Joe e memre disi ete?

Joe feni taki den uitgave foe A Waktitoren di ben kon na doro no so langa pasa abi praktis waarde gi joe? Loekoe dan san joe e memre ete nanga jepi foe den aksi di e kon now?

◻ San na a difrenti na mindri „a dei foe Masra” èn „a dei foe Jehovah”? (Openbaring 1:10; Joèl 2:11)

„A dei foe Masra” abi a kontroe na ini den 16 fisjoen di den e taki foe den na ini Openbaring kapitel 1 te nanga 22 èn den prenspari sani di Jesus ben taki na fesi leki wan piki na tapoe na aksi foe den disipel foe en di abi foe doe nanga a marki foe en denoja. Leki wan heimarki foe a dei foe Masra, dan Jehovah en dei di e gi sma frede e broko kon te a sa tjari kroetoestrafoe kon na tapoe a kroektoe grontapoe foe Satan (Mateus 24:3-14; Lukas 21:11). — 15/12, bladzijde 11.

◻ San na wan toe aparti marki foe a Makarios bijbel?

A nen Jehovah de moro leki 3500 leisi na ini a Makarios bijbel. Wan sabiman tapoe a kontren foe boekoe di e taki foe Rosia relisi, ben taki: „A vertaling e hori ensrefi soifri na a Hebrew tekst, èn den wortoe di a gebroiki na ini a vertaling de soifri èn den e fiti a tori.” — 15/12, bladzijde 27.

◻ San na „waarheid” di Jesus ben taki ben sa fri wi? (Johanes 8:32)

Nanga „waarheid”, Jesus ben wani taki den bodoi di ben gi nanga jepi foe Gado en santa jeje — spesroetoe bodoi di abi foe doe nanga a wani foe Gado — di kibri gi wi na ini bijbel. — 1/1, bladzijde 3.

◻ Soema na den disiten Jehu nanga den disiten Jonadab?

Jehu e prenki Jesus Krestes, èn „na Israèl foe Gado”, salfoe kresten, e teki presi gi Jesus na grontapoe (Galasiasma 6:16; Openbaring 12:17). Neleki fa Jonadab ben kon miti Jehu, na so wan „bigi ipi” foe nâsi kon foe horibaka gi den sma di e teki presi gi Jesus na grontapoe (Openbaring 7:9, 10; 2 Kownoe 10:15). — 1/1, bladzijde 13.

◻ San a wani taki foe ’waka nanga Gado’? (Genesis 5:24; 6:9)

Disi wani taki dati den sma di e doe dati, soleki Heinok nanga Noa, ben tjari densrefi na wan fasi di ben sori taki den abi wan tranga bribi na ini Gado. Den ben doe san Jehovah ben komanderi den èn ben tjari a libi foe den akroederi den sani di den ben sabi foe en foe a fasi fa a ben handri nanga libisma. — 15/1, bladzijde 13.

◻ Foe san ede wan sma moesoe seti sani na fesi bifo a dede kande?

Na wan fasi a de so, taki te wan sma e seti den sortoe sani disi, dan dati na wan presenti gi en osofamiri. A e sori lobi. A e sori taki wan sma wani ’sorgoe gi den sma di de memre foe en osofamiri’, srefi te a no de nanga den moro (1 Timoteus 5:8). — 15/1, bladzijde 22.

◻ San „na owroe froebontoe” ben doe? (2 Korentesma 3:14)

A ben gi sani di ben de wan prenki foe a njoen froebontoe èn den ofrandi di sma ben tjari ala leisi baka ben sori a tranga fanowdoe di libisma abi foe kon fri foe sondoe nanga dede. A ben de wan „leriman di e tjari go na Krestes” (Galasiasma 3:24). — 1/2, bladzijde 14.

◻ Na sortoe fasi a njoen froebontoe de foe têgo? (Hebrewsma 13:20)

Na a fosi presi, tra fasi leki a Wetfroebontoe, noiti den sa poeroe en èn poti wan trawan na ini en presi. Na a di foe toe presi, den bakapisi foe a fasi fa a e wroko sa de foe ala ten. Èn a di foe dri presi, borgoe foe Gado Kownoekondre na grontapoe sa tan kisi winimarki foe a seti foe a njoen froebontoe na ini a Doesoen Jari Tiri. — 1/2, bladzijde 22.

◻ San na den winimarki te wi de nanga tangi?

A waran firi di wan sma e ondrofeni foe di a de nanga tangi na ini en ati, e jepi foe meki a de kolokoe èn abi vrede. (Teki gersi Odo 15:13, 15.) Foe di a de di wan sma de nanga tangi na ati de wan positief eigifasi, meki dati e kibri en teige negatief firi soleki atibron, djaroesoe, nanga bita-ati. — 15/2, bladzijde 4.

◻ Na ini sortoe froebontoe den ben tjari den manpikin go di gebore nanga jeje?

A njoen froebontoe, di Jehovah sroto nanga den memre foe a jeje Israèl, èn a froebontoe gi a Kownoekondre, di Jesus e sroto nanga den salfoe bakaman foe en di e waka na en baka (Lukas 22:20, 28-30). — 15/2, bladzijde 16.

◻ Sortoe dri bigi fesa den Israèlsma ben komanderi foe fisiti?

A fesa foe den Brede sondro sroedeki, di e hori wantewante baka a Paska foe 14 Nisan; a Wikifesa, na tapoe a di foe 50 dei baka 16 Nisan; èn a fesa foe Tjari sani kon makandra, noso a Wiwirikampoe-fesa, na ini a di foe seibi moen (Deuteronomium 16:1-15). — 1/3, bladzijde 8, 9.

◻ Foe san ede a de wan grani foe de na kresten konmakandra?

Jesus ben taki: „Pe toe noso dri sma e kon makandra na ini mi nen, na drape mi de na den mindri” (Mateus 18:20; 28:20). So srefi wan prenspari fasi fa den e gi njanjan na jejefasi, na nanga jepi foe den kresten konmakandra èn den moro bigi konmakandra (Mateus 24:45). — 1/3, bladzijde 14.

◻ Foe pe a nen Nimrod kon?

Difrenti sabiman e prakseri taki a nen Nimrod no ben de wan nen di a ben kisi di en mama meki en. Na presi foe dati, den denki taki a de wan nen di a ben kisi baka ten di a ben kon na krin taki a ben lobi meki oproeroe. — 15/3, bladzijde 25.

◻ O prenspari osofamiri de gi a libisma libimakandra?

Na osofamiri na wan sani di libisma abi fanowdoe. A historia e sori taki te a seti foe na osofamiri e go na baka, dan a krakti foe den libimakandra nanga den nâsi e kon moro swaki. So boen, na osofamiri abi langalanga krakti na tapoe a tranga foe a libimakandra èn a boen foe den pikin nanga den geslakti na ini a ten di e kon. — 1/4, bladzijde 6.

◻ San na dri boeweisi taki bijbel na a Wortoe foe Gado?

(1) A e taki sani soifri tapoe a kontren foe sabidensi; (2) a abi gronprakseri na ini di de foe ala ten èn di wi kan gebroiki boen gi a libi foe a ten disi; (3) a abi spesroetoe profeititori na ini di kon troe, soleki fa den historia troetori e sori. — 1/4, bladzijde 15.