Loyaalfasi — Fu sortu prèis?
„Nanga wan sma di de loyaal, yu sa handri loyaal.” — PSALM 18:25.
1, 2. (a) San na loyaalfasi, èn fa den difrenti sei fu en abi krakti na tapu wi libi? (b) Fu san-ede a de bun fu wi luku na Yehovah leki wi tumusi bun Eksenpre?
TAIHORI, plekti, lobi, fruplekti, kotrowfasi. San den wortu disi abi fu du nanga makandra? Den de difrenti sei fu loyaalfasi. Loyaalfasi na wan gado eigifasi di e kon fu wan dipi firi ini a gi di yu e gi yu srefi ini a dini fu Gado. Ma gi furu sma na ini a ten disi, loyaalfasi wani taki pikinso nomo. Taihori na wan trowpatna, fruplekti na owru famiriman, kotrowfasi fu wan wrokoman na en basi — na ini ala den sani disi sma e handri na wan mi-no-kefasi èn furutron den no e hori den srefi na den gronprakseri fu den. Èn san e psa te wan strei fu loyaalfasi opo ede kon? Di no so langa psa kba, na ini Ingrisikondre, wan man di e hori buku fu monitori ben fruteri na waarheid fu na moni afersi fu na maatschappij fu en na den sma di e tyek luku efu belasting pai, a ben lasi en wroko.
2 A de makriki fu taki nomo fu loyaalfasi, ma trutru loyaalfasi musu abi na horibaka fu den du pe gronprakseri no e poti a wan sei fu frede ede. Leki onvolmaakti libisma, wi e misi ini disi furutron. Fu dati-ede a de bun fu wi luku na eksenpre fu wan sma di yu no kan tweifri srefisrefi na a loyaalfasi fu en, Yehovah Gado srefi.
Loyaalfasi di sori leki eksenpre
3. Fa Yehovah ben sori taki a ben de loyaal na a prakseri fu en di skrifi na ini Genesis 3:15?
3 Di Adam ben sondu, Yehovah ben tyari a prakseri fu en kon a krin fu frulusu na libismafamiri di no ben gebore ete. Na fondamenti fu na du disi ben de na lobi fu en gi na libisma mekisani fu en (Yohanes 3:16). Baka wan pisi ten, dan Yeises Krestes, na pramisi siri di Genesis 3:15 ben taki a fesi fu en, ben sori taki a ben de na frulusu-ofrandi, èn a no ben sa kan fu na sei fu Yehovah fu drai mofo ini a tori fu na prakseri fu en di a ben tyari kon a fesi. Te wi e teki na ofrandi fu Yeises, dan na bribi fu wi no sa meki wi kisi syen. — Rome sma 9:33.
4. Fa Yehovah ben sori taki a ben de loyaal na Yeises, èn sortu bakapisi disi ben abi?
4 Na de di Yehovah ben de loyaal na Yeises ben tranga na Manpikin srefisrefi di a ben de na grontapu. Yeises ben sabi taki a ben musu kon tanapu na fesi dede, èn a ben abi na fasti bosroiti fu tan loyaal na en Gado te na a kba. Di a ben teki dopu èn ben kisi salfu nanga santa yeye, dan moro furu sabi fu en libi bifo a ben tron libisma ben tyari kon a krin gi en. Na neti di den ben tori en, a ben begi fu a mag drai go baka na en hemel Tata, na ’a glori di a ben abi na Yehovah sei bifo grontapu ben de’ (Yohanes 17:5). Fa disi ben sa kan? Soso efu Yehovah no ben o libi en loyaal Manpikin na ini grebi fu si pori. Yehovah ben opo en fu dede fu no dede moro èn na so fasi ben meki na profeititori di skrifi na ini Psalm 16:10 kontru na wan loyaal fasi: „Yu no sa libi mi sili na ini Syeool.” — Tori fu den Apostru 2:24-31; 13:35; Openbaring 1:18.
5. Sortu tra loyaal du abi fu du nanga den pramisi fu Yehovah na Yeises?
5 Baka en opobaka, Yeises so srefi ben sabi taki a ben sa kan frutrow tapu den wortu fu Yehovah fu ’poti en feianti leki wan futubangi fu en futu’ (Psalm 110:1). Na ten dati ben doro na ini 1914, na a kba fu „den faste ten fu den nâsi”, di na Kownukondre ben opo na ini hemel. Na pramisi taki Yeises ben sa kisi na makti na tapu den feianti fu en ben bigin kontru nanga na iti di den ben iti Satan nanga den ogri-yeye fu en komoto fu hemel. A sa doro wan heimarki te den sa sroto den fu dusun yari langa na ini a peti di no abi gron èn „den kownu fu grontapu nanga den legre fu den” kisi pori. — Lukas 21:24; Openbaring 12:7-12; 19:19; 20:1-3.
6. Sortu howpu di de seiker Gado e poti na wi fesi, èn fa wi kan sori na warderi fu wi gi disi?
6 Na psalmsingiman ben gi deki-ati: „Howpu tapu Yehovah èn hori en pasi, èn a sa hei yu fu teki na grontapu abra” (Psalm 37:34). Wi kan frutrow na tapu, taki Yehovah sa go doro fu hori en wortu, èn taki a sa tyari man, uma nanga pikin, di ’e hori en pasi’, pasa leti a mindri na kba fu na gadolowsu grontapu disi. Den wortu ’e hori en pasi’ ini na Hebrewtongo e tyari na prakseri kon abra fu fayafasi èn so srefi fu kotrowfasi ini a dini fu Yehovah. Fu dati-ede, a no de now na ten fu kon weri ofu fu gi den dienstgrani baka di wi kisi. Disi na a ten fu wi span wi srefi ini loyaal diniwroko gi wi Gado nanga en kownukondre (Yesaya 35:3, 4). Tumusi bun eksenpre de fu gi wi deki-ati. Meki wi luku wantu fu den.
Den famiri-edeman e sori loyaalfasi
7, 8. (a) Sortu wroko Yehovah ben gi Noa nanga en famiri fu du? (b) Fa na famiri fu Noa ben buweisi taki den ben de warti fu kisi na kibri fu Gado ini na ten fu na frudu di ben kon na a heri grontapu?
7 Di Yehovah ben poti na en prakseri fu wan bigi frudu pori wan gadolowsu libisma libimakandra, a ben meki wan frubontu nanga na famiri-edeman Noa fu hori en famiri na libi èn fu a libi go doro na tapu na grontapu disi (Genesis 6:18). Noa ben de grantangi gi na kibri fu na sei fu Gado di ben poti na en fesi, ma en nanga en famiri ben musu buweisi taki den de warti fu dati. Fa? Fu di den ben du san Yehovah ben komanderi. Fosi den ben si den srefi na fesi na kefarlek bigi wroko fu bow na ark. Te na ark ben sa klari, dan Noa ben sa musu furu en nanga wantu meti, di ben sa teki na presi fu ala den meti, èn nanga nofo nyanyan fu hori den na libi fu wan langa pisi ten. Ma dati no ben de ala. Ini a langa ten fu sreka sani, Noa ben du ala san a ben man na ini wan preikiwroko di noiti ben feni presi ete, fu warskow fu na krutu fu Gado di ben o kon. — Genesis kapitri 6 nanga 7; 2 Petrus 2:5.
8 Na beibri e fruteri wi taki „Noa ben du ala sani di Gado ben komanderi en fu du. Yoisti so a ben du” (Genesis 6:22; 7:5). Noa nanga en famiri ben sori taki den ben de loyaal na ini na du fu den wroko di den ben kisi fu du. Na yeye fu ófer den srefi ben meki den kobroiki den ten na wan bun fasi, ma na wroko ben de tranga èn na preikiwroko muilek. Taki den manpikin fu Noa nanga den uma no ben kisi pikin bifo na Frudu, ben yepi fu den hori den prakseri na tapu na wroko di den ben kisi fu du èn fu seti den aktiviteit bun. Na ogri Frudu dati ben tyari wan regtfardiki kba kon na wan gadolowsu seti fu sani. Soso Noa, en uma nanga den dri manpikin fu den nanga den pikinwefi fu den ben tan a libi. Wi kan breiti taki den ben de loyaal na Gado èn na den instruktie fu en, bika ibriwan fu wi en rutu komoto langalanga fu Noa nanga yepi fu Sem, Cham ofu Yafet. — Genesis 5:32; 1 Petrus 3:20.
9. (a) Fa na tesi di Yehovah ben tesi Abraham ben de wan tesi fu en loyaalfasi? (b) Fa Isâk ben sori loyaalfasi ini a tori disi?
9 Di Abraham ben sreka fu ófer Isâk leki wan ofrandi, a ben handri fu di a gi na wan kotrow fasi yesi na Yehovah komando. Fa a ben de wan tesi na tapu en loyaalfasi! Ma Yehovah ben hori na anu fu Abraham èn ben taki: „Now mi sabi taki yu e frede Gado, fu di yu no hori kibri yu manpikin, yu wan enkriwan, gi mi.” Ma wi e du bun, fu prakseri san ben psa bifo dati. Ini a pisi ten fu a dri dei waka go na a bergi Moria, Abraham seiker ben abi nofo ten fu wegi sani go-kon èn fu kenki en prakseri. Èn fa a ben de nanga Isâk, di ben tyari na udu fu na srakti-ofrandi èn di ben gi pasi fu den tai en anu nanga futu? A no ben degedege na ini na kotrowfasi fu en na en papa, Abraham, so srefi a no ben tweifri na a ról di a ben musu prei, ala di a ben gersi taki en loyaal fasi fu handri ben sa meki a lasi en libi. — Genesis 22:1-18; Hebrew sma 11:17.
Kresten loyaalfasi
10, 11. Den fruku kresten e gi sortu eksenpre fu loyaalfasi?
10 Yehovah alaten ben handri na ini tru loyaalfasi. ’Tron bakaman fu Gado’, na apostru Paulus e gi deki-ati (Efesia sma 5:1, 2). So leki fa den famiri-edeman ben handri, na so kresten ben musu handri. Den fruku kresten ben gi tumusi bun eksenpre fu loyaalfasi ini anbegi, so leki fa na ondrofenitori di e kon e sori.
11 Na Romeini keisri Constantius I, na papa fu keisri Constantijn, leki fa a sori ben abi dipi respeki gi den bakaman fu Yeises Krestes. Fu tesi na loyaalfasi fu den kresten di ben abi fu du nanga en paleisi, a ben fruteri den taki den ben kan tan na ini na dienst fu en soso efu den ben agri fu tyari ofrandi na kruktugado. Efu den ben weigri, na so den ben taigi den, dan dati ben sa abi leki bakapisi taki den o seni den gwe èn a ben sa teki refensi na tapu den. Nanga na senpel triki disi, Constantius ben wani fu kon sabi den wan di noiti ben sa libi den gronprakseri fu den loyaalfasi fu den a wan sei. Den wan di ben sori taki den de loyaal na Gado nanga den gronprakseri fu en ben tan na ini na dienst fu na keisri, èn sonwan srefi ben tron frutrow raiman. Den wan di no ben de loyaal na a komando fu Gado den ben puru na wroko na wan syen fasi.
12. Fa kresten opziener musu sori loyaalfasi, èn fu san-ede disi de tumusi prenspari fu na bun fu na gemeente?
12 Ala di loyaalfasi musu sori na ini a libi fu ala kresten, toku den e kari en spesrutu na ini Titus 1:8 na ini na rij fu den eigifasi di de fanowdu fu wan man kan de wan kresten opziener. William Barclay e taki taki hoʹsi·os, na Grikitongo wortu di ben poti dyaso abra nanga „loyaalfasi”, e sori tapu „na man di e gi yesi na den têgo wèti di ben de èn di de bifo ala den wèti di libisma meki”. A de tumusi prenspari taki owruman e teki so wan loyaal bosroiti fu gi yesi na den wèti fu Gado. Na yoisti eksenpre disi sa yepi na gemeente fu gro èn de tranga nofo fu kakafutu gi ala tesi nanga druk di de wan kofar gi na gemeente leki grupu ofu gi den aparti memre fu en (1 Petrus 5:3). Owruman di den ben poti na wroko e tyari wan bigi frantiwortu na fesi na ipi fu no poti noiti den gronprakseri fu a loyaalfasi fu den na Yehovah a wan sei, bika na gemeente e kisi na rai fu ’waka na baka a bribi fu den’. — Hebrew sma 13:7.
Loyaalfasi — fu sortu prèis?
13. San den e bedul nanga na prakseri „Ala sma abi den prèis”, èn sortu eksenpre e gersi taki den e horibaka gi disi?
13 „Ala sma abi den prèis” na wan prakseri di sma e fruteri, taki na Sir Robert Walpole, wan fosi minister fu Ingrisikondre fu na di fu tina-aiti yarihondro, ben taki. Heri moi a e sori syatu na tru tori taki na ini a heri historia sma ben seri furutron den loyaalfasi fu den fu gridi wini ede. Luku William Tyndale, di ben poti na beibri abra, èn di ben meki na fowtu fu teki Henry Phillips leki wan loyaal mati. Na wan no-loyaal fasi Phillips ben tori Tyndale na den feianti fu en na ini 1535, san ben abi leki bakapisi taki wantronso den ben sroto Tyndale èn a ben lasi en libi bifo en ten ben doro. Wán historiaman e taki taki Phillips, di kande ben de wan wrokosani fu na Ingrisi kownu ofu den Ingrisi Katolik, „ben kisi bun pai gi en Yudas-wroko”. Na historiaman, a no de fu taki, ben sori go na Yudas Iskariot, di ben teki 30 solfru moni leki na prèis fu tori Yeises Krestes. Fu den eksenpre disi wi no musu go denki taki na „prèis” fu na loyaalfasi fu wan sma alatron de moni. Dati no de so.
14. Fa na loyaalfasi fu Yosef na Yehovah ben kon ini tesi, èn nanga sortu bakapisi?
14 Di na uma fu Potifar ben aksi Yosef tranga fu kon ’didon na [en]’, dan na loyaalfasi fu Yosef na Yehovah ben kon ini tesi. San a ben sa du? Fu di na ini en yeye Yosef ben si krinkrin sortu gronprakseri ben de ini a du disi, meki a ben lon komoto fu na oso, nanga na fasti bosroiti taki noiti a ’ben sa kan du na bigi ogri disi èn fu tru sondu na Gado’. Na prisiri fu seks di ben poti na en fesi no ben kan broko na loyaalfasi fu Yosef na en Gado, Yehovah. — Genesis 39:7-9.
15. Fa Absalom ben sori taki a no ben de loyaal, èn nanga sortu bakapisi?
15 Ma tra kofar de ete; ambisi kan nyan loyaalfasi na ondro. Dati ben de na buweigi fu ati baka na opruru di Absalom ben meki nanga en papa, kownu David. Nanga yepi fu konplot nanga triki Absalom ben pruberi fu wini na bun-ati fu na pipri. Te fu kba, a ben tyari wan legre kon makandra fu opo feti nanga den loyaal bakaman fu en papa. Na dede fu en nanga na anu fu Yoab ben tyari wan kba kon na a no-loyaalfasi fu Absalom na en papa, David, ma fa a ben musu pai wan prèis fu na pruberi di a ben pruberi fu trowe na teyokrasia seti! — 2 Samuwel 15:1-12; 18:6-17.
Wan loyaalfasi sondro prèis
16. San 2 Korente sma 11:3 e tyari kon a krin fu den buweigi fu ati fu Satan?
16 Ala di Satan e taki taki ala sma abi en prèis, èn disi ben de tru ini a tori fu Absalom, toku a no ben de so nanga Yosef, èn noiti a ben de tru nanga loyaal anbegiman fu Yehovah. Toku Satan sa pristeri ibri sortu sani fu kisi wi so fara fu broko wi loyaalfasi na wi Mekiman. Na apostru Paulus ben taki taki a frede taki „tapu wan ofu tra fasi, so leki a sneki nanga en triki ben kori Eifa”, na so na denki fu wi ben sa kon pori, san ben sa abi leki bakapisi taki wi no e hori na wi loyaalfasi na Yehovah èn na na anbegi fu en. — 2 Korente sma 11:3.
17. San sonwan ben teki ini na presi fu den diri dienstgrani?
17 A fiti fu wi aksi wi srefi: ’Wan prèis de di mi ben sa teki ini na presi fu na grani fu mi fu anbegi mi Mekiman loyaal?’A de wan sari sani, taki sonwan di ben de dienstknekti fu Yehovah di ben gi den srefi abra ben handri tra fasi leki Yosef èn ben aksi pikinso nomo ini a kenki fu loyaalfasi. Srefi son owruman ben seri den diri grani fu santa dienst, fu nyan fu wan pisiten prisiri fu hurudu. Efu sma de wan owruman ofu no, furu fu den wan di e du disi ben lasi fu alaten na famiri wánfasi, na lobi nanga respeki fu na gemeente èn na bun-ati fu Yehovah, di de yoisti na Sma di kan gi na tranga fu tan loyaal èn fu kakafutu gi ala sortu tesi fu Satan. — Yesaya 12:2; Filipi sma 4:13.
18. Fu san-ede a de prenspari fu gi yesi na a warskow fu 1 Timoteyus 6:9, 10?
18 Trawan, fu a bosroiti fu go na fesi na ini grontapu sani fu ambisi ede, ben „boro den srefi na ala sei nanga furu pen”, awasi den ben sabi den krin warskow na ini na beibri (1 Timoteyus 6:9, 10). Demas, wan kresten di Paulus e taki fu en, ben lasi ala sani fu na reide disi, kande fu wan syatu pisiten ofu fu alaten (2 Timoteyus 4:10). Noiti wan sma kan drifi komoto fu en loyaalfasi na Yehovah sondro fu kisi ranpu leki bakapisi. „Gado no e meki sma spotu nanga en. San wan sma e sai, na dati a sa koti tu.” — Galasia sma 6:7.
19, 20. (a) San na wantu fu den kofar di tai na a luku di wan sma e luku tumusi furu telefisi? (b) Sortu eksenpre wán famiri fu Kotoigi ben poti?
19 Son leisi na prèis fu kon na wan kruderi e sori en srefi na wan heri fini fasi. Fu eksenpre, wan bericht fu Verenigde Staten fu Amerkankondre e taki taki furu famiri e kobroiki kande afu fu ala den yuru di den no e sribi fu luku telefisi na oso, yongu sma spesrutu de wan srafu fu en. Efu wan kresten ben sa gi en yeye nyanyan moro furu nanga a luku fu telefisi, nanga en seks èn ogridu, a ben sa kan pori den kresten gronprakseri fu en heri esi. Dati makriki ben sa kan abi leki bakapisi taki a no kon de loyaal moro, e de wan freimde sma na ini Yehovah ai. Na sortu takru demakandra disi e pori bun gwenti (1 Korente sma 15:33). Wi no musu frigiti taki den Buku e frumane wi fu teki ten fu stuka Yehovah Wortu èn fu denki dipi fu en. Tumusi furu ten di sma e lusu span na fesi wan telefisi de wan reti kenki di wi e kenki ten di wi ben kan kobroiki fu kisi sabi di e tyari wi go na têgo libi leki wan loyaal anbegiman fu Yehovah? Furu sma di kisi sabi fu na waarheid na ini a ten disi, ben musu fu tyari bigi kenki kon na ini na fasi fa den e denki ini a tori disi. — 1 Timoteyus 4:15, 16; 2 Timoteyus 2:15.
20 Takasyi na wan Japan zakenman di e libi na ini Ingrisikondre. Moro furu fu den neti a ben gwenti fu sidon dri ofu fo yuru e luku telefisi nanga en famiri. Baka di en nanga en uma ben teki dopu dri yari psa kba, a ben teki na bosroiti taki studeri nanga en srefi nanga famiri beibristudi musu teki na fosi presi. Fu di a tyari na luku di a e luku telefisi go na kande 15 ofu 30 miniti gemiddeld ibri dei, a ben teki fesi na ini na famiri na wan bun fasi. Ala di Takasyi musu studeri nanga tu Beibri, wan Ingrisitongowan èn wan Japanwan, toku a ben gro esi-esi na yeye fasi èn now a e dini leki wan dinari na ini a diniwroko na ini wan Ingrisitongo gemeente. Na uma fu en de wan yepi pionier. „Fu kibri na yeyefasi fu den tu yongu boi fu wi,” a e taki, dan „ibri dei mi e luku so srefi bunbun sortu programa mi uma nanga mi e gi den primisi fu luku na tapu telefisi.” Na dwengi disi fu yu srefi e gi bun bakapisi.
21. San wi sabi fu den triki fu Satan, èn fa wi kan kibri wi srefi?
21 Wi kan de seiker fu disi: Satan e sabi den swakifasi fu wi, kande moro betre leki wi srefi e sabi den. A no sa meki noti stóp en fu pruberi fu meki wi no hori tranga na gronprakseri ofu fu swaki wi kotrowfasi na Yehovah. (Teki gersi Mateyus 4:8, 9.) Fa wi kan kibri wi srefi dan? Fu di wi e denki alaten na a gi di wi ben gi wi srefi abra èn fu di wi e feni prisiri ini na kweki fu bekwaamfasi ala di wi e dini den yeye fanowdu fu trawan. Leki loyaal diniman fu Yehovah, wi musu tan de bezig na ini na dienst fu en èn musu meki na santa Wortu fu en tyari wi alaten. Disi sa yepi wi ini wi faste bosroiti taki no wan enkri prèis di Satan oiti ben sa kan pristeri wi, sa meki wi drifi komoto fu loyaalfasi na Gado. — Psalm 119:14-16.
Fa yu e piki?
◻ Fa Yehovah nanga Yeises ben sori loyaalfasi?
◻ San na wantu tra beibri eksenpre fu loyaalfasi?
◻ San Satan ben sa kan pristeri wi ofu kan pruberi fu du?
◻ Fa wi kan tranga wi srefi fu tan loyaal ini wi anbegi fu Yehovah?