Fileimon nanga Oneisimus — Den kon de wán ini a kresten bradafasi

WAN foe den brifi foe na apostel Paulus di a ben skrifi na ondro a krakti foe a santa jeje, e taki foe wan moeilek problema di ben abi foe doe nanga toe man. Wan ben de Fileimon, èn a trawan ben de Oneisimus. Soema ben de den man disi? San ben meki taki Paulus ben abi belangstelling gi a situwâsi foe den?

Fileimon, a sma di ben kisi a brifi, ben libi na Kolose na Pikin Asia. Tra fasi leki foeroe tra kresten na ini a srefi kontren, Fileimon ben sabi Paulus boen, èn ben teki a boen njoensoe foe a preikiwroko foe na apostel ede (Kolosesma 1:1; 2:1). Paulus ben sabi en leki wan ’lobi kompe wrokoman’. Fileimon ben de wan eksempre foe bribi nanga lobi. A ben lobi foe teki sma na oso èn a ben de wan fonten foe kowroe-ati gi den kompe kresten foe en. Soleki fa a sori, dan Fileimon ben de wan goedoe man, foe di en oso ben bigi nofo foe hori konmakandra foe a gemeente foe a presi na ini. Sma e denki taki Apfia nanga Archippus, toe tra sma di Paulus e taki foe den na ini en brifi, kande na en wefi nanga en manpikin. Fileimon ben abi seiker wán srafoe toe, Oneisimus. — Fileimon 1, 2, 5, 7, 19b, 22.

Wan loweman na Rome

Den Boekoe foe bijbel no e froeteri wi foe san ede Oneisimus ben de moro leki 1400 kilometer fara foe oso nanga Paulus na Rome, foe pe a brifi gi Fileimon ben skrifi wan sani foe 61 G.T. Ma Paulus ben taigi Fileimon: „Efoe [Oneisimus] ben doe joe wan ogri noso a abi foe pai joe wan sani, dan poti a paiman na mi tapoe” (Fileimon 18). Den wortoe disi e sori krin taki Oneisimus ben abi problema nanga en basi, Fileimon. Paulus ben skrifi a brifi nanga a marki foe meki den toe man kon boen baka.

Sma e taki dati Oneisimus ben kon tron wan loweman, baka di a foefoeroe foe Fileimon, so taki a ben kan pai gi a lowe di a ben lowe go na Rome. Drape a ben abi a prakseri foe libi na ini a foto pe ipi-ipi sma ben libi sondro foe sma feni en.a Na ini a Griki-Rome libimakandra, loweman ben de wan bigi problema no soso gi den srafoe eiginari, ma so srefi gi a poebliki administrâsi. Sma taki dati Rome ben „abi a takroe nen foe de wan kibripresi soleki fa a gwenti de” gi srafoe di lowe.

Fa Paulus ben miti Oneisimus? Bijbel no e froeteri wi dati. Ma di Oneisimus ben kon gwenti a fri di a ben kisi, dan soleki fa a sori, Oneisimus ben kon froestan taki a ben poti ensrefi na ini wan toemoesi kefalek situwâsi. Na ini a foto Rome, wan spesroetoe groepoe skowtoe ben soekoe foe kisi den srafoe di ben de loweman, di na ogri di den ben doe ben de wan foe den moro bigi ogri di a wet foe owroeten ben sabi. Soleki fa Gerhard Friedrich e taki, dan „den ben gwenti foe bron wan marki nanga wan faja isri na tapoe a fesi-ede foe den srafoe di ben lowe èn di den ben kisi baka. Foeroetron den ben e pina den . . . , den ben e trowe den na ini a preigron gi den meti, noso den ben e kroisi den foe tapoe skreki gi tra srafoe foe waka baka na eksempre foe den.” Kande, na so Friedrich e prakseri, baka di Oneisimus gebroiki ala moni di a foefoeroe èn soekoe wan kibripresi noso wan wroko te a kon weri, a aksi kibri èn jepi foe Paulus, di a ben jere foe en na ini na oso foe Fileimon.

Tra sma e denki taki foe espresi Oneisimus ben go na wan foe den mati foe en basi, èn ben howpoe taki nanga a krakti di a sma dati ben abi na tapoe a basi, en ben sa kan kon de ini wan boen matifasi baka nanga wan basi di nanga reti ben atibron nanga en foe a wan noso tra reide. Fonten na a sei foe historia e sori taki so wan sani ben de „wan algemeen kibripresi di ben de na ala sei foe srafoe di ben de na ini problema”. Efoe dati ben de so, dan a foefoeroe di Oneisimus ben foefoeroe ben de „moro foeroe foe kan rèis go na Paulus foe aksi en foe taki nanga Fileimon gi en, na presi taki a ben foefoeroe a moni nanga a prakseri foe lowe”, na so sabiman Brian Rapske e taki.

Paulus e jepi Oneisimus

Awansi san a reide ben de foe san ede Oneisimus ben lowe, a de krin taki a ben soekoe a jepi foe Paulus foe kon boen baka nanga en basi di ben de nanga atibron. A sani dati ben tjari wan problema kon gi Paulus. Djaso joe ben abi wan srafoe di fosi no ben de na bribi èn di ben de wan ogriman di ben lowe. Na apostel moesoe proeberi foe jepi en foe di a e overtoigi wan kresten mati foe no gebroiki en reti di de akroederi wet foe gi hebi strafoe? San Paulus ben moesoe doe?

Na a ten di Paulus ben skrifi Fileimon, dan kande a loweman ben de wan pisi ten nanga na apostel. Nofo ten ben pasa taki Oneisimus ben kan kon tron wan kresten, so taki Paulus ben kan taki dati Oneisimus ben tron wan „lobi brada” (Kolosesma 4:9). „Mi e froemane joe ini a tori foe mi pikin, . . . di mi ben tron wan papa foe en ala di mi ben de ini boei na ini strafoe-oso”, na so Paulus ben taki foe en eigi matifasi na jejefasi di a ben abi nanga Oneisimus. Foe ala den fasi fa sani ben kan waka foe di Paulus ben boemoei nanga a tori, a sani disi moesoe de a wan di Fileimon no ben froewakti srefisrefi. Na apostel ben taki dati a srafoe di Fileimon „no ben man gebroiki” fosi, ben e drai go baka leki wan kresten brada. Oneisimus ben sa de wan „wini” now, noso ben sa de wan sma di den kan „gebroiki boen”, èn na so wan fasi ben libi akroederi san en nen ben wani taki. — Fileimon 1, 10-12.

Na apostel, di ben de na ini strafoe-oso, ben kan gebroiki Oneisimus heri boen. Foe taki en leti, Paulus ben wani hori en drape, ma boiti taki a ben sa de teige a wet, a ben sa de wan fasi foe pasa den reti foe Fileimon (Fileimon 13, 14). Na ini wan tra brifi di Paulus ben skrifi a srefi ten gi a gemeente di ben kon makandra na ini na oso foe Fileimon, Paulus ben skrifi foe Oneisimus leki „mi getrow èn lobi brada, di de wan sma foe oenoe”. Disi e sori taki Oneisimus ben boeweisi en getrowfasi kaba. — Kolosesma 4:7-9.b

Paulus ben gi Fileimon a deki-ati foe teki Oneisimus na wan switi fasi, ma a no ben gebroiki en makti leki apostel foe gi en a komando foe doe dati noso foe fri en srafoe. Foe a matifasi foe den èn foe a lobi ede di den ben abi gi makandra, meki Paulus ben de seiker taki Fileimon ben sa „doe srefi moro” leki san Paulus ben aksi en (Fileimon 21). San ’srefi moro’ wani taki kande, no de krin, bika soso Fileimon ben kan bosroiti nanga reti san a ben o doe nanga Oneisimus. Son sma e froeklari den wortoe foe Paulus taki a ben aksi, sondro foe a ben taki dati, foe ’seni Oneisimus go baka na en, so taki a ben kan go doro foe jepi Paulus soleki fa a ben bigin doe kaba’.

Fileimon ben teki san Paulus ben taki foe Oneisimus? A gersi taki foeroe tweifri no de taki a ben doe dati, ala di a sani dati kande no plisi tra srafoe eiginari foe Kolose, di kande ben wani si taki Oneisimus ben moesoe kisi strafoe leki wan eksempre, foe tapoe skreki gi den eigi srafoe foe den foe waka baka na eksempre foe Oneisimus.

Oneisimus — Wan man di kenki

Awansi fa a no fa, Oneisimus ben go baka na Kolose nanga wan njoen persoonlijkheid. Foe di en fasi foe denki ben kenki nanga a krakti foe a boen njoensoe, meki sondro tweifri a ben tron wan getrow memre foe a kresten gemeente na ini a foto dati. Efoe baka ten Fileimon ben fri Oneisimus, den Boekoe foe bijbel no e sori. Ma na jejefasi, a sma di ben de wan loweman fosi, ben tron wan fri man. (Teki gersi 1 Korentesma 7:22.) Den srefi fasi disi fa sma e kenki e pasa na ini a ten disi. Te sma e gebroiki bijbel gronprakseri na ini a libi foe den, dan den situwâsi nanga a sma di den de, e kenki. Den wan di sma ben si leki sma di a libimakandra no ben kan gebroiki fosi, e kisi jepi foe tron borgoe di de wan eksempre.c

Fa a teki di wan sma ben teki a troe bribi ben meki wan difrenti! Ala di Fileimon „no ben man gebroiki” Oneisimus fosi, a njoen Oneisimus seiker ben libi akroederi en nen leki wan sma di e gi „wini”. Èn a ben de seiker wan blesi taki Fileimon nanga Oneisimus ben kon de wán na ini a kresten bradafasi.

[Foetoewortoe]

[Faki na tapoe bladzijde 30]

Srafoe na ondro a wet foe rome

Na ondro a wet foe Rome di ben abi krakti na ini a fosi jarihondro G.T., wan srafoe ben de dorodoro na ini a makti foe den frowsoe, den lostoe nanga firi foe en basi. Soleki fa Gerhard Friedrich, wan sma di e froeklari sani di pasa, e taki, dan „foe taki en leti èn foe taki soleki fa wet ben de, a srafoe no ben de wan sma, ma wan sani di en eiginari ben kan gebroiki soleki fa a ben wani. . . . Den ben e si [en] a srefi leki den osometi nanga wrokosani èn den no ben kisi no wan prakseri na a wet foe lanti.” Wan srafoe no ben kan soekoe wan paiman na lantiwet foe den onregtfardiki sani di a ben pina. Te joe loekoe en boen, a ben moesoe doe nomo san en basi ben komanderi en foe doe. No wan skotoe no ben de na den strafoe di wan basi, di ben atibron, ben sa kan gi en. Srefi gi wan pikin fowtoe, a basi ben gebroiki a makti foe libi nanga dede.*

Ala di a goedoe sma ben kan abi hondrohondro srafoe, srefi wan sempel osofamiri, te joe teki dati gersi a goedoe man, kan abi toe noso dri srafoe. „Den wroko di den ososrafoe ben moesoe doe ben difrenti srefisrefi”, na so sabiman John Barclay e taki. „Srafoe ben wroko leki sma di e loekoe na oso, boriman, sma di e poti njanjan nanga dringi na tafra, sma di e krin sani, boskopoeman, sma di e loekoe pikin, sma di e sorgoe gi jongoe pikin èn e gi den bobimerki, nanga foetoeboi di e doe ala sortoe wroko gi wan sma, boiti den difrenti sortoe wroko di wan srafoe kisi spesroetoe leri foe doe, di wan sma ben sa kan si na ini den moro bigi èn moro goedoe oso. . . . Foe taki en krin, a kwaliteit foe a libi foe wan ososrafoe ben anga foeroe foe a fasi fa en basi ben de èn a sani dati ben kan abi boen noso takroe bakapisi: te a ben abi wan ogri-ati basi, dan dati ben kan abi leki bakapisi taki a ben pina foe wan lo ogri, ma wan basi di ben abi switifasi èn ben lobi foe gi sani ben kan meki taki a srafoe ben kan froedrage a libi èn ben kan de nanga howpoe. Eksempre de di sma na ala sei sabi foe na ogri-ati fasi fa den ben handri nanga den srafoe èn den skrifi na ini den boekoe di e taki foe Rome noso Grikikondre foe fositen, ma foeroe sani skrifi toe di e kotoigi foe a boen matifasi di ben de na mindri son eiginari nanga den srafoe foe den.”

*Ini a tori foe katibo na mindri a pipel foe Gado foe owroeten, loekoe Hulp tot begrip van de bijbel, di a Watchtower Bible and Tract Society of New York, Inc. tjari kon na doro, Pisi 7, bladzijde 1393-1395.