Kownoekondre preikiman e froeteri

Doro ala sortoe sma nanga a waarheid

NA APOSTEL Paulus ben de wan fajafaja preikiman foe Gado Kownoekondre. A no ben gi gens na okasi foe kon na mindri a wroko di a kisi foe preiki „a boen njoensoe” (1 Korentesma 9:16; Tori foe den Apostel 13:50-52). Paulus ben gi tra sma a tranga foe waka na baka na eksempre foe en. — 1 Korentesma 11:1.

Na heri grontapoe sma sabi Jehovah Kotoigi foe den serjoesoe moeiti di den e doe foe preiki. Ija, den e taki nanga tra sma na ini „boen ten” èn na ini „moeilek ten” foe doe a wroko di den kisi foe Gado, foe „meki disipel” (2 Timoteus 4:2; Mateus 28:19, 20). Srefi na ini kondre pe den e ondrofeni gens, tokoe den e doro den opregti sma nanga a toemoesi prenspari boskopoe foe Gado Kownoekondre, soleki fa den ondrofenitori di e kon now e sori.

◻ Na tapoe wan èilanti na a westsei foe a Stille Zuidzee, pe den tapoe a wroko foe Jehovah Kotoigi, wan boi foe 12 jari ben kon si taki a ben de na mindri takroe kompe na skoro. Foeroe foe den skoromati foe en ben abi a gwenti foe smoko sikaret, e leisi seks boekoe, e trobi den skoromeester nanga den skoromisi, èn e feti. A situwâsi ben kon so takroe taki a boi ben aksi en papa efoe a ben kan poti en na tapoe wan tra skoro. Ma a papa ben taki-go-taki-kon nanga en boi foe no doe dati, foe di a ben denki taki a fasi fa den studenti e tjari densrefi na tapoe tra skoro na ini a birti, no ben sa difrenti. Ma fa a ben sa jepi en boi?

A papa ben memre taki a ben abi wan boekoe na ini en oso gi jongoe sma. A ben de wan presenti foe wan famiriman di ben de wan foe den Jehovah Kotoigi. So boen, a ben soekoe a boekoe, èn di a feni en, a ben gi en boi a boekoe. A ben abi a nen: Wat jonge mensen vragen — Praktische antwoorden (Jongoe sma e aksi — Piki di e wroko).a A boi ben feni taki a kapitel „Hoe weersta ik de druk van leeftijdgenoten?” (Fa mi kan kakafoetoe gi a druk foe speri?), ben de wan spesroetoe jepi. No wawan a ben leri en foe si o prenspari a de foe tan abi lespeki gi ensrefi, ma a ben leri en so srefi fa a moesoe taki nôno nanga takt te tra sma e proeberi foe poti druk na en tapoe foe doe wan don sani. Foe di a jonkoeman ben gebroiki den bijbel gronprakseri di de ini a boekoe, a ben leri fa foe kakafoetoe na wan boen fasi gi a druk foe speri.

Di en papa ben si disi èn tra boen kenki na en manpikin, a papa ben bosroiti foe leisi a boekoe. Foe di den praktis rai di a ben feni ini a boekoe ben naki en ati, a papa ben aksi Jehovah Kotoigi wan oso-bijbelstudie. Baka ten, tra memre foe en osofamiri ben kon makandra nanga en na a study. Nanga sortoe bakapisi? A boi, en moro jongoe brada, en papa, èn toe foe den granpapa nanga granmama foe en, de Jehovah Kotoigi nownowde.

◻ Na ini a srefi kondre, toe foe den Jehovah Kotoigi ben poti na strafoe-oso foe di den ben gi jesi finifini na bijbel gronprakseri. Ma den no ben meki a situwâsi foe den tapoe den foe taki sondro frede foe Gado Kownoekondre. Den ben go miti wan amtenari foe wan strafoe-oso èn den ben kisi primisi foe hori na Avondmaal foe Masra drape. Den ben breiti srefisrefi di 14 strafoeman ben sori belangstelling gi bijbel èn ben kon makandra nanga den Kotoigi na a prenspari okasi disi di ben feni presi! Na baka di den ben kon loesoe, wan toe foe den ben tan studeri bijbel èn ben abi demakandra nanga Jehovah Kotoigi.

Na ini moro leki 25 kondre Jehovah Kotoigi e pina foe a tapoe di sma tapoe a wroko foe den noso foe difrenti fasi foe gens noso froefolgoe. Ma neleki den apostel, den e tan go doro „sondro foe stòp foe gi leri èn foe meki a boen njoensoe foe a Krestes, Jesus, bekènti”. — Tori foe den Apostel 5:42.

[Foetoewortoe]