Leri foe feni prisiri ini a frede gi Jehovah
„Kon, oenoe manpikin, arki mi; a frede gi Jehovah na san mi sa leri oenoe.” — PSALM 34:11.
1. Fa Gado Kownoekondre sa figi frede poeroe, ma dati wani taki dati ala sortoe frede sa figi poeroe?
NA ALA presi sma e angri foe kon fri foe frede — frede gi takroedoe nanga a doe di sma e doe ogri nanga tranga, frede foe lasi wroko, frede gi wan serjoesoe siki. Fa a sa de wan bigi dei te a fri dati e tron wan troetroe sani na ondro a Kownoekondre foe Gado! (Jesaja 33:24; 65:21-23; Mika 4:4) Tokoe, a no ala frede sa figi poeroe na ini a ten dati, èn wi no moesoe proeberi toe foe poeroe ala frede ini wi libi nownow. Joe abi frede di boen èn frede di no boen.
2. (a) Sortoe frede no boen, èn sortoe frede wi wani foe abi? (b) San na frede gi Gado, èn fa den tekst di den teki skrifi, e sori dati?
2 Frede kan de wan vergif gi a froestan, a kan tapoe a man di wan sma man denki na wan logis fasi. A kan swaki a deki-ati di wan sma abi èn a kan pori a howpoe di wan sma abi. Wan sma di de na ini kefar foe wan feanti ede, kan ondrofeni a sortoe frede disi (Jeremia 51:30). Wan sma di e si en leki wan toemoesi prenspari sani taki sma di abi makti moesoe feni en boen, kan ondrofeni a sortoe frede disi (Odo 29:25). Ma joe abi frede toe di de gosontoe, a frede di e hori wi foe wi no doe wan sani sondro foe prakseri den bakapisi foe dati fosi, di e hori wi foe wi no gi wisrefi mankeri. A frede gi Gado wani taki moro leki dati srefi. A de wan dipi lespeki gi Jehovah, makandra nanga wan gosontoe frede foe doe wan sani di no e plisi en (Psalm 89:7). A frede disi foe doe wan sani di no e plisi Gado, e kon foe a warderi di wi abi gi en lobi boen-ati fasi èn gi en boen fasi (Psalm 5:7; Hosea 3:5). A wani taki toe a sabi di wi abi taki Jehovah na a Moro Hei Kroetoeman èn na Almaktiwan di abi a makti foe gi strafoe, èn srefi dede na den wan di e weigri foe gi jesi na en. — Romesma 14:10-12.
3. Fa a frede gi Jehovah e difrenti foe a frede di abi foe doe nanga son heiden gado?
3 A frede gi Gado de gosontoe, a no de wan ongosontoe firi foe frede. A e boeweigi wan sma foe hori strak na san boen, foe no skeki foe doe san fowtoe. A no de leki a frede di abi foe doe nanga a fositen Griki gado Phobos, di den e taki foe en leki wan ogri-ati gado di ben gi sma deki-ati foe doe takroe ogridoe. Èn a no de leki a frede di abi foe doe nanga a Hindoe oema-gado Kali, di sontron den e taki foe en leki wan gado di lobi foe si broedoe, di e gebroiki dede skin, sneki, nanga edekrabasi, leki moimoi sani. A frede gi Gado e hari sma; a no e meki sma tan farawe foe en. A frekti nanga lobi èn nanga warderi. So boen, frede gi Gado e hari wi go na Jehovah. — Deuteronomium 10:12, 13; Psalm 2:11.
Foe san ede son sma abi en èn trawan no abi en
4. Na ini sortoe situwâsi a libisma famiri saka go, soleki fa na apostel Paulus ben sori, èn san de a reide foe disi?
4 Frede gi Gado no de na eigifasi di e boeweigi a heri libisma famiri. Na Romesma 3:9-18, na apostel Paulus e taki o fara libisma fadon komoto na a volmaaktifasi di den ben abi ini a bigin. Baka di a ben taki dati ala sma de na ondro sondoe, dan Paulus e kari den wortoe foe den boekoe foe Psalm di e taki: „No wan regtfardikisma no de, no wán srefi.” (Loekoe Psalm 14:1.) Dan a e taki moro fini foe a tori te a e taki foe den sani soleki a soekoe di sma no e soekoe Gado, a boen-ati fasi di den no abi, a bidrigi taki foe den, a floekoe di den e floekoe, èn a meki di den e meki broedoe e lon. Fa dati e taki soifri foe a fasi fa grontapoe de na ini a ten disi! A moro bigi pisi foe sma no abi belangstelling gi Gado nanga den prakseri foe en. Iniwan skèin switi fasi den e hori na baka foeroetron foe gebroiki en na okasi pe den kan kisi wini foe dati. Lei nanga doti-taki de wan aladei sani. A meki di sma e meki broedoe lon pasa marki no de soso foe si na njoensoe, ma so srefi na ini ontspanning. San na a reide foe so wan situwâsi? A troe, taki wi alamala na bakapikin foe a sondari Adam, ma te sma teki den fasi foe libi di na apostel Paulus ben skrifi, dan moro sani de na ini a tori. Vers 18 e froeklari san na dati, te a e taki: „No wan frede gi Gado de na fesi den ai foe den.” — Loekoe Psalm 36:1.
5. Foe san ede a de so taki son sma abi frede gi Gado, ala di trawan no abi dati?
5 Ma foe san ede a de so taki son sma abi frede gi Gado, ala di trawan no abi dati? Foe taki en eenvoudig, a de foe di son sma kweki en, ala di trawan no kweki en. No wan foe wi gebore nanga a frede gi Gado, ma wi alamala man foe abi a frede dati. Frede gi Gado na wan sani di wi moesoe leri. Foe dati ede, efoe wi wani meki a de wan tranga krakti di e boeweigi a libi foe wi, dan wi moesoe kweki en.
Wan kari di e hari sma
6. Soema e gi wi a kari soleki fa skrifi na Psalm 34:11, èn fa a tekst disi e sori taki frede gi Gado de wan sani di sma moesoe leri?
6 Na ini Psalm 34 wi e kisi wan kari di e hari sma foe leri a frede gi Jehovah. Disi na wan psalm foe David. Èn soema David ben prenki? A ben prenki Masra Jesus Krestes. Wan profeititori di na apostel Johanes ben fiti spesroetoe na tapoe Jesus, skrifi na ini vers 20 foe a psalm disi (Johanes 19:36). Na ini a ten foe wi, Jesus na a sma di e gi wi so wan kari soleki a wan na ini vers 11: „Kon, oenoe manpikin, arki mi; a frede gi Jehovah na san mi sa leri oenoe.” Disi e sori krin taki frede gi Gado na wan sani di wi kan leri èn Jesus Krestes abi a koni srefisrefi foe leri wi. Foe san ede disi de so?
7. Foe san ede wi moesoe leri spesroetoe foe Jesus, foe abi frede gi Gado?
7 Jesus Krestes sabi o prenspari a frede gi Gado de. Hebrewsma 5:7 e taki foe en: „Na ini den dei foe en libisma skin, Krestes nanga tranga babari èn watra-ai ben seni tranga begi èn so srefi faja begi go na a Sma di ben man froeloesoe en foe dede, èn Gado ben jere en foe a frede di a ben abi gi en.” So wan frede gi Gado ben de wan eigifasi di Jesus ben sori srefi bifo a ben dede na wan pina oedoe. Hori na prakseri, taki na Odo kapitel 8, den e taki foe a Manpikin foe Gado leki a sma di de koni. Èn ini Odo 9:10 den e taigi wi: „A frede gi Jehovah na a bigin foe koni.” So boen, a frede gi Gado ben de wan prenspari pisi foe na eigifasi foe a Manpikin foe Gado langa bifo a ben kon na grontapoe.
8. San wi e leri foe a frede gi Jehovah, na Jesaja 11:2, 3?
8 Moro fara, Jesaja 11:2, 3 e taki foe Jesus leki a Mesias Kownoe: „Na en tapoe a jeje foe Jehovah moesoe tan, a jeje foe koni èn foe froestan, a jeje foe rai èn foe krakti, a jeje foe sabi èn foe a frede gi Jehovah; èn a sa prisiri na ini a frede gi Jehovah.” O moi den e taki foe dati! A frede gi Gado no de wan sani di no e gi prisiri. A e tjari wini èn a e jepi foe doe sani moro boen. A de wan eigifasi di sa panja na a heri kontren na tapoe san Krestes e tiri leki Kownoe. A e tiri now, èn na ala sma di den e tjari kon na wán leki borgoe foe en, a e gi leri foe a frede gi Jehovah. Fa a e doe dati?
9. Fa Jesus Krestes e leri wi a frede gi Jehovah, èn san Jesus wani taki wi moesoe leri foe a frede dati?
9 Nanga jepi foe den konmakandra foe wi, den kringkonmakandra nanga kongres, Jesus, leki na Edeman di poti tapoe a gemeente èn leki a Mesias Kownoe, e jepi wi foe froestan krin san na a frede gi Gado èn foe san ede a e tjari so foeroe winimarki kon. Na so wan fasi a e proeberi foe meki a warderi di wi abi gi dati kon moro dipi, so taki wi sa leri foe feni prisiri ini a frede gi Jehovah, neleki fa en e feni prisiri na ini dati.
Joe sa doe moeiti?
10. San wi moesoe doe te wi e fisiti den gemeente konmakandra, efoe wi wani froestan a frede gi Jehovah?
10 A no de foe taki, dati soso a leisi di wi e leisi bijbel, noso a fisiti di wi e fisiti den konmakandra na ini a Kownoekondrezaal, no sa gi wi a djaranti taki wi sa abi frede gi Gado. Loekoe san wi moesoe doe efoe troetroe wi wani froestan a frede gi Jehovah. Odo 2:1-5 e taki: „Mi manpikin, efoe joe e teki den wortoe foe mi èn e kibri den gebod foe mi leki wan goedoe na joe, so taki nanga joe jesi joe e poti prakseri na koni, so taki joe kan beni joe ati go na a koni foe si sani krin; efoe, boiti dati, joe e bari kari foe a froestan srefi èn e opo joe sten srefi foe a koni foe si sani krin, efoe joe e tan soekoe en leki solfroe, èn e tan soekoe en leki goedoe di kibri, dan ini a kefal dati joe sa froestan a frede gi Jehovah èn joe sa feni a sabi foe Gado srefi.” So boen, te wi e fisiti den konmakandra, wi moesoe poti prakseri na tapoe san den e taki, wi moesoe doe serjoesoe moeiti foe poti prakseri na tapoe den moro prenspari penti èn wi moesoe hori den na ede. Wi moesoe prakseri dipi fa a fasi fa wi e firi gi Jehovah moesoe abi krakti na tapoe a fasi fa wi e denki te wi e kisi rai — ija, wi moesoe opo wi ati. Dan wi sa froestan a frede gi Jehovah.
11. Sortoe sani wi moesoe doe na wan serjoesoe fasi èn doronomo, efoe wi wani kweki frede gi Gado?
11 Psalm 86:11 e poti wi prakseri na tapoe wan tra prenspari sani, dati na begi. „Leri mi, o Jehovah, foe den pasi foe joe. Mi sa waka ini joe waarheid”, a psalm singiman ben begi. „Meki mi ati kon wánfasi foe frede joe nen.” Jehovah ben feni a begi dati boen, bikasi a ben meki den skrifi a begi na ini bijbel. Efoe wi wani kweki frede gi Gado, dan wisrefi moesoe begi Jehovah foe a jepi wi, èn wi sa kisi wini efoe wi e begi na wan serjoesoe fasi èn doronomo. — Lukas 18:1-8.
Joe ati de na ini a tori
12. Foe san ede wi moesoe poti spesroetoe prakseri na tapoe na ati, èn san disi abi na ini toe?
12 Wan tra sani de di wi moesoe si toe na ini Psalm 86:11. A psalm singiman no ben aksi foe froestan a frede gi Gado nanga en froestan nomo. A ben taki foe na ati foe en. A kweki di wi moesoe kweki frede gi Gado, abi foe doe nanga a simbôlis ati, di e aksi foe wi, taki wi moesoe poti spesroetoe prakseri na tapoe en, foe di a de na inisei sma foe wi, soleki fa dati de foe si na ini ala den sani di wi e doe ini wi libi, èn a abi den prakseri foe wi na ini toe, den fasi fa wi e denki, den lostoe foe wi, den boeweigi foe na ati foe wi, nanga den marki di wi abi na prakseri.
13. (a) San kan sori taki na ati foe wan sma prati? (b) Na sortoe marki wi moesoe wroko foe doro en, ala di wi e kweki frede gi Gado?
13 Bijbel e warskow wi taki na ati foe wan sma kan prati. A kan de feradelek (Psalm 12:2; Jeremia 17:9). A kan boeweigi wi foe teki prati na gosontoe sani — foe go na den gemeente konmakandra èn na ini a velddienst — ma a kan lobi son fasi foe a grontapoe fasi foe libi. Disi kan gens wi foe horibaka troetroe nanga wi heri ati gi den Kownoekondre afersi. Dan a feradelek ati kan proeberi foe overtoigi wi taki, tokoe, wi e doe so foeroe leki foeroe tra sma. Noso kande na skoro noso na wi wrokopresi, frede gi libisma kan abi krakti na tapoe wi ati. A bakapisi de taki, ini den birti dati kande wi e tweifri foe meki sma kon sabi wi leki Jehovah Kotoigi èn kande wi e doe sani srefi di no e fiti kresten. Ma baka ten, wi konsensi e trobi wi. Dati a no a sma di wi wani foe de. Makandra nanga a psalm singiman wi e begi Jehovah foe dati ede: „Meki mi ati kon wánfasi foe frede joe nen.” Wi wani taki a heri inisei sma di wi de, soleki fa a sori ini ala den sani di wi e doe na ini a libi, moesoe boeweisi taki wi „abi frede gi a troe Gado èn e hori den komando foe en”. — Preikiman 12:13.
14, 15. (a) San Jehovah ben pramisi taki a ben o gi a pipel foe en, di a ben taki na fesi foe a fri di a ben o fri den Israèlsma foe katibo na Babilon? (b) San Jehovah ben doe nanga a marki na prakseri foe prani a frede gi Gado na ini na ati foe a pipel foe en? (c) Foe san ede Israèl ben drai en baka gi den pasi foe Jehovah?
14 Jehovah ben pramisi taki a ben sa gi a pipel foe en wan ati di e frede Gado. A ben taki na fesi foe a meki di a ben o meki Israèl kon boen baka, èn a ben taki soleki fa wi e leisi na Jeremia 32:37-39: „Mi sa tjari den kon baka na a presi disi èn mi sa meki den libi ini seiker fasi. Èn seiker den sa tron a pipel foe mi èn misrefi sa tron a Gado foe den. Èn mi sa gi den wan ati èn wan pasi so taki den kan abi frede gi mi ala ten, gi a boen foe den nanga den manpikin foe den baka den.” Na vers 40, den e poti krakti na tapoe a pramisi foe Gado: „A frede gi mi, mi sa poti na ini na ati foe den, so taki den no sa dribi komoto foe mi.” Na ini 537 bifo Gewoon Teri, Jehovah troetroe ben tjari den baka na Jerusalem, soleki fa a ben pramisi. Ma fa a de nanga a tra pisi foe a pramisi dati — taki a ben sa gi den ’wan ati so taki den kan abi frede gi en alaten’? Foe san ede a nâsi Israèl foe fositen ben dribi komoto na Jehovah, baka di a ben tjari den kon foe Babilon, di meki taki a tempel foe den ben kisi pori na ini 70 Gewoon Teri, na so wan fasi taki noiti den ben sa bow en baka?
15 A no ben de foe di Jehovah ben misi foe doe wan sani foe en sei. Foe troe, Jehovah ben doe sani foe poti a frede gi Gado ini den ati foe en pipel. Nanga a sari-ati fasi di Jehovah ben sori den di a ben fri den foe Babilon èn ben meki den kon baka na ini a mamakondre foe den, a ben gi den nofo reide foe abi dipi lespeki gi en. Gado ben poti krakti na tapoe ala den sani dati di a ben doe, foe di a ben froemane den, a ben gi den rai, èn a ben piri-ai gi den nanga jepi foe den profeiti Hagai, Sakaria, nanga Maleaki; nanga jepi foe Esra di a ben seni go na den leki wan leriman; nanga jepi foe Granman Nehemia; èn nanga jepi foe na eigi Manpikin foe Gado srefi. Sontron a pipel ben poti prakseri èn den ben arki. Den ben gi jesi di den ben bow a tempel foe Jehovah baka, di Hagai nanga Sakaria ben gi den tranga foe doe dati èn di den ben seni den freimde wefi gowe na ini den dei foe Esra (Esra 5:1, 2; 10:1-4). Ma moro foeroetron den no ben gi jesi. Den no ben tan gi jesi ala ten; den no ben tan opo densrefi foe teki rai; den no ben tan opo den ati. Den Israèlsma no ben e kweki frede gi Gado, èn leki wan bakapisi foe dati, a frede gi Gado no ben de wan tranga krakti di ben boeweigi den na ini den libi. — Maleaki 1:6; Mateus 15:7, 8.
16. Na ini na ati foe soema Jehovah ben prani a frede gi Gado?
16 Tokoe a pramisi foe Jehovah foe poti frede gi Gado na ini den ati foe a pipel foe en no ben misi. A ben meki wan njoen froebontoe nanga na Israèl na jejefasi, den kresten di a ben pristeri wan howpoe foe libi na hemel (Jeremia 31:33; Galasiasma 6:16). Na ini 1919, Gado ben meki den komoto na katibo foe Babilon a Bigiwan, a grontapoemakti foe falsi relisi. A ben prani a frede gi en steifi na ini den ati foe den. Disi tjari foeroe winimarki gi den èn gi den wan foe a „bigi ipi”, di abi a howpoe foe libi leki borgoe na grontapoe na ondro a Kownoekondre (Jeremia 32:39; Openbaring 7:9). A frede gi Jehovah ben kon de na ini den ati toe.
Fa frede gi Gado e prani na ini wi ati
17. Na sortoe fasi Jehovah poti frede gi Gado na ini wi ati?
17 Na sortoe fasi Jehovah prani a frede disi gi Gado na ini wi ati? Nanga a wroko foe en jeje. Èn san wi abi di de wan sani di meki nanga jepi foe a santa jeje? Bijbel, a Wortoe foe Gado di skrifi nanga jepi foe en santa jeje (2 Timoteus 3:16, 17). Nanga den sani di a ben doe na ini a ten di pasa, nanga a fasi fa a e handri now nanga den foetoeboi foe en leki wan kontroe foe en profeiti Wortoe, èn nanga profeititori foe sani di moesoe pasa ete, Jehovah e gi wan steifi fondamenti gi wi alamala foe kweki frede gi Gado. — Josua 24:2-15; Hebrewsma 10:30, 31.
18, 19. Na sortoe fasi den kongres, den kringkonmakandra, nanga den gemeente konmakandra e jepi wi foe kisi frede gi Gado?
18 A de prenspari foe si taki Jehovah ben taigi Moses, soleki fa skrifi na Deuteronomium 4:10: „Tjari a pipel kon makandra na mi, so taki mi kan meki den jere den wortoe foe mi, so taki den kan leri foe frede mi ala den dei di den de na libi na tapoe a gron èn taki den kan leri den manpikin foe den.” Na a srefi fasi na ini a ten disi, Jehovah sreka sani pasa marki foe jepi a pipel foe en foe leri foe frede en. Na den kongres, den kringkonmakandra, nanga den gemeente konmakandra, wi e froeteri foe a boeweisi di wi abi foe a lobi boen-ati fasi nanga boen fasi foe Jehovah. Dati na san wi ben e doe di wi ben e studeri a boekoe De grootste mens di ooit heeft geleefd (A moro bigi man di oiti ben libi). Fa a studie dati ben abi krakti na tapoe joe nanga na tapoe a fasi fa joe e denki foe Jehovah? Di joe ben si den difrenti fasi foe a kefalek moi persoonlijkheid foe wi hemel Tata, soleki fa dati ben de foe si na ini en Manpikin, dan dati ben tranga na angri foe joe, foe noiti no doe wan sani di no e plisi Gado? — Kolosesma 1:15.
19 Na den konmakandra foe wi, wi e studeri tori so srefi foe a fri di Jehovah ben fri a pipel foe en na ini a ten di pasa (2 Samuèl 7:23). Te wi e studeri a bijbelboekoe Openbaring nanga jepi foe a boekoe De Openbaring — Haar grootse climax is nabij! (Na Openbaring — En moro bigi heimarki de krosibei!), dan wi e leri foe profeitis fisjoen di kon troe kaba na ini a di foe 20 jarihondro disi èn foe sani di moesoe pasa ete di e gi sma frede. Foe ala den sani disi di Gado ben doe, Psalm 66:5 e taki: „Kon, joe pipel èn loekoe den wroko foe Gado. A fasi fa a e handri nanga den manpikin foe libisma e gi frede.” Ija, te joe loekoe en boen, dan den sani disi di Gado ben doe, e prani frede gi Jehovah na ini wi ati, wan dipi lespeki. Na a fasi disi wi kan froestan fa Jehovah e meki a pramisi foe en kon troe: „A frede gi mi, mi sa poti na ini den ati foe den, so taki den no sa drai den baka gi mi.” — Jeremia 32:40.
20. San wi moesoe doe foe wi sei, so taki a frede gi Gado kan prani dipi na ini wi ati?
20 Ma a de krin taki, frede gi Gado no e kon na ini wi ati sondro taki wi e doe moeiti foe wi sei. Den bakapisi no e kon foe densrefi. Jehovah e doe wan sani foe en sei. Wi moesoe doe wan sani foe wi sei foe di wi e kweki a frede gi Gado (Deuteronomium 5:29). Israèl na skinfasi no ben doe dati. Ma foe di na Israèl na jejefasi nanga den kompe foe den e froetrow tapoe Jehovah, meki e ondrofeni foeroe foe den winimarki kaba di e kon gi den wan di abi frede gi Gado. Wi sa poti prakseri na tapoe wan toe foe den winimarki disi na ini na artikel di e kon now.
Fa joe ben sa piki?
◻ San na a frede gi Gado?
◻ Fa wi e kisi leri foe feni prisiri ini a frede gi Jehovah?
◻ Sortoe moeiti wi moesoe doe foe wi sei, so taki wi kan abi frede gi Gado?
◻ Foe san ede a kisi di wi e kisi frede gi Gado, abi foe doe nanga ala fasi foe wi simbôlis ati?
[Prenki na tapoe bladzijde 24, 25]
A de fanowdoe foe studeri fajafaja so taki wi kan froestan a frede gi Jehovah