Loekoe den loyaalwan!

„Soema no sa frede joe troetroe, Jehovah, èn gi joe nen glori, bika joe wawan de loyaal?” — OPENBARING 15:4.

1. Sortoe sani J. F. Rutherford ben taki foe a loyaalfasi foe C. T. Russell, a sma di ben de presidenti fosi en?

JOSEPH F. RUTHERFORD di ben tron presidenti foe a Waktitoren Genootschap, baka C. T. Russell, na ini 1917, ben bigin taki na a beri foe Russell nanga den wortoe disi: „Charles Taze Russell ben de loyaal na Gado, loyaal na Krestes Jesus, loyaal na den afersi foe a kownoekondre foe a Mesias. A ben de loyaal dorodoro — ija, loyaal srefi te na dede.” Dati ben de troetroe wan moi sani foe taki foe wan getrow foetoeboi foe Jehovah Gado. No wan betre sani wi ben kan taki foe wan sma, leki foe taki dati a ben pasa a tesi na tapoe en loyaalfasi, èn taki a ben de loyaal — loyaal dorodoro.

2, 3. (a) Foe san ede a de wan moeilek sani foe de loyaal (b) Soema seti densrefi toe foe feti nanga den troe kresten foe di den disi e doe moeiti foe de loyaal?

² A de wan moeilek sani foe de loyaal. Foe san ede? Bika te wan sma de loyaal, dan dati no e kroederi nanga den afersi foe a sma srefi. Den moro prenspari wan foe den sma di no de loyaal na Gado, na den kerki fesiman foe krestenhèit. So srefi, noiti ete someni sma ben de, di no de loyaal den patna na ini a trowlibi na ini a ten disi. Soetadoe na wan gewoon sani. Na ini a bisnis joe abi boen foeroe sma toe di no de loyaal. Den e taigi wi foe a tori disi: „Foeroe wrokobasi nanga bekwaam wrokoman . . . e bribi taki na ini a ten disi soso don sma nanga sma di trawan kan bedrigi makriki, de loyaal na a wrokope foe den.” Sma e wisiwasi den wan di de „loyaal toemoesi”. „A fosi èn a wan-enkri sma di joe moesoe de loyaal na en, na joesrefi”, na fa wan presidenti foe wan bedrijf, di e gi rai tapoe a kontren foe fa sma moesoe drai wan bedrijf èn soekoe wrokoman, ben taki en. Ma efoe den e taki dati wan sma moesoe de loyaal na ensrefi, dan dati e pori san a wortoe wani taki troetroe. Disi e memre wi na san skrifi na ini Mika 7:2: „Na grontapoe, a loyaalwan no de moro.”

³ Ma moro foeroe a de so, taki Satan nanga den ogri jeje foe en seti densrefi foe feti nanga wi, foe di den poti na ini den ede foe sorgoe taki wi no de loyaal na Gado. Dati meki Efeisesma 6:12 e taigi kresten: „Wi no e feti nanga broedoe èn nanga skin, ma nanga den tiri, nanga tirimakti, nanga den grontapoe tiriman foe a doengroe disi, nanga den godelowsoe jeje makti na den hemel presi.” Ija, wi moesoe poti prakseri na tapoe a warskow: „Hori oensrefi, de na ai. Oen gensman, Didibri, e waka lontoe leki wan krasi lew, di e soekoe foe njan wan sma.” — 1 Petrus 5:8.

4. Sortoe firi e meki a de so wan moeilek sani foe de loyaal?

⁴ San e meki en moeilek toe foe de loyaal, na den firi di wi abi foe prakseri wi eigi afersi nomo, firi di wi kisi foe wi papa nanga mama, soleki fa Genesis 8:21 e taki: „Den firi di libisma abi na ini en ati, takroe” — èn a e prakseri en eigi afersi nomo — „foe sensi en jongoe jari”. Wi alamala abi a problema di na apostel Paulus ben erken dati a ben abi: „A boen di mi wani doe, mi no e doe, ma na ogri di mi no wani doe, na dati mi e doe.” — Romesma 7:19.

Loyaalfasi na wan spesroetoe sani

5, 6. San wi kan taki foe san loyaalfasi wani taki, èn san sma skrifi foe en?

⁵ „Loyaalfasi” na wan spesroetoe wortoe. Dati meki Insight on the Scriptures e taki: „No wan Ingrisi wortoe sori foe de, di kan taki soifri san den Hebrew nanga Griki wortoe wani taki, ma ’loyaalfasi’, di abi na ini toe a prakseri foe a gi di wan sma e gi ensrefi èn foe getrowfasi, na wan wortoe di, te dati gebroiki ini a tori foe Gado èn a diniwroko di sma e doe gi en, pikinmoro e sori san a wani taki.”a A Waktitoren ben taki wan leisi foe „loyaalfasi”: „Getrowfasi, plekti, lobi, froeplekti, no broko pramisi. San den wortoe disi abi foe doe nanga makandra? Den de difrenti sei foe loyaalfasi.” Ija, wan lo boenfasi de di, te joe loekoe en boen, na difrenti sei foe loyaalfasi. A de troetroe wan moi sani foe si omeni leisi na ini bijbel den e kari loyaalfasi makandra nanga regtfardikifasi.

⁶ Den toe sani di taki dja, na wan jepi toe: ’Loyaalfasi kan sori tapoe wan doronomo getrowfasi di sma kan froetrow èn a broko di wan sma no e broko en pramisi, wani sani di de wan djaranti teige tweifri noso tesi di wan sma kan kisi.’ ’Loyaalfasi e sori go na te wan sma e doe ala ten san a pramisi, noso a firi di wan sma abi doronomo foe hori ensrefi getrow na a organisâsi noso den gronprakseri di a e firi froeplekti na dati; a wortoe no e sori nomo na tapoe a hori di wan sma e hori ensrefi getrow na wan sma noso wan sani, ma a e sori toe na tapoe te wan sma e weigri foe trawan kori en èn poeroe en foe a sani noso a sma di a e hori ensrefi getrow na dati.’ So boen, sma di tan de getrow awansi den e kisi tesi, gens, nanga froefolgoe, e froedini en taki sma kari den „loyaal”.

7. Sortoe difrenti kan de na mindri loyaalfasi nanga getrowfasi?

⁷ Ma te wi e taki foe loyaalfasi, dan a ben sa de wan boen sani foe sori nanga wan eksempre taki wan difrenti kan de na mindri loyaalfasi nanga getrowfasi. Na westsei foe Amerkankondre, joe abi wan waran watra fonten di pikinmoro ibri joeroe e koekoe kon na tapoesei. A fonten e doe disi na so wan getrow fasi, taki sma kari en Old Faithful (Getrow Ala ten). Bijbel e taki dati den sortoe sani disi, leki moenkenki di no abi libi, de getrow, foe di sma kan froetrow na en tapoe. Psalm 89:37 e taki foe moenkenki leki „wan getrow kotoigi di de na loktoe”. Den e taki dati den wortoe foe Gado de getrow. Openbaring 21:5 e taki: „A Sma di ben sidon na tapoe a kownoestoeroe, ben taki: ’Loekoe! Mi e meki ala sani kon njoen.’ A e taki toe: ’Skrifi, bika den wortoe disi de getrow èn troe.’” Ala den sani disi de getrow, sma kan froetrow na den tapoe, ma den no man lobi wan sma noso abi den moreel eigifasi, soleki loyaalfasi.

Jehovah, a moro loyaal Sma di de

8. Sortoe sani di taki na ini bijbel, e meki wi kon sabi soema na a moro boen eksempre foe wan sma di de loyaal?

⁸ Wi no abi foe tweifri kwetikweti taki Jehovah Gado na a moro boen eksempre foe wan sma di de loyaal. Jehovah ben de loyaal na a libisma famiri, èn a ben gi en Manpikin srefi, so taki libisma kan kisi têgo libi (Johanes 3:16). Na ini Jeremia 3:12, wi e leisi: „’Drai kon baka, o Israèl di fadon komoto na bribi’, na so Jehovah taki. ’Mi no sa meki mi fesi kon atibron nanga oenoe, bika mi de loyaal.’” San e sori moro fara taki Jehovah de loyaal na den wortoe di skrifi na ini Openbaring 16:5: „Joe, a Sma di de èn di ben de, a loyaal Sma, de regtfardiki.” Èn ete wan tron den e taigi wi na ini Psalm 145:17: „Jehovah de regtfardiki na ini ala den pasi foe en èn a de loyaal na ini ala den wroko foe en.” Foe taki en leti, dan Jehovah na so wan boen eksempre foe wan sma di de loyaal, dati Openbaring 15:4 e taki: „Soema no sa frede joe troetroe, Jehovah, èn gi joe nen glori, bika joe wawan de loyaal?” Jehovah Gado de loyaal moro ala sma di de.

9, 10. Fa Jehovah ben sori taki a ben de loyaal di a ben handri nanga a nâsi Israèl?

⁹ A historia foe a nâsi Israèl spesroetoe, abi boen foeroe boeweisi di e sori taki Jehovah de loyaal na en pipel. Na ini a ten foe den Kroetoebakra, Israèl ben fadon komoto na a troe bribi ibri tron baka, ma ala ten baka Jehovah ben firi sari èn a ben froeloesoe den (Kroetoebakra 2:15-22). Ala den feifi hondro jari di Israèl ben abi kownoe, Jehovah ben sori taki a ben de loyaal na a nâsi dati.

¹⁰ Foe di Jehovah de loyaal, meki a ben abi pasensi nanga en pipel, soleki fa dati skrifi na ini 2 Kroniki 36:15, 16: „Jehovah, a Gado foe den fositen tata foe den, ibri tron baka ben tan seni [warskow] gi den nanga jepi foe den boskopoeman foe en, bika a ben abi sari-ati gi en pipel èn gi a tanpresi foe en. Ma den ben tan dreigi den boskopoeman foe a troe Gado doronomo èn den ben lagi den wortoe foe en èn ben spotoe den profeiti foe en, te leki na atibron foe Jehovah ben kon na tapoe a pipel foe en, te leki den no ben man kon betre moro.”

11. Sortoe djaranti noso trowstoe wi e kisi, foe a loyaalfasi foe Jehovah?

¹¹ Foe di Jehovah de a moro loyaal sma di de, meki na apostel Paulus ben kan skrifi na ini Romesma 8:38, 39: „Mi abi na overtoigi taki no wan dede noso libi, no wan engel noso tiri, no wan sani di de now noso wan sani di moesoe kon ete, no wan makti, no wan hei noso dipi, no wan tra mekisani sa man prati wi foe a lobi foe Gado, di de na ini Krestes Jesus, wi Masra.” Ija, Jehovah e gi wi a djaranti: „Mi no sa gowe libi oenoe kwetikweti, èn noiti mi no sa drai mi baka gi oenoe” (Hebrewsma 13:5). Troetroe, a de wan trowstoe foe sabi taki Jehovah Gado de loyaal ala ten!

Jesus Krestes, a loyaal Manpikin

12, 13. Sortoe boeweisi wi abi taki a Manpikin foe Gado de loyaal?

¹² Wan sma di e waka soifri na baka Jehovah ini a teki di wan sma e teki a tjalensi foe de loyaal, ben de èn de Jesus Krestes. A ben fiti taki na apostel Petrus ben teki Psalm 16:10 èn gebroiki disi foe taki foe Jesus Krestes na ini Tori foe den Apostel 2:27: „Joe no sa libi mi na ini Hades, èn joe no sa gi pasi taki a sma di de loyaal na joe, e si pori.” Jesus Krestes e froedini en taki den kari en a „loyaalwan”. A de loyaal dorodoro na en Tata èn na a Kownoekondre di Gado ben pramisi. Satan ben proeberi fosi foe broko a soifri retifasi foe Jesus foe di a ben gebroiki tesi, èn ben poti a prakseri na tapoe a denki di wan sma e denki en eigi afersi nomo. Di Didibri no ben man doe dati, dan a ben gebroiki froefolgoe, èn te foe kaba a ben meki taki Jesus dede na a pina-oedoe. Ala ten Jesus ben de loyaal na en hemel Tata, Jehovah Gado. — Mateus 4:1-11.

¹³ Jesus Krestes ben de loyaal na den bakaman foe en, foe di a ben hori ensrefi na a pramisi di skrifi na ini Mateus 28:20: „Loekoe! Mi de nanga oenoe ala den dei te na a kaba foe a seti foe sani.” Leki wan kontroe foe a pramisi dati, a ben de loyaal ini a doe di a ben doe en wroko leki edeman foe a gemeente foe en, foe a Pinksterfesa 33 G.T. te kon miti a ten disi.

Onvolmaakti libisma di ben de loyaal

14. Sortoe eksempre Job de foe wan sma di ben de loyaal?

¹⁴ We, san wi kan taki foe onvolmaakti libisma? Den kan de loyaal na Gado? Wi abi a spesroetoe kefal foe Job. Ini a kefal foe Job, Satan ben sori krin san ben de a tori. A ben de so, taki Job ben de loyaal na Jehovah Gado, noso taki a ben e dini en soso foe di a ben prakseri en eigi afersi nomo? Satan ben djaf taki a ben kan meki Job drai en baka gi Jehovah, te a ben o tjari problema kon gi Job. Di Job ben lasi ala den goedoe foe en, ala den pikin foe en, èn srefi en gosontoe, dan en wefi ben gi en tranga: „Floekoe Gado èn dede!” Ma Job ben de loyaal, bika a ben taigi en: „’Neleki fa wan oema sondro froestan e taki, na so joe e taki toe. Wi sa teki soso den boen sani foe a troe Gado èn no teki den ogri sani toe?’ Na ini ala den sani disi Job no ben sondoe nanga den mofoboeba foe en” (Job 2:9, 10). Foe taki en leti, Job ben taigi den man di ben moesoe trowstoe en: „Awinsi a [Gado] kiri mi, tokoe mi sa howpoe tapoe en” (Job 13:15, New International Version). A no de foe froewondroe taki Jehovah ben feni Job boen! Foe dati ede a ben taigi Elifas, a Teimanitsma: „Na ati foe mi kon faja nanga joe nanga den toe kompe foe joe, bika oenoe no taki troe sani foe mi, soleki fa mi foetoeboi Job doe.” — Job 42:7, 10-16; Jakobus 5:11.

15. Sortoe boeweisi bijbel e gi wi foe den foeroe foetoeboi foe Jehovah Gado di ben de loyaal?

¹⁵ Foe ala den man nanga oema di ben abi bribi èn di Hebrewsma kapitel 11 e taki foe den, wi kan taki den ben de loyaalwan. Den no ben de getrow nomo, ma den ben de loyaal toe di den ben kisi kwinsi. Dati meki wi e leisi foe den wan „di nanga jepi foe bribi . . . ben tapoe den mofo foe lew, ben man tapoe a krakti foe faja, ben man lowe gi a srapoe foe a feti-owroe . . . Ija, trawan ben kisi tesi foe di sma ben spotoe den èn ben krawasi den, ija, moro leki dati, foe di den ben poti den na boei èn na strafoe-oso. Sma ben ston den, sma ben tesi den, sma ben sá den na pisi, den ben dede foe di sma ben kiri den nanga a feti-owroe, den ben waka na ini skapoeskin, na ini krabitaskin, ala di den ben de na nowtoe, èn den ben de na ini banawtoe èn sma ben libi takroe nanga den.” — Hebrewsma 11:33-37.

16. Sortoe eksempre na apostel Paulus ben de foe wan sma di ben de loyaal?

¹⁶ Den kresten Griki Boekoe foe bijbel e sori a moi eksempre toe foe na apostel Paulus. Na wan joisti fasi a ben kan taigi kresten foe Tesalonika foe a diniwroko foe en: „Oenoe na kotoigi, èn Gado toe, fa wi ben sori oenoe taki wi de loyaal èn regtfardiki èn sondro fowtoe, oen bribiman” (1 Tesalonikasma 2:10). Na ini den wortoe di Paulus ben skrifi na ini 2 Korentesma 6:4, 5, wi abi moro boeweisi taki a ben de loyaal, èn wi e leisi drape: „Na ala fasi wi e rikomanderi wisrefi na Gado leki bedinari: foe di wi ben moesoe froedrage foeroe, foe banawtoe ede, foe nowtoe ede, foe problema ede, foe fonfon ede, foe strafoe-oso ede, foe djoegoedjoegoe ede, foe tranga wroko ede, foe di wi ben lasi sribi na neti, foe di wi no ben abi njanjan son tron.” Ala den sani disi e sori taki na apostel Paulus ben abi lespeki gi en ensrefi foe di a ben de loyaal.

Loyaal sma na ini a ten disi

17. Sortoe wortoe foe J. F. Rutherford ben sori taki a ben abi a fasti bosroiti foe de loyaal?

¹⁷ Te wi e loekoe a ten disi, dan wi abi a heri moi eksempre di wi ben si kaba na a bigin foe na artikel disi. Loekoe san skrifi na ini a boekoe Wereldomvattende zekerheid onder de „Vredevorst” (Seikerfasi na heri grontapoe ondro a „Kownoe foe Vrede”), tapoe bladzijde 146 ondro na ondro-edeprakseri di nen „A loyaalfasi di a ben na ini strafoe-oso”. Drape den e taki: „Di Joseph F. Rutherford, a presidenti foe a Waktitoren Genootschap, ben de na strafoe-oso, dan tapoe 25 december 1918 a ben skrifi wan brifi pe a ben sori taki a ben de loyaal na a organisâsi foe Jehovah. A ben skrifi: ’Foe di mi ben weigri foe meki skeki nanga Babilon, ma ben proeberi na wan getrowfasi foe dini mi Masra, meki mi de na strafoe-oso, èn mi breiti foe dati. . . . Moro betre A feni mi boen èn moro betre mi de na strafoe-oso, leki mi meki skeki nanga a Meti noso saka misrefi na en ondro èn de fri èn taki heri grontapoe breiti gi mi.’”b

18, 19. Sortoe heri moi eksempre wi abi foe sma di de loyaal na ini a ten disi?

¹⁸ Wi abi heri boen eksempre foe foeroe kresten di ben de loyaal èn di ben horidoro di den ben kisi froefolgoe. Na mindri foe den loyaal sma disi wi abi den Kotoigi foe Jehovah na Doisrikondre, na a ten di den Nasi ben tiri a kondre, soleki fa dati de foe si na tapoe a video di nen Purple Triangles, di someni eksemplaar foe en prati na ini Ingrisitongo. Moi eksempre toe na di foe den foeroe loyaal Kotoigi foe Jehovah na Afrika, soleki den wan na Malawi. Drape wan waktiman foe wan strafoe-oso ben taki foe a loyaalfasi foe den Kotoigi: „Noiti den sa tapoe foe hori densrefi na a bribi foe den. Na presi foe dati, den e kon moro foeroe.”

¹⁹ Wan sma no kan leisi den Jaarboek van Jehovah’s Getuigen (Jariboekoe foe Jehovah Kotoigi) di kon na doro no so langa ete, sondro taki a loyaalfasi foe den troe kresten e naki en ati, soleki den wan di de na Grikikondre, Mosambik, nanga Polen. Foeroe foe den ben kisi boen hebi skin-ati; trawan den ben kiri. Bladzijde 177 foe a Jaarboek 1992 e sori fowtow foe neigi kresten man na Etiopia di ben teki a tjalensi ini a tori foe loyaalfasi, te leki trawan ben kiri den. Wi no breiti taki wi leki Jehovah Kotoigi abi someni moi eksempre di e gi wi krakti foe teki a tjalensi ini a tori foe loyaalfasi?

20. San sa de a bakapisi te wi tan de loyaal?

²⁰ Te wi e kakafoetoe gi tesi èn gi kwinsi foe di wi tan loyaal, dan wi e kisi moro lespeki gi wisrefi. Foe dati ede, na sortoe sei foe a strei ini tori foe loyaalfasi wi wani de? Te wi e teki a tjalensi ini a tori foe loyaalfasi, dan wi e teki a sei foe Jehovah Gado ini a strei èn e boeweisi taki Satan Didibri na a ogri, takroe sortoe leiman! Na a fasi disi wi e meki taki wi Mekiman, Jehovah Gado, feni wi boen, èn wi kan kisi a pai foe wan kolokoe, têgo libi (Psalm 37:29; 144:15b). San a wani taki foe teki a tjalensi ini a tori foe loyaalfasi, wi sa go loekoe na ini a tra artikel.

[Foetoewortoe]

San joe ben sa piki?

◻ Foe san ede a de wan tjalensi foe de loyaal?

◻ Foe san ede wi kan taki dati „loyaalfasi” na wan heri spesroetoe wortoe?

◻ Sortoe eksempre bijbel e gi wi foe libisma di ben de loyaal?

◻ Sortoe moi eksempre wi abi foe sma di ben de loyaal na ini a ten disi?

[Prenki na tapoe bladzijde 18]

Charles Taze Russell

[Prenki na tapoe bladzijde 19]

Jesus troetroe ben de a „loyaalwan” foe Jehovah

[Prenki na tapoe bladzijde 20]

Job ben sori foe de loyaal na Gado, ala di a no ben de volmaakti

[Prenki na tapoe bladzijde 21]

Paulus ben de wan moi eksempre foe wan sma di ben de loyaal na Jehovah