Dini Jehovah na wan loyaal fasi
„Nanga wan sma di de loyaal, joe [Jehovah] sa handri na wan loyaal fasi”. — 2 SAMUÈL 22:26.
1. Fa Jehovah e handri nanga den wan di de loyaal na en?
JEHOVAH pipel no man pai en foe ala den sani di a e doe gi den (Psalm 116:12). O kefarlek moi den presenti na jeje èn na skinfasi èn en safoe sari-ati de! Kownoe David foe Israèl foe owroeten ben sabi taki Gado e handri na wan loyaal fasi toe nanga den sma di de loyaal na en. Dati David ben taki ini wan singi di a ben meki „na a dei di Jehovah ben fri en poeroe foe na inisei anoe foe ala en feanti èn foe na inisei anoe foe [kownoe] Saul”. — 2 Samuèl 22:1.
2. San na wan toe penti ini a singi foe David, di skrifi na 2 Samuèl kapitel 22?
2 David ben bigin en singi (di e kroederi nanga Psalm 18), foe di a e prèise Jehovah leki „a Sma di e gi pasi foe lon komoto”, leki wan piki tapoe begi (2 Samuèl 22:2-7). Komoto na en hemel tempel, Jehovah ben handri foe fri en loyaal dienstknekti poeroe foe makti feanti (vers 8-19). David ben kisi pai foe dati ede, foe di a ben feti baka wan opregti waka nanga libi èn ben tan hori den pasi foe Jehovah (vers 20-27). Moro fara a e kari wan baka trawan, den sani di doe nanga a krakti di Gado ben gi (vers 28-43). Te foe kaba, dan David ben froeteri foe a fri di a ben kon fri foe den sma na oso, di ben feni fowtoe na en èn foe feanti foe tra nâsi èn ben gi Jehovah tangi leki „a Wan di e doe bigi wroko foe froeloesoe gi en kownoe èn di e sori lobi boen-ati gi a salfoewan foe en” (vers 44-51). Jehovah kan fri wi toe efoe wi e feti baka wan opregti waka nanga libi èn efoe wi e froetrow na en tapoe foe kisi krakti.
San a wani taki foe de loyaal
3. Te joe loekoe en foe bijbel sei, san a wani taki foe de loyaal?
3 A singi foe David foe kisi fri, e gi wi na seikerfasi disi di e trowstoe wi: „Nanga wan sma di de loyaal joe [Jehovah] sa handri na wan loyaal fasi” (2 Samuèl 22:26). Na Hebrew bijvoegelijk naamwoord cha.sidh’ di e taki foe „wan loyaal sma” noso „wan sma di abi lobi boen-ati” (Psalm 18:25, foetoewortoe). A zelfstandig naamwoord che.sedh’ abi na ini en a prakseri foe boen-ati di na wan lobi fasi e plak ensrefi na wan sani te leki a doro a marki di abi foe doe nanga a sani dati. Jehovah e sori a sortoe boen-ati disi gi den dienstknekti foe en, neleki fa den e sori dati gi en. A regtfardiki, santa loyaalfasi disi e vertaal nanga „lobi boen-ati” èn „loyaal lobi” (Genesis 20:13; 21:23). Ini den Griki boekoe foe bijbel, „loyaalfasi” e tjari na prakseri foe santafasi nanga dipi respeki di e kon na krin ini a zelfstandig naamwoord ho.si.o’tes èn na bijvoegelijk naamwoord ho’si.os. So wan loyaalfasi wani taki so srefi toe getrowfasi èn a gi di joe moesoe gi joesrefi dorodoro ini a dini foe Gado èn a wani taki foe de opregti èn foe doe soifri ala joe plekti na Gado. Foe de loyaal na Jehovah wani taki foe tai hori na en nanga a gi di joe e gi joesrefi ini na dini foe Gado so tranga taki a e wroko leki wan krakti lijm.
4. Fa a loyaalfasi foe Jehovah e kon na krin?
4 Na eigi loyaalfasi foe Jehovah e kon na krin na ini foeroe fasi. Foe eksempel, a e opo doe sani foe kroetoe den ogriwan leki wan bakapisi foe loyaal lobi gi en pipel èn foe loyaalfasi na retidoe èn regtfardikifasi (Openbaring 15:3, 4; 16:5). Loyaalfasi na en froebontoe nanga Abraham ben poesoe en foe de nanga langa pasensi nanga den Israèlsma (2 Kownoe 13:23). Den sma di de loyaal na Gado kan froetrow tapoe a jepi foe en te go doro na a kaba foe den loyaal waka nanga libi èn den kan de seiker taki a sa memre den (Psalm 37:27, 28; 97:10). Jesus ben kisi krakti foe a sabi, taki, leki a moro prenspari „loyaalwan” foe Gado, en sili no ben sa libi na ini Sjeool. — Psalm 16:10; Tori foe den Apostel 2:25, 27.
5. Foe di Jehovah de loyaal, san a e aksi foe en dienstknekti, èn sortoe aksi wi sa poti prakseri na tapoe?
5 Foe di Jehovah Gado de loyaal, a e winsi taki den dienstknekti foe en moesoe de loyaal (Efeisesma 4:24). Foe eksempel, man-nengre moesoe de loyaal foe den kan feni den boen foe kan poti den leki gemeente owroeman (Titus 1:8). Sortoe sani moesoe poesoe Jehovah pipel foe dini en na wan loyaal fasi?
Warderi gi den sani di wi ben leri
6. Fa wi moesoe denki foe den bijbel sani di wi ben leri, èn san wi moesoe hori na prakseri foe a sortoe sabi dati?
6 A de di wi de nanga tangi gi den sani di wi ben leri ini bijbel moesoe poesoe wi foe dini Jehovah na wan loyaal fasi. Na apostel Paulus ben gi Timoteus tranga: „Go doro ini den sani di joe ben leri èn di den ben overtoigi joe foe bribi, sabi foe soema joe ben leri den èn taki foe sensi pikin-nengre ten joe sabi den Boekoe, di man foe meki joe kon koni foe kisi froeloesoe nanga jepi foe a bribi di de ini akroederi nanga Krestes Jesus” (2 Timoteus 3:14, 15). Hori na prakseri taki a sabi dati ben komoto foe Gado nanga jepi foe „a getrow èn koni srafoe”. — Mateus 24:45-47.
7. Fa owroeman moesoe denki foe jeje njanjan di Gado sorgoe foe en nanga jepi foe a getrow srafoe?
7 Spesroetoe den wan di den ben poti leki owroeman moesoe warderi a jeje njanjan di e gi krakti, èn di Gado e gi nanga jepi foe a getrow srafoe. Wan toe jari pasa kaba wan toe owroeman ben mankeri so wan warderi. Wan oemasma di ben e loekoe fa sani e go ben taki dati den man disi „ben kon abi wan lo sani foe taki foe den artikel ini A Waktitoren, den no ben wani teki en leki Gado kanari foe waarheid, ala ten den ben proeberi foe tjari den fasi foe denki go abra tapoe trawan”. Ma, loyaal owroeman noiti e proeberi foe abi krakti tapoe trawan foe trowe awinsi sortoe pisi foe a jeje njanjan di Gado e gi nanga jepi foe a getrow srafoe.
8. San efoe wi no e froestan wan toe bijbel penti krinkrin di a getrow èn koni srafoe ben tjari kon a fesi?
8 Leki Kotoigi foe Jehovah di gi densrefi abra, wi alamala moesoe de loyaal na en nanga na en organisâsi. Wi no moesoe go denki noiti srefi foe skoifi komoto foe a wondroe leti foe Gado, nanga di wi e koti go ini wan waka nanga libi foe wan sma di fadon komoto na bribi, san kan tjari wi go na dede na jeje fasi now èn na pori te foe kaba (Jeremia 17:13). Ma, san efoe a hebi gi wi foe teki noso warderi wan toe bijbel penti di a getrow srafoe e tjari kon a fesi? Dan, meki wi erken nanga sakafasi pe wi ben leri waarheid èn begi foe kisi koni foe kan handri nanga na problema disi te leki a e kon na wan loesoe nanga wan toe sani di e tjari afersi kon a krin ini wan poeblikâsi. — Jakobus 1:5-8.
Warderi a kresten bradafasi
9. Fa 1 Johanes 1:3-6 e sori taki kresten moesoe abi wan jeje foe matifasi?
9 Warderi di e komoto foe wi ati gi na jeje foe matifasi, di de na mindri wi kresten bradafasi, e gi wan tra deki-ati foe dini Jehovah na wan loyaal fasi. Te joe loekoe en boen, wi matifasi nanga Gado nanga Krestes no kan de gesontoe na jeje fasi sondro a jeje disi. Na apostel Johanes ben taigi salfoe kresten: „Na sani di wi si èn di wi jere, wi e froeteri oenoe toe, so taki oenoe toe kan abi wan prati [„matifasi”, Diaglott] nanga wi. Moro fara a prati disi foe wi, de nanga a Tata èn nanga en Manpikin Jesus Krestes. . . . Efoe wi e taki: ’Wi e abi wan prati nanga en’, èn tokoe ete wi e tan waka ini doengroe, dan wi e lei èn wi no e waka ini waarheid” (1 Johanes 1:3-6). A gronprakseri disi e fiti ala kresten, efoe na howpoe foe den de foe go na hemel noso foe libi na grontapoe.
10. Ala di Euodia nanga Sentike, leki fa a sori, ben feni en moeilek foe loesoe wan problema di den ben abi nanga makandra, tokoe fa Paulus ben si den oema disi?
10 Moeiti de fanowdoe foe tan hori wan jeje foe matifasi. Foe eksempel, den kresten oema Euodia nanga Sentike, ben feni en moeilek, so leki fa a ben sori, foe loesoe wan problema di ben de a mindri den. Foe dati ede Paulus ben froemane den „foe denki a srefi ini Masra”. A ben taki moro fara: „Mi e aksi oenoe toe, troetroe kompe tjatjariman, foe tan asisteri den oema disi di ben strei sei na sei nanga mi gi a boen njoensoe, makandra nanga Clemens nanga den tra kompe wrokoman foe mi, di den nen skrifi ini a boekoe foe libi” (Filipisma 4:2, 3). Den oema dati di ben gi densrefi ini a dini foe Gado, ben strei sei na sei nanga Paulus nanga trawan „gi a boen njoensoe”, èn a ben de seiker taki den ben de a mindri den wan ’di nen ben skrifi ini a boekoe foe libi’.
11. Efoe wan loyaal kresten e miti wan problema na jeje fasi, dan san ben sa fiti foe tan hori na prakseri?
11 Kresten no e weri wan karta leki wan grani èn marki foe sori san den kisi foe doe ini Jehovah organisâsi èn fa den dini en na wan loyaal fasi. Efoe den abi wan problema na jeje sei, fa a no ben sa de wan sori foe lobi foe poti den jari foe den foe loyaal dienst gi Jehovah na wan sei! Kande a ben de so taki, a sma di den ben kari „troetroe kompe tjatjariman” ben de wan loyaal brada di ben de fajafaja foe jepi trawan. Efoe joe na wan owroeman, joe de dan wan „troetroe kompe tjatjariman”, klariklari foe gi jepi na wan sari-ati fasi? Meki wi alamala hori den boen na prakseri di kompe bribiman ben doe, neleki fa Gado e doe dati, èn gi den jepi na wan lobi fasi foe tjari den lai foe den. — Galasiasma 6:2; Hebrewsma 6:10.
No wan tra presi foe go
12. Di san Jesus ben taki ben meki ’foeroe disipel drai go na den sani di den ben libi na baka’, dan sortoe sei Petrus ben teki?
12 Wi sa kisi deki-ati foe dini Jehovah na wan loyaal fasi nanga en organisâsi, efoe wi e hori na prakseri taki no wan tra presi de foe go foe kisi têgo libi. Di den sani di Jehovah ben taki, ben meki ’foeroe disipel drai go na den sani di den ben libi na baka’, a ben aksi den apostel foe en: „Oenoe no wani go toe?” Petrus ben piki: „Masra, na soema wi sa go? Joe abi wortoe foe têgo libi; èn wi ben bribi èn ben kon sabi taki joe na a Santawan foe Gado.” — Johanes 6:66-69.
13, 14. (a) Foe san ede a fosi jarihondro Djoebribi no ben abi a boen foe Gado? (b) San wan sma di ben de Kotoigi foe Jehovah langa ten kaba, ben taki foe na organisâsi foe Gado di joe kan si?
13 „Wortoe foe têgo libi”, no ben de foe feni ini a Djoebribi foe a fosi jarihondro G.T. A prenspari sondoe foe en ben de a trowe di den ben trowe Jesus leki a Mesias. Na ini no wan foe den pisi foe en, a Djoebribi ben abi en fondamenti soso tapoe den bijbelboekoe ini Hebrewtongo. Den Sadoeseisma ben taki dati engel no de èn den no ben bribi ini wan opobaka. Ala di den Faraseisma no ben agri nanga den ini den afersi disi, tokoe na wan sondoe fasi den ben meki Gado Wortoe de sondro krakti leki wan bakapisi foe den gwenti foe den di no ben komoto na bijbel (Mateus 15:1-11; Tori foe den Apostel 23:6-9). Den gwenti disi ben meki den djoe kon de ini katibo èn ben meki a de tranga gi foeroe foe den foe teki Jesus Krestes (Kolosesma 2:8). Faja gi ’den gwenti foe den tata foe en’, ben meki Saulus (Paulus), ini a don foe en, tron wan takroe-ati froefolgoeman foe den bakaman foe Krestes. — Galasiasma 1:13, 14, 23.
14 Djoebribi ben misi a boen-ati foe Gado, ma Jehovah ben blesi na organisâsi foe den bakaman foe en Manpikin — ’wan pipel di abi faja foe doe boen wroko’ (Titus 2:14). Na organisâsi dati de te now ete, èn wan sma di de langa ten wan Kotoigi foe Jehovah kaba, ben taki foe en: „Efoe wan sani de di de moro prenspari gi mi , dan a de a tori foe tan krosibei na Jehovah organisâsi di joe kan si. Den froekoe ondrofeni foe mi ben leri mi o don a de, foe froetrow tapoe san libisma e taki-go-taki-kon. Di mi no ben tweifri moro foe a penti dati, dan mi ben teki na fasti bosroiti foe tan na a getrow organisâsi. Na sortoe fasi moro wan sma ben sa kan kisi Jehovah boen-ati nanga blesi?” No wan tra presi de moro pe joe kan go foe kisi a boen foe Gado nanga têgo libi.
15. Foe san ede wi moesoe wrokomakandra nanga na organisâsi foe Jehovah di wi kan si èn nanga den wan di abi frantiwortoe ini na organisâsi?
15 Na ati foe wi moesoe poesoe wi foe wrokomakandra nanga Jehovah organisâsi, bikasi wi sabi taki na organisâsi disi wawan e kisi tiri nanga jepi foe en santa jeje èn e meki en nen nanga en prakseri bekènti. A no de foe taki, dati den wan di e tjari frantiwortoe ini a organisâsi, no de volmaakti (Romesma 5:12). Ma „na atibron foe Jehovah ben kon faja srefisrefi” nanga Aron nanga Mirjam, di den ben feni fowtoe na Moses èn ben frigiti taki Gado ben gi en, no den, na frantiwortoe (Numeri 12:7-9). Ini a ten disi, loyaal kresten wrokomakandra nanga „den wan di e teki fesi ini a wroko”, bikasi dati na san Jehovah e aksi (Hebrewsma 13:7, 17). Wan fasi foe sori wi loyaalfasi na foe fisiti kresten konmakandra doronomo èn gi piki di ’e gi trawan deki-ati foe sori lobi èn doe boen wroko’. — Hebrewsma 10:24, 25.
Bow trawan
16. Wan lostoe foe wi foe doe sortoe sani gi trawan moesoe troesoe wi toe foe dini Jehovah na wan loyaal fasi?
16 Na lostoe foe bow trawan, moesoe gi wi na deki-ati toe foe dini Jehovah na wan loyaal fasi. Paulus ben skrifi: „Sabi e gi sma heimemre, ma lobi e bow trawan” (1 Korentesma 8:1). Foe di wan seiker sortoe foe sabi e gi den sma di abi en heimemre, meki Paulus ben moesoe wani taki dati lobi toe e bow den wan di e sori na eigifasi dati. A boekoe di professor Weiss nanga English ben skrifi, e taki: „A sma di man foe sori lobi gewoonlek e kisi, a no kan tra fasi, lobi baka. A man di wan sma man foe sori boen wani nanga belangstelling na ala kontren foe a libi . . . abi wan spesroetoe krakti tapoe a sma di e sori den sortoe firi disi, so boen leki a sma di e kisi den èn na so fasi a e tjari prisiri kon gi ala toe.” Te wi e sori lobi, dan wi e bow a trawan èn wisrefi, so leki fa den wortoe foe Jesus e sori: „A moro switi foe gi sani leki foe kisi sani.” — Tori foe den Apostel 20:35.
17. Fa lobi e bow trawan èn san a sa kibri oenoe foe doe?
17 Na 1 Korentesma 8:1, Paulus ben gebroiki a Griki wortoe a.ga’pe, di e sori tapoe lobi di abi en gron tapoe gronprakseri. A e bow trawan, bikasi a abi langa pasensi nanga switifasi, a e tjari èn e froedrage ala sani, èn a no e misi noiti. A lobi disi e poeroe firi di kan doe sma ogri, so leki heimemre nanga djaroesoe (1 Korentesma 13:4-8). A sortoe lobi disi sa jepi wi foe wi no kragi foe den brada foe wi, di de onvolmaakti neleki fa wi de onvolmaakti. A sa jepi wi foe wi no tron leki den „gadolowsoe sma” di „ben boro kon” na mindri foe den troe krestensma foe na fosi jarihondro. Den man disi „no ben abi respeki gi tiri èn den ben taki skempi foe den gloriwan”, a ben de krin taki den ben taki ogri foe den sma disi leki den salfoe kresten opziener, di ben kisi wan seiker glori a tapoe den (Judas 3, 4, 8). Foe tan loyaal na Jehovah, meki wi no broko kindi noiti gi a tesi foe doe iniwan srefi sortoe sani.
Kakafoetoe gi Didibri!
18. San Satan ben sa wani doe nanga a pipel foe Jehovah, ma foe san ede a no man doe so?
18 A sabi taki Satan wani pori na wanfasi di wi abi leki na pipel foe Gado, moesoe meki wi bosroiti kon moro bigi foe dini Jehovah na wan loyaal fasi. Satan ben sa wani foe kiri ala den dienstknekti foe Gado èn den grontapoe dienstknekti foe Didibri e kiri den troe anbegiman foe Gado sontron. Ma Gado no sa gi Satan pasi foe kiri den alamala. Jesus ben dede foe „tjari na wan di ben abi na wrokosani foe meki dede kon, dati na Didibri, kon de noti” (Hebrewsma 2:14). A kontren foe Satan foe sori en makti ben kon skotoe sensi di den ben trowe en komoto na hemel baka di Krestes ben kon tron Kownoe ini 1914. Èn te Jehovah ten de so fara, dan Jesus sa pori Satan nanga en organisâsi.
19. (a) Sortoe warskow foe den moeiti di Satan e doe a tijdschrift disi ben gi jari pasa kaba? (b) Foe koti pasi gi den trapoe foe Satan, sortoe moeiti wi moesoe doe te wi e handri nanga wi kompe bribiman?
19 A tijdschrift disi ben warskow wan leisi: „Efoe Satan, Didibri, kan meki broeja kon a mindri a pipel foe Gado, kan meki den meki trobi èn feti nanga densrefi, noso foe meki den sori èn kweki wan gridi jejefasi di ben sa tjari den go na a pori foe a lobi di den abi gi den brada, dan a ben sa doro na marki foe swari den krinkrin” (A Waktitoren foe 1 mei 1921, bladzijde 134, Ingrisitongo). No meki wi gi Didibri pasi foe pori wi wánfasi, kande foe di a sa meki wi go gongosa noso feti nanga makandra (Levitikus 19:16). Meki Satan noiti koni moro wi na so wan fasi taki wisrefi e doe den wan di e dini Jehovah na wan loyaal fasi, ogri noso e meki a libi kon moro hebi gi den. (Teki gersi 2 Korentesma 2:10, 11.) Na presi foe dati, meki wi poti den wortoe foe Petrus ini wi libi: „Hori joe prakseri na wan, tan na ai. Joe gensman, Didibri, e waka lontoe leki wan krasi lew, di e soekoe foe njan wan sma. Ma kakafoetoe gi en, tan fasti ini bribi” (1 Petrus 5:8, 9). Te wi e kakafoetoe gi Satan, dan wi kan tan ini na blesi wanfasi di wi abi leki Jehovah pipel. — Psalm 133:1-3.
Froetrow tapoe Jehovah nanga jepi foe begi
20, 21. Fa froetrow tapoe Jehovah nanga jepi foe begi, abi foe doe nanga a dini foe en na wan loyaalfasi?
20 Foe froetrow tapoe Jehovah nanga jepi foe begi, sa jepi wi foe tan go doro foe dini en na wan loyaal fasi. Te wi e si taki a e piki den begi foe wi, dan wi e kon moro krosibei na en. Foe froetrow tapoe Jehovah nanga jepi foe begi, ben de wan sani di Paulus ben gi tranga foe doe di a ben skrifi: „Mi e winsi taki na ibri presi den sma e tan begi, e opo loyaal anoe go na tapoe, sondro atibron nanga hari-taki” (1 Timoteus 2:8). Foe eksempel, fa a de wan prenspari sani taki owroeman froetrow tapoe Jehovah nanga jepi foe begi! So wan boeweisi foe loyaalfasi na Jehovah, te den e kon na makandra foe taki foe gemeente afersi, sa jepi den foe no fadon go ini hari-taki di no e kaba èn foe bigin kisi atibron kande.
21 Froetrow tapoe Jehovah nanga jepi foe begi sa jepi wi foe wi doe den grani di wi kisi ini en dienst. Wan man di ben dini Jehovah foeroe tenti jari langa, ben kan taki: „A teki di wi e teki iniwan wroko di wi e kisi ini Gado organisâsi di de na heri grontapoe, èn a tan di wi e tan doe wi wroko, sondro foe sani kan drifi wi poeroe, e tjari a switi lafoe foe Gado, taki a e feni wi boen kon tapoe den opregti moeiti di wi e meki. Srefi efoe a wroko di wi moesoe doe sori lagi pikinso, dan nofotron a e kon a krin taki efoe wi no ben doe dati na wan getrow fasi, foeroe prenspari dienst no ben sa kan feni presi. So boen efoe wi de nanga sakafasi èn abi belangstelling foe gi glori langalanga na Jehovah nen èn no na di foe wi, dan wi kan de seiker taki alaten wi sa tan tanapoe ’kànkan, sondro foe drifi, ala ten abi foeroe foe doe ini a wroko foe Jehovah.’” — 1 Korentesma 15:58.
22. Fa den foeroe blesi foe Jehovah moesoe wroko tapoe na loyaalfasi foe wi?
22 Awansi san wi e doe ini a dienst foe Jehovah, a no de foe taki dati wi no man pai en baka foe san a e doe gi wi. Fa wi de ini seikerfasi ini Jehovah organisâsi, pe den sma di de en mati e lontoe wi! (Jakobus 2:23) Jehovah ben blesi wi nanga wánfasi di e kon foe bradafasi lobi di abi en roetoe so dipi taki srefi Satan no man diki en poeroe. Foe dati ede, meki wi tan hori na wi loyaal hemel Tata èn wrokomakandra nanga a pipel foe en. Foe now te ala têgo ten, meki wi dini Jehovah na wan loyaal fasi.
Fa joe ben sa piki?
◻ San a wani taki foe de loyaal?
◻ San na wan toe sani di moesoe troesoe wi foe dini Jehovah na wan loyaal fasi?
◻ Foe san ede wi moesoe kakafoetoe gi Didibri?
◻ Fa begi kan jepi wi foe de loyaal dienstknekti foe Jehovah?
[Prenki na tapoe bladzijde 32]
Den loyaal dienstknekti foe Jehovah no e gi pasi na a Gensman foe den, Didibri, di gersi wan krasi lew, foe panja na wánfasi foe den