Saka joesrefi loyaal na ondro theokratis orde
„Loekoe! O boen èn o switi a de foe libi wánmakandra leki brada! A de leki na dow foe Hermon, di e saka tapoe den bergi foe Sion.” — Psalm 133:1, 3.
1. Fa Jehovah Wortoe e taki foe en grontapoe osofamiri foe dienstknekti di gi densrefi abra?
FA DISI e taki moi foe den sma, di — aladi den panja na a heri grontapoe — ben gi den libi abra na den ala Tata, Jehovah Gado! Èn seker a de tiri na wan toemsi boen fasi en grontapoe osofamiri disi. Na ini wan lobi fasi a de sorgoe gi ala san wi abi fanowdoe. — Ps. 145:16.
2. San a wani taki foe saka joesrefi na ondro theokratis orde?
2 Ma ete, tapoe wan krakti fasi a de tanapoe na tapoe dati en pikin di e dini en tranga hori vréde nanga wanfasi (1 Kor. 1:10). Èn den boen bakapisi disi e kon te den dienstknekti foe Gado saka densrefi na ondro theokratis orde. San disi wini taki? Foedi Gado tirimakti den e kari wan theokratsi (Wan tiri foe Gado), dan saka wisrefi na ondro theokratis orde wani taki, dati wi de gi jesi na den wet, kroetoe besroiti nanga gronprakseri di komoto foe Gado. — Jes. 33:22.
3. Fa Jezus ben tjari en firi kon na fesi tapoe na tori foe saka ensrefi na ondro Gado tiri?
3 Na moro moi eksempre foe wan sma di saka ensrefi loyaal na ondro theokratis orde, de di foe Jezus Kristus. Ini hemel a ben de „na fosigeborewan foe heri den mekisani” (Kol. 1:15). „Jehovah srefi ben meki mi leki na bigin foe en pasi, leki na moro fosi wan foe en wroko foe langa ten pasa kaba. Foe sensi ten di no abi marki a ben poti mi na wroko, foe sensi a bigin kaba, foe sensi ten bifo na grontapoe. . . . Mi ben kon tanapoe leki wan basi-wrokoman na sé en, èn mi ben tron na sma di dé foe dé spesroetoe a ben lobi, ala di alaten mi ben de nanga prisiri na en fesi” (Odo 8:22, 23, 30). Dati a ben feni prisiri foe saka ensrefi na ondro a tirimakti foe Gado, ben kon na krin, di a ben de na grontapoe, bikasi Jezus ben taki: „Mi no ben saka komoto foe hemel foe doe mi wani, ma na wani foe en di ben seni mi” (Joh. 6:38). Leki wan pisi foe a doe foe Gado wani, a ben leri soifri, no en égi prakseri, ma den prakseri foe Gado. „San mi e leri, no de foe mi ma foe en di ben seni mi kon”, Jezus ben taki (Joh. 7:16). Fa disi de wan toemsi moi fasi foe libi di ala Gado dienstknekti kan waka na en baka!
4. Ferteri fa na theokratis orde de ini na ten disi?
4 Foe di a ben saka ensrefi na ondro theokratis tiri, srefi te na dede, meki Jezus ben kisi na paiman foe libi ini hemel sondro foe dede moro. Boiti dati, a ben kisi „ala makti ini hemel èn na grontapoe” (Matt. 28:18). Foe en sé agen, a ben froetrow „ala en goedoe” na grontapoe (den grontapoe afersi foe en kownoekondre) na getrow salfoe kristen. Jezus ben kari den „wan getrow èn koni srafoe” (Matt. 24:45-47). Leki wan paiman den sa teki wan dé prati makandra nanga Kristus leki „priester” nanga „kownoe” ini na hemel tiri foe en kownoekondre (Openb. 14:1, 4; 20:6). Ini a ten disi, wan fika-pisi foe a „getrow srafoe” disi e libi ete na grontapoe. Den abi ini na wroko foe den sosrefi toe foe gi jeje njanjan, di den ben kisi na a reti ten, na ala Jehovah grontapoe dienstknekti. Den de ini na srefi posisi leki na apostel Paulus nanga en kompe-wrokoman te na apostel dati ben taki foe den wondroe waarheid di Gado e gi na en pipel: „Gi wi Gado ben tjari en kon na krin nanga jepi foe en jeje” (1 Kor. 2:9, 10). Den e teki fesi sosrefi toe ini na kownoekondre-préki, di moe doro na „heri grontapoe” bifo na kaba foe a grontapoe di e go na pori kon! — Matt. 24:14.
Den bakapisi foe wan fowtoe fasi foe libi
5, 6. (a) Sortoe bakapisi a ben abi gi Eva nanga Adam di ben wani de onafhankelijk foe Jehovah? (b) Fa Jehovah e handri nanga „tigri ini skapoe-krosi”?
5 A de wan toemsi prenspari sani gi ibriwan sma di de wan pisi foe Gado osofamiri, foe saka densrefi loyaal na ondro den leri èn seti foe na Bigi Theokraat, Jehovah, nanga en Kownoe-Manpikin, Kristus Jezus, soleki na „getrow srafoe” na grontapoe e prati disi! Foe di theokratis orde e bigin na Jehovah srefi, èn e go na ondro, dan noiti wi sa wani waka baka Satan na Didibri foe meki oensrefi onafhankelijk foe theokratis tiri. Tjari kon ini joe prakseri den sari bakapisi di a ben abi gi Eva di a ben gi jesi na a kori èn dekati foe Satan foe no saka ensrefi na ondro theokratis orde. A ben taigi en foe troe: „De onafhankelijk foe Gado. Go denki joesrefi. Besroiti gi joesrefi san na boen èn ogri. Dan joe sa de leki Gado. Seker joe no sa dede” (Gen. 3:1-11). Kande dati ben gersi dati a moi, ma a ben de wan lé (Joh. 8:44). Di en masra teki en sé, foe di a no ben wani moro toe foe saka ensrefi na ondro theokratis orde, den ben drifi den poeroe foe na djari foe Eden èn foe Gado osofamiri foe loyaal dienst-knekti. Di na joisti ten ben doro, soleki Jehovah ben warskow, na dede-strafoe ben kon tapoe den ala toe. — Gen. 2:17.
6 Na a srefi fasi, ini disi ten, ibri wan sma na mindri Jehovah pipel, di de bezig nanga onafhankelijk èn kontra leri, no e waka baka Gado, ma baka Satan na Didibri. Ma Jehovah e si san e psa ini en osofamiri èn e poti prakseri na tapoe (Odo 15:3). A no sa gi pasi na sma di gersi tigri foe njan en dienstknekti di gersi skapoe, èn foe datede a de opo doe wan sani na a joisti ten (Matt. 7:15-23). Leki wan lobi Tata a de kibri na jeje tanboen foe en osofamiri. — Ezech. 34:11-16.
7. (a) San Aäron nanga Mirjam ben misi foe teki na prakseri? (b) Nanga sortoe bakapisi?
7 Sosrefi toe ini tra bijbel eksempre e kon krin na fesi o kefarlek a de foe no saka joesrefi na ondro theokratis orde. Foe eksempre, Mirjam nanga Aäron ben gebroiki na famirfasi di den ben abi nanga Mozes èn den tjalansi en posisi ini na gemeente foe na Israël ini owroeten (Num. 12:1, 2). Den misi foe prakseri dati Jehovah srefi ben gi Mozes spesroetoe makti, soleki den wondroe sani di ben pasa e sori. Jehovah ben memre den: „Mi heri oso mi ben froetrow na Mozes. Foe mofo na mofo mi e taki nanga en . . . Foe san ede dan joe no ben frede foe taki tégen mi knekti, tégen Mozes?” Ne „Jehovah ati kon bron nanga den”. Aäron ben kisi wan tranga piri-ai èn foe taki foe Mirjam, den ben naki en nanga gwasi èn foe wan pisi ten foe 7 dé a ben poeroe poti na dorosé foe na kampoe. — Num. 12:7-15.
8. San a tori foe kownoe Saul e sori?
8 Dan wi ben abi kownoe Saul foe na Israël foe owroeten, di ben wégri foe wakti tapoe Jehovah. A presi foe dati, a ben teki na fri foe tjari slagti-ofrandi, ala di a no ben de wan priester. A ben krin ensrefi tapoe wan swaki fasi foe taki dati a ben abi na gevaar foe lasi en legre, foe di den ben e waka go abra na a feanti legre. Ma soema legre a ben de? Foe Saul ofoe foe Jehovah? Na proféti Samuël ben taigi en: „Joe ben handri tapoe wan lawfasi. Joe no ben hori na komando foe Jehovah, joe Gado, . . . Èn now joe kownoekondre no sa tan” (1 Sam. 13:13, 14). A kownoewroko ben teki poeroe foe Saul èn a ben gi na ’wan man di ben de switi ini Jehovah ati’. Na so fasi Saul ben pai wan hebi prijs foe na misi di a ben misi foe saka ensrefi na ondro Gado èn sosrefi toe foe di a ben misi opregti beraw di a tori ben tjari kon na en prakseri. Disi e sori dati Jehovah foe troe e poti prakseri tapoe den asranti, onafhankelijk, no-theokratis activiteit na mindri en pipel. — Odo 11:2.
9. Foe san ede kownoe Uzzia ben tron wan sma di den ben poeroe a den mindri?
9 Na tori foe na kownoe foe Juda, Uzzia, e akroederi nanga disi. Ala di a ben de kownoe tapoe Jehovah pipel, tokoe a no ben kisi na makti foe dini ini iniwan priesterwroko. Tokoe a ben tanapoe a tapoe foe doe wroko leki priester. Den priester ben taki nanga en krakti èn den ben taki: „A no de joe bisnis, o Uzzia, foe bron switismeri-ofrandi gi Jehovah, ma a de na bisnis foe den priester, den manpikin foe Aäron, den santawan, foe bron switismeri-ofrandi. Komoto foe na santapresi; bikasi joe ben handri ontrow.” Dan Uzzia di ben misi foe sori beraw, ben kisi atibron nanga den priester, sodati en sondoe foe asranti fasi ben kon moro ogri. „Ini en atibron nanga den priester, gwasi ben broko kon tapoe en fesi-ede . . . foedi Jehovah ben naki en.” Te nanga na dé foe en dede, a ben tan wan gwasiman, wan sma di den ben poeroe a den mindri, „Koti poeroe foe na oso foe Jehovah”. — 2 Kron. 26:16-21.
10. Fa Paulus ben taki foe den sma di ben tjalensi en wroko di a ben kisi foe Jezus?
10 Na apostel Paulus ben taki foe son sma di ben tjalansi na spesroetoe wroko di a ben kisi foe na Edeman foe na kristen gemeente, Jezus Kristus (2 Kor. 11:12). Ma Paulus ben taki dati den sortoe sma disi „ben de falsi apostel, bidrigi wrokoman, di e kenki densrefi ini apostel foe Kristus. Èn a no de wan froewondroe sani, bikasi Satan srefi e tan kenki ensrefi ini wan engel foe leti” (2 Kor. 11:13). Den sma dati e meki den égi gridi prakseri go na fesi. Paulus ben gi warskow foe den sortoe sma disi nanga den wortoe: „Foe oen égi mindri, man sa opo tanapoe, di sa taki kron-kron sani foe hari den discipel kon na den baka. Tan na ai foe datede” (Tori foe den Apostel 20:30, 31). Paulus ben begi den brada tranga, ooktoe den sokari apostel, foe no gi pasi dati trobi nanga broeja ben pori na wanfasi nanga na meki froktoe foe na kristen gemeente. Efoe son sma ben misi foe teki na rai disi foe santa jeje na ati, dan seker rampoe ben de e wakti den. — Gal. 1:7-9.
11. Fa Jehovah e kibri na harmonie ini en grontapoe organisaatsi?
11 Na bijbel-skrifiman Johannes ondro krakti foe santa jeje ben verklari: „Ibriwan sma di e poesoe go na fesi èn no e tan ini na leri foe na Kristus, no abi Gado. . . . Efoe wan sma kon a joe èn a no tjari na leri disi, no teki en noiti ini joe oso èn no taki en odi toe. Bikasi na soema di taki en odi e teki prati ini en ogri wroko” (2 Joh. 9-11). Ja, Jehovah sa kibri na boen jeje nanga na harmonie ini en osofamiri.
Loekoe boen ini disi ten
12. Ini san Jehovah e tjari ala sma kon makandra di lobi en?
12 Now, „ini den laatste dé”, Jehovah e tjari ala sma di lobi en kon ini wan wánfasi, harmonieus organisaatsi. Sma foe ala naatsi e poti prakseri tapoe na kari: „Kon, èn meki wi opo go na a bergi foe Jehovah, na a oso foe na Gado foe Jakob; èn en sa leri wi foe en pasi, èn seker wi sa waka den pasi foe en” (Jes. 2:2, 3). Poti prakseri dati Jehovah e leri sma ini en pasi, sodati den kan kon tapoe en pasi èn den no kan waka den égi pasi. — Jer. 10:23, 24.
13. (a) Foe san ede now spesroetoe wi moe loekoe boen? (b) Fa wi kan meki den prakseri foe Satan kon tron noti?
13 Ma Satan abi now „bigi ati-bron”. A sabi dati a abi soso „wan sjatoe ten” bifo den poeroe en na pasi. Foe datede meki a de waka lontoe leki „wan krasi lew, di e soekoe foe swari wan sma” (Openb. 12:12; 1 Petr. 5:8). Wi moe loekoe boen foe datede gi ala moeiti di na gado foe disi grontapoe, Satan na Didibri, e doe foe sai trobi nanga stré na mindri den memre foe Jehovah osofamiri. „Loekoe foe dat-ede boen fa joe e waka, no leki donman, ma leki koniman, bai na joisti ten gi joesrefi, bikasi den dé de ogri. No de foe datede moro langa onredelek, ma tan loekoe san na a wani foe Jehovah” (Ef. 5:15-17). Foe di wi o njan boen foe den seti foe Jehovah gi wi jeje tanboen, wi sa kon tranga, kon krin, kon de sreka-sreka tapoe na joisti fasi. Na so fasi wi sa kan de wan wegi tégen Satan ogri plan èn kan meki en prakseri kon tron noti. — Ef 6:10-13.
14. (. . .)
14 Wan jeje fasi di wi moe loekoe boen nanga en, de foe denki moro foe wisrefi leki wi moe denki (Rom. 12:3). Wan kristen nanga dati ben sa kan go denki dati a abi wan spesroetoe boskopoe foe Gado, loesoe foe na kanari, di Jehovah e gebroiki foe meki en waarheid bekenti na en osofamiri èn foe tiri den. Nanga so wan fasi wan sma ben sa sori dati leki fa en e prakseri, a de ini wan spesroetoe matifasi nanga Jehovah, wan matifasi pe no wan tra brada ofoe sisa ini a osofamiri no de na ini. Ma so wan poti foe ensrefi aparti kan tjari wan sma soso go na lawfasi: „Soema e poti ensrefi aparti, sa soekoe en égi gridi lostoe; a sa kisi atibron nanga ala praktis koni.” — Odo 18:1.
Wakti tapoe Jehovah
15. (a) Na wan joisti sani foe gi rai na Jehovah „srafoe”-klasse? (b) Gi wan eksempre foe na gebroiki foe saka ensrefi na theokratis fasi ini na fosi eeuw?
15 Wawan tron son sma e poti na prakseri foe na „srafoe”-klasse tapoe difrenti afersi foe leri nanga organisaatsi, di leki den e prakseri moe loekoe baka njoen. Rai foe meki wan sani kon moro boen de seker joisti, neleki a no de fowtoe foe aksi foe tjari wantoe punt kon moro krin. Wan eksempre foe disi ben de di Paulus, Barnabas nanga trawan ben seni go „na den apostel nanga owroeman ini Jeruzalem” tapoe na tori foe na besnijdenis. Di den owroeman ini Jeruzalem ondro na tiri foe santa jeje ben teki wan besroiti ini na afersi disi, den ben seni brada go na difrenti foto foe „tjari go gi den di de drape den besroiti foe hori, di den apostel nanga owroeman ini Jeruzalem ben teki”. Saka joesrefi loyaal na den besroiti dati, ben abi Jehovah blesi leki bakapisi. Na so fasi den „gemeente ben kon tranga nomonomo ini na bribi èn den ben kon moro foeroe ini nomroe dé foe dé”. — Tori foe den apostel 15:1-16:5.
16. (a) Sortoe joisti jeje fasi moe sori baka te rai ben gi? (b) Sortoe rai Paulus e gi na den sma di e sori wan fowtoe jeje fasi?
16 Na joisti jeje fasi, baka te rai ben gi, de foe de tevréde foe libi na afersi abra gi a loekoe ondro begi foe den lepi brada di e tiri na wroko ini Jehovah organisaatsi. Ma efoe den sma di ben gi den rai no de tevréde nanga dati èn e go doro foe taki foe na tori ini den gemeente nanga na prakseri foe tra sma kon na den sé, dan san? Dati ben sa tjari pratifasi kon èn ben kan njan na bribi foe son sma na ondrosé. Paulus e gi foe datede na rai „foe hori den na ai, di kontrari na leri di joe ben leri, e meki pratifasi kon, èn e gi okasi foe sma naki foetoe, èn tan farawe foe den”. Paulus ben gi Titus sosrefi toe na rai „foe piri ai gi den sma di e taki kontra” èn a de taki moro fara: „A de fanowdoe foe tapoe den mofo, foe di den sma disi toe-pa-toe e drai heri osofamiri foe ondro go na tapoe foe di . . . den e leri sani di den no moe leri . . . Joisti foe a réde disi, tan piri ai gi den.” — Rom. 16:17, 17; Tit. 1:9-13.
17. Fa ini disi ten wi kan waka baka David toemsi moi jejefasi?
17 Gado Wortoe e verklari: „Sabi e meki bigi memre kon, ma lobi e bow sma” (1 Kor. 8:1). Fa a de moro boen foe datede foe tan de druk bezig ini a moro prenspari wroko, di de foe meki Gado toemsi moi kownoekondre bekenti, taki sani di e bow tra sma, èn foe tranga na bribi foe trawan nanga wisrefi, aladi wi e wakti nanga pasensi te leki Jehovah sa meki en wani pasa nanga jepi foe en kanari di a poti! (Rom. 12:19; Fil. 4:8, 9) Waka baka David di a ben taki: „Bikasi tapoe joe Jehovah, mi ben wakti; joesrefi ben go doro foe piki, o Jehovah, mi Gado” (Ps. 38:15). No frigiti noiti na prenspari prakseri di Paulus ben tjari kon ondro wortoe, namkoe „dati den alamala taki ini wanfasi nanga makandra èn dati prati fasi no de na oen mindri, ma dati oen de krosbé na wán ini na srefi jeje èn ini na srefi fasi foe prakseri” (1 Kor. 1:10). Foe di na gronprakseri disi e gebroiki na a heri grontapoe ini Jehovah osofamiri, meki wi e si froewondroe bakapisi. Ja, „O boen èn o switi a de te brada e libi wán makandra”! — Ps. 135:1.
Joe kan piki den aksi di e kon now?
□ Fa Jezus ben gi wan toemsi moi eksempre ini na saka na ondro theokratis orde?
□ Sortoe bakapisi na misi foe saka joesrefi na ondro theokratis orde kan abi?
□ Foe san ede spesroetoe ini disi ten wi moe loekoe boen nanga Satan?
□ Sortoe jeje fasi wi moe sori te wi e gi rai?
[Prenki na tapoe bladzijde 207]
Foe di kownoe Uzzia no ben saka ensrefi na ondro theokratis orde, meki dati gwasi ben kisi en