Waarheid e meki sma kon fri

NA AMERKANKONDRE, moro leki wan miljoen sma e sidon na ini strafoe-oso. Pikinmoro dri doesoen foe den kisi dedestrafoe. Proeberi foe si joesrefi na ini a situwâsi dati. Fa joe ben o firi? A prakseri foe so wan froewakti troetroe na wan takroe sani. Ma tokoe, na wan fasi, ala libisma de na ini wan srefi sortoe situwâsi. Bijbel e taki: „Den alamala sondoe èn den no e doro a glori foe Gado” (Romesma 3:23). Ija, foe di wi de bakapikin foe Adam, dan wan sondoe fasi e hori wi „na strafoe” (Romesma 5:12). Ibri dei, wi e firi den bakapisi foe a strafoe di wi de na ini, soleki fa a ben de nanga a kresten apostel Paulus, di ben skrifi: „Na ini den memre foe mi skin mi e si wan tra wet e feti nanga a wet foe mi froestan èn di e tjari mi go na ini katibo foe a wet foe a sondoe di de na ini den memre foe mi skin.” — Romesma 7:23.

Foe a sondoe fasi foe wi ede, meki ibriwan foe wi de na ondro wan dedestrafoe, foe taki en so, bika bijbel e taki: „A pai foe sondoe na dede” (Romesma 6:23). A psalm singiman Moses ben taki foe a situwâsi foe wi na wan fasi di fiti: „Seibitenti jari na ala san wi abi — aititenti, efoe wi tranga; ma tokoe ala san den e tjari kon gi wi na problema nanga sari; libi e kaba esi, èn wi dede.” — Psalm 90:10, Today’s English Version; teki gersi Jakobus 4:14.

Jesus ben prakseri foe a de di a libisma famiri de na ini katibo foe sondoe nanga dede, di a ben taigi den bakaman foe en: „Waarheid sa meki oenoe kon fri” (Johanes 8:32). Nanga den wortoe dati, Jesus ben gi den bakaman foe en a howpoe foe wan sani di moi moro leki foe kon fri foe a tiri foe Rome — a ben pristeri den wan fasi foe kisi pardon foe sondoe èn a fri di den kan kon fri foe dede! Fa disi ben sa gi na den? „Efoe a Manpikin e meki oenoe kon fri”, na so Jesus ben taigi den, „dan oenoe sa fri troetroe” (Johanes 8:36). Ija, foe di disi ben gi en libi, meki „a Manpikin”, Jesus, ben de leki wan soen-ofrandi foe bai baka san Adam ben lasi (1 Johanes 4:10). Disi ben opo a pasi gi ala libisma di e gi jesi foe kon fri foe a katibo foe sondoe nanga dede. A wan-enkri gebore Manpikin foe Gado dede „so taki ibriwan sma di e sori bribi na ini en, no ben sa kisi pori, ma ben sa abi têgo libi”. — Johanes 3:16.

So boen, a waarheid di kan meki wi kon fri, abi foe doe nanga Jesus Krestes. Den wan di e tron sma di e waka soifri na en baka, abi a howpoe foe kon fri foe sondoe nanga dede te a Kownoekondre foe Gado e teki ala makti abra foe den afersi na grontapoe. Srefi now, den sma di e teki a waarheid foe Gado Wortoe, e ondrofeni troetroe fri. Na sortoe fasi?

Kon fri foe a frede gi den dedewan

Miljoenmiljoen sma na ini a ten disi e libi nanga wan frede gi den dedewan. Foe san ede? Foe di den relisi foe den leri den taki wan sili e gowe libi a skin te wan sma e dede èn e go na wan jeje kondre. Dati na foe san ede a de a gwenti na ini son kondre taki den famiriman foe a sma di dede e hori wan dede-oso di e teki foeroe dei nanga neti. Nofo tron disi wani taki toe dati den e singi tranga èn den e naki dron. Den lowfisiti e bribi taki disi sa plisi a dede sma èn sa sorgoe taki a jeje foe en no e kon baka foe soekoe den sma di de na libi. Den falsi leri foe krestenhèit di abi foe doe nanga den dedewan, meki nomo taki a gwenti disi tan.

Ma bijbel e tjari a waarheid kon na krin foe a situwâsi foe den dedewan. A e taki krin taki joe sili na joe, èn no wan dangra pisi foe joe di e libi go doro baka dede (Genesis 2:7; Esekièl 18:4). Boiti dati, den dedewan no e pina na ini wan hèl di e bron, èn den no de wan pisi toe foe wan jeje kondre, wan sani di kan abi krakti na tapoe den sma di de na libi. „Foe a sei foe den dedewan”, na so bijbel e taki, „den no sabi notinoti, . . . bika no wan wroko noso prakseri noso sabi noso koni no de na ini Sjeol [grebi], a presi pe joe e go.” — Preikiman 9:5, 10.

Den bijbel waarheid fri foeroe sma foe a frede gi den dedewan. Den no e tjari diri ofrandi moro foe plisi den afo foe den, èn den no e broko den ede taki den lobiwan foe den e pina na wan ogri-ati fasi foe den sondoe foe den ede. Den kon sabi taki bijbel abi wan toemoesi moi howpoe gi den sma di dede, bika a e froeteri wi taki na Gado en joisti ten, „wan opobaka o de foe den regtfardikiwan nanga den onregtfardikiwan” (Tori foe den Apostel 24:15; Johanes 5:28, 29). So boen, den dedewan soso e rostoe now, neleki den de ini wan dipi sribi. — Teki gersi Johanes 11:11-14.

A waarheid foe a situwâsi foe den dedewan nanga a howpoe gi wan opobaka kan fri wi foe a lasi-ati di wi kan firi te wi e kisi foe doe nanga dede. So wan howpoe ben jepi wan trowpaar na Amerkankondre di a boi foe den foe fo jari ben kon dede na ini wan ongolokoe. „Wan olo de na ini wi libi di no kan tapoe, te leki wi si a boi foe wi baka nanga jepi foe na opobaka”, na so a mama foe en e erken. „Ma wi sabi taki a pen foe wi na soso gi wan pisi ten nomo, foe di Jehovah e pramisi taki a sa figi den watra-ai poeroe di e kon foe sari ede.” — Openbaring 21:3, 4.

Kon fri foe a frede gi a tamara

San a tamara abi gi wi? A grontapoe foe wi sa bron na ini wan nucleair holocaust? A pori di sma e pori a libi kontren foe grontapoe, sa meki taki wi no man libi moro na tapoe a planeiti foe wi? A go di a moraal foe sma e go na baka, sa abi leki bakapisi taki sma no e hori densrefi na wet moro èn taki broeja e kon? Disi na sani di foeroe sma na ini a ten disi frede troetroe.

Ma bijbel e gi wan fri foe den sortoe ogri frede dati. A e gi wi a djaranti taki „grontapoe e tan srefi te ten di no skotoe” (Preikiman 1:4). Jehovah no ben meki a planeiti soso foe si fa sma di no abi frantiwortoefasi e pori en (Jesaja 45:18). Na presi foe dati, Jehovah ben meki grontapoe foe a de leki wan paradijs oso gi wan libisma famiri di de na ini wánfasi (Genesis 1:27, 28). A sani di A abi na prakseri, no kenki. Bijbel e froeteri wi taki Gado sa „pori den wan di e pori grontapoe” (Openbaring 11:18). Baka dati, „den safri-ati sma sa abi grontapoe,” bijbel e taki, „èn foe troe den sa feni switi prisiri na ini vrede pasa marki”. — Psalm 37:11.

Wi kan froetrow a pramisi disi, bika Gado no e lei. Jehovah ben meki en profeiti Jesaja taki: „Mi wortoe di e komoto na mi mofo, . . . no sa drai kon baka na mi sondro bakapisi, ma seiker a sa doe a sani dati di mi abi prisiri na ini, èn foe troe, a sa abi boen bakapisi na ini san mi ben seni en go” (Jesaja 55:11; Titus 1:2). Foe dati ede, nanga ala froetrow wi kan froewakti a kontroe foe a pramisi foe Gado di skrifi na ini bijbel na ini 2 Petrus 3:13: „Njoen hemel nanga wan njoen grontapoe de di wi e froewakti akroederi en pramisi, èn na ini den disi, regtfardikifasi sa de.”

Kon fri foe a frede gi libisma

Bijbel e gi wi moi eksempre foe man nanga oema di ben sori taki den no ben frede foe gi densrefi na ini a dini foe Gado. Wan toe foe den ben de Gideon, Barak, Debora, Danièl, Ester, Jeremia, Abigaèl, and Jaèl — foe kari soso wan toe. Den getrow man nanga oema disi ben denki fa a psalm singiman ben denki, di ben skrifi: „Tapoe ini Gado mi poti mi froetrow. Mi no sa frede. San wan sma foe grontapoe kan doe mi?” — Psalm 56:11.

Na ini a fosi jarihondro, den apostel Petrus nanga Johanes ben sori a srefi sortoe deki-ati di den tirimakti foe grontapoe ben komanderi den foe tapoe nanga preiki. „Ma gi wi,” den ben piki, „wi no kan tapoe foe taki foe den sani di wi si èn jere.” Foe di Petrus nanga Johanes ben tanapoe kánkan, meki den ben poti den na ini strafoe-oso baka ten. Baka di den ben kon fri na wan wondroe fasi, den ben go doe a wroko foe den baka èn den ben tan „taki a wortoe foe Gado nanga deki-ati”. Sjatoe baka dati, den ben tjari Petrus nanga den tra apostel go na fesi a djoe Sanhedrin. „Nomo wi ben komanderi oenoe foe no tan preiki na ini a nen disi,” a granpriester ben taigi den, „èn tokoe, loekoe! oenoe foeroe Jerusalem nanga a leri foe oenoe.” Petrus nanga den tra apostel ben piki: „Wi moesoe gi jesi na Gado leki tiriman moro leki na libisma.” — Tori foe den Apostel 4:16, 17, 19, 20, 31; 5:18-20, 27-29.

Na ini a ten disi, Jehovah Kotoigi e meki moeiti na ini a wroko di den e doe foe preiki a boen njoensoe foe Gado Kownoekondre, foe abi a srefi faja di den fosi jarihondro kresten ben abi. Srefi den jongoewan na mindri den nofo tron e sori taki den no frede, foe di den e taki nanga tra sma foe a bribi foe den. Loekoe wan toe eksempre.

Stacie, wan tini, e sjen srefisrefi. A bakapisi ben de, taki a ben de wan tjalensi fosi foe taki nanga tra sma foe a bribi foe en. Ma san a ben doe foe wini a sjen foe en? „Mi ben studeri bijbel èn ben sorgoe taki mi ben froestan foe san mi ben taki”, a e taki. „Disi ben meki en moro makriki gi mi, èn mi ben kisi moro froetrow na ini misrefi.” Wan koranti foe a presi ben skrifi foe a boen nen foe Stacie. Na artikel, di wan skoromisi foe a skoro foe en ben skrifi, ben taki: „A sori taki a bribi foe [Stacie] gi en a krakti foe feti nanga den foeroe kwinsi di moro foeroe tini e firi. . . . Èn a e feni taki a dini di a e dini Gado moesoe de a moro prenspari sani na ini a denki foe en.”

Tommie ben bigin leri bijbel foe en papa nanga mama di a ben abi feifi jari nomo. Srefi di a ben jongoe ete, a ben teki sei gi a troe anbegi na wan deki-ati fasi. Te den jongoe kompe na ini en klas ben teken prenki foe den fesadei, dan Tommie ben teken sani foe a paradijs di Gado pramisi. Di Tommie ben de wan tini, a ben si taki foeroe foe den studenti ben froewondroe foe a bribi foe Jehovah Kotoigi. Na presi foe tan tiri foe di a ben frede den, a ben aksi wan foe den leriman foe en efoe a ben kan abi wan aksi-nanga-piki takimakandra nanga a klas foe en so taki a ben kan piki ala den aksi foe den na ini wán leisi. A ben kisi primisi, èn a ben gi wan toemoesi moi kotoigi.

Di Markietta ben abi 17 jari, dan a ben kisi wan toemoesi moi okasi foe taki nanga tra sma na ini en klas foe a bribi foe en. „Wi ben kisi wan toewijzing foe hori wan lezing”, a e taki. „Mi ben teki wan tori foe a boekoe Wat jonge mensen vragen — Praktische antwoorden (Jongoe sma e aksi — Piki di e wroko).a Mi ben teki feifi kapitel foe a boekoe èn ben skrifi den titel na tapoe a bord. Mi ben aksi a klas foe poti fosi sortoewan foe den titel den ben feni moro prenspari èn dan den trawan.” Baka dati, wan takimakandra nanga a klas ben hori. „Mi ben sori a klas a boekoe”, Markietta e bosroiti, „èn wan toe foe den studenti ben aksi mi wan eksemplaar. Srefi a leriman foe mi ben taki dati a ben wani wan.”

A waarheid kan meki joe kon fri

Soleki fa wi si, dan a waarheid di de na ini bijbel e fri sma awansi o owroe den de, te den e studeri en èn te den e poti prakseri na tapoe a boskopoe foe en. A e fri den foe a frede gi den dedewan, a frede gi a tamara, èn a frede gi libisma. Te foe kaba, Jesus loesoe-paiman sa fri a libisma famiri di gi e jesi, foe sondoe nanga dede. Fa a sa de wan prisiri foe libi foe têgo na ini wan paradijs na grontapoe, èn foe no de moro na ini katibo foe a sondoe fasi di wi kisi! — Psalm 37:29.

Joe ben sa wani sabi moro foe den blesi di Gado pramisi? Efoe dati de so, dan san joe moesoe doe? Jesus ben taki: „Disi wani taki têgo libi, foe den e teki sabi na ini den foe joe, a wan-enkri troe Gado, èn foe en di joe ben seni kon, Jesus Krestes” (Johanes 17:3). Foe dati ede, efoe joe wani ondrofeni a fri di Jehovah ben pramisi den disipel foe en, dan joe moesoe leri foe Jehovah Gado nanga en Manpikin. Joe moesoe sabi san na a wani foe Gado èn doe en dan, bika bijbel e taki: „Grontapoe e pasa gowe èn so srefi a lostoe foe en, ma a sma di e doe a wani foe Gado, e tan foe têgo.” — 1 Johanes 2:17.

[Foetoewortoe]

[Prenki na tapoe bladzijde 7]

Na ondro a Kownoekondre foe Gado, a libisma famiri sa kon fri foe sondoe nanga dede te foe kaba