Kresneti — Wan grontapoe fesadei noso wan santa dei gi relisi?
NA China den e kari en na Owroe Man foe kresneti. Na Ingrisikondre den sabi en leki Papa Kresneti. Sma na Rosiakondre e gebroiki a nen Granpapa Vorst èn na Amerkankondre den e kari en Santa Claus.
Foeroe sma e si na owroe man disi di de nanga prisiri èn di abi wan bigi bere nanga wan barba di weti fan, leki a sma di de kresneti srefi. Ma foeroe sma sabi toe taki Santa Claus na wan anansitori, wan tori di no troe èn di abi en fondamenti na tapoe gwenti di abi foe doe nanga wan beskopoe foe Mira (na ini disiten Torkoekondre), di ben libi na ini a di foe fo jarihondro.
Gwenti ben abi foeroe krakti na tapoe fesa ala ten, èn nanga kresneti a no de tra fasi. Na anansitori foe Santa Claus na soso wán eksempre foe koeltoeroe gwenti di abi foe doe nanga wan pôpi fesadei. Ala di son sma e hori nomo taki kresneti gwenti abi den fondamenti na tapoe sani di skrifi na ini bijbel, tokoe a de troetroe so taki moro foeroe foe den gwenti disi e kon foe heidensma.
Wan tra eksempre na a kresneti bon. The New Encyclopædia Britannica e taki: „Na anbegi di sma e anbegi bon, san ben de wan gewoon sani na den heidensma foe Europa, ben tan baka di den sma disi ben tron kresten, èn den ben teki den Skandinafia gwenti foe moi na oso, èn a maksin nanga bon di e tan groen ala ten na Njoen Jari foe jagi didibri gowe èn a poti di den ben poti wan bon gi den fowroe na kresnetiten.”
A meki di sma e meki kransi foe hulstbon noso tra bon di e tan groen ala ten na ete wan tra pôpi kresneti gwenti. Disi so srefi, abi boen foeroe foe doe nanga a heiden anbegi. Owroeten Romesma ben gebroiki taki foe hulstbon foe moi den tempel na a ten foe Saturnalia, wan fesa foe seibi dei di den ben hori mindribere foe winter, èn di ben de gi Saturnus, a gado foe gronwroko. Sma ben sabi a heiden fesa disi spesroetoe foe a bradjari fasi fa sma ben handri sondro foe dwengi densrefi èn a dwengi di den no ben dwengi den seks firi foe den.
A gwenti di sma abi na kresneti foe bosi makandra na ondro wan taki foe mistletoe (di prenki dja) kan gersi gi son sma leki wan sani di abi foe doe nanga lobitori, ma a de wan sani di komoto na den Mindri Jarihondro. Den druïden foe owroeten Ingrisikondre ben bribi taki a mistletoe ben abi towfroe krakti; foe dati ede, den ben gebroiki en foe kibri sma gi ogri jeje, wisi, nanga tra sortoe takroe sani. Baka wan pisi ten, sma ben teki a kroektoe bribi taki te sma e bosi makandra na ondro a mistletoe, dan a bakapisi foe dati ben sa de taki den sa trow nanga makandra. Na son pipel, a gwenti disi pôpi ete na kresnetiten.
Disi na soso wan toe foe den disiten kresneti gwenti di heiden leri ben abi krakti na tapoe, noso di komoto langalanga foe dati. Ma kande joe e aksi joesrefi, fa ala den sani disi doe kon. Fa wan fesadei di sma e taki dati a e gi grani na a geborte foe Krestes, ben kisi someni foe doe nanga gwenti di no de kresten gwenti? A prenspari sani na, fa Gado e denki foe a tori?
[Sma di abi a reti foe a prenki na tapoe bladzijde 3 nanga 4]
Bladzijde 3: Santa Claus: Thomas Nast/Dover Publications, Inc., 1978; mistletoe na tapoe bladzijde 3 nanga prenki na tapoe bladzijde 4: Discovering Christmas Customs and Folklore by Margaret Baker, published by Shire Publications, 1994