wan sma moesoe saka ensrefi

5. San na wan toe rai foe Paulus gi masra nanga wefi?

⁵ Foe dati ede, te wan problema e opo ede kon, dan a no de a ten foe soekoe fa foe lon komoto gi den, ma foe soekoe wan moro boen fasi foe poti a rai foe Gado Wortoe ini wi libi. Foe eksempre, poti prakseri na tapoe den wortoe disi foe Paulus, di wi e feni ini Efeisesma 5:22-25, 28, 29: „Meki den wefi saka densrefi na ondro den masra foe den neleki na ondro Masra, bikasi wan man na a ede foe en wefi neleki fa Krestes de na ede foe a gemeente toe, en di de a froeloesoeman foe a skin disi. Te joe loekoe en boen, so leki fa a gemeente e saka ensrefi na ondro Krestes, na so den wefi moesoe doe toe na den masra foe den ini ala sani. Oen masra, oen tan lobi oen wefi neleki fa Krestes ben lobi a gemeente toe èn ben gi ensrefi abra gi en. Na a fasi disi den masra moesoe lobi den wefi foe den leki den eigi skin. A sma di lobi en wefi, lobi ensrefi, bikasi no wan man oiti no ben wani si en eigi skin na ai; ma a e sorgoe en èn e boboi en, neleki fa Krestes e doe nanga a gemeente toe.”

6. Fa kresten masra moesoe de tra fasi leki den man foe grontapoe?

⁶ Foeroe tron mansma ben gebroiki a makti foe den leki masra na wan kroektoefasi èn den ben basi den wefi foe den (Genesis 3:16). Ma, Paulus ben gi kresten masra a deki-ati foe de tra fasi leki den man foe grontapoe, foe den kresten masra moesoe de leki Krestes, no leki den man di na wan tranga fasi wani tiri den wefi foe den ini ala pikinpikin sani foe den libi. Foe troe, a man Jesus Krestes noiti ben grofoe noso ben e basi sma. A ben handri nanga den bakaman foe en nanga grani èn nanga respeki, di a ben taki: „Kon na mi, oen alamala di e wroko tranga èn di abi hebi lai èn mi sa kowroe oen ati. Teki mi tjatjari na oen tapoe èn leri foe mi, bika mi abi safrifasi èn sakafasi foe ati.” — Mateus 11:28, 29.

7. Fa wan man kan gi a wefi foe en grani te a moesoe doe grontapoe wroko?

⁷ Wan kresten masra e gi a wefi foe en grani leki wan moro swaki patoe (1 Petrus 3:7). Foe eksempre, kon wi taki dati a wefi abi foe doe grontapoe wroko. A masra sa hori disi ini prakseri, foe di a sa jepi en wefi èn a sa abi langa pasensi nanga en so fara leki a kan. Wan prenspari reide foe san ede oemasma teki a bosroiti foe brokotrow, na foe di a masra foe den no e broko en ede nanga den pikin noso nanga na oso. Foe dati ede, wan kresten masra e meki moeiti foe de wan jepi gi en wefi na oso, na wan fasi di wani taki wan sani èn di de foe a wini foe a heri osofamiri.

8. San a saka di kresten wefi moesoe saka densrefi abi na ini?

⁸ A moro makriki gi kresten wefi foe saka densrefi na ondro den masra foe den, te den masra foe den e handri den nanga grani. Ma, disi no wani taki wan froe-akti katibo. Gado ben gi a komando taki wan wefi no moesoe de wan srafoe, ma wan „patna di warti a srefi” („wan patna di e tron wan paar nanga en”, foetoewortoe), èn disi e sori tapoe wan sani di e fiti a man (Genesis 2:18). Na Maleaki 2:14, den e taki foe wan wefi leki a „patna” foe wan man. Na so fasi, den wefi ini bijbel ten ben abi foeroe fri foe denki èn handri. Foe a „bekwaam wefi” bijbel e taki: „Na ini en na ati foe en eiginari ben froetrow.” Foe troe, a ben kisi foe doe den sortoe afersi leki a loekoe taki ala sani ini en oso ben waka boen, loekoe a bai foe njanjan, de mindriman foe bai noso seri gron noso oso èn drai wan pikin bisnis. — Odo 31:10-31.

9. (a) Fa oema di ben frede Gado ini bijbel ten ben sori troe sakafasi? (b) San kan jepi wan kresten wefi foe tan saka ensrefi ini a ten disi?

⁹ Tokoe, a wefi di ben e frede Gado ben e erken a makti foe en masra. Foe eksempre, Sara „ben gwenti foe gi jesi na Abraham, ala di a ben kari en ’masra’”, no leki wan fasi foe sori boen maniri nomo, ma leki wan opregti fasi foe sori a saka di a ben e saka ensrefi na ondro en masra (1 Petrus 3:6; Genesis 18:12). A ben sori toe taki a ben de klariklari foe libi en oso nanga ala sani na ini, ini a foto Ur na baka, foe go libi na ini tenti nanga en masra (Hebrewsma 11:8, 9). Ma a saka di wan wefi ben moesoe saka ensrefi, no ben wani taki dati a no ben kan handri na wan frantiwortoefasi te dati ben de fanowdoe. Di Moses ben misi foe gi jesi na a wet foe Gado ini a tori foe besnijdenis, dan en wefi, Zipora, ben meki rampoe no miti den, foe di a handri na wan fasti fasi, sondro foe frede (Exodus 4:24-26). A abi foe doe nanga moro sani leki foe plisi wan man di no de volmaakti. Den wefi moesoe „saka densrefi na ondro den masra foe den neleki na ondro Masra” (Efeisesma 5:22). Te wan kresten wefi e denki akroederi en matifasi nanga Gado, dan disi e jepi en foe loekoe pasa den pikinpikin swakifasi nanga fowtoe ini a masra foe en, so leki fa a masra srefi moesoe doe ini a fasi fa a e handri nanga en.

Komunikâsi — Libibroedoe foe wan trowlibi

10. O prenspari komunikâsi de gi wan trowlibi?

¹⁰ Di den ben aksi wan afkati tapoe a kontren foe brokotrow san ben de a wan-enkri moro bigi reide foe san ede den trowpaar e prati nanga makandra, dan a ben piki: „A man di den no man taki eerlijk nanga makandra, tjari san de na tapoe den ati kon na doro èn handri nanga makandra leki nanga wan moro boen mati foe den.” Ija, komunikâsi na a libibroedoe foe wan tranga trowlibi. So leki fa bijbel e taki, dan „plan no sa waka boen pe wan froetrow takimakandra no de” (Odo 15:22). Den masra nanga wefi moesoe de ’froetrow mati’, di e njanboen foe wan lobi, krosibei matifasi (Odo 2:17). Tokoe, foeroe trowpaar e feni en wan moeilek sani foe abi komunikâsi èn na so wan fasi a e meki a mandi di den e mandi gro nomo, te leki wan bigi atibron broko kon na doro. Noso den trowpatna kan kibri baka wan doin skèin foe boen maniri, ala di na a sei foe den firi den e dribi komoto foe makandra.

11. Fa komunikâsi na mindri masra nanga wefi kan kon moro boen?

¹¹ A sori leki wan pisi foe a problema de, taki mansma nanga oemasma foeroe tron abi difrenti fasi foe abi komunikâsi. A sori leki moro foeroe oemasma e firi switi te den e taki foe den firi foe den, ala di na a tra sei a sori leki mansma wani moro foeroe foe taki foe troe tori. Oemasma lobi moro foeroe foe sori taki den e firi nanga sma èn e gi tranga na emotioneel sei, ala di mansma lobi foe soekoe èn pristeri loesoe foe den afersi. Tokoe, a mogelijkheid foe boen komunikâsi de te ala toe patna abi a fasti bosroiti foe de „esi foe jere, no esi foe taki, no esi foe kisi atibron” (Jakobus 1:19). Loekoe makandra na ini oen ai èn poti prakseri troetroe. Meki taki oenoe e taki fri nanga makandra nanga jepi foe aksi di e sori taki oenoe e firi gi makandra. (Teki gersi 1 Samuèl 1:8; Odo 20:5.) Na presi foe gi wan esi-esi loesoe te joe patna e tjari wan problema kon na fesi, arki heri boen, ala di joe e meki moeiti foe loesoe den afersi. Èn begi na wan sakafasi makandra, ala di oenoe e soekoe tiri foe Gado. — Psalm 65:2; Romesma 12:12.

12. Fa kresten trowpatna kan bai ten gi makandra?

¹² A e sori taki son tron den broko-ede nanga kwinsi foe libi e meki taki trowpatna no abi foeroe ten noso krakti abra foe man abi takimakandra di wani taki wan sani. Ma, efoe kresten wani foe meki a trowlibi foe den de krin èn den wani kibri en foe de sondro flaka, dan den moesoe tan krosibei foe makandra. Den moesoe handri nanga a banti foe wánfasi foe den leki wan sani di warti foeroe, di diri èn den moesoe bai ten gi en èn gi makandra. (Teki gersi Kolosesma 4:5.) Ini son kefal a loesoe foe feni ten foe abi wan boen takimakandra kan de nètso makriki leki a kiri foe a TV. Sidon dringi wan kopi kofi noso te nanga makandra, kan jepi trowpatna foe tan abi komunikâsi èn taki foe den firi foe den. Na den sortoe okasi dati, den kan ’poti mofo makandra’ foe difrenti famiri afersi (Odo 13:10). Èn fa a de wan koni sani foe kweki a gwenti foe taki foe pikinpikin sani di e froeferi wan sma èn foe aboisi di meki bifo den tron bigi fonten foe druk! — Teki gersi Mateus 5:23, 24; Efeisesma 4:26.

13. (a) Sortoe eksempre Jesus ben gi ini krin-atifasi nanga eerlijkfasi? (b) San na wan toe fasi fa den trowpatna kan kon moro krosibei na makandra?

¹³ Wan man ben èrken taki: „Nofo tron a hebi gi mi foe taki troetroe san de na tapoe mi ati èn taigi [a wefi foe mi] fa mi e firi troetroe.” Ma, a taki di wan sma kan taki foe san de tapoe en ati na wan frifasi, na wan prenspari sroto foe kweki wan krosibei matifasi nanga makandra. Loekoe o krin-ati èn eerlijk Jesus ben de nanga den sma di ben o tron memre foe en trow-oema groepoe. A ben taki: „Mi no e kari oenoe srafoe moro langa, bikasi wan srafoe no sabi san en basi e doe. Ma mi kari oenoe mati, bikasi ala den sani di mi jere foe mi Tata, mi meki oenoe kon sabi den” (Johanes 15:15). So boen, teki joe trowpatna leki wan mati. Froetrow joe patna nanga den firi foe joe. Meki moeiti foe taki makriki, eerlijk „switi lobi wortoe” (Heisingi foe Salomo 1:2). Son tron a kan sori taki krin-ati komunikâsi no makriki, ma te ala toe trowpatna e doe nofo moeiti, dan foeroe sa kan doe foe meki a trowlibi foe den tron wan banti foe wánfasi di e tan.

A handri foe kesekese

14, 15. Fa oenoe kan wai pasi gi trobi?

¹⁴ Troe kesekese sa opo kon seiker wanwantron so. Ma na oso foe joe no moesoe kon tron wan ’oso di foeroe nanga trobi’ (Odo 17:1). Loekoe boen foe no taki foe afersi di abi foe doe nanga dipi ati firi te den pikin sa kan jere dati èn sori taki joe e hori den firi foe joe patna na prakseri. Di Rakèl ben taki foe a broko-ede foe en foe a kisi di a no ben man kisi pikin èn ben aksi Jakob foe gi en pikin, dan Jakob ben piki nanga atibron: „Mi de na ini a presi foe Gado, di hori a froktoe foe joe bere?” (Genesis 30:1, 2) Te osofamiri problema e kon, feti nanga a problema, no feti nanga a sma. Te oenoe abi wan takimakandra na mindri oenoe toe wawan, loekoe boen foe oenoe „no taki sondro foe prakseri” noso foe koti den wortoe foe makandra foe soso. — Odo 12:18.

¹⁵ A troe, taki joe kan abi tranga firi foe a fasi fa joe e si sani, ma joe kan taki foe den sondro „takroe bitafasi nanga mandi nanga atibron nanga babari nanga skempifasi foe taki” (Efeisesma 4:31). „Taki makandra foe den problema foe oenoe na wan gewoon fasi foe taki”, na dati wan masra ben taki. „Efoe wán foe oenoe bigin opo en sten, dan tapoe a takimakandra. Kon baka, baka wan sjatoe pisi ten. Bigin agen.” Odo 17:14 e gi a boen rai disi: „Bifo a trobi broko kon na doro, gowe.” Proeberi foe taki makandra foe afersi agen te ala toe foe oenoe kon kowroe.

Tan getrow na makandra

16. Foe san ede soetadoe na so wan serjoesoe afersi?

¹⁶ Hebrewsma 13:4 e froeklari: „A trowlibi moesoe de krin na mindri ala sma èn a trowbedi sondro flaka, bikasi Gado sa kroetoe hoeroeman nanga soetaman.” Soetadoe na wan sondoe kontrari Gado. A e pori wan trowlibi toe (Genesis 39:9). Wan oema raiman foe trowlibi e skrifi: „Baka te a kon na krin, dan soetadoe e naki wan heri osofamiri leki wan tranga winti, e pori na osofamiri, e broko ala froetrow nanga a respeki di sma abi gi densrefi, e doe ogri na den jongoewan.” A hori di sma kan hori bere noso wan siki di wan sma kan kisi abra foe seks ede, kan de a bakapisi toe.

17. Fa wi kan wai pasi gi den firi foe doe soetadoe noso fa wi kan trowe den?

¹⁷ Son sma e kweki firi foe doe soetadoe foe di den e teki na ini den a kroektoe fasi fa grontapoe e si seks so leki fa boekoe, telefisi nanga film e sori en (Galasiasma 6:8). Ma, sma di e ondrosoekoe sani e taki, dati soetadoe de nofo tron a bakapisi, no foe wan lostoe foe abi seks nomo, ma foe wan so kari fanowdoe di a sma e firi foe boeweisi taki a sma e hari sma prakseri ete nanga en skin noso foe wan lostoe foe wani kisi moro lobi. (Teki gersi Odo 7:18.) Awansi san na a gron foe disi, wan kresten moesoe trowe hoeroedoe dren. Taki foe den firi foe joe nanga joe patna na wan eerlijkfasi. Efoe a de fanowdoe, soekoe jepi na gemeente owroeman. Te joe e doe so, dan dati sa kan jepi joe foe no fadon go ini sondoe. Moro ete, kresten moesoe loekoe boen fa den e tjari densrefi te den abi foe doe nanga sma foe a tra geslagti. A ben sa de kontrari den bijbel gronprakseri foe trow nanga wan sma èn e loekoe wan trawan nanga gridi seks lostoe (Job 31:1; Mateus 5:28). Kresten moesoe loekoe boen, spesroetoe foe den no kweki wan krosibei demakandra nanga kompe-wrokoman. Meki den sortoe matifasi disi de opregti nanga switifasi, ma soso foe doe bisnis nanga den.

18. San nofo tron na a roetoe foe seks problema ini wan trowlibi, èn fa wi kan loesoe disi?

¹⁸ Wan moro bigi kibri gi joe na wan lobi, krin-ati matifasi nanga joe eigi trowpatna. Foeroe sma di e ondrosoekoe sani e taki dati seks problema ini trowlibi pikinso nomo e kon foe problema na skin sei, ma moro foeroe den de problema di e kon foe di a komunikâsi pôti. Den problema ini a lin disi de pikinso nomo te wan trowpaar abi krin-ati komunikâsi èn den e doe den trowplekti leki wan fasi foe sori lobi, na presi foe si en leki wan plekti.a Na ondro den sortoe joisti situwâsi dati, krosibei seks libimakandra kan jepi foe tranga a banti ini a trowlibi. — 1 Korentesma 7:2-5; 10:24.

19. San na „wan volmaakti banti foe wánfasi” èn sortoe krakti a kan abi tapoe wan trowlibi?

¹⁹ Na lobi na „wan volmaakti banti foe wánfasi” na ini a kresten gemeente. Te den e kweki lobi, dan den trowpaar, di e gi densrefi na a dini foe Gado, man ’tan froedrage makandra èn gi makandra pardon na wan frifasi’ (Kolosesma 3:13, 14). Lobi, di gron tapoe den gronprakseri ini a Wortoe foe Gado, e soekoe a boen foe trawan (1 Korentesma 13:4-8). Kweki a sortoe lobi dati. A sa jepi joe foe tranga a banti ini a trowlibi foe oenoe. Poti bijbel gronprakseri ini oenoe trowlibi. Efoe oenoe e doe dati, dan a trowlibi foe oenoe sa sori taki a de wan banti foe wánfasi di e tan èn a sa tjari prèise nanga grani gi Jehovah Gado kon.

[Foetoewortoe]

Fa joe ben sa piki?

◻ Foe san ede trowlibi moesoe de wan banti foe wánfasi di moesoe tan?

◻ San na a fasi fa bijbel e si na edeman-wroko èn a saka di wan sma e saka ensrefi?

◻ Fa den trowpaar kan meki komunikâsi kon moro boen?

◻ Fa den trowpaar kan handri kesekese tapoe wan krestenfasi?

◻ San sa jepi foe tranga a banti ini a trowlibi?

[Prenki na tapoe bladzijde 24]

Efoe a wefi foe wan kresten masra abi foe doe grontapoe wroko, dan a masra no sa gi pasi taki a wefi kisi toemoesi foeroe foe doe