Dini nanga na organisâsi foe Jehovah na wan loyaal fasi
„Nanga wan sma di de loyaal, joe sa handri na wan loyaal fasi.” — 2 SAMUÈL 22:26.
1, 2. San na wan toe eksempre foe loyaalfasi di wi alamala kan si na ini a gemeente?
LATILATI wan neti wan owroeman e sreka wan lezing gi wan kresten konmakandra. A ben sa wani stòp èn teki wan bro; na presi foe dati, a e tan wroko, e soekoe eksempre nanga agersitori foe bijbel di sa doro na ati foe sma èn gi na ipi deki-ati. A neti foe a konmakandra, wan papa nanga mama di weri srefisrefi èn di de foe a srefi gemeente dati, ben sa lostoe foe tan wan neti na oso; na presi foe dati, den e sreka den pikin foe den nanga pasensi èn den e go na a konmakandra. Baka a konmakandra, wan groepoe kresten e taki foe a lezing foe na owroeman. Wan sisa e kisi a firi foe taki dati a srefi brada dati di ben hati den firi foe en wan leisi; na presi foe dati, a e taki fajafaja foe wan foe den penti di a brada ben taki foe en. Joe e si a wán thema di de na ini ala den situwâsi disi?
2 A thema dati na loyaalfasi. Na owroeman e wroko foe dini na ipi foe Gado na wan loyaal fasi; a papa nanga mama e go na den gemeente konmakandra na wan loyaal fasi; a sisa e horibaka gi den owroeman na wan loyaal fasi (Hebrewsma 10:24, 25; 13:17; 1 Petrus 5:2). Ija, na tapoe ala kontren foe a libi, wi e si taki a pipel foe Gado abi a fasti bosroiti foe dini nanga na organisâsi foe Jehovah na wan loyaal fasi.
3. Foe san ede a de so prenspari taki wi e tan loyaal na Jehovah en organisâsi na grontapoe?
3 Te Jehovah e loekoe san e pasa na ini a pori grontapoe disi, dan a e si taki pikinso sma nomo de loyaal (Mika 7:2). Fa en ati moesoe djompo foe prisiri te a e si a loyaalfasi foe en pipel! Ija, joe eigi loyaalfasi e prisiri en. Ma disi e meki taki Satan, a fosi oproeroeman, e kisi bigi atibron, èn a de wan boeweisi taki a de wan leiman (Odo 27:11; Johanes 8:44). Joe kan froewakti taki Satan sa proeberi foe swaki a loyaalfasi foe joe na Jehovah èn na En organisâsi na grontapoe. Kon meki wi loekoe wan toe fasi fa Satan e doe disi. Na so fasi wi kan si moro betre fa wi kan tan loyaal te na a kaba. — 2 Korentesma 2:11.
Efoe wi e poti prakseri na tapoe onvolmaaktifasi, dan dati kan swaki wi loyaalfasi
4. (a) Foe san ede a de makriki foe soekoe fowtoe na den sma di abi makti? (b) Fa Korak ben sori taki a no ben de loyaal na a organisâsi foe Jehovah?
4 Te wan brada abi wan frantiwortoe posisi, dan den fowtoe foe en de moro krin foe si kande. A de troetroe makriki foe kroetoe na tapoe ’wan pikin drei grasi na ini na ai foe wi brada ala di wi no e si a barki na ini wi eigi ai’! (Mateus 7:1-5) Ma te wi e tan soekoe fowtoe na sma, dan dati kan abi leki bakapisi taki wi no de loyaal. Leki eksempre, loekoe a difrenti na mindri Korak nanga David. Korak ben tjari foeroe frantiwortoe, èn kande a ben de loyaal foeroe jari langa kaba, ma a ben wani wan moro hei posisi. A ben kon atibron nanga a makti di Moses nanga Aron, en omoepikin, ben abi. Ala di Moses ben de a moro safri-ati sma di ben de, tokoe soleki fa a sori, Korak ben bigin soekoe fowtoe na en. Kande a ben feni fowtoe na Moses. Ma den fowtoe dati, no ben gi Korak a reti foe no de loyaal na a organisâsi foe Jehovah. A ben koti poeroe na mindri foe a gemeente. — Numeri 12:3; 16:11, 31-33.
5. Foe san ede David ben sa kisi a firi foe meki oproeroe teige Saul?
5 David, na a tra sei, ben dini na ondro kownoe Saul. Saul, di fosi ben de wan boen kownoe, ben tron wan godelowsoe sma troetroe. David ben abi bribi, horidoro, èn srefi pikinso koni fanowdoe, foe kakafoetoe gi den ogri sani di Saul ben doe foe djaroesoe ede. Tokoe, di David ben abi wan okasi foe teki refensi, a ben taki dati ’soleki fa Jehovah e si en, dan a no ben kan kwetikweti’, taki en ben o doe wan sani di no de loyaal teige a sma di Jehovah ben salfoe. — 1 Samuèl 26:11.
6. San wi no moesoe doe noiti, srefi efoe wi e si swakifasi nanga fowtoe na ini owroeman?
6 Te a gersi leki son wan di e teki fesi na mindri wi, e teki wan fowtoe bosroiti, e taki grofoe, noso a gersi leki den lobi wan sma moro leki wan trawan, dan wi sa kroetoekroetoe na den tapoe, èn kande e jepi taki sma na ini a gemeente e go soekoe fowtoe na trawan? Wi no sa go na den kresten konmakandra moro foe di wi wani sori taki wi no e agri? Kwetikweti! Neleki David, noiti wi no sa gi pasi taki den fowtoe foe tra sma e meki taki wi no de loyaal na Jehovah nanga na organisâsi foe en! — Psalm 119:165.
7. San na wan toe kroeka sani di ben opo kon na ini a tempel na Jerusalem, èn fa Jesus ben denki foe dati?
7 A moro bigi eksempre di wan libisma ben gi ini a tori foe loyaalfasi, ben de Jesus Krestes, èn den e taki foe en leki a „loyaalwan” foe Jehovah, na ini wan profeititori (Psalm 16:10). A kroeka fasi fa den ben gebroiki a tempel na Jerusalem ben moesoe meki a de wan tjalensi foe de loyaal. Jesus ben sabi taki a wroko foe a granpriester nanga den ofrandi ben prenki en eigi diniwroko èn a dede di a ben o dede leki wan ofrandi, èn a ben sabi o prenspari a ben de gi sma foe leri wan sani foe disi. Dati meki a ben abi leti foe kisi faja atibron di a ben si taki a tempel ben kon tron wan „presi pe foefoeroeman e tan”. Nanga a makti di Gado ben gi en, a ben krin a tempel toe leisi. — Mateus 21:12, 13; Johanes 2:15-17.
8. (a) Fa Jesus ben sori taki a ben de loyaal na a tempel seti? (b) Fa wi kan sori taki wi e warderi en taki wi e anbegi Jehovah makandra nanga en krin organisâsi?
8 Tokoe Jesus ben horibaka gi a tempel seti na wan loyaal fasi. Sensi di a ben de pikin nengre, a ben go na den fesa na a tempel èn nofotron a ben gi leri drape. A ben pai a tempel belasting srefi — ala di a no ben de froeplekti troetroe foe doe dati (Mateus 17:24-27). Jesus ben prèise a pôti weduwe foe di a ben poti „ala san a ben abi foe tan na libi” na ini a tempel monikisi. Sjatoe baka dati, Jehovah ben drai en baka gi a tempel foe ala ten. Ma te nanga a ten dati, Jesus ben de loyaal na a tempel (Markus 12:41-44; Mateus 23:38). Jehovah en organisâsi na grontapoe na ini a ten disi, hei moro a djoe sistema nanga a tempel foe den. A troe, taki a no de volmaakti; dati meki kenki moesoe kon son leisi. Ma a no lai nanga kroekafasi, èn Jehovah Gado no abi na prakseri toe foe poti wan tra sani na ini en presi. Noiti wan onvolmaakti fasi di wi e si na ini na organisâsi moesoe meki wi kisi bita-ati noso wan fasi foe soekoe fowtoe na sma noso foe kon de wan sma di e kroetoekroetoe. Na presi foe dati, meki wi abi a loyaalfasi foe Jesus Krestes. — 1 Petrus 2:21.
Wi eigi onvolmaaktifasi
9, 10. (a) Fa Satan en seti foe sani e wroko tapoe den onvolmaaktifasi foe wi, so taki a kan kori wi foe tjari wisrefi na wan fasi di no de loyaal? (b) San wan sma, di doe wan serjoesoe sondoe, moesoe doe?
9 Satan e proeberi toe foe poesoe wi meki wi no de loyaal foe di a e wroko tapoe den onvolmaaktifasi foe wi. A seti foe sani foe en e wroko tapoe den swakifasi foe wi, èn e kori wi foe doe sani di no boen na ini Jehovah ai. A de wan sari, taki ibri jari doesoendoesoen sma e broko kindi gi hoeroedoe. Son sma e meki a fasi disi foe no de loyaal kon moro ogri ete foe di den e libi wan dobroe libi, èn e tan doe sondoe, ala di den e doe neleki den tan de getrow kresten. Wan jongoe oema ben taki wan sani foe a tori disi di ben de na ini den artikel „Wat jonge mensen vragen . . . ” di e kon na ini den Ontwaakt! tijdschrift doronomo, èn a ben skrifi: „Den artikel ben taki soifri foe a libi foe mi.” Na kibrifasi a ben kon abi matifasi nanga jongoe sma di no ben lobi Jehovah. San ben de a bakapisi? A e skrifi: „A libi foe mi ben kon takroe srefisrefi, mi ben kisi foe doe nanga hoeroedoe èn mi ben abi foe kisi piri-ai. A matifasi di mi ben abi nanga Jehovah ben kon pori, èn mi papa nanga mama nanga den owroeman no ben froetrow mi moro.”
10 A jongoe oema disi ben kisi jepi foe den owroeman èn ben kon dini Jehovah loyaal baka. Ma a de wan sari, taki foeroe sma e kisi moro ogri bakapisi, èn son wan foe den no e kon baka na a gemeente noiti moro. O moro boen a de foe de loyaal èn foe kakafoetoe gi tesi foe a godelowsoe grontapoe disi! Poti prakseri na tapoe den warskow na ini den Waktitoren nanga Ontwaakt! tijdschrift di e taki foe tori leki grontapoe demakandra èn takroe sortoe ontspanning. Meki a de so taki noiti joe e go doe wan sani di no de loyaal. Ma efoe dati ben sa pasa, dan noiti no doe neleki joe de tra fasi (Psalm 26:4). Na presi foe dati, aksi jepi. Dati na foe san ede kresten papa nanga mama nanga owroeman de. — Jakobus 5:14.
11. Foe san ede a no ben o boen efoe wi e si wisrefi leki sma di no takroe srefisrefi, èn sortoe bijbel gronprakseri ben kan jepi wi foe kisi wan tra prakseri?
11 Den onvolmaaktifasi foe wi kan tjari wi kon ini kefar na wan tra fasi. Son sma di no ben de loyaal, tapoe foe proeberi foe plisi Jehovah. Memre taki David ben doe wan toemoesi serjoesoe sondoe. Ma tokoe, wan heri pisi ten baka a dede foe David, Jehovah ben memre en leki wan getrow foetoeboi (Hebrewsma 11:32; 12:1). Foe san ede? Foe di noiti a no ben tapoe foe proeberi foe plisi Jehovah. Odo 24:16 e taki: „A regtfardikiwan kan fadon seibi tron srefi, èn seiker a sa opo tanapoe; ma rampoe sa meki den godelowsoewan naki foetoe fadon.” Seiker, efoe wi e doe pikinpikin sondoe — ija ibritron baka — foe di wi abi wan swakifasi di wi e feti nanga en, dan tokoe wi kan de regtfardiki ete na ini Jehovah ai efoe wi e tan „opo tanapoe” — dati wani taki, abi opregti berow èn go doro foe dini na wan loyaal fasi. — Teki gersi 2 Korentesma 2:7.
Loekoe boen nanga den trikifasi di abi foe doe nanga a de di wan sma no de loyaal
12. Fa wan toemoesi strak fasi foe si sani akroederi a wet nomo, ben meki taki sma no ben de loyaal, soleki fa dati ben de nanga den Fariseiman?
12 A de di wan sma no de loyaal e kon toe na moro triki fasi. Wan sma di no de loyaal, kan doe srefi leki a de loyaal! Foe eksempre, den Fariseiman na ini a ten foe Jesus, ben denki foe densrefi kande taki den ben de loyaal srefisrefi. Ma den no ben si a difrenti na mindri a de di wan sma de loyaal nanga wan sma di e hori ensrefi tranga na wet di libisma meki, bika den ben de strak srefisrefi èn ben kroetoe sma na wan ogri-ati fasi. (Teki gersi Preikiman 7:16.) Te joe loekoe en boen, dan ini a tori disi den no ben de loyaal — no na a pipel di ben moesoe dini, no na san a troetroe marki foe a Wet ben de di den ben taki dati den ben leri en na sma, èn no na Jehovah srefi. Jesus, na a tra sei, ben de loyaal na san a Wet ben wani taki, san ben abi en fondamenti na tapoe lobi. Dati meki a ben bow a pipel èn ben gi den deki-ati, neleki san den profeititori di e taki foe a Mesias, ben taki na fesi. — Jesaja 42:3; 50:4; 61:1, 2.
13. (a) Fa kresten papa nanga mama ben kan de sma di no de loyaal? (b) Foe san ede papa nanga mama moesoe loekoe boen taki den no de toemoesi strak, den no e kroetoekroetoe toemoesi, noso e taki negatief te den den e gi den pikin foe den tranga leri?
13 Kresten di abi makti te na wan seiker marki, e kisi foeroe wini foe na eksempre di Jesus ben gi ini a tori disi. Foe eksempre, loyaal papa nanga mama sabi taki den moesoe gi den pikin foe den tranga leri (Odo 13:24). Tokoe den e sorgoe taki den no e tanteri den jongoewan foe den nanga wan ogri-ati sortoe tranga leri di den e gi foe di den de nanga atibron noso, nanga a kroetoe di den e kroetoe den pikin foe den doronomo. Efoe pikin abi a firi taki noiti den no kan plisi a papa nanga mama foe den, noso den e denki taki na anbegi foe a papa nanga mama e meki den tron sma di e soekoe fowtoe na trawan èn di e kroetoe sma nomo, dan dati kan meki den pikin lasi-ati, èn a bakapisi de taki den sa hari densrefi poeroe foe a troe bribi. — Kolosesma 3:21.
14. Fa kresten skapoeman kan sori taki den de loyaal na a ipi di den e dini?
14 So a de toe, taki kresten owroeman nanga opziener di e rèis e poti prakseri na tapoe den problema nanga den kefar di na ipi e kisi foe doe nanga dati. Leki loyaal skapoeman, den e gi rai te disi de fanowdoe, den e sorgoe taki den sabi ala troetori fosi èn den e loekoe boen taki san den e taki, abi en gron tapoe bijbel èn tapoe den poeblikâsi foe a Genootschap (Psalm 119:105; Odo 18:13). Den sabi toe, taki den skapoe e froetrow tapoe den foe bow den na jejefasi èn foe gi den njanjan. Dati meki den e soekoe foe waka baka Jesus Krestes, a Moro Boen Skapoeman. Ibri wiki den e jepi den skapoe na den kresten konmakandra na wan loyaal fasi — èn den no e meki den lasi-ati, ma na presi foe dati, den e bow den èn e tranga a bribi foe den. — Mateus 20:28; Efeisesma 4:11, 12; Hebrewsma 13:20, 21.
15. Fa son sma na ini a fosi jarihondro ben sori taki den ben abi wan fowtoe sortoe loyaalfasi?
15 Wan tra triki fasi foe a de di wan sma no de loyaal, na wan fowtoe sortoe loyaalfasi. Troe loyaalfasi soleki fa bijbel e taki foe disi, no e gi wi pasi foe de moro getrow na sma noso plekti leki wi de loyaal na Jehovah Gado. Foeroe djoe na ini a fosi jarihondro ben hori densrefi na wan tranga-ede fasi na a Wet foe Moses èn na a djoe seti foe sani. Tokoe a ten ben doro gi Jehovah foe poti en blesi na tapoe a nâsi Israèl na jejefasi, na presi foe poti disi na tapoe na oproeroe nâsi. Te joe teki disi gersi nanga a heri djoe nâsi, dan soso wan toe foe den ben de loyaal na Jehovah èn ben fiti densrefi na a prenspari kenki disi. Srefi na mindri troe kresten, wan toe sma di ben abi a djoe bribi, nomonomo ben wani go baka na den „swaki èn pôti fondamenti sani” foe a Wet foe Moses, di ben kon troe na ini Krestes. — Galasiasma 4:9; 5:6-12; Filipisma 3:2, 3.
16. Fa loyaal foetoeboi foe Jehovah e handri te kenki e kon?
16 Na a tra sei, a pipel foe Jehovah na ini a ten disi sori taki den de loyaal na ini a ten pe sani e kenki foeroe. Foe di a leti foe waarheid di tjari kon na krin, e kon krin moro nanga moro, meki kenki e tjari kon (Odo 4:18). No so langa pasa ete, „a getrow èn koni srafoe” jepi wi foe kon froestan sani moro fini ini a tori foe a wortoe „geslakti” di den e gebroiki na ini Mateus 24:34 èn foe a ten di „den skapoe” nanga „den bokoboko” sa kisi kroetoe, soleki fa den e taki foe dati na ini Mateus 25:31-46, èn so srefi foe a fasi fa wi e si difrenti sortoe lantiwroko (Mateus 24:45). Tweifri no de, taki son wan foe den sma di fadon komoto na bribi ben o prisiri efoe foeroe Kotoigi foe Jehovah ben tan hori densrefi steifi na a fasi fa wi ben froestan den tori dati fosi èn ben weigri foe go na fesi. Dati no pasa kwetikweti. Foe san ede? A pipel foe Jehovah de loyaal.
17. Fa lobiwan ben sa kan tesi wi loyaalfasi son leisi?
17 Ma a tori foe wan fowtoe sortoe loyaalfasi kan abi krakti na tapoe wisrefi. Te wan lobi mati noso srefi wan osofamiri memre e bosroiti foe waka wan pasi di no e kroederi nanga bijbel gronprakseri, dan wi kan kisi a firi taki a loyaalfasi foe wi prati. A de normaal, taki wi abi loyaal fasi gi osofamiri memre. Ma noiti wi no moesoe de moro getrow na den osofamiri memre dati leki wi de loyaal na Jehovah! (Teki gersi 1 Samuèl 23:16-18.) Èn wi no ben sa jepi ogriman toe foe kibri wan serjoesoe sondoe noso teki partèi gi den teige den owroeman di e proeberi ’ini wan jeje foe safri-atifasi foe meki den kon boen baka’ (Galasiasma 6:1). Efoe wi ben sa doe dati, dan wi no ben o de loyaal na Jehovah, na organisâsi foe en, èn na wan lobiwan. Te foe kaba, efoe wi e meki taki wan sondari no e kisi a tranga leri di a abi fanowdoe, dan te joe loekoe en boen, wi e tapoe a sondari foe kisi wan fasi foe lobi di Jehovah e sori en (Hebrewsma 12:5-7). Memre toe, taki „den soro di wan lobiwan meki, de getrow” (Odo 27:6). Foe taki en leti, lobi-ati rai di abi en gron tapoe a Wortoe foe Gado ben sa kan broko a bigimemre foe wan lobiwan di sondoe, ma disi ben sa kan sori foe de wan sani di e kibri en libi baka ten!
Loyaalfasi e kakafoetoe gi froefolgoe
18, 19. (a) San Akab ben wani foe Nabot, èn foe san ede Nabot ben weigri? (b) A loyaalfasi foe Nabot ben warti den bakapisi? Tjari disi kon na krin.
18 Son leisi Satan e soekoe foe pori a loyaalfasi foe wi langalanga. Loekoe a tori foe Nabot. Di kownoe Akab ben dwengi en foe seri a droifi-djari foe en, dan Nabot ben piki: „Foe mi sei, soleki fa Jehovah e si en, dan a no kan kwetikweti taki mi e gi joe a goedoe di mi kisi foe den fositen tata foe mi” (1 Kownoe 21:3). Nabot no ben tranga-ede; a ben de loyaal. A Wet foe Moses ben gi a komando taki noiti wan Israèlsma no ben mag seri a famiri goedoe di a ben kisi (Lefitikus 25:23-28). Nabot ben sabi seiker taki na ogri-ati kownoe disi ben kan kiri en, bika Akab ben meki en wefi, Iseibèl, kiri foeroe profeiti foe Jehovah kaba! Tokoe Nabot ben tanapoe kánkan. — 1 Kownoe 18:4.
19 Loyaalfasi e aksi wan òfer son leisi. Iseibèl, di ben kisi a jepi foe wan toe „man di ben boen foe noti”, ben meki Nabot kisi a nen gi wan ogri di a no ben doe. A bakapisi ben de, taki den ben kiri en nanga den manpikin foe en (1 Kownoe 21:7-16; 2 Kownoe 9:26). Disi wani taki, dati Nabot ben abi wan fowtoe sortoe loyaalfasi? Kwetikweti! Nabot de wan foe den foeroe loyaal man nanga oema di de ’na libi’ na ini a prakseri foe Jehovah nownowde, èn den e sribi na ini a grebi pe noti no kan pasa nanga den, te leki a ten foe na opobaka doro. — Lukas 20:38; Tori foe den Apostel 24:15.
20. Fa howpoe kan jepi wi foe tan loyaal?
20 A srefi pramisi dati e gi den loyaalwan foe Jehovah seikerfasi na ini a ten disi. Wi sabi taki a loyaalfasi foe wi kan kostoe wi foeroe na ini a grontapoe disi. Jesus Krestes ben pai gi a loyaalfasi foe en nanga en libi, èn a ben taigi den bakaman foe en taki sma no ben o handri moro betre nanga den (Johanes 15:20). Neleki fa a howpoe di a ben abi gi a tamara ben gi en krakti, na so a howpoe foe wi e gi wi krakti toe (Hebrewsma 12:2). Dati meki wi kan tan loyaal nanga ala sortoe froefolgoe di e wakti wi.
21. Sortoe djaranti Jehovah e gi na den loyaalwan foe en?
21 A troe, taki te joe e teki en gersi tra sani, dan a no foeroe foe wi na ini a ten disi e kisi foe doe nanga problema di abi langalanga foe doe nanga a loyaalfasi foe wi. Ma a kan taki a pipel foe Gado e kisi foe doe nanga moro froefolgoe bifo a kaba e kon. Fa wi kan de seiker taki wi o tan loyaal? Foe di wi e tan loyaal now. Jehovah gi wi wan bigi wroko foe doe — preiki èn leri sma foe a Kownoekondre foe en. Meki wi tan doe a prenspari wroko disi na wan loyaalfasi (1 Korentesma 15:58). Efoe wi e weigri foe meki libisma onvolmaaktifasi pori a loyaalfasi foe wi na a organisâsi foe Jehovah èn efoe wi e kibri wisrefi gi den sortoe trikifasi dati foe no de loyaal, soleki wan fowtoe sortoe loyaalfasi, dan wi sa de srekasreka moro boen efoe a loyaalfasi foe wi e kisi moro hebi tesi. Awansi fa a no fa, meki a de so taki ala ten wi abi a djaranti taki Jehovah de loyaal foe têgo na den loyaal foetoeboi foe en (2 Samuèl 22:26). Ija, a sa kibri den loyaalwan foe en! — Psalm 97:10.
[Foetoewortoe]
Jesus ben abi deki-ati foe poeroe so wan bisnis orga di ben tjari wini kon. Soleki fa wan historia skrifiman e taki, dan a tempel belasting ben moesoe pai nanga wan spesroetoe owroeten djoe moni. So boen, foeroe sma di ben kon na a tempel ben moesoe broko a moni foe den so taki den ben man pai a belasting. Den sma di ben broko a moni ben abi primisi foe aksi sma wan fasti bedrag foe a broko di den ben broko a moni, èn disi ben meki den kisi foeroe moni.
Loekoe na Ontwaakt! foe 22 december 1993; 8 januari 1994; nanga 22 januari 1994.
A bradafasi foe den ben kon foe a bradafasi foe den Hasidim, wan groepoe di ben opo hondrohondro jari na fesi foe feti teige a krakti di den Grikisma ben abi na den tapoe. Den Hasidim ben teki a nen foe den foe a Hebrew wortoe chasi·dhimʹ noso „loyaalwan”. Kande den ben denki taki bijbeltekst di e taki foe den „loyaalwan” foe Jehovah, ben abi foe doe nanga den na wan noso tra spesroetoe fasi (Psalm 50:5). Den nanga den Fariseiman di ben kon baka den, ben de sma di ben de toemoesi strak, di ben poti densrefi leki sma di moesoe feti gi a Wet so taki a ben tan neleki fa a skrifi.
San joe ben sa piki?
◻ Fa wi kan sorgoe taki onvolmaaktifasi foe trawan no e meki wi tron sma di no de loyaal?
◻ Na sortoe fasi wi eigi onvolmaaktifasi ben sa kan meki wi doe wan sani di no de loyaal?
◻ Fa wi kan kakafoetoe gi a firi foe abi wan fowtoe sortoe loyaalfasi?
◻ San sa jepi wi foe tan loyaal srefi na ini ten foe froefolgoe?
[Faki na tapoe bladzijde 9]
Dini loyaal na Bethel
„Meki ala sani feni presi na wan fasi di fiti èn leki fa sani seti.” Dati na san na apostel Paulus ben skrifi (1 Korentesma 14:40). Paulus ben sabi taki efoe wan gemeente ben moesoe drai boen, dan a ben sa de fanowdoe foe ’seti sani’, foe orga sani. Na so owroeman na ini a ten disi, moesoe teki bosroiti di abi foe doe nanga praktis afersi, soleki a sori di den moesoe sori gemeente memre na sortoe boekoestudie den kan go, a seti di den moesoe seti velddienst konmakandra, èn a loekoe di den moesoe loekoe fa a gebied e wroko. Son leisi, den sortoe seti disi kan de wan tesi tapoe a loyaalfasi. Den no de komando di e kon foe Gado, èn den no kan fiti ala sani di ibriwan sma ben sa wani.
Joe feni en wan tjalensi son leisi, foe de loyaal na wan toe foe den praktis seti di de na ini a kresten gemeente? Efoe dati de so, dan joe kan feni na eksempre foe Bethel wan jepi. A nen Bethel, wan Hebrew wortoe di wani taki „Oso foe Gado”, gi na ala den 104 bijkantoro foe a Waktitoren Genootschap, so srefi den edekantoro na Amerkankondre. Den friwani wrokoman di e libi èn e wroko na den Bethel presi, wani taki den presi disi e sori lespeki nanga frede gi Jehovah. Disi e aksi taki ibriwan foe den moesoe de loyaal.
Sma di e kon fisiti Bethel, e taki nofotron foe na ordefasi nanga a krinfasi di den e si drape. Den wrokoman orga èn den de kolokoe; a fasi fa den e taki èn den maniri foe den, èn srefi a fasi fa den e weri, e sori taki den abi lepi kresten konsensi di kisi leri foe bijbel. Ala memre foe wan Bethelfamiri e hori densrefi loyaal na den markitiki foe Gado Wortoe.
Boiti dati, a Tiri Skin e gi den wan anoeboekoe di nen In eenheid samenwonen (Libi makandra na ini wánfasi), di e taki na wan switifasi foe wan toe foe den praktis seti di de fanowdoe gi so wan bigi famiri, so taki den kan wroko boen nanga makandra (Psalm 133:1). Foe eksempre, a e taki foe a libi na ini den kamra, njanjan, krinfasi, krosi nanga wiwiri, nanga difrenti tra tori. Na wan loyaal fasi, den memre foe a Bethelfamiri e horibaka gi èn e libi akroederi den seti disi, srefi efoe den sani di densrefi lobi, ben sa meki den wani doe wan tra sani. Den no e si na anoeboekoe disi leki wan heri ipi strak reglementi nanga seti, ma leki wan toe boen tirilin di meki foe horibaka gi a wánfasi nanga vrede. Na wan loyaal fasi, den opziener e hori den fasi disi di abi den gron tapoe bijbel, hei èn den e gebroiki den na wan positief fasi foe bow a Bethelfamiri èn foe gi den deki-ati foe go doro nanga a santa Betheldiniwroko foe den.
* Den presi disi di abi drukkerij, kantoro nanga kamra pe sma e libi na ini, no e kon ini a presi foe Gado en bigi jeje tempel, noso oso. Gado en jeje tempel na a sani di a seti gi a soifri anbegi (Mika 4:1). Foe dati ede, joe no kan taki dati a de wan troetroe gebow nomo na grontapoe.
[Faki na tapoe bladzijde 10]
A loyaal sma nanga a sma di e hori ensrefi tranga na a wet
Na ini 1916, na Encyclopædia of Religion and Ethics ben taki dati „a difrenti disi na mindri a loyaal sma nanga a sma di e hori ensrefi tranga na a wet, de foe feni kande na ini ala ten èn na ala presi”. A ben tjari kon na krin: „Joe abi a sma di e hori ensrefi tranga na a wet èn di e doe san sma e taigi en foe doe, di no e broko no wan wet; a e tan getrow na a wortoe di skrifi èn di sma kan leisi. Joe abi a loyaal sma di e doe disi toe ma, . . . di joe kan de seiker taki a sa doe moro, di e poti ala en prakseri na tapoe a plekti foe en, di e meki en fasi foe denki de akroederi a marki di a wani doro.” Baka ten, a srefi boekoe disi ben taki: „Foe de loyaal, wani taki moro leki foe hori joesrefi na a wet. . . . A loyaal sma e difrenti foe a sma di e hori ensrefi na a wet, foe di a de wan sma di e dini nanga en heri ati nanga prakseri . . . A loyaal sma no e gi ensrefi pasi taki a e sondoe foe espresi nanga den sani di a doe, nanga den sani di a no doe, noso nanga den sani di a no sabi.”