Srafoe foe libisma noso foetoeboi foe Gado?

„JEHOVAH KOTOIGI na sma di wi kan lespeki na wan noso tra fasi.” Na so a Doisri boekoe Seher, Grübler, Enthusiasten e taki. Ala di a e kroetoe den Kotoigi finifini foe feni fowtoe na den, tokoe a e erken: „Moro foeroe foe den abi wan libi pe joe no man feni fowtoe na den, èn e libi leki sma foe a middenklasse. Den e doe den grontapoe wroko nanga faja èn na wan opregti fasi, den na borgoe di no lobi babari èn sma di e pai belasting na wan eerlijk fasi. Den no e feti na baka goedoe na wan law fasi. . . . A fasi fa den e tjari densrefi na tapoe den kongres na wan fasi di orga, na wan sani di de foe prèise. A jeje di den abi foe òfer densrefi de a srefi leki iniwan tra relisi groepoe; ini a tori foe a diniwroko foe den, den e pasa ala den trawan. Ma a sani di e meki den de moro hei leki iniwan tra kresten kerki nanga groepoe foe a ten foe wi, na a troetroe fasti bosroiti di moro foeroe foe den abi foe meki den bijbel-leri bekènti na ondro ala omstandigheid èn na ondro ala sortoe kefar.”a

Ala di wi kisi so wan boen prèise, tokoe wan toe prakseri ben opo di ben meki sma e si den Kotoigi foe Jehovah na wan heri tra fasi. Na ini moro foeroe kondre na heri grontapoe, den Kotoigi doe a relisi wroko foe den na poebliki foeroe tintenti jari langa sondro gens. Foeroe miljoen sma sabi den, e lespeki den, èn e agri taki den abi a reti foe doe na anbegi foe den. Ma foe san ede tweifri de ete soema den Kotoigi foe Jehovah de?

Kande wán reide foe san ede sma e tweifri, na taki na ini a ten disi wan toe tra relisi groepoe kon abi foe doe nanga a mesbroiki di den e mesbroiki pikin, a kiri di sma e kiri densrefi na ipi, èn den sani di terrorist e doe foe kiri sma. A no de foe taki dati a fasi disi fa sma no e tjari densrefi na wan retifasi, de na ala presi, no soso na den sma di de na ini relisi. Ma, na ini a tori foe relisi foeroe sma kon de negatief, èn son wan kon abi srefi wan feantifasi.

Den kefar foe waka na baka libisma

Wan „sekte” na „wan groepoe di e hori ensrefi na wan aparti bijbel-leri noso na wan fesiman”. Na a srefi fasi, den sma di de foe wan „sekte” de „loyaal srefisrefi na wan sma, wan idea, noso wan sani”. Foe taki en leti, den memre foe iniwan relisi di groepoe abi wan tranga banti nanga libisma fesiman èn den idea foe den, de ini kefar taki den kan tron srafoe foe libisma. Wan banti di e poti toemoesi foeroe prakseri na tapoe a fesiman, kan meki taki wan sma e anga toemoesi foeroe na a fesiman na emotioneel sei èn na jejefasi, na tapoe wan fasi di no boen. A kefar kan de moro hebi te wan sma kweki foe sensi pikin-nengreten na ini wan sekte.

Den sma di abi den sortoe denki disi foe wan relisi, abi bodoi fanowdoe di den kan bribi. Son sma kon jere taki den Kotoigi de foe wan relisi organisâsi di e meki den memre foe en tron srafoe, e basi den na wan tranga fasi, e skotoe a fri fasi foe den sondro wan reide, èn e meki den tron sma di no e kroederi nanga den prakseri èn sani foe a heri libimakandra.

Jehovah Kotoigi sabi taki reide no de gi den idea dati. Foe dati ede den e aksi joe foe loekoe dati gi joesrefi. Baka te joe go prakseri foe dati finifini, dan teki joe eigi bosroiti. Den Kotoigi na foetoeboi foe Gado, soleki fa densrefi e froeklari, noso srafoe foe libisma troetroe? Foe pe den e kisi a krakti foe den? Den toe artikel na tapoe bladzijde 12-23 sa gi boen piki na tapoe den sortoe aksi disi.

[Foetoewortoe]