Relisi — Wan afersi di sma no mag taki foe en?
„TOE sani de, di noiti mi e taki foe den nanga tra sma: relisi nanga politiek!” Dati na wan sani di joe e jere foeroe, te Jehovah Kotoigi e taki nanga tra sma foe bijbel. Èn joe kan froestan taki tra sma e prakseri so.
Te sma e taki foe politiek, dan son tron sani kan kon faja èn wan kesekese e kon baka dati. Foeroe sma e si taki den sani di politiek sma e pramisi den, no wani taki noti èn den e si taki politiek sma foeroetron e soekoe soso makti, moni, èn foe kon pôpi. Na wan sari, taki den difrenti fasi fa sma e prakseri foe politiek e abi leki bakapisi son leisi, taki sma e go doe ogridoe.
’Ma,’ kande joe e prakseri taki, ’a no so a de nanga relisi toe? A no de so, taki a faja di sma faja ini a tori foe a relisi foe den, meki taki foeroe feti doe kon di wi e si nownowde?’ Langa ten kaba na Noord Ierland, Lomsoe sma nanga Protestant sma ben poti kontrari makandra foe feti nanga makandra. Na den Balkan kondre, memre foe na Oost Orthodox Kerki, Lomsoe sma, nanga trawan e strei foe kisi gron. San na a bakapisi foe dati? Tranga ogridoe nanga a mandi di sma e mandi tapoe makandra doronomo.
Te sma de ini kefar foe lasi den libi, dan foeroe foe den sma disi no wani taki foe den sani di den e bribi noso den sani di den osofamiri foe den e bribi. Na Afrika, foeroe jarihondro foe feantifasi ben de na mindri sma foe Krestenhèit, nanga sma di e hori densrefi na a relisi foe dorosei kondre noso foe a ras foe den. Disi ben meki taki papa nanga mama gi den pikin foe den toe nen, di kan kibri den pikin foe den pikinso, wan gwenti di de ete nojaso. So boen, wan jongoe boi kan taki dati en na wan memre foe a kerki noso a kan taki dati a de foe wan tra relisi, foe di a e gebroiki wan nen èn a no e gebroiki a tra nen. Te den sani di wan sma e bribi kan meki taki a sma kan lasi en libi, dan a no de foe froewondroe taki a sma no wani taki nanga trawan foe relisi na poebliki.
Gi trawan, relisi na wan afersi di den no mag taki foe en, srefi efoe den no abi foe frede taki den o lasi den libi. Den sma disi e frede taki, te den e taki foe a bribi foe den nanga wan sma foe wan tra relisi, dan dati sa tjari wan kesekese kon di no wani taki notinoti. Na a tra sei, trawan e bribi taki ala relisi boen. So langa a sani di wan sma e bribi, e gi en satisfaksi, den e taki, dan a de wan soso sani foe taki foe den difrenti foe den relisi.
Srefi serjoesoe studenti di e studeri den gronprakseri nanga den inibere tori foe relisi, no e agri nanga makandra. Na ini na artikel „A studie di sma meki foe relisi èn a fasi fa sma prati relisi ini groepoe”, The New Encyclopædia Britannica e erken: „Pikinmoro noiti . . . sabiman kroederi nanga makandra foe a gronprakseri foe [relisi] . . . So boen, na ini a historia foe relisi, na afersi disi ben abi na ini en difrenti pisi, pe sma no man kroederi nanga makandra.”
Wan wortoeboekoe e taki foe relisi leki „a sori di libisma e sori bribi nanga dipi respeki gi wan makti di hei moro en èn di a e si leki a mekiman èn tiriman foe na universum”. Disi ben sa aksi foe relisi, taki a ben sa moesoe abi wan prenspari rol na ini a libi foe libisma. Foe troe, na ala presi relisi ben de wan sani di meki a historia foe libisma. „No wan libisma libimakandra no de,” na so Oxford Illustrated Encyclopedia of Peoples and Cultures e taki, „di no soekoe foe meki a libi kon orga na wan wánfasi èn meki a wani taki wan sani sondro a jepi foe a wan noso a tra sortoe fasi foe anbegi.” Foe di relisi abi foe doe nanga den gronprakseri soleki „wánfasi” nanga „a wani di a libi wani taki wan sani”, dati meki foe troe relisi ben sa warti wan tra sani, leki kesekese noso trobi. Na presi foe dati, relisi warti foe sma hori wan takimakandra nanga tra sma — wan takimakandra pe sma e poti boen prakseri na tapoe relisi. Ma nanga soema, èn sortoe boen bakapisi kan kon foe wan takimakandra pe sma e poti boen prakseri tapoe relisi?