Tigikus — Wan kompe srafoe di sma ben froetrow
NA DIFRENTI okasi, Tigikus ben rèis nanga na apostel Paulus èn ben tjari ensrefi leki a boskopoeman foe en. A ben de wan boskopoeman di den ben kan froetrow nanga moni èn nanga frantiwortoe foe hori ai tapoe sani. Foe di den Boekoe foe bijbel e poti krakti tapoe a froetrow di sma ben kan froetrow Tigikus — wan eigifasi di de prenspari gi ala kresten — dati meki kande joe ben sa wani sabi moro foe en.
Paulus ben taki foe Tigikus leki „mi lobi brada nanga getrow dinari nanga kompe srafoe na ini Masra” (Kolosesma 4:7). Foe san ede na apostel ben si en so?
A wroko foe jepi Jerusalem
A ben kon de so taki wan materia nowtoe ben kon na mindri den kresten na Judea na ini a pisi ten 55 G.T. Nanga jepi foe den gemeente na Europa nanga Pikin Asia, Paulus ben orga sani foe piki moni foe jepi den. Tigikus, di ben de foe a distrikt foe Asia, ben prei wan ròl na ini a wroko disi foe jepi den kresten.
Baka di Paulus ben gi bodoi fa foe handri nanga a bijdrage disi, dan a ben gi leki rai, taki man di den ben kan froetrow ben o seni go na Jerusalem noso go drape nanga en foe tjari ala den sani di den ben kisi (1 Korentesma 16:1-4). Di a ben teki waka foe a langa pisi foe Grikikondre go na Jerusalem, dan difrenti man ben go nanga en, èn soleki fa a e sori, wán foe den ben de Tigikus (Tori foe den Apostel 20:4). So wan sortoe bigi groepoe ben de fanowdoe kande, bika den ben e tjari moni di den ben kisi foe difrenti gemeente. A ben de fanowdoe foe kibri a moni boen, foe di foefoeroeman ben de na sei pasi èn den ben de wan kefar gi den sma di ben e waka pasa. —2 Korentesma 11:26.
Foe di Aristárkus nanga Trófimus ben go nanga Paulus na Jerusalem, dati meki son sma e denki taki kande Tigikus nanga trawan ben doe dati toe (Tori foe den Apostel 21:29; 24:17; 27:1, 2). Foe di Tigikus ben abi foe doe nanga a programa disi foe jepi trawan, meki sma e denki dati en na wán foe den foeroe „brada” di ben wroko nanga Titus na Grikikondre foe seti sani foe piki moni èn di „den gemeente ben poti en na wroko toe foe de a kompe di e rèis nanga [Paulus] ini a tori foe a switi presenti disi” (2 Korentesma 8:18, 19; 12:18). Efoe a fosi wroko di Tigikus ben doe ben abi foeroe frantiwortoe na ini, dan a di foe toe wroko foe en no ben abi moro mendri frantiwortoe na ini.
Foe Rome go na Kolose
Baka feifi noso siksi jari (60-61 G.T.), Paulus ben e howpoe taki a ben sa kon fri foe a fosi leisi di a ben de na doengroe-oso na Rome. Tigikus ben de nanga en, hondrohondro kilometer foe oso. Now Tigikus ben e go baka na Asia. Disi ben gi Paulus na okasi foe seni brifi esi-esi go na kresten gemeente ini a gebied dati èn foe seni Oneisimus, a lowe srafoe foe Fileimon, go baka na Kolose. Tigikus nanga Oneisimus ben tjari nanga den no moro mendri leki dri brifi di de now wan pisi foe bijbel — wán gi den Efeisesma, wán gi den Kolosesma, èn wán gi Fileimon. A kan so srefi taki wan brifi ben seni go na a gemeente na Laodisea, wan foto di ben de so wan 18 kilometer foe Kolose. — Efeisesma 6:21; Kolosesma 4:7-9, 16; Fileimon 10-12.
Tigikus no ben de soso wan sma di ben e tjari brifi. A ben de wan boskopoeman di Paulus ensrefi ben kan froetrow, bika Paulus ben skrifi: „Tigikus, mi lobi brada nanga getrow dinari nanga kompe srafoe ini Masra, sa meki ala mi afersi bekènti na oenoe. Foe a reide disi mi e seni en kon na oenoe, so taki oenoe ben kan sabi den sani di abi foe doe nanga wi, èn a kan trowstoe oen ati.” — Kolosesma 4:7, 8.
A sabiman E. Randolph Richards e sori taki wan sma di e tjari wan brifi „foeroetron ben de wan mindriman na mindri a sma di skrifi a brifi èn a sma di moesoe kisi a brifi, boiti a brifi srefi di ben de wan mindriman toe. . . . [Wán reide] foe san ede wan sma ben de fanowdoe di den ben kan froetrow, ben de [foe di] foeroetron a ben e tjari moro bodoi nanga en. Wan brifi ben kan taki sjatoe fa wan situwâsi de, foeroetron na a fasi fa a skrifiman e si a tori, ma den sma di ben kisi a brifi, ben e froewakti foe a sma di ben tjari a brifi taki a ben gi den ala den tra finifini tori.” Ala di wan brifi ben sa kan handri foe leri nanga afersi di de tranga fanowdoe, tokoe wan boskopoeman di sma kan froetrow ben kan tjari tra boskopoe abra nanga mofo-taki.
Den brifi gi den Efeisesma, den Kolosesma, nanga Fileimon no e taki foeroe foe fa Paulus ben e meki en. So boen Tigikus ben abi foe froeteri persoonlijk tori foe tjari kon na krin fa a situwâsi ben de nanga Paulus na Rome, èn Tigikus ben moesoe froestan den situwâsi ini den gemeente boen nofo so taki a ben kan gi den deki-ati. Den sortoe boskopoe nanga frantiwortoe disi ben kan froetrow soso na wan sma di ben kan teki presi getrow gi a sma di ben seni en kon. Tigikus ben de so wan man.
Dini leki opziener na ini farawe toewijzing
Baka di Paulus ben kon fri foe a hori di den ben hori en na ini oso na Rome, dan a ben prakseri dipi foe seni Tigikus noso Artemas go na Titus tapoe na èilanti Kreta (Titus 1:5; 3:12). Na ini a pisi ten di Paulus ben de gi a di foe toe leisi na ini doengroe-oso na Rome (kande na in 65 G.T.), agen na apostel ben seni Tigikus go na Efeise, kande foe teki a presi abra foe Timoteus di dan ben sa kan go na Paulus foe de na en sei. —2 Timoteus 4:9, 12.
Efoe Tigikus ben go na ala toe presi, Kreta nanga Efeise, no de so krin. Ma tokoe, den sortoe sani disi e sori taki a ben tan wan foe den krosibei mati foe Paulus teleki den lasti jari foe a diniwroko foe na apostel. Efoe Paulus ben e denki foe seni en go foe doe den frantiwortoe diniwroko di kande foeroetron ben moeilek toe, na presi foe Paulus ben seni Timoteus nanga Titus go, dan a de krin foe si taki Tigikus ben kon tron wan lepi kresten opziener. (Teki gersi 1 Timoteus 1:3; Titus 1:10-13.) A wani di a ben wani foe go, foe den ben kan gebroiki en na ini den farawe toewijzing, ben meki taki Paulus nanga a heri kresten gemeente ben kan gebroiki en boenboen.
Nojaso, kresten di e òfer densrefi de klariklari foe dini Gado na ini gemeente foe Jehovah Kotoigi na ini a birti pe den e tan noso e meki taki na tra presi den kan meki den Kownoekondre afersi go na fesi. Doesoendoesoen sma teki nanga prisiri a kari foe teki toewijzing leki zendeling, opziener di e rèis, internationaal wrokoman di e doe bow wroko, na a edekantoro foe a Watch Tower Society, noso na den bijkantoro foe en. Neleki Tigikus, den no e dini foe sma ai, ma den na tranga wrokoman, ’getrow dinari’ di Gado e si leki warti sma, èn tra kresten sa lobi den leki sma di de foe froetrow leki ’kompe srafoe ini Masra’.