Libi de, baka te wan sma dede?

TOE aksi broeja a libisma famiri doesoendoensoen jari kaba: Foe san ede wi moesoe kon owroe èn dede te foe kaba? Wan libi de, baka te wan sma dede, pe a de sabisabi?

A fosi aksi broeja foeroe sma, foe di srefi disiten sabidensi tapoe a kontren foe datratori, nanga ala den kefalek moi sani di den kon feni, no man feni wan overtoigi piki noso wan piki di e gi sma satisfaksi.

A di foe toe aksi ben abi wan heri ipi piki di e difrenti. Ma nofo tron, piki di abi foe doe nanga a tori efoe wan libi de, baka te wan sma dede pe a de sabisabi, prati na mindri den sma di de seiker taki a libi disi a no ala san de èn den sma di abi a srefi fasti overtoigi taki, a libi pe wan sma de sabisabi, e kon na wan kaba baka te wan sma dede. A moro bigi pisi foe den sma foe a lasti groepoe disi e froeteri wi taki tweifri no de na ini a prakseri foe den taki a sjatoe libi foe wan libisma na ala san a kan froewakti. Foeroe tron, ibri sani di wan sma tjari kon na fesi foe sori taki disi no de so, den sma disi e piki na wan toemoesi tevrede fasi, èn den e taki: „We, noiti wan sma no kon baka foe froeteri wi, a no so?”

Neleki fa a de nanga tra aksi di e tjari strei kon, na so foeroe aksi de di no kisi wan piki ete — èn e froeklari taki ala ten den e gi okasi foe overtoigi sma na a wán noso tra fasi. Ma trawan sa piki, kande na wan spotoe fasi: „Wi sa abi foe wakti èn si te a ten doro!”

Wan aksi di de wan langa pisi ten kaba

So wan 3500 jari pasa kaba, a barinen Job foe Owstoesei, di sma sabi foe a pasensi di a ben abi di a ben kisi pina, ben aksi granwe kaba efoe libi de, baka te wan sma dede. Disi na a fasi fa Job ben poti na aksi foe en: „Libisma dede èn den meki en go didon; a e hari en lasti bro èn a no de moro. Leki watra di e komoto na se noso wan gron foe wan liba di no abi watra moro èn e kon drei, na so libisma e go didon èn a no e opo . . . Efoe wan libisma dede, dan a sa libi baka?” — Job 14:10-14, New International Version.

Ma a no Job wawan ben aksi efoe wan libi de, baka te wan sma dede. Na Encyclopædia of Religion and Ethics e froeteri wi den tori disi di e opo wi froestan na ondro na ondro-edeprakseri „A situwâsi foe den dedewan”: „No wan enkri tori di abi foe doe nanga a jeje libi foe wan libisma, hari libisma en prakseri so, leki di foe a situwâsi di a sa de na ini, baka te a dede. Foeroe tron, den [inheems sma] na ala presi foe grontapoe, abi toemoesi krin èn libilibi fasi fa den e prakseri foe a jeje kondre — fa a libi de drape, den fasi fa a de, a fasi fa a kondre tan — èn disi e sori fa a tori e teki ala den prakseri krinkrin. A frede di foeroe sma e frede den dedewan, e sori go na wan boen owroe prakseri taki a situwâsi foe den dedewan no ben de wán, pe libi ben kon na wan kaba. Dede ben tapoe den krakti; dati ben de krin nofo; ma tra krakti no ben de dan, noso den krakti disi no ben man sori densrefi na dangra fasi di sma no ben man si krin? Awansi libisma ben bribi fosi na ini wan jeje, sili, noso kra di de aparti foe a skin, a gersi leki ibri reide de foe bribi taki den ben si den dedewan leki sma di e libi na wán noso tra fasi ete.”

Kande joe feni joesrefi na ini wan foe den dri groepoe di kari dja na tapoesei: joe no sabi seiker san e pasa baka, te wan sma dede; joe abi na overtoigi taki wan sortoe libi de, baka te wan sma dede; noso joe abi na overtoigi taki a libi disi na ala san de. Awansi fa a no fa, wi e aksi joe foe ondrosoekoe a tra artikel boen. Loekoe efoe joe e feni overtoigi bijbel boeweisi na ini, taki wan toemoesi moi froewakti de foe wan kolokoe libi, baka te wan sma dede, fa disi sa pasa, pe èn, o ten.