Den winimarki foe frede a troe Gado
„Mi Jehovah, na joe Gado, a Sma di e leri joe fa foe kisi wini gi joesrefi, a Sma di e meki joe waka na a pasi di joe moesoe waka.” — JESAJA 48:17.
1. Gi sortoe rampoe sma ben kan wai pasi efoe den ben abi frede gi Gado?
EFOE Adam ben kweki frede gi Gado, dan dati ben kan tapoe en foe doe sondoe, di ben meki taki a dede foe têgo èn taki den bakapikin foe en e njan pina doesoendoesoen jari kaba. Efoe a fositen nâsi Israèl ben gi jesi na a rai foe Jehovah foe frede en èn foe lobi en, dan a nâsi dati no ben sa abi foe go ini katibo na Babilon, èn den no ben sa weigri foe erken a Manpikin foe Gado èn den no ben sa abi fowtoe ini a trowe di den ben trowe a broedoe foe en. Efoe a grontapoe na ini a ten disi ben abi frede gi Gado, dan no wan kroeka na ini a tiri foe wan kondre noso na ini bisnis ben sa de, no wan takroedoe, no wan orlokoe. — Odo 3:7.
2. Foe san ede wi moesoe kweki frede gi Jehovah, awinsi san den situwâsi de na a grontapoe di de lontoe wi?
2 Awinsi san a grontapoe di de lontoe wi e doe, tokoe wi leki aparti sma, leki osofamiri, leki den gemeente foe den foetoeboi foe Jehovah, kan kisi winimarki te wi e kweki frede gi a troe Gado. Disi de akroederi a froemane di Moses ben gi a nâsi Israèl: „San Jehovah joe Gado e aksi foe joe, foe frede Jehovah joe Gado èn foe waka ini ala den pasi foe en èn foe lobi en èn foe dini Jehovah joe Gado nanga joe heri ati èn nanga joe heri sili; foe hori den komando foe Jehovah . . . foe a boen foe joe?” (Deuteronomium 10:12, 13) San na wan toe foe den winimarki di wi e kisi te wi abi frede gi Jehovah, a troe Gado?
Koni — A warti moro leki gowtoe
3. (a) San na a moro prenspari winimarki di wi kan kisi? (b) San Psalm 111:10 wani taki?
3 A moro prenspari winimarki na troe koni. Psalm 111:10 e froeklari: „A frede gi Jehovah na a bigin foe koni.” San dati wani taki? Koni na a man di wan sma man foe gebroiki a sabi di a abi na wan boen fasi, foe loesoe problema, foe drai kefar poeroe, èn foe doro wan marki. A abi foe doe nanga a kroetoe di wan sma e kroetoe sani na wan joisti fasi. A bigin, a fosi pisi, a fondamenti foe so wan koni, na a frede gi Jehovah. Foe san ede? Bikasi ala mekisani na a wroko foe en anoe. Den abi en fanowdoe. A ben gi a libisma famiri wan friwani foe man teki bosroiti, ma no nanga a koni foe man poti den eigi foetoe na pasi nanga boen bakapisi, sondro a tiri foe en (Josua 24:15; Jeremia 10:23). Soso te wi e warderi den prenspari sani dati foe a libi èn wi e libi akroederi den sani dati, dan wi kan abi boen bakapisi di e tan. Efoe a sabi di wi abi foe Jehovah e gi wi a fasti overtoigi taki a wani foe Gado seiker sa abi boen bakapisi èn taki a pramisi foe en èn a man di a man pai den sma di de getrow, de seiker, dan a frede gi Gado sa boeweigi wi foe waka nanga koni. — Odo 3:21-26; Hebrewsma 11:6.
4, 5. (a) Foe san ede a leri di wan jonkoeman ben kisi na wan universiteit, no ben gi en troe koni? (b) Fa a man disi nanga en wefi ben kisi troe koni baka ten, èn na sortoe fasi a sani disi kenki a libi foe den?
4 Loekoe wan eksempre. Wan toe tintenti jari pasa, wan jonkoeman ben studeri na a Universiteit foe Saskatchewan na Kanada. Biologie ben de wan foe den leri di a ben kisi èn den ben leri en foe evolutie. Baka di a kisi en skoro papira, a ben go studeri spesroetoe atoom natuurkunde, èn a ben kisi wan studie beurs foe go doro nanga en studie na a Universiteit foe Toronto. Di a ben e studeri, a ben si toemoesi moi boeweisi foe a fasi fa sani orga nanga a fasi fa den atoom stroektoeroe seti. Ma a no ben kisi no wan piki na tapoe den aksi: Soema ben meki ala den sani disi? O ten? Èn foe san ede? Sondro den piki dati, a ben sa kan gebroiki a sabi foe en na wan koni fasi ini wan grontapoe di ben de ini wan feti na ini a ten dati? San ben sa tiri en? Wan tranga lobi gi a kondre foe en? Wan tranga lostoe foe kisi materia pai? A ben de so, taki a ben kisi troetroe koni?
5 No langa baka di a kisi en skoro papira, a jonkoeman dati nanga en wefi ben bigin studeri bijbel nanga Jehovah Kotoigi. Foe Gado en eigi Wortoe den ben bigin foe kisi den piki di den no ben kisi bifo. Den ben kon leri sabi a Mekiman, Jehovah Gado. Di den ben e studeri foe Moses na a Redi Se èn foe Danièl nanga den kompe foe en na Babilon, dan den ben leri o prenspari a de foe no abi frede gi libisma, ma gi Gado (Exodus 14:10-31; Danièl 3:8-30). So wan frede gi Gado makandra nanga lobi gi Jehovah ben bigin foe boeweigi den. Heri esi a heri libi nanga waka foe den ben kenki. Now fosi a jonkoeman disi ben kon sabi a Sma di a wroko foe en a ben e studeri na ini biologie. A ben bigin foe froestan a prakseri foe a Sma di a koni foe en a ben si di a ben studeri natuurkunde. Na presi taki a ben gebroiki a sabi foe en foe meki wrokosani di ben sa pori en kompe-libisma, dan en nanga en wefi ben wani foe jepi trawan foe den lobi Gado èn foe den lobi den kompe-libisma foe den. Den ben gi den nen foe go ini a foeroeten-diniwroko leki sma di e meki a Kownoekondre foe Gado bekènti. Baka ten, den ben studeri na a Waktitoren Bijbelskoro Gilead èn den ben seni go na tra kondre leki zendeling.
6. Efoe wi abi koni di abi en roetoe na ini a frede gi Jehovah, gi sortoe sani na baka san sma e feti, di de foe wan sjatoe pisi ten nomo, wi sa wai pasi gi, èn san wi sa doe na presi foe dati?
6 A no de foe taki, dati a no ala sma kan de wan zendeling. Ma wi alamala kan njan boen foe a koni di abi en roetoe na ini a frede gi Jehovah. Efoe wi e kweki a koni dati, dan wi no sa teki a filosofia foe libisma fajafaja na ini wi, foe di den no sabi soifri san a libi wani taki troetroe. Wi sa poti wi prakseri na tapoe a studeri foe bijbel, di skrifi nanga jepi foe a santa jeje foe Jehovah Gado, a Fonten foe a libi, a sma di kan gi wi têgo libi (Psalm 36:9; Kolosesma 2:8). Na presi taki wi e tron srafoe foe a bisnis sistema disi, di foe ensrefi e tanapoe na a lanki foe kisi pori, wi sa gi jesi na a rai foe Jehovah foe de tevrede nanga njanjan èn nanga krosi, ala di wi e meki a matifasi foe wi nanga Jehovah kon tron a moro prenspari sani ini wi libi (1 Timoteus 6:8-12). Na presi taki wi e handri neleki a tamara foe wi e anga foe wan makriki èn goedoe libi ini a grontapoe disi, wi sa bribi a Wortoe foe Gado te a e taigi wi taki a grontapoe disi sa pasa gowe èn so srefi den lostoe foe en, ma taki a sma di e doe a wani foe Gado e tan foe têgo. — 1 Johanes 2:17.
7. (a) Na sortoe fasi Odo 16:16 e jepi wi foe abi wan balansi fasi foe si sani di abi waarde? (b) Sortoe pai e kon te wi e meki a wani foe Gado tron a moro prenspari sani ini wi libi?
7 Odo 16:16 e gi wi deki-ati te a e taki reti fa a sani de: „A kisi foe koni [a koni di e bigin nanga a frede foe Jehovah] — o moro betre a de leki gowtoe! Èn a kisi foe froestan na wan sani di wan sma wani moro leki solfroe.” So wan koni èn a froestan di wi e froestan, sa boeweigi wi foe meki a doe di wi e doe a wani foe Gado, kon tron a moro prenspari sani na ini wi libi. Èn san na a wroko di Gado froetrow na den Kotoigi foe en foe den doe dati na ini a ten disi foe a libisma historia? Foe preiki foe en Kownoekondre èn foe jepi reti-atisma foe kon tron troetroe disipel foe Jesus Krestes (Mateus 24:14; 28:19, 20). Disi na wroko di e tjari pai kon foe troetroe satisfaksi èn foeroe kolokoe. Nanga boen reide bijbel e taki: „Kolokoe a sma di feni koni.” — Odo 3:13.
Kibri wi foe no doe ogri
8. (a) Kari wan di foe toe winimarki di e kon te wi abi frede gi Gado. (b) San na a takroe sani teige san wi e kisi kibri? (c) Fa a frede gi Gado e tron wan tranga krakti di e boeweigi wi?
8 A di foe toe winimarki foe a frede gi Gado, na taki a e kibri wi foe no doe ogri. Den wan di abi dipi lespeki gi Gado, no e bosroiti gi densrefi san boen èn san ogri. Den no e si den sani leki takroe di Gado e taki dati den boen, èn den no e si den sani leki boen di Gado e taki dati den takroe (Psalm 37:1, 27; Jesaja 5:20, 21). Boiti dati, wan sma di a frede gi Gado e boeweigi en, no e stòp na a sabi di a sabi nomo san Gado e taki dati boen èn san no boen. So wan sma lobi san Jehovah lobi èn a no wani si na ai san Jehovah no wani si na ai. A bakapisi de taki, a e handri akroederi den markitiki foe Gado. So boen, neleki fa Odo 16:6 e taki, „ini a frede gi Jehovah wan sma e drai komoto na san ogri”. So wan frede gi Gado e tron wan tranga krakti di e boeweigi wan sma foe doro san a no man doe nanga en eigi krakti.
9. Na sortoe fasi wan tranga angri foe no doe wan sani di no e plisi Gado, ben abi krakti na tapoe a bosroiti di wan oema na Meksikow ben teki, èn nanga sortoe bakapisi?
9 Srefi efoe a frede gi Gado e bigin foe gro nomo ini wan sma, tokoe a kan gi a sma krakti foe no doe wan sani di ben kan de wan sari baka ten gi en, en heri libi langa. Foe eksempre, wan oema di ben de nanga bere na Meksikow ben aksi wan Kotoigi foe a poeroe di sma e poeroe bere. A Kotoigi ben leisi difrenti tekst gi na oema èn a ben taki: „Gi a Mekiman, a libi na wan toemoesi prenspari sani, srefi a libi foe den wan di no gebore ete” (Exodus 21:22, 23; Psalm 139:13-16). Ondrosoekoe foe datra ben sori taki kande a beibi foe na oema no ben sa de normaal. Ma now, foe di den sani di a ben si ini a Wortoe foe Gado ben boeweigi en, meki na oema ben bosroiti foe kisi a beibi foe en. A datra foe en no ben wani ondrosoekoe en moro, èn a masra foe en ben taki dati a ben o gowe libi en, ma na oema ben tanapoe kánkan. Baka ten, a ben kisi wan oemapikin — normaal, gosontoe, èn moi. Foe di tangi ben boeweigi en, meki a ben go soekoe den Kotoigi èn den ben bigin studeri a Wortoe foe Gado nanga en. Na ini wán jari en nanga en masra ben teki dopoe. Wan toe jari na baka, na wan distriktkongres, den ben prisiri foe miti a fosi Kotoigi baka èn den meki a miti a moi oemapikin foe den di ben abi fo jari. A joisti lespeki gi Gado nanga wan tranga angri foe no doe wan sani di no e plisi en, foe troe abi wan tranga krakti na tapoe a libi foe wan sma.
10. Gi sortoe fasi foe ogridoe, a frede gi Gado kan gi sma tranga foe broko nanga den fasi dati?
10 Frede gi Gado e tranga wi teige wan lo takroedoe (2 Korentesma 7:1). Te a frede disi kweki na wan joisti fasi, dan a kan jepi wan sma foe tjari wan kaba kon na sondoe di a e doe na wan kibri fasi èn di soso en nanga Jehovah sabi. A kan jepi en foe kon fri foe katibo foe a fowtoe gebroiki foe sopi nanga drug. Wan sma na Zuid Afrika di ben de wan srafoe foe drug ben froeklari: „Di mi ben teki sabi foe Gado, mi ben kweki wan frede toe foe no plisi en. Mi ben sabi taki a ben e loekoe, èn mi ben wani srefisrefi foe a feni mi boen. A frede ben boeweigi mi foe pori den drug di mi ben abi na mi, foe di mi ben trowe den na ini a toilet.” Frede gi Gado jepi doesoendoesoen sma moro na den srefi sortoe fasi disi. — Odo 5:21; 15:3.
Kibri wi teige a frede gi libisma
11. Teige sortoe trapoe di de na ala sei, a gosontoe frede gi Jehovah kan kibri wi?
11 Gosontoe frede gi Gado e kibri wi toe teige frede gi libisma. Moro foeroe sma e kisi kwinsi foe di den frede libisma na a wan noso a tra fasi. Srefi den apostel foe Jesus Krestes ben gowe libi en èn den ben lowe di den sroedati ben graboe en hori ini a djari foe Getseimanei. Baka ten, ini a fesisei djari foe a heipriester, Petrus ben lasi en balansi fasi èn frede ben abi en ini en makti, èn foe dati ede a ben taki dati a no ben de wan foe den disipel foe Jesus èn taki a no ben sabi Jesus srefi (Markus 14:48-50, 66-72; Johanes 18:15-27). Ma den apostel ben kisi jepi foe kisi den jeje balansi fasi baka. Na a tra sei, na ini den dei foe kownoe Jojakim, frede ben moro Uría, a manpikin foe Semaja, na so wan fasi taki a ben gowe libi a diniwroko foe en leki wan profeiti foe Jehovah èn a ben lowe foe a kondre, ala di tokoe den ben kisi en èn ben kiri en. — Jeremia 26:20-23.
12. (a) Na sortoe sani di e gi kibri teige a frede gi libisma Odo 29:25 e sori go? (b) Fa wi kan kweki froetrow tapoe Gado?
12 San kan jepi wan sma foe wini a frede di a abi gi libisma? Baka di Odo 29:25 e warskow taki „a frede gi libisma e poti wan trapoe gi wan sma”, a e taki moro fara: „A sma di e froetrow tapoe Jehovah sa kisi kibri.” Froetrow tapoe Jehovah na a sroto. So wan froetrow abi en gron na tapoe sabi nanga ondrofeni. Te wi e studeri a Wortoe foe en, wi e si boeweisi foe a reti fasi foe den pasi foe Jehovah. Wi e kon de bekènti nanga den sani di pasa di e sori taki wi kan froetrow na en tapoe, èn tapoe a seiker fasi foe den pramisi foe en (so srefi a wan foe na opobaka), a lobi foe en nanga en almakti krakti. Te wi e handri na tapoe a sabi dati, foe di wi e doe den sani di Jehovah e taigi wi foe doe èn wi e kakafoetoe gi den sani teige san a e warskow wi, dan wi e ondrofeni langalanga a sorgoe di a e gi wi na wan lobi fasi èn a froetrow di wi kan froetrow tapoe en. Wi srefi e si den boeweisi taki a krakti foe en e wroko foe doe a wani foe en. A froetrow di wi abi tapoe en e gro, èn makandra nanga dati a lobi di wi abi gi en, èn a serjoesoe angri di wi abi foe no doe wan sani di no e plisi en, e gro toe. So wan froetrow gron na tapoe wan tranga fondamenti. A e dini leki wan fortresi di e kibri wi teige frede gi libisma.
13. Fa frede gi Gado kan jepi wi na wi grontapoe wroko, na wi oso nanga na skoro?
13 A froetrow di wi e poti ini Jehovah, makandra nanga frede gi Gado, sa meki wi e hori steifi na san boen, efoe wan sma gi soema wi e wroko e pramisi wi taki wi sa lasi wi wroko efoe wi no e teki prati na ini kroeka bisnis afersi. (Teki gersi Mika 6:11, 12.) So wan frede gi Gado e meki taki doesoendoesoen kresten, man foe tan horidoro na ini a troe anbegi, ala di den e tanapoe na fesi gens foe den osofamiri memre di no e bribi. A e gi so srefi den jongoewan di e go na skoro a deki-ati foe taki dati den na Jehovah Kotoigi, èn a e tranga den foe man handri nanga a spotoe di den tra skoro pikin e spotoe nanga den bijbel markitiki. Foe dati ede wan tini Kotoigi ben taki: „A no abi trobi srefisrefi san den jongoewan foe grontapoe e denki. San Jehovah e denki, na dati de prenspari.”
14. Fa a doe kon taki den foetoeboi foe Jehovah man foe kon de winiman, srefi ala di a libi foe den de na ini kefar?
14 A srefi overtoigi dati e tranga troe kresten foe hori steifi na den pasi foe Jehovah, srefi te a libi foe den de ini kefar. Den sabi taki den moesoe froewakti froefolgoe foe grontapoe. Den sabi taki den apostel ben kisi fonfon nanga tiki èn taki ogri-atisma ben fon Jesus Krestes srefi èn den ben kiri en (Markus 14:65; 15:15-39; Tori foe den Apostel 5:40; teki gersi Danièl 3:16-18.) Ma den foetoeboi foe Jehovah abi a tranga overtoigi taki a kan tranga den foe den horidoro; dati nanga a jepi foe Gado den kan kon de winiman; dati sondro misi, Jehovah sa pai den wan di de getrow — efoe a de fanowdoe srefi nanga wan opobaka foe libi na ini a njoen grontapoe foe en. A lobi di den abi gi Gado makandra nanga frede gi Gado, e boeweigi den na wan tranga fasi foe wai pasi foe doe no wan sani di no e plisi en.
15. San ben meki taki Jehovah Kotoigi ben man foe hori den soifri retifasi na ini den Nazi konsentrâsi kampoe?
15 A sani disi di e boeweigi den, ben meki taki den ben man foe tanapoe kánkan gi den toemoesi ogri-ati sani di ben doe na ini den Nazi konsentrâsi kampoe na ini den jari 1930 nanga den jari 1940. Den ben memre èn ben handri na tapoe a rai di Jesus ben gi na Lukas 12:4, 5: „Mi e taigi oenoe, mi mati, no frede den wan di e kiri a skin èn baka dati den no man doe noti moro. Ma mi sa taigi oenoe, soema oenoe moesoe frede: Frede a wan di baka a kiri kaba, abi a makti foe trowe ini Gehèna. Ija, mi e taigi oenoe, frede a Sma disi.” Foe dati ede, Gustav Auschner, wan Kotoigi di ben de na ini Sachsenhausen konsentrâsi kampoe, ben skrifi baka ten: ’A SS groepoe ben soetoe August Dickmann èn den ben pramisi taki den sa soetoe wi toe efoe wi no ben o skrifi wi nen na ondro wan papira di e taki dati wi e drai wi baka gi a bribi foe wi. No wan foe wi skrifi wi nen na ondro. Wi ben abi moro frede gi Jehovah foe doe wan sani di no e plisi en, na presi foe abi frede gi den koegroe foe den.’ Frede gi libisma e meki sma e skeki, ma frede gi Gado e meki wan sma e hori steifi na san boen.
A sorgoe di joe e sorgoe taki joe e tan na libi
16. San ben meki taki Noa ben man foe hori wan soifri fasi foe libi, tintenti jari na baka tintenti jari te go miti a Froedoe, èn san ben de a bakapisi gi en nanga en osofamiri?
16 Noa ben libi pasa den lasti dei foe a grontapoe di ben de bifo a froedoe. Jehovah ben teki a bosroiti foe pori na ogri grontapoe foe a ten dati foe na ogri foe libisma ede. Ma na a ten dati, Noa ben de ini a grontapoe dati di ben lai nanga ogridoe, toemoesi takroe hoeroedoe, nanga wan mi-no-ke fasi gi a wani foe Gado. Ala di Noa ben preiki foe regtfardiki fasi, tokoe „den no ben poti prakseri te leki a froedoe kon èn ben figi den alamala poeroe” (Mateus 24:39). Tokoe Noa no ben lasi-ati gi a wroko di Gado ben poti na fesi foe en. A ben doe „akroederi ala sani di Jehovah ben komanderi en. Na so a ben doe” (Genesis 6:22). San ben meki taki Noa ben man foe tan handri na wan soifri fasi, jari baka jari te go miti a Froedoe? Hebrewsma 11:7 e gi a piki: „Nanga bribi Noa ben sori frede gi Gado, baka di a ben kisi a warskow foe Gado foe sani di no ben de ete.” Leki wan bakapisi foe dati, en nanga en wefi nanga den manpikin foe en nanga den wefi foe den manpikin, ben kisi kibri pasa a Froedoe.
17. (a) San wi moesoe doe, awinsi san tra sma e doe? (b) Foe san ede den wan di abi frede gi Gado, de troetroe den sma di de kolokoe?
17 Wi e libi na ini wan pisi ten di na foeroe fasi de a srefi leki a di foe den dei foe Noa (Lukas 17:26, 27). Agen wi e kisi wan warskow. Openbaring 14:6, 7 e froeteri wi foe wan engel di e frei na mindri foe a hemel èn a e gi tranga na sma foe ala nâsi nanga lo nanga tongo, foe den „frede Gado èn gi en glori”. Awinsi san a grontapoe di de lontoe joe e doe, gi jesi na den wortoe dati èn baka dati gi a kari na tra sma. Neleki Noa, handri ini bribi èn sori frede gi Gado. Te joe e doe so, dan dati kan kibri a libi foe joe nanga a libi foe foeroe tra sma. Te wi e prakseri foe den winimarki, foe san den wan di e frede a troe Gado e njan boen, dan wi kan agri nomo nanga a psalm singiman di ben singi: „Kolokoe a man de di abi frede gi Jehovah, di abi foeroe prisiri srefisrefi ini den komando foe en.” — Psalm 112:1.
San joe ben sa piki?
◻ San na wan toe toemoesi moi winimarki te wi abi frede gi a troe Gado?
◻ Na sortoe fasi a koni di abi en roetoe na ini frede gi Gado kan kibri wi?
◻ Foe san ede frede gi Gado e meki wi e drai wi baka gi takroedoe?
◻ Na sortoe fasi frede gi Gado e kibri wi teige frede gi libisma?
◻ Sortoe krakti frede gi Gado abi na tapoe den sani di wi e froewakti na ini a tamara foe wi?
[Prenki na tapoe bladzijde 28, 29]
„Kolokoe a man de di abi frede gi Jehovah, di abi foeroe prisiri srefisrefi ini den komando foe en.” — Psalm 112:1