Fa joe kan kibri den pikin foe joe?

BAKA di Wernera ben go na wan skoro ini a birti foe en foeroe jari langa, dan a ben go na wan moro hei skoro makandra nanga 3000 tra jongoewan foe São Paulo, Brasjonkondre. Gi a fosi leisi, a ben si den kompe studenti e seri èn e gebroiki drug. Heri esi, fosi den moro owroe studenti ben o teki en kon ini a groepoe foe den, den ben doe sani nanga en di ben lagi èn di ben de kefalek, foe di a skin foe en ben pikin.

Eva, a sisa foe Werner, ben abi problema toe. Foe di a ben wani doe ala moeiti, meki a ben studeri so tranga taki a no ben man moro èn a ben kon broeja na froestan sei. Neleki tra tini, Werner nanga Eva ben abi kibri fanowdoe na skin sei èn na emotioneel sei. Sortoe jepi den pikin foe joe abi fanowdoe? Fa joe kan sreka den gi a libi leki bigisma? Foe troe, sortoe tamara joe wani joe pikin moesoe abi?

Den abi moro fanowdoe leki soso sorgoe na skin sei

Prakseri pikinso foe a tjalensi di papa nanga mama e miti te den wani gi den pikin foe den kibri nojaso. Foe di a kwaliteit foe na osofamiri libi e go na baka èn moro nanga moro sma e kon pôti, meki na ini foeroe kondre a nomroe foe pikin di e tan na strati e kon moro bigi. Pikin-nengre di e wroko, na a bakapisi foe a kibri di den jongoewan no kisi teige sma di e teki wini foe den. A fowtoe gebroiki foe drug so srefi e pori foeroe jongoewan. Foe eksempre, di wan tini na Brasjonkondre ben tron wan srafoe foe drug, dan a vrede na ini na oso foe en ben lasi gowe. Boiti na emotioneel druk di a papa nanga a mama foe a tini disi ben ondrofeni, den ben feti toe foe pai moni gi a kon di a tini disi ben moesoe kon boen baka, èn den sma di e seri drug èn di no abi sari-ati ben kon na a oso foe a papa nanga mama foe aksi a moni foe den.

Ala di den kwinsi foe a libi de, tokoe foeroe papa nanga mama e go doro foe gi den pikin foe den no wawan njanjan, krosi, nanga tanpe, ma so srefi kibri teige den ogri di e doe nanga tranga, a fowtoe gebroiki foe drug, nanga tra problema. Disi na wan boen fasi foe meki moeiti, ma a nofo? Fa a de nanga a kibri foe pikin teige ogri na emotioneel sei èn na jeje sei? Foeroe sma e si taki foe abi boen bakapisi leki papa nanga mama, wani taki toe foe kakafoetoe gi den tjalensi di abi foe doe nanga den sortoe mati èn den sortoe ontspanning di den pikin foe den o teki. Ma fa papa nanga mama kan wai pasi foe no kibri den pikin toemoesi na a wan sei, ma na a tra sei foe no gi den toemoesi foeroe primisi toe? Joe e kisi a kari foe poti prakseri tapoe den piki di de foe feni na ini a tra artikel.

[Foetoewortoe]