Skapoeman nanga skapoe ini wan theokrasia seti

„Jehovah na wi Kroetoeman, Jehovah na a Sma di e gi wi wet, Jehovah na wi Kownoe; ensrefi sa froeloesoe wi.” — JESAJA 33:22.

1. Fa wi kan taki dati den fosi jarihondro kresten èn den kresten ini a ten disi de wan theokrasia seti?

THEOKRASIA wani taki wan tiri foe Gado. A abi na ini toe foe erken a makti foe Jehovah èn waka baka den tirilin nanga leri foe en ini den bigi èn pikin bosroiti di wi e teki ini wi libi. A fosi jarihondro gemeente ben de wan troetroe theokrasia seti. Kresten ini a ten dati ben kan taki na wan eerlijkfasi: „Jehovah na wi Kroetoeman, Jehovah na a Sma di e gi wi wet, Jehovah na wi Kownoe” (Jesaja 33:22). Nanga a salfoe fikapisi di de a moro prenspari pisi foe na organisâsi foe Jehovah Gado ini a ten disi, a de na a srefi fasi wan troetroe theokrasia seti.

Na sortoe fasi wi abi theokratisfasi ini a ten disi?

2. San na wan fasi fa Jehovah Kotoigi e saka densrefi ondro a tiri foe Jehovah?

² Fa wi kan taki dati na organisâsi foe Jehovah na grontapoe na wan theokrasia seti? Bikasi den sma di de wan pisi foe en e saka densrefi foe troe na ondro a tiri foe Jehovah. Èn den e waka baka a tiri foe Jesus Krestes, a sma di Jehovah poti tapoe kownoestoeroe leki Kownoe. Foe eksempre, ini a ten foe a kaba, Jesus ben kisi a komando disi langalanga foe a Bigi Theokraat: „Poti joe kron-nefi na ini èn koti, bikasi a joeroe doro foe koti, foe di a njanjan di de foe koti na grontapoe, lepi dorodoro” (Openbaring 14:15). Jesus e gi jesi èn a e doe a kotiwroko na grontapoe. Kresten e horibaka gi a Kownoe foe den ini a bigi wroko disi, foe di den e preiki a boen njoensoe nanga faja èn e meki disipel (Mateus 28:19; Markus 13:10; Tori foe den Apostel 1:8). Foe di den e doe disi, den de kompe-wrokoman toe nanga Jehovah, a Bigi Theokraat. — 1 Korentesma 3:9.

3. Fa kresten e saka densrefi ondro theokrasia ini afersi di abi foe doe nanga boen gwenti nanga wet?

³ Ini a fasi fa den e tjari densrefi toe, kresten e saka densrefi na ondro a tiri foe Gado. Jesus ben taki: „A sma di e doe san troe, e kon na a leti, so taki en wroko kan tjari kon na krin leki wroko di a ben doe ini akroederi nanga Gado” (Johanes 3:21). Ini a ten disi someni haritaki de, di no e kaba, di abi foe doe nanga markitiki ini a tori foe boen gwenti nanga wet, ma den kesekese disi no e feni presi na mindri kresten. San Jehovah e taki dati na hoeroedoe, den e si leki hoeroedoe, èn den e wai pasi gi dati dorodoro, neleki a de wan kefarlek takroe siki di kan kisi joe! Den e sorgoe toe gi den osofamiri foe den, e gi jesi na den papa nanga mama èn e tan saka densrefi na ondro den hei tirimakti (Efeisesma 5:3-5, 22-33; 6:1-4; 1 Timoteus 5:8; Titus 3:1). So boen, den e handri na wan theokratisfasi, ini akroederi nanga Gado.

4. Sortoe fowtoe fasi foe doe sani Adam, Eva nanga Saul ben sori, èn fa kresten e sori wan tra fasi foe doe sani?

⁴ Adam nanga Eva ben lasi a Paradijs bikasi den ben wani foe teki den eigi bosroiti ini san boen èn san ogri. Jesus ben wani de heri tra fasi leki dati. A ben taki: „Mi no e soekoe mi eigi wani, ma a wani foe a sma di seni mi kon.” Kresten e soekoe a srefi sani (Johanes 5:30; Lukas 22:42; Romesma 12:2; Hebrewsma 10:7). Saul, a fosi kownoe foe Israèl, ben gi jesi na Jehovah — ma no ini ala sani. Foe a sani disi den ben trowe en. Samuèl ben taigi en: „Foe gi jesi, moro betre leki srakti-ofrandi, foe poti prakseri, moro betre leki a fatoe foe manskapoe” (1 Samuèl 15:22). A de wan theokratis sani foe waka baka a wani foe Jehovah te na wan seiker momenti, kande foe di wi e go ini a preikiwroko noso e fisiti den konmakandra doronomo, èn baka dati e meki skeki ini afersi di abi foe doe nanga boen gwenti nanga wet noso na a wan noso tra fasi? Kwetikweti! Wi e meki moeiti foe ’doe a wani foe Gado nanga wi heri sili’ (Efeisesma 6:6; 1 Petrus 4:1, 2). Tra fasi leki Saul, wi e saka wisrefi krinkrin ondro a tiri foe Gado.

Wan disiten theokrasia seti

5, 6. Fa Jehovah e handri nanga libismafamiri ini a ten disi èn san na a bakapisi te sma e wroko makandra nanga a seti disi?

⁵ Ini a ten di pasa Jehovah ben tiri èn ben tjari troe tori kon na krin nanga jepi foe sma, so leki profeiti, kownoe, nanga apostel. Ini a ten disi dati no e pasa so moro; wi no abi profeiti nanga apostel di santa jeje e wroko na den tapoe. Na presi foe dati, Jesus ben taki dati ini a ten foe en kownoe denoja, a ben sa meki sma kon sabi wan getrow skin foe bakaman, a „getrow èn koni srafoe”, èn a ben sa poti en na tapoe ala den goedoe foe en (Mateus 24:45-47; Jesaja 43:10). Ini 1919 a srafoe dati sma ben kon sabi en leki a fikapisi foe salfoe kresten. Sensi a ten dati, foe di a Tiri Skin foe Jehovah Kotoigi e teki presi gi den, a ben de a moro prenspari pisi foe a theokrasia seti na grontapoe. Na heri grontapoe, bijkantoro-komte, opziener di e rèis èn gemeente owroeman, e teki presi gi a Tiri Skin.

⁶ Wroko makandra nanga a theokratis organisâsi, na wan prenspari pisi foe saka wisrefi ondro a theokrasia seti. So wan wroko makandra e sorgoe gi wánfasi nanga orde na heri grontapoe ini „a heri gemeenschap foe brada” (1 Petrus 2:17). Disi e plisi Jehovah, di „no de wan Gado foe broeja, ma foe vrede”. — 1 Korentesma 14:33.

Owroeman ini wan theokrasia seti

7. Foe san ede wi kan taki dati kresten owroeman ben poti na wroko na wan theokratis fasi?

⁷ Ala owroeman di den ben poti na wroko, awansi sortoe posisi foe makti den abi, e handri ini akroederi nanga ala den markitiki, so leki fa a skrifi ini bijbel foe a wroko foe wan opziener noso owroeman (1 Timoteus 3:1-7; Titus 1:5-9). Moro fara, Paulus wortoe gi den owroeman foe Efeise e fiti ala owroeman: „Poti prakseri na tapoe oensrefi èn na tapoe a heri ipi, di na mindri den a santa jeje ben poti oenoe leki opziener, foe wei a gemeente foe Gado” (Tori foe den Apostel 20:28). Ija, den ben poti den owroeman na wroko nanga jepi foe santa jeje, di e kon foe Jehovah Gado (Johanes 14:26). A poti di den ben poti den na wroko, na wan theokratis fasi. Moro fara, den e wei na ipi foe Gado. Na ipi na foe Jehovah, a no foe den owroeman. Na organisâsi foe Jehovah na wan theokrasia seti.

8. San na moro foeroe foe den frantiwortoe foe owroeman ini a ten disi?

⁸ Ini en brifi gi den Efeisesma, na apostel Paulus ben taki foe moro foeroe foe den frantiwortoe foe den owroeman, di a ben taki: „A ben gi sonwan leki apostel, sonwan leki profeiti, sonwan leki evangelium preikiman, sonwan leki skapoeman nanga leriman, nanga a prakseri foe meki den santawan kon boen baka gi a diniwroko, foe bow a skin foe a Krestes” (Efeisesma 4:11, 12). Apostel nanga profeiti no ben de moro, baka di „a skin foe a Krestes” ben pasa a ten di a bigin njoenjoen. (Teki gersi 1 Korentesma 13:8.) Ma te nanga now owroeman e wroko tranga foe doe na evangelium-wroko, a skapoeman-wroko, èn a wroko foe gi sma leri. — 2 Timoteus 4:2; Titus 1:9.

9. Fa owroeman moesoe sreka densrefi foe prenki a wet foe Gado ini a gemeente?

⁹ Foe di theokrasia na a tiri foe Gado, owroeman di e doe den wroko boen, sabi a wani foe Gado dorodoro. Josua ben kisi a komando foe leisi a Wet ibri dei. Owroeman toe moesoe studeri èn soekoe rai ini den Boekoe foe bijbel doronomo èn den moesoe sabi den poeblikâsi dorodoro, di a getrow èn koni srafoe e tjari kon na doro (2 Timoteus 3:14, 15). Disi wani taki toe den Waktitoren nanga Ontwaakt! tijdschrift nanga tra poeblikâsi di e sori fa foe gebroiki den bijbel gronprakseri ini spesroetoe situwâsi.a Ma ala di a de prenspari gi wan owroeman foe sabi èn foe waka baka den tirilin di skrifi poti ini den poeblikâsi foe a Waktitoren Genootschap, a moesoe sabi den bijbel gronprakseri, di de a fondamenti foe den tirilin, dorodoro toe. Dan a sa man gebroiki den bijbel tirilin nanga froestan èn nanga sari-ati. — Teki gersi Mika 6:8.

Dini nanga wan kresten jeje

10. Gi sortoe takroe fasi foe doe, owroeman moesoe kibri densrefi èn fa?

¹⁰ Na a ten foe a jari 55 Gewoon Teri, na apostel Paulus ben skrifi en fosi brifi gi a gemeente na Korente. Wán foe den problema di a ben taki foe den, ben abi foe doe nanga seiker man di ben wani de prenspari ini a gemeente. Paulus ben skrifi: „Oenoe abi nofo kaba, a no so? Oenoe kon goedoe kaba, a no so? Oenoe bigin tiri leki kownoe sondro wi, a no so? Èn mi ben winsi foe troe taki oenoe ben bigin tiri leki kownoe, so taki wi toe ben sa kan tiri nanga oenoe leki kownoe” (1 Korentesma 4:8). Ini a fosi jarihondro Gewoon Teri, ala kresten ben abi a howpoe foe tiri leki kownoe nanga priester na hemel makandra nanga Jesus (Openbaring 20:4, 6). Ma so leki fa a ben sori, dan son sma na Korente ben frigiti taki no wan kownoe no de ini a kresten theokrasia seti na grontapoe. Na presi foe handri leki kownoe foe a grontapoe disi, kresten skapoeman e kweki sakafasi, wan eigifasi di e plisi Jehovah. — Psalm 138:6; Lukas 22:25-27.

11. (a) San na wan toe aparti eksempre foe sakafasi? (b) Fa owroeman nanga ala tra kresten moesoe si densrefi?

¹¹ Sakafasi na wan swakifasi? Kwetikweti! Foe Jehovah srefi den e taki dati a de nanga sakafasi (Psalm 18:35). Den kownoe foe Israèl ben tjari den legre go feti èn den ben tiri a nâsi nanga Jehovah leki fesiman. Tokoe ibriwan foe den ben moesoe loekoe boen, ’taki en ati no ben hei ensrefi na tapoe den brada foe en’ (Deuteronomium 17:20). Jesus, di opo baka foe dede, na wan hemel Kownoe. Ma di a ben de na grontapoe, a ben wasi den foetoe foe den disipel foe en. Fa a ben de nanga sakafasi! Èn foe sori taki a ben wani taki den apostel foe en moesoe abi a srefi sakafasi, meki a ben taki: „Efoe mi, ala di mi na Masra nanga Leriman, wasi den foetoe foe oenoe, dan oenoe moesoe wasi den foetoe foe makandra toe” (Johanes 13:14; Filipisma 2:5-8). Ala glori nanga prèise moesoe go na Jehovah, èn na no wan libisma (Openbaring 4:11). Efoe den na owroeman efoe no, ala kresten moesoe prakseri foe densrefi ini a leti foe den wortoe foe Jesus: „Wi de soso-srafoe. Wi ben doe san wi ben moesoe foe doe” (Lukas 17:10). Ala tra fasi foe si sani a no wan theokratisfasi.

12. Foe san ede lobi na wan prenspari eigifasi di kresten owroeman moesoe kweki?

¹² Makandra nanga sakafasi, kresten owroeman e kweki lobi. Na apostel Johanes ben sori o prenspari lobi de, di a ben taki: „A sma di no lobi trawan, no ben leri sabi Gado, bikasi Gado na lobi” (1 Johanes 4:8). Sma di no e sori lobi no abi theokratisfasi. Den no sabi Jehovah. Bijbel e taki foe a Manpikin foe Gado: „Jesus di ben lobi den wan foe en di ben de ini grontapoe, ben lobi den te na a kaba” (Johanes 13:1). Di a ben taki nanga 11 man di ben sa tron wan pisi foe a tiri skin ini a kresten gemeente, Jesus ben taki: „Disi na mi komando, taki oenoe lobi makandra neleki fa mi lobi oenoe” (Johanes 15:12). Lobi na a marki di e meki sma kon sabi troe krestendom. A e hari sma di lasi-ati, denwan di de nanga sari nanga denwan di de na ini katibo na jeje fasi, ma di e angri foe kon fri (Jesaja 61:1, 2; Johanes 13:35). Owroeman moesoe de wan eksempre ini a sori foe lobi.

13. Ala di problema ini a ten disi kan de moeilek, fa wan owroeman kan de wan krakti di sa wroko boen ini ala situwâsi?

¹³ Ini a ten disi, nofotron den e aksi owroeman foe jepi loesoe problema di dangra. Problema ini a trowlibi kan abi dipi roetoe èn kan de tranga foe loesoe. Jongoesma abi problema di bigisma feni kande taki den no man foe froestan den. Siki di abi foe doe nanga a firi foe sma, nofotron moeilek foe froestan. Wan owroeman di e toeka nanga den sortoe sani dati, kande no de seiker san a moesoe doe. Ma a kan abi a froetrow taki, efoe a e froetrow tapoe a koni foe Jehovah, di a e soekoe nanga jepi foe begi, efoe a e go ondrosoekoe bijbel èn den bodoi di a getrow èn koni srafoe tjari kon na doro èn efoe a e handri na wan sakafasi èn na wan lobifasi nanga den skapoe, dan a sa de wan krakti di sa wroko boen srefi na ini den moro moeilek situwâsi.

14, 15. San na wan toe sani di sma ben taki, di e sori taki Jehovah ben blesi en pipel nanga foeroe boen owroeman?

¹⁴ Jehovah ben gi en organisâsi foeroe blesi nanga „presenti ini sma” (Efeisesma 4:8). Ten na ten, a Waktitoren Genootschap e kisi brifi, di e gi deki-ati, èn di de wan boeweisi foe a lobi di owroeman di abi sakafasi, e sori, di nanga sari-ati e wei den skapoe foe Gado. Foe eksempre, wan gemeente owroeman e skrifi: „Mi no kan memre wan fisiti foe wan kringopziener di ben wroko moro na mi tapoe, èn di te now ete den e taki boen foe en ini a gemeente. A kringopziener ben jepi mi foe si o prenspari a de, foe abi wan positief fasi foe doe sani, te mi e handri nanga den brada, ala di mi moesoe poti krakti na tapoe a gi foe prèise.”

¹⁵ Wan sisa di ben moesoe rèis go na wan fara ati-oso foe kisi datra-jepi drape, e skrifi: „Fa a e gi wan korostoe firi foe man miti wan owroeman a fosi banawtoe neti dati ini na ati-oso so farawe foe oso! En nanga tra brada ben de foeroe nanga mi. Srefi sma foe grontapoe, di ben sabi san mi ben e ondrofeni, ben firi taki noiti mi no ben sa kan tan na libi sondro a trowstoe, a sorgoe nanga den begi foe den lobi brada disi di ben gi densrefi troetroe.” Wan tra sisa e skrifi: „Tide mi de na libi, bikasi a skin foe owroeman ben tjari mi nanga pasensi ini a feti di mi ben feti nanga a hebi brokoskin di mi ben firi. . . . Wan brada nanga a wefi foe en no ben sabi san den ben moesoe taigi mi. . . . Ma san naki mi ati moro ben de, taki ala di den no ben froestan krin san mi ben e ondrofeni, tokoe na wan lobifasi den ben poti prakseri tapoe mi.”

16. Sortoe froemane Petrus e gi owroeman?

¹⁶ Ija, foeroe owroeman e poti a froemane foe na apostel Petrus na ini den libi: „Wei na ipi foe Gado di de na oenoe sorgoe, no ondro dwengi, ma foe di oenoe wani; no foe lobi gi wini na wan oneerlek-fasi, ma foe di oenoe de klariklari; no leki sma di e basi den wan di de a goedoe foe Gado, ma leki eksempre foe na ipi” (1 Petrus 5:1-3). Fa den theokratis owroeman disi de wan blesi!

Skapoe ini a theokrasia seti

17. Kari wan toe eigifasi di ala memre foe a gemeente moesoe kweki.

¹⁷ Ma a no owroeman wawan de wan pisi foe wan theokrasia seti. Efoe den skapoeman moesoe abi theokratisfasi, dan den skapoe moesoe de so toe. Na sortoe fasi? We, den srefi gronprakseri di e tiri den skapoeman, moesoe tiri den skapoe. Ala kresten, no den owroeman wawan, moesoe abi sakafasi efoe den wani kisi blesi foe Jehovah (Jakobus 4:6). Alamala moesoe kweki lobi, bikasi sondro dati den ofrandi foe wi gi Jehovah no e plisi en (1 Korentesma 13:1-3). Èn wi alamala, no den owroeman wawan, moesoe „kon de foeroe nanga soifri sabi foe a wani foe [Jehovah] ini ala koni nanga a froestan foe si sani na wan jeje fasi”. — Kolosesma 1:9.

18. (a) Foe san ede a no de nofo foe abi soso wan frafra sabi foe waarheid? (b) Fa wi alamala kan kon foeroe nanga soifri sabi?

¹⁸ Jongoewan nanga owroewan toe, ala joeroe e tanapoe na fesi moeilek bosroiti di den moesoe teki, te den e proeberi foe tan getrow ala di den e libi ini a grontapoe foe Satan. A sei di grontapoe e teki tapoe e kontren foe krosi, pokoe, film nanga boekoe, na wan tjalensi gi a jeje fasi foe denki foe son sma. Wan frafra sabi foe waarheid no nofo foe jepi wi foe tan hori wi balansi. Foe de seiker taki wi sa tan getrow, dan wi moesoe foeroe wisrefi nanga soifri sabi. Wi abi a koni fanowdoe foe man si sani nanga a koni di Gado Wortoe wawan kan gi oenoe (Odo 2:1-5). Disi wani taki, dati wi moesoe kweki boen studie gwenti, prakseri dipi foe den sani di wi leri èn poti den ini wi libi (Psalm 1:1-3; Openbaring 1:3). Paulus ben skrifi gi ala kresten, no gi owroeman wawan, di a ben taki: „Tranga njanjan de foe lepi sma, gi den wan di, foe di den gebroiki den koni foe man si sani, ben oefen foe kan si a difrenti foe san boen èn san ogri.” — Hebrewsma 5:14.

Skapoeman nanga skapoe e wroko makandra

19, 20. Sortoe froemane ala sma e kisi foe wroko makandra nanga den owroeman èn foe san ede?

¹⁹ Te foe kaba, wi moesoe taki dati den sma di e sori wan troetroe theokratis jeje, na denwan di e wroko makandra nanga den owroeman. Paulus ben skrifi gi Timoteus: „Den owroeman di e tiri na wan boen fasi moesoe kisi toetron someni grani, spesroetoe denwan di e wroko tranga na a sei foe taki èn gi leri” (1 Timoteus 5:17; 1 Petrus 5:5, 6). Foe de wan owroeman na wan grani srefisrefi, ma moro foeroe foe den owroeman na sma di abi wan osofamiri ala di den e go na den grontapoe wroko ibri dei èn di abi wefi nanga pikin foe sorgoe. Ala di den e dini nanga prisiri, a diniwroko foe den sa de moro makriki èn a sa pai moro te a gemeente e horibaka gi den, no kroetoekroetoe den pasa marki èn no aksi toemoesi foe den. — Hebrewsma 13:17.

²⁰ Na apostel Paulus ben taki: „Hori denwan na prakseri di e teki fesi na oen mindri, di e taki a wortoe foe Gado gi oenoe èn waka baka a bribi foe den, ala di oenoe e loekoe na a kaba foe a fasi fa den e tjari densrefi” (Hebrewsma 13:7). Nôno, Paulus no ben gi den brada deki-ati foe waka baka den owroeman (1 Korentesma 1:12). A no de wan theokratis sani foe waka baka wan libisma. Ma a de seiker wan koni sani foe waka baka a bribi foe wan theokratis owroeman, di a bribi foe en kisi tesi, èn di e doe na evangelium-wroko nanga faja, di de na den konmakandra doronomo, èn di e handri na wan sakafasi èn na wan lobifasi nanga a gemeente.

Wan boeweisi foe bribi

21. Fa kresten e sori wan tranga bribi leki a di foe Moses?

²¹ Foe troe, a de di wan theokratis organiŝasi de ini a ten disi di takroe moro iniwan ten ini libisma historia, de wan boeweisi foe a makti foe a Bigi Theokraat (Jesaja 2:2-5). A de wan boeweisi toe foe a bribi foe pikinmoro feifimiljoen kresten man, oema nanga pikin, di e feti nanga den problema foe na aladei libi, ma di noiti no e frigiti taki Jehovah na den Tiriman. Neleki fa Moses di ben de getrow, „ben tan de nanga horidoro neleki a ben si a Sma di ai no kan si”, na so kresten ini a ten disi abi a srefi tranga bribi (Hebrewsma 11:27). Den abi a grani foe libi ini wan theokrasia seti èn ala dei den gi Jehovah tangi foe disi (Psalm 100:4, 5). Ala di den e ondrofeni a krakti foe Jehovah foe froeloesoe den, den prisiri foe kan bariwroko: „Jehovah na wi Kroetoeman, Jehovah na a Sma di e gi wi wet, Jehovah na wi Kownoe; ensrefi sa froeloesoe wi.” — Jesaja 33:22.

[Foetoewortoe]

San bijbel e sori?

◻ Na sortoe fasi kresten e saka densrefi na ondro theokrasia seti?

◻ Fa a theokrasia seti orga ini a ten disi?

◻ Na sortoe fasi owroeman moesoe sreka densrefi foe doe den frantiwortoe foe den?

◻ Sortoe kresten eigifasi de prenspari gi owroeman foe den kweki èn sori den?

◻ Sortoe matifasi moesoe de na mindri den skapoe nanga den skapoeman ini a theokrasia seti?

[Prenki na tapoe bladzijde 28]

Adam nanga Eva ben lasi a Paradijs, bikasi den ben wani teki den eigi bosroiti ini a tori foe san boen èn ogri

[Prenki na tapoe bladzijde 30]

Efoe wan owroeman e handri na wan sakafasi èn na wan lobifasi nanga den skapoe, a sa de wan krakti di sa wroko boen ala ten