O ten den e leisi en èn fa den e kisi wini foe en

Froekoe mamanten:

Wan trowpaar di abi grontapoe wroko, ben teki a bosroiti foe opo tin miniti moro froekoe, ibri mamanten, èn foe gebroiki a ten dati foe leisi bijbel makandra, bifo den e fetifeti e gowe foe oso. Den sani di den e leisi e gi den wan fondamenti foe abi gosontoe takimakandra, baka te den gowe foe oso.

Wan owroeman na Nigeria e gebroiki a schema foe a Theokrasia Diniwroko Skoro, leki a fondamenti foe leisi bijbel nanga en osofamiri. Den e leisi wan pisi foe bijbel ibri dei baka te den taki makandra foe a dei-tekst, moeroe foeroe den e doe dati na mamanten. Den e aksi den pikin foe leisi wan baka trawan, wan pisi foe a pisi foe bijbel di moesoe leisi. Dan den e kisi a kari foe poti aksi foe den vers di den ben leisi.

Wan oso-wefi na Japan leisi a heri bijbel ibri jari, foe sensi 1985. A abi wan programa foe leisi 20 te go miti 30 miniti, bigin feifi joeroe mamanten ibri dei. A e taki foe den winimarki: „Mi bribi kon tranga. A e jepi mi foe frigiti a siki foe mi èn foe poti mi prakseri na tapoe a Paradijs howpoe.”

Wan sisa di de wan pionier 30 jari kaba, ma di en masra no de wan Kotoigi, e opo feifi joeroe ibri mamanten, foe leisi bijbel. A programa foe en e aksi taki a moesoe leisi so wan fo bladzijde foe den Hebrew Boekoe foe bijbel, wán kapitel foe den Griki Boekoe foe bijbel, nanga wán vers foe Odo. Sensi 1959 a leisi a heri bijbel ibri jari. A taki: „Den bakapisi foe a leisi di mi e leisi bijbel, na taki mi e firi taki Jehovah lobi mi . . . Mi e kisi deki-ati, trowstoe, nanga piri-ai.” A e taki moro fara: „Te mi e leisi bijbel, dan dati de neleki Jehovah e gi mi krakti ibri dei baka.”

Wan sisa di ben kon leri a waarheid na wan kondre pe den ben tapoe a wroko foe Jehovah Kotoigi, ben abi wan masra toe di ben de teige a bribi foe en. A sisa ben kan leisi bijbel foe moende te go miti freida, na mindri siksi joeroe nanga seibi joeroe mamanten. Disi gi en krakti na inisei. A e taki foe a fasi fa a leisi di a ben leisi, ben abi krakti na en tapoe: „Wi e leri foe lobi Jehovah nanga Jesus èn foe libi kolokoe, ala di wi abi problema, foe di wi sabi taki den pramisi foe Jehovah no e misi.”

Wan sisa di ben go na a Pionier Skoro, ben teki a fasti bosroiti foe waka na baka a rai di den ben kisi drape foe meki a leisi di den e leisi bijbel, tron wan ala dei sani. Na ini a bigin a ben man leisi na mindri feifi joeroe nanga siksi joeroe mamanten. Di a kenki di a wroko foe en ben kenki, ben kon na mindri disi, dan a ben kenki go foe leisi na mindri neigi joeroe nanga tin joeroe na neti. Di tra situwâsi opo ede kon di ben de wan tjalensi gi en, dan a e taki: „Mi ben tan kenki a schema foe mi akroederi den situwâsi foe mi.”

Moro lati na ini a dei:

Toe sisa di de sisa na skinfasi toe èn di de memre foe a bethelfamiri na Brasjonkondre, abi a gwenti foe leisi bijbel makandra gi so wan 20 miniti ibri dei baka a brekten njanjan. Den leisi a heri bijbel so wan 25 tron kaba; ma tokoe den e skrifi: „Ala ten wi e feni wan njoen sani, foe dati ede a leisi di wi e leisi bijbel no e tron wan froeferi sani.”

Na Japan wan sisa di no trow, ben kon froestan taki, ala di a ben kweki kon leki wan Kotoigi, tokoe a no ben sabi den Boekoe foe bijbel boen; di a ben tron wan pionier, a ben teki a fasti bosroiti foe leisi bijbel doronomo. Now a e leisi a bijbel leisi pisi gi a Theokrasia Diniwroko Skoro ala di a e rèis go na ati-oso foe kisi datra jepi, wán dei ibri wiki. Baka ten, a e ondrosoekoe sani moro fara na oso. Na a kaba foe a wiki, a e leisi bijbel moro fara, ala di a e leisi den boekoe akroederi a ten di den ben skrifi.

Wan boi di abi 13 jari, leisi a heri bijbel dri tron kaba èn nownowde a e leisi wan kapitel ibri dei te a komoto na skoro. A e taki dati disi jepi en „foe lobi Jehovah moro”.

Wan Kotoigi di abi foeroe foe doe leki wan man di e wroko, wan owroeman, wan masra, èn wan papa, e arki den bijbel cassette ala di a e rèis nanga trein go na wroko. Dan te a de na oso, a e leisi a srefi materiaal baka di a ben arki.

Wan pionier na Fransikondre, boiti taki a e leisi bijbel srefi, e arki den bijbel cassette, te a e bori, te a e rèi wagi, te a abi foe kakafoetoe gi moeilek ten, noso soso foe di a e prisiri foe doe dati.

Wan pionier na Japan di abi 21 jari, e memre taki en mama ben wani nomonomo taki a moesoe teki pikinso njanjan na jejefasi ibri dei, èn ibri dei a ben e leisi bijbel, ala di a no e doe dati tapoe a srefi ten ibri leisi, foe sensi a ben abi dri jari. Baka te a leisi a pisi di a ben wani leisi gi a dei dati, dan a e sorgoe taki a e leisi den prenspari vers baka, èn dan a e teki wan toe miniti foe prakseri baka foe den sani di a leisi.

Wan tra Kotoigi, wan pionier, leisi a heri bijbel so wan tin tron na ini den 12 jari di pasa. A masra foe en no de na bribi, foe dati ede a meki wan schema foe leisi bijbel na bakadina.

Na neti:

Wan owroeman di de wan gewoon pionier na Japan, e leisi bijbel aiti jari kaba, ibri neti bifo a e go sribi. A e taki: „Mi lobi spesroetoe den tekst di e sori fa Jehovah e denki, fa a e prakseri foe afersi, èn fa a e handri na ini situwâsi. Te mi e prakseri dipi foe den tekst disi, dan disi e jepi mi foe abi a denki foe Jehovah èn foe jepi mi kresten brada nanga sisa èn mi osofamiri.”

Foe sensi 1979, wan owroeman na Fransikondre, e leisi bijbel wan joeroe langa ibri neti. Foeroetron a abi feifi noso siksi vertaling na en fesi, foe agersi den. A e taki dati foe di a ben e leisi so finifini, meki dati jepi en foe kon sabi soifri „fa foe fiti a sabi foe bijbel na ini ala-dei situwâsi”. Disi meki taki a man abi moro boen bakapisi toe te a e gi rai di komoto na den Boekoe foe bijbel.

Gi 28 jari kaba, wan brada na Nigeria meki en wan gwenti foe leisi a dei-tekst foe a tra mamanten na neti, di de foe feni na ini Ondrosoekoe den Boekoe foe bijbel ibri dei. Makandra nanga dati, a e leisi a heri kapitel foe bijbel foe pe a dei-tekst dati teki. Baka di a trow, a ben go doro nanga a gwenti disi, èn a e leisi èn e taki makandra nanga en wefi foe a materiaal.

Wan tini di abi wan papa nanga mama di no de Kotoigi, abi a gwenti foe leisi feifi te go miti tin miniti ibri neti bifo a e go sribi. Den miniti dati warti foeroe gi en, èn a e begi bifo èn baka a leisi. A marki foe en na foe sabi a boskopoe di Jehovah ben gi ibri wan foe den bijbel skrifiman foe skrifi.

Wan brada di trow èn di e dini na bethel, e taki dati a leisi bijbel wán leisi ibri jari, aiti jari langa kaba. A e leisi 20 te go miti 30 miniti, bifo a e go rostoe te neti. Srefi te a weri srefisrefi, a e si taki te a e go na bedi sondro foe leisi, dan a no man sribi. A moesoe foe opo èn foe sorgoe gi a jeje angri dati.