Sunem — Di sma sabi foe a lobi di sma sori èn foe na ogri di sma e doe nanga tranga

NA A zuidsei foe Galilea, na a owstoesei pisi foe a lagi presi foe Jisre-èl, joe ben abi a foto Sunem. A pikin foto disi ben si toe foe den moro prenspari feti foe bijbel historia, ma sma ben sabi en toe leki a foto pe toe oemasma ben gebore di ben de eksempre na ini a sori foe loyaal lobi.

A pikin bergi di sma denki na Morei, ben tanapoe na baka Sunem, ala di abrasei foe a lagi presi, so wan aiti kilometer moro fara, joe ben abi a bergi Gilboa. Na mindri den toe pikin bergi disi, joe ben abi wan pisi gron di abi foeroe watra, èn e meki foeroe froktoe — wan foe den kontren foe heri Israèl di e gi moro foeroe njanjan.

A moi boitipresi disi lontoe Sunem e gi wan background gi wan foe den moro moi lobi tori di oiti froeteri wan ten — A Heisingi. A singi disi e froeteri foe wan moi meisje foe a boitipresi di ben froekisi foe trow nanga en kompe di ben de wan herder, na presi foe tron wan foe den wefi foe kownoe Salomo, di a kownoe ben aksi en. Salomo ben gebroiki ala en koni nanga goedoe foe wini na ati foe a meisje. Ibri tron baka a ben prèise en: „Soema na a oema disi di e loekoe go na gron leki deibroko, moi leki a foeroe moen, soifri leki a faja son?” Èn a ben pramisi foe lontoe en nanga ala den diri moi ston di a ben kan prakseri. — Heisingi 1:11; 6:10.

Foe meki en tesi pikinso foe a libi na ini wan kownoe oso, dan Salomo ben meki a go nanga en na Jerusalem leki wan pisi foe a groepoe foetoeboi foe en, makandra nanga 60 foe den moro boen sroedati foe en (Heisingi 3:6-11). A ben meki a tan na ini en kownoe-oso, wan oso di de so kefalek moi, taki di na oemakownoe foe Skeba ben si dati, „jeje no ben sori foe de moro na ini en”. — 1 Kownoe 10:4, 5.

Ma a meisje foe Sunem ben de loyaal na a boi di ben de wan herder. „Leki wan aprabon na mindri den bon foe a boesi,” a ben taki, „na so mi lobiwan de” (Heisingi 2:3). Meki Salomo abi prisiri nanga en doesoen droifidjari. Wán droifidjari — makandra nanga en lobiwan — ben de nofo gi en. A lobi foe en no ben kan seki. — Heisingi 8:11, 12.

Wan tra moi oema ben libi na Sunem. Wi no sabi noti foe a fasi fa a ben de na skin sei, ma seiker a ben moi na ati. Bijbel e taki dati a ’skotoe ensrefi’ — noso ben span ensrefi srefisrefi — so taki a ben kan gi a profeiti Elisa njanjan doronomo èn wan presi foe tan. — 2 Kownoe 4:8-13.

Wi kan prakseri fa Elisa nanga tangi ben kon baka, na baka wan langa rèis di ben meki en weri, na ini a pikin tapoesei kamra di na oema nanga en masra ben sreka gi en. Kande a ben fisiti na oso foe den foeroetron, foe di a ben doe en diniwroko na ini wan pisi ten foe 60 jari. Foe san ede a Sunem oema disi ben taki nomonomo dati Elisa moesoe tan na a oso foe den ibri leisi te a ben pasa drape? Bika a ben warderi a wroko foe Elisa. A profeiti disi di ben abi sakafasi èn di no ben prakseri ensrefi nomo, ben handri leki a konsensi foe a nâsi, foe di a ben memre den kownoe, den priester, nanga den borgoe na a plekti di den abi foe dini Jehovah.

Sondro tweifri a Sunem oema ben de wan foe den sma di Jesus ben abi na prakseri di a ben taki: „A sma di e teki wan profeiti bika a de wan profeiti, sa kisi a pai foe wan profeiti” (Mateus 10:41). Jehovah ben gi na oema disi di ben frede Gado, wan spesroetoe pai. Ala di a no ben man kisi pikin foeroe jari langa, tokoe a ben meki wan manpikin. Wan toe jari na baka, a ben kisi jepi foe Gado toe, di wan angriten foe seibi jari langa ben pori a kondre. A tori disi di e naki sma ati, e memre wi taki a switifasi di wi e sori gi den foetoeboi foe Jehovah noiti e pasa a prakseri foe wi hemel Tata. — 2 Kownoe 4:13-37; 8:1-6; Hebrewsma 6:10.

Toe feti di ben feti krinkrin

Ala di sma e memre Sunem leki a foto foe den toe loyaal oema disi, tokoe a foto ben de kotoigi foe toe feti di ben kenki a fasi fa a historia foe Israèl ben waka. Wan kefalek boen fetigron ben de krosibei foe a foto — a plata presi na mindri den pikin bergi Morei nanga Gilboa. Ala ten sroedati komandanti na ini bijbel ten ben meki a kampoe foe den pe foeroe watra ben de foe feni, na tapoe hei gron foe kisi kibri, èn, efoe a kan, pe den abi wan hei posisi foe pe den kan loekoe abra wan drei lagi presi nanga nofo presi pe den kan sreka den groepoe man, asi, nanga fetiwagi gi a feti. Sunem nanga Gilboa ben gi den sortoe winimarki dati.

Na ini a ten foe den kroetoeman, wan legre foe 135.000 Midiansma, Amaleksma, nanga trawan ben meki a kampoe foe den na a plata presi na fesi foe Morei. Den kameili foe den ben de „so foeroe leki den ai-santi di de na sekanti” (Kroetoebakra 7:12). Abrasei foe den na a tra sei foe a plata presi, na a fonten Harod na a foetoe foe a bergi Gilboa, joe ben abi den Israèlsma ondro kroetoeman Gideon, di ben abi soso 32.000 sroedati.

Na ini den dei bifo wan feti, ibri sei ben sa proeberi foe broeja a trawan. Den legre di ben spotoe, den kameili di den ben gebroiki foe feti, den fetiwagi, nanga den asi ben kan meki den sroedati foe Israèl di ben waka nanga foetoe, kon frede. Tweifri no de taki den Midiansma — di ben seti kaba ala di den Israèlsma ben e orga densrefi ete — ben sori foe de wan sani di e gi frede. Di Gideon ben aksi: „Soema e frede èn e beifi?”, dan toe foe a di foe dri pisi foe en legre ben piki foe di den gowe libi a fetigron. — Kroetoebakra 7:1-3.

Now soso 10.000 sma foe den Israèl legre ben loekoe abrasei a plata presi na den 135.000 feanti sroedati, èn heri esi Jehovah ben meki a nomroe foe den sroedati foe Israèl kon tron wan pikin groepoe foe 300 sma. Leki fa a gwenti ben de na Israèl, dan den ben prati a pikin groepoe disi na ini dri groepoe. Foe di a doengroe ben tapoe den, den ben panja go èn ben teki a posisi foe den na dri sei foe a kampoe foe a feanti. Dan, tapoe a komando foe Gideon, den 300 sma ben naki den watrakan panja di ben kibri den frambo foe den, ben hori den frambo dati go na loktoe, èn ben bigin bari: „A feti-owroe foe Jehovah èn foe Gideon!” Den ben bro na tapoe den toetoe foe den èn ben tan bro. Na ini a doengroe, den moksi ipi sroedati di ben skreki, ben prakseri taki 300 groepoe ben opo kon foe feti nanga den. Jehovah ben drai ibriwan sma teige a trawan, èn „a heri kampoe ben bigin lon èn ben bigin e bari èn ben e lon gowe”. — Kroetoebakra 7:15-22; 8:10.

Wan di foe toe feti ben feni presi krosibei foe Sunem na ini a ten foe kownoe Saul. Bijbel e froeteri taki „den Filistijnsma ben tjari den legre foe den kon na wán, èn den ben kon èn ben opo a kampoe foe den na Sunem. Dati meki Saul ben tjari heri Israèl kon na wán, èn den ben opo a kampoe foe den na Gilboa”, neleki fa a legre foe Gideon ben doe foeroe jari na fesi. Ma tra fasi leki Gideon, Saul no ben froetrow tapoe Jehovah, èn a ben froekisi foe soekoe rai na wan sma na Endor di de leki wan asi foe den ogri jeje. Di a ben si a kampoe foe den Filistijnsma, dan „a ben kon frede, èn en ati ben bigin beifi srefisrefi”. Ini a feti di ben feni presi baka dati, den Israèlsma ben lon èn ben lasi hebi. Ala toe, Saul nanga Jonathan, ben lasi a libi foe den. — 1 Samuèl 28:4-7; 31:1-6.

Na so a ben de taki a historia foe Sunem ben abi ala toe leki marki, lobi di sma sori nanga ogri di sma e doe nanga tranga, èn froetrow tapoe Jehovah èn froetrow tapoe den ogri jeje. Na ini a lagi plata presi disi, toe oemasma ben sori loyaalfasi ini lobi èn ini na ontfanga foe sma boen, èn toe fesiman foe Israèl ben feti den feti krinkrin. Ala fo eksempre e sori o prenspari a de foe froetrow tapoe Jehovah, di noiti e misi foe pai den wan di e dini en.

[Prenki na tapoe bladzijde 31]

A disiten dorpoe Sulam na a presi pe Sunem foe fositen ben de, nanga Morei na bakasei

[Sma di abi a reti foe a prenki]

Pictorial Archive (Near Eastern History) Est.