Saka wisrefi nanga prisiri na ondro tirimakti
„Oenoe gi jesi now nanga oen heri ati.” — ROMESMA 6:17.
1, 2. (a) Sortoe jeje de krin foe si ini grontapoe ini a ten disi, èn san na a fonten foe en nanga a bakapisi foe dati? (b) Fa den foetoeboi foe Jehovah di gi densrefi abra na en, e sori taki den de tra fasi?
„A JEJE di e wroko now ini den manpikin foe trangajesi” de krin foe si na wan fasi di e seki sma ini a ten disi. A de wan jeje foe srefidensi, di no skotoe, di komoto kon foe Satan, „a tiriman foe a tirimakti foe a loktoe”. A jeje disi, a „loktoe” disi, noso a fasi di sma abi moro foeroe, foe denki den eigi boen nomo èn foe no gi jesi, abi „makti” noso krakti na tapoe a moro bigi pisi foe a libisma famiri. Disi na wán reide foe san ede a sani di den ben kari wan bigi problema foe makti, e pasa na grontapoe. — Efeisesma 2:2.
2 Na wan kolokoe, taki den foetoeboi foe Jehovah di gi densrefi abra na en, no e foeroe den jeje fokofoko foe den, nanga a „loktoe” disi di doti noso nanga a jeje foe opo densrefi kontrari makti. Den sabi taki „na atibron foe Gado e kon na tapoe den manpikin foe trangajesi”. Na apostel Paulus e taki moro fara: „Foe dati ede oenoe no moesoe teki prati ini den sani foe den” (Efeisesma 5:6, 7). Na presi foe dati, troe kresten e doe moeiti foe de „foeroe nanga a jeje foe [Jehovah]”, èn den e dringi „a koni foe tapoesei”, di „soifri, èn di lobi vrede, di de reidelek, klariklari foe gi jesi”. — Efeisesma 5:17, 18; Jakobus 3:17.
Saka wisrefi nanga wi heri ati na ondro a soevereinfasi foe Jehovah
3. San na a sroto foe saka wisrefi nanga wi heri ati na ondro trawan, èn sortoe bigi lès a historia e leri wi?
3 A sroto foe saka wisrefi nanga wi heri ati na ondro trawan, na foe erken tirimakti di abi a reti foe tiri. A historia foe a libisma famiri e sori, taki a weigri di sma e weigri foe erken a soevereinfasi foe Jehovah, no e tjari kolokoe kon. A weigri di Adam nanga Eva ben weigri foe erken a soevereinfasi dati, no ben tjari kolokoe kon gi den, so srefi gi Satan Didibri, a sma di ben meki den opo densrefi kontrari Jehovah (Genesis 3:16-19). Satan abi „bigi atibron”, ala di a de now ini a situwâsi di e go na baka, foe di a sabi taki a ten foe en sjatoe (Openbaring 12:12). A vrede nanga a kolokoe foe a libisma famiri, ija, foe a heri universum, e anga foe na erken di a heri libisma famiri e erken a regtfardiki soevereinfasi foe Jehovah. — Psalm 103:19-22.
4. (a) Na sortoe fasi Jehovah wani taki den foetoeboi foe en moesoe saka densrefi na ondro en èn moesoe gi jesi na en? (b) Foe sortoe sani wi moesoe abi na overtoigi, èn fa a psalm singiman e taki foe disi?
4 Tokoe, bika foe den toemoesi moi eigifasi foe Jehovah di de ini balansi, a no abi satisfaksi nanga a gi di wan sma e gi jesi na en, sondro foe wan waran firi foe faja e poesoe a sma. Troetroe, Jehovah abi makti! Ma En a no sma di e tiri na tapoe trawan na wan ogri èn bita-atifasi. En na wan Gado foe lobi, èn a wani foe den mekisani foe en di abi froestan, gi jesi na en nanga den heri ati, foe di den lobi en. A wani foe den saka densrefi na ondro a soevereinfasi foe en, foe di nanga den heri ati den e bosroiti foe poti densrefi ondro a regtfardiki èn reti tirimakti foe en, bika den abi na overtoigi taki no wan sani ben kan de moro boen gi den, leki foe gi jesi na en foe têgo. A sortoe sma di Jehovah wani foe de ini na universum foe En, abi a srefi firi foe a psalm singiman di ben skrifi: „A wet foe Jehovah de volmaakti, a e kowroe a sili. A froemane foe Jehovah de foe froetrow, a e meki denwan di no abi ondrofeni kon koni. Den gebod di komoto na Jehovah de reti, den e meki na ati e prisiri; den komando foe Jehovah krin, den e meki den ai e skèin. A frede gi Jehovah soifri, a e tanapoe foe têgo. Den kroetoe bosroiti foe Jehovah troe; makandra den ben boeweisi foe de regtfardiki” (Psalm 19:7-9). Wan tranga froetrow ini a retifasi nanga a regtfardikifasi foe Jehovah en soevereinfasi — disi moesoe de a fasi fa wi e firi, efoe wi wani libi ini a njoen grontapoe foe Jehovah.
Saka wisrefi nanga prisiri na ondro wi Kownoe
5. Sortoe pai Jesus ben kisi foe di a ben gi jesi, èn san wi e erken nanga wi heri ati?
5 Krestes Jesus ensrefi na wan heri boen eksempre ini a saka di a saka ensrefi na ondro en hemel Tata. Wi e leisi, taki „a ben saka ensrefi èn ben gi jesi te na dede, ija, wan dede na wan pina-oedoe”. Paulus e taki moro fara: „Foe a sani disi ede meki Gado ben poti en na ini wan moro hei posisi toe èn na wan boen-atifasi a ben gi en a nen di hei moro ibri tra nen, so taki na ini a nen foe Jesus ibri kindi ben sa boigi, foe den di de na hemel èn foe den di de na grontapoe èn foe den na ondro gron, èn ibri tongo ben moesoe erken na poebliki, taki Jesus Krestes na Masra gi a glori foe Gado a Tata” (Filipisma 2:8-11). Ija, nanga prisiri wi e boigi wi kindi na fesi foe Krestes Jesus, wi Fesiman èn Kownoe di e tiri. — Mateus 23:10.
6. Fa Jesus ben boeweisi foe de wan kotoigi nanga wan fesiman gi den nationaal groepoe, èn fa a „kownoe tirimakti” foe en sa go doro baka a bigi banawtoe?
6 Foe Krestes leki wi Fesiman, Jehovah ben taki na fesi: „Loekoe! Leki wan kotoigi gi den nationaal groepoe mi ben poti en, leki wan fesiman nanga wan komanderiman gi den nationaal groepoe” (Jesaja 55:4). Jesus ben sori taki ensrefi na a „getrow èn troe kotoigi” foe en Tata gi den pipel foe ala nâsi, nanga jepi foe a diniwroko foe en na grontapoe èn nanga jepi foe a tiri di a ben tiri a preikiwroko ala di a ben de na hemel, baka a dede nanga na opobaka foe en (Openbaring 3:14; Mateus 28:18-20). Den sortoe nationaal groepoe disi, di a nomroe foe den e gro moro nanga moro, de ini a „bigi ipi” di sa pasa a „bigi banawtoe” libilibi na ondro Krestes leki fesiman (Openbaring 7:9, 14). Ma a fesiman-wroko foe Jesus no e kaba drape. A „kownoe tirimakti” foe en sa tan wan doesoen jari langa. Gi libisma di e gi jesi, a sa handri ini akroederi nanga a nen foe en leki „Wondroe Raiman, Tranga Gado, Têgo Tata, Kownoe foe vrede”. — Jesaja 9:6, 7; Openbaring 20:6.
7. San wi moesoe doe sondro draidrai, efoe wi wani meki Krestes e tjari wi go na den „fonten foe watra foe libi”, èn sortoe sani sa meki taki Jesus nanga Jehovah lobi wi?
7 Efoe wi wani abi wini foe den „fonten foe watra foe libi” pe a Pikin Skapoe, Krestes Jesus, e tjari den reti-ati libisma go, dan sondro draidrai wi moesoe boeweisi nanga a fasi fa wi e handri, taki wi e saka wisrefi nanga prisiri na ondro en makti leki Kownoe. (Openbaring 7:17; 22:1, 2; teki gersi Psalm 2:12.) Jesus ben froeklari: „Efoe oenoe lobi mi, dan oenoe sa hori den komando foe mi. A sma di abi den komando foe mi èn e hori den, a sma dati na a wan di lobi mi. Èn a sma di lobi mi, mi Tata sa lobi en toe, èn mi sa lobi en” (Johanes 14:15, 21). Joe wani meki Jesus nanga en Tata lobi joe? Saka joesrefi dan na ondro a tirimakti foe den.
Den opziener e gi jesi nanga prisiri
8, 9. (a) Sortoe sani Krestes ben gi foe bow a gemeente, èn na sortoe fasi den man disi moesoe de leki eksempre gi na ipi? (b) Fa den e agersi, ini a boekoe Openbaring, a saka di den kresten opziener moesoe saka densrefi, èn fa den moesoe soekoe wan „ati di e gi jesi” te den e handri kroetoe-afersi?
8 „A gemeente saka ensrefi na ondro a Krestes.” Leki na opziener foe a gemeente, Jesus ben gi „presenti ini man” foe „bow” a gemeente (Efeisesma 4:8, 11, 12; 5:24). Den ben taigi den man disi di owroe na jeje fasi, foe ’wei na ipi foe Gado di de na den sorgoe’, no „e basi denwan di de a goedoe foe Gado, ma leki eksempre gi na ipi” (1 Petrus 5:1-3). Na ipi na foe Jehovah, èn Krestes na a „boen skapoeman” foe den (Johanes 10:14). Foe di a boen, taki den opziener e froewakti taki den skapoe di Jehovah nanga Krestes ben poti na den sorgoe sa wroko nanga den heri ati makandra nanga den, meki densrefi moesoe de boen eksempre leki sma di e saka densrefi na ondro trawan. — Tori foe den Apostel 20:28.
9 Ini a fosi jarihondro, den ben prenki den salfoe owroeman na wan agersifasi, leki den ben de „na ini” noso „na tapoe” a reti-anoe foe Krestes, di e sori a saka di den e saka densrefi na ondro en leki na Edeman foe a gemeente (Openbaring 1:16, 20; 2:1). So a de toe ini a ten disi, taki den opziener ini den gemeente foe Jehovah Kotoigi moesoe saka densrefi na ondro a tiri foe Krestes èn den moesoe ’saka densrefi na ondro a makti anoe foe Gado’ (1 Petrus 5:6). Te a de fanowdoe taki den e kroetoe afersi, dan neleki Salomo ini den jari di a ben de getrow, den moesoe begi Jehovah: „Joe moesoe gi joe foetoeboi wan ati di e gi jesi, foe kroetoe a pipel foe joe, foe abi a koni foe si boen nanga ogri” (1 Kownoe 3:9). Wan ati di e gi jesi sa boeweigi wan owroeman foe proeberi foe si sani neleki fa Jehovah nanga Krestes Jesus e si den, so taki a bosroiti di den e teki na grontapoe de someni leki a kan a srefi leki a bosroiti di teki na hemel. — Mateus 18:18-20.
10. Fa ala opziener moesoe doe moeiti foe waka baka Jesus ini a fasi fa a ben handri nanga den skapoe?
10 Opziener di e rèis, nanga gemeente owroeman sa doe moeiti toe foe waka baka Krestes ini a fasi fa a ben handri nanga den skapoe. Tra fasi leki den Fariseiman, Jesus no ben poti wan lo lin di ben moeilek foe sma waka na den baka (Mateus 23:2-11). A ben taigi denwan di joe kan teki gersi nanga skapoe: „Kon na mi, oenoe alamala di e wroko tranga èn di abi hebi lai na oen tapoe, èn mi sa kowroe oen ati. Teki mi tjatjari na oen tapoe èn leri foe mi, bika mi abi safrifasi èn sakafasi foe ati, èn oenoe sa feni kowroe-ati gi oen sili. Bika mi tjatjari safoe èn mi lai lekti” (Mateus 11:28-30). Ala di a troe taki ibri kresten moesoe „tjari en eigi lai”, tokoe den opziener moesoe hori na eksempre foe Jesus na prakseri, èn den moesoe jepi den brada foe den foe firi taki a lai foe kresten frantiwortoe di den abi, de „safoe”, a de „lekti”, èn a de wan prisiri foe tjari en. — Galasiasma 6:5.
Saka wisrefi na wan theokrasia fasi
11. (a) Fa wan sma kan respeki edeman-wroko, ma tokoe no e handri troetroe na wan theokrasia fasi? Gi eksempre. (b) San a wani taki foe handri troetroe na wan theokrasia fasi?
11 Theokrasia na a tiri foe Gado. A abi foe doe nanga a gronprakseri foe na edeman-wroko, di den e taki foe dati ini 1 Korentesma 11:3. Ma a wani taki moro leki dati. A kan gersi taki wan sma e sori respeki gi na edeman-wroko, ma tokoe a no e handri na wan theokrasia fasi so leki fa a wortoe srefi e taki. Fa disi kan? Foe eksempre, demokrasia na a tiri foe a pipel, èn den e taki foe wan demokrasiasma leki „wan sma di e bribi ini den marki foe demokrasia”. Wan man kan taki dati a e handri na wan demokrasia fasi, noso e teki prati ini verkiezing, èn srefi taki a de wan aktief politiekman. Ma efoe ini na aladei fasi fa a e tjari ensrefi, a no e respeki a jeje foe demokrasia nanga ala den gronprakseri di abi foe doe nanga dati, sma kan taki dan dati a e handri troetroe na wan demokrasia fasi? So a de toe taki, efoe wan sma e handri troetroe na wan theokrasia fasi, dan a moesoe doe moro leki foe saka ensrefi nomo na ondro edeman-wroko na wan gewoon fasi. A moesoe handri neleki fa den fasi foe Jehovah nanga den eigifasi foe en de. Jehovah moesoe tiri en troetroe na ala fasi. Èn foe di Jehovah ben gi en Manpikin ala makti, meki foe handri na wan theokrasia fasi wani taki toe foe waka soifri na Jesus baka.
12, 13. (a) San a wani taki spesroetoe toe foe handri na wan theokrasia fasi? (b) A de so taki a saka di wi e saka wisrefi na wan theokrasia fasi wani taki foe gi jesi na wan lo lin? Gi eksempre.
12 Memre taki, Jehovah wani, taki lobi moesoe poesoe sma foe saka densrefi na en ondro nanga den heri ati. Dati na a fasi fa a e tiri na universum. En na lobi ini persoon (1 Johanes 4:8). Krestes Jesus na „a skèin di a glori foe en e skèin èn a soifri prenki foe a fasi fa a de” (Hebrewsma 1:3). A wani, taki den troe disipel foe en moesoe lobi makandra (Johanes 15:17). So boen, foe handri na wan theokrasia fasi no wani taki wawan foe saka joesrefi na ondro trawan, ma foe abi lobi toe. Wi kan taki sjatoe foe na afersi na a fasi disi: Theokrasia na a tiri foe Gado; Gado na lobi; foe dati ede theokrasia na a tiri di wan sma e tiri nanga lobi.
13 Wan owroeman ben sa kan prakseri taki, foe handri na wan theokrasia fasi, dan den brada moesoe gi jesi na ala den difrenti lin. Wan toe owroeman ben meki lin foe rai di a „getrow èn koni srafoe” e gi sontron (Mateus 24:45). Foe eksempre, wan leisi a rai ben gi taki, foe kon sabi den brada ini a gemeente moro makriki, dan a ben sa boen foe no go sidon ala leisi na a srefi presi ini a Kownoekondrezaal. Disi ben de wan praktis rai, a no ben de wan lin di wi moesoe foe gi jesi na en nomonomo. Ma wan toe owroeman kan abi a firi foe kenki dati na ini wan lin èn taki denwan di no e hori densrefi na dati, no e handri na wan theokrasia fasi. Tokoe, foeroe boen reide kan de foe san ede wan brada noso wan sisa kan froekisi foe sidon na wan spesroetoe presi. Efoe wan owroeman no e hori den sortoe sani disi na prakseri na wan lobi fasi, dan ensrefi e handri troetroe na wan theokrasia fasi? Foe handri na wan theokrasia fasi, dan „meki ala den afersi foe oenoe feni presi na wan lobi fasi”. — 1 Korentesma 16:14.
Dini nanga prisiri
14, 15. (a) Fa wan owroeman ben sa kan poeroe a prisiri di son brada noso sisa abi ini a diniwroko foe Jehovah, èn foe san ede disi no de wan theokrasia fasi foe handri? (b) Fa Jesus ben sori taki, na presi foe a e warderi omeni wi e doe, a e warderi a lobi di de foe si ini a diniwroko foe wi? (c) Sortoe sani den owroeman moesoe hori na prakseri?
14 Foe handri na wan theokrasia fasi wani taki toe foe dini Jehovah nanga prisiri. Jehovah na „a kolokoe Gado” (1 Timoteus 1:11). A wani dati den anbegiman foe en dini en nanga prisiri. Denwan di e hori densrefi tranga na lin, moesoe hori na prakseri, taki na mindri foe den reglementi di Israèl ben moesoe „hori densrefi soifri” na dati, disi ben de toe: „Oenoe moesoe prisiri na fesi foe Jehovah, oen Gado, ini ala sani di oenoe e doe” (Deuteronomium 12:1, 18). Awinsi san wi e doe na ini a diniwroko foe Jehovah, a moesoe de wan prisiri, a no moesoe de wan hebi. Den opziener kan doe foeroe foe meki den brada firi prisiri ini san den man doe ini a diniwroko foe Jehovah. Na a tra sei, efoe owroeman no e loekoe boen, dan den kan poeroe a prisiri foe wan toe foe den brada. Foe eksempre, efoe den e teki a wan gersi nanga a trawan, èn den e prèise denwan di ben doro a gemiddelde foe a joeroe di a gemeente ben preiki noso ben pasa dati, èn sondro foe den e taki dati krinkrin den e kroetoe denwan di no ben doro dati, dan fa denwan sa firi di kande ben abi wan boen reide foe san ede den skrifi moro mendri ten tapoe a raport? A sani disi no ben sa kan meki, taki sondro taki a de fanowdoe, den e firi taki den ben doe fowtoe èn ben sa kan e poeroe a prisiri foe den?
15 Den pikinso joeroe di son sma kan gi na a gi foe kotoigi na poebliki, kan sori taki a moeiti di den ben doe, de moro foeroe leki den foeroe joeroe di trawan ben preiki, te joe hori na prakseri taki den trawan moro jongoe, den abi wan moro boen gosontoe, nanga tra situwâsi. Ini a tori disi, den owroeman no mag kroetoe den. Ija, a Tata ben gi Jesus „makti foe kroetoe” (Johanes 5:27). Jesus ben kroetoe a pôti weduwe, foe di a weduwe ben gi moro mendri leki a gemiddelde foe den trawan? Nôno, a ben firi heri boen sortoe waarde den toe pikin pisi moni disi ben abi gi en. Den ben de „ala san a ben abi, ala san a ben abi fanowdoe foe tan na libi”. Foe troe, den ben prenki wan dipi lobi gi Jehovah! (Markus 12:41-44) A de so taki den owroeman moesoe abi moro mendri firi gi den moeiti di doe nanga lobi, foe denwan di ala san den man doe, de moro mendri leki a „gemiddelde” ini aantal? Te joe e prakseri a lobi di den abi gi Jehovah, dan kande den sortoe moeiti disi de moro foeroe leki a gemiddelde!
16. (a) Foe san ede den opziener moesoe abi a koni foe man si sani krin èn moesoe de ini balansi, te den e gebroiki nomroe ini den lezing foe den? (b) Na sortoe fasi den brada kan kisi moro boen jepi foe doe moro ini a diniwroko foe den?
16 Den sani disi di ben taki, moesoe kon tron wan tra „lin” now, taki noiti wi moesoe taki foe nomroe — srefi foe gemiddelde? Kwetikweti! A wani taki dati opziener moesoe hori a balansi na mindri a gi di den e gi den brada deki-ati foe doe moro ini a diniwroko èn a jepi di den e jepi den foe doe san den man nanga prisiri (Galasiasma 6:4). Ini Jesus en agersitori foe den talenti, a masra ben gi den goedoe foe en na den srafoe foe en „ibriwan akroederi en eigi koni” (Mateus 25:14, 15). So srefi, owroeman moesoe hori na prakseri san ibri Kownoekondre preikiman man doe. Disi e aksi taki den moesoe abi a koni foe man si sani krin. A kan de so troetroe taki sonwan abi deki-ati fanowdoe foe doe moro. A kan de so taki den e warderi en taki den e kisi jepi foe orga a wroko foe den moro boen. Awinsi fa a tori de, efoe den kan kisi jepi foe doe san den man nanga prisiri, dan kande a prisiri dati sa gi den krakti foe doe moro ini den kresten wroko foe den, pe a kan. — Nehemia 8:10; Psalm 59:16; Jeremia 20:9.
A vrede di e kon foe di wi e saka wisrefi nanga prisiri
17, 18. (a) Fa a saka di wi e saka wisrefi nanga prisiri kan tjari vrede nanga regtfardikifasi kon gi wi? (b) Sortoe sani kan de foe wi efoe wi e poti prakseri troetroe na tapoe den komando foe Gado?
17 A saka di wi e saka wisrefi nanga prisiri na ondro a reti soevereinfasi foe Jehovah, e tjari foeroe vrede kon gi wi. Ini begi a psalm singiman ben taigi Jehovah: „Denwan di lobi joe wet abi vrede pasa marki, èn sani no de gi den foe den naki foetoe fadon” (Psalm 119:165). Foe di wi e gi jesi na a wet foe Gado, meki wi e kisi wini gi wisrefi. Jehovah ben taigi Israèl: „Disi na san Jehovah ben taki, a Sma di bai joe baka, a Santawan foe Israèl: ’Mi, Jehovah, na oen Gado, a Sma di e leri oenoe foe kisi wini gi oensrefi, a Sma di e meki oenoe go na tapoe a pasi di oenoe moesoe waka. O, efoe soso oenoe ben sa poti prakseri troetroe tapoe mi komando! Dan a vrede foe oenoe ben sa tron leki wan liba, èn a regtfardikifasi foe oenoe leki den skwala foe a se.’” — Jesaja 48:17, 18.
18 A froeloesoe-ofrandi foe Krestes e tjari wi ini vrede nanga Gado (2 Korentesma 5:18, 19). Efoe wi e bribi ini a broedoe foe Jesus, di e froeloesoe sma, èn wi e doe serjoesoe moeiti foe feti nanga den swakifasi foe wi, èn wi e doe a wani foe Gado, dan wi sa feni froelekti foe den firi di wi abi taki wi fowtoe (1 Johanes 3:19-23). So wan bribi di e go makandra nanga wroko, e gi wi wan regtfardiki nen na fesi foe Jehovah èn a toemoesi moi howpoe foe pasa „a bigi banawtoe” libilibi èn foe libi foe têgo na ini a njoen grontapoe foe Jehovah (Openbaring 7:14-17; Johanes 3:36; Jakobus 2:22, 23). Ala den sani disi kan de foe wi ’efoe soso wi ben sa poti prakseri troetroe na tapoe den komando foe Gado’.
19. Foe sortoe sani a kolokoe foe wi now nanga a howpoe foe wi foe libi foe têgo e anga, èn fa David ben taki foe na overtoigi di wi abi nanga wi heri ati?
19 Ija, a kolokoe foe wi now, nanga a howpoe foe wi foe libi foe têgo na wan paradijs grontapoe, abi foeroe foe doe nanga a saka di wi e saka wisrefi nanga prisiri na ondro a makti foe Jehovah leki Soeverein Masra foe na universum. Meki a de so, taki wi abi a srefi firi di David ben abi, di a ben taki: „Foe joe, o Jehovah, na a granfasi nanga a maktifasi nanga a glori nanga a boenfasi nanga a wartifasi; bika ala sani na hemel èn na grontapoe na foe joe. Foe joe na a kownoekondre, o Jehovah, a Sma di e opo ensrefi leki edeman foe ala sani. Èn now, o wi Gado, wi e taigi joe tangi èn wi e prèise a glori nen foe joe.” — 1 Kroniki 29:11, 13.
Penti foe hori na prakseri
◻ Na sortoe fasi Jehovah wani taki den foetoeboi foe en moesoe saka densrefi na ondro en èn moesoe gi jesi na en?
◻ Sortoe pai Jesus ben kisi foe di a ben gi jesi, èn sortoe sani wi moesoe boeweisi nanga jepi foe a fasi fa wi e handri?
◻ Fa ala opziener moesoe waka baka Jesus ini a fasi fa a ben handri nanga den skapoe?
◻ San a wani taki toe foe handri na wan theokrasia fasi?
◻ Sortoe blesi a saka di wi e saka wisrefi nanga prisiri e tjari kon gi wi?
[Prenki na tapoe bladzijde 18]
Owroeman e gi na ipi deki-ati foe doe ala san den man nanga prisiri
[Prenki na tapoe bladzijde 20]
Jehovah e prisiri nanga denwan di e gi jesi na en nanga den heri ati