Joe na wan sma di e si sani na wan positief fasi noso wan sma di e si sani na wan negatief fasi?
„A BEN de a moro boenwan foe den ten, a ben de a moro takroewan foe den ten, . . . a ben de a ten foe abi howpoe, a ben de a ten sondro howpoe, wi ben abi ala sani na wi fesi, wi no ben abi noti na wi fesi.” Den bigin wortoe foe a kefalek moi boekoe A Tale of Two Cities foe Charles Dickens e sori na wan koni fasi a kontrari fa sani di pasa kan abi krakti na tapoe a denki foe wi, den firi foe wi èn a fasi fa wi e si sani.
Den toe foto di a ben taki foe den ben de Londen nanga Parijs na ini a ten foe broeja foe a Fransi Revo. Gi den sma di ben kisi kwinsi èn di ben libi na ini Fransikondre na ini a di foe tina-aiti jarihondro, a meki di a revo ben meki den reti di libisma abi, bekènti, ben de troetroe wan „ten foe abi howpoe”. Ma gi den wan foe a politiek nanga sociaal sistema foe Fransikondre na ini a pisi ten dati, noso a politiek sistema di ben e lasi gowe, a ben de wan „ten sondro howpoe”, di ben o tjari den go na dede nanga pori.
Dati na wan positief fasi foe si sani noso wan negatief fasi foe si sani? Ala den sani dati ben anga foe sortoe sei joe ben de. Èn a sani dati de so ete.
Wan ten foe ondrosoekoe joesrefi
Joe na wan sma di e si sani na wan positief fasi? Joe e si a prisiri sei foe a libi èn e froewakti ala ten a moro boen sani? Noso joe abi a gwenti foe si sani na wan negatief fasi, èn abi wan negatief fasi foe si den sani di joe e howpoe na tapoe, e howpoe taki sani sa waka heri boen, ma na a srefi ten e froewakti taki sani no sa waka boen srefisrefi?
Siksi tenti jari pasa kaba, na Amerkan tori skrifiman James Branch Cabell ben kari den toe filosofia di de kontrari makandra na a fasi disi: „A sma di e si sani na wan positief fasi e sori taki wi e libi na ini a moro boen libisma libimakandra di ben kan de; èn a sma di e si sani na wan negatief fasi e frede taki efoe a sani dati de troe, dan a situwâsi de sondro howpoe.” Efoe joe e denki taki a fasi disi foe si sani na wan sani di e meki joe tweifri, dan ondrosoekoe den positief nanga den negatief fasi foe soso dri sani foe a grontapoe na ini a ten disi soleki fa a skrifi na ondrosei. Ondrosoekoe baka dati a fasi fa joe e denki foe a sani èn aksi joesrefi: ’Mi na wan sma di e si sani na wan positief fasi noso wan sma di e si sani na wan negatief fasi?’
Vrede di e tan: Omeni kontren na grontapoe pe problema de joe kan kari? Ierland, a Joegoslafia foe fosi, a Mindri Owstoesei, Boeroendi, Rwanda — den wan disi e kon wantewante na ini joe prakseri. Den problema disi nanga tra feti oiti kan kisi wan loesoe foe meki vrede na heri grontapoe di e tan, de wan seiker sani? A grontapoe o abi vrede?
Tranga na ekonomia sei: Ala di den kondre foe na Europees Unie e howpoe foe abi wán moni sistema na ini a jari 1999, tokoe den e tanapoe na fesi problema di abi foe doe nanga moni di lasi en waarde èn nanga a leni di lanti e leni moni foe a poebliki. Na tra presi, kroektoedoe e swaki na ekonomia stroektoeroe foe foeroe Amerkan nanga Afrikan nâsi, pe a lasi di moni e lasi en waarde e poti wan hebi di pikinmoro den no man tjari èn pe etnis problema e prati sma ete. Wan grontapoe di tranga na ekonomia sei no fara moro?
Na abi di sma no abi wroko: Na ini a nationaal verkiezing foe 1997, a Konmakandra foe Kerki foe Ingrisikondre ben bondroe kon na wán foe gi ala politiek partèi tranga foe poti wroko leki wan moro prenspari sani na tapoe wan lijst foe sani di den sa poti prakseri na tapoe. Ma nanga pikinmoro 30 procent foe den wrokoman na grontapoe di no abi wroko noso no abi nofo wroko, fasti wroko de — spesroetoe gi den jongoewan?
A de troetroe makriki foe si sani na wan negatief fasi! Ma wan reide de foe si sani na wan positief fasi, èn wi e gi joe a kari foe go loekoe fa a kan foe kweki wan positief fasi foe si sani.
[Prenki na tapoe bladzijde 3]
A Fransi Revo
[Sma di abi a reti foe a prenki]
Foe a boekoe Pictorial History of the World