Kownoekondre preikiman e froeteri
Fiti oensrefi nanga sakafasi na a pasi foe Jehovah
„SOEKOE Jehovah, ala oen safri-atisma foe grontapoe.” A kari disi di a Hebrew profeiti Sefanja ben bari wroko gi moro leki 26 jarihondro pasa kaba, e gi ete na sma na heri grontapoe (Sefanja 2:3). San a wani taki foe soekoe Jehovah? Foe doe disi dan wan sma e bigin foe e teki sabi na ini en foe a wan-enkri troe èn libi Gado, Jehovah. — Jeremia 10:10; Johanes 17:3.
Tokoe, a teki foe sabi srefi no e meki taki wan sma e kisi wan boen nen na Gado. Foe Gado kan feni wan sma boen, dan a moesoe doe den sani disi di a kon sabi toe. Fa? Foe di na wan saka fasi a e fiti en fasi foe denki èn en fasi foe tjari ensrefi na den markitiki foe Gado, soleki fa na ondrofenitori foe Suriname di e kon now e sori. — Efeisesma 4:22-24.
Eddy, wan skoromeester di owroe pikinso moro leki 30 jari, ben wani kisi piki srefisrefi tapoe aksi leki den wan di e kon now: ’Sortoe ròl relisi e plèi ini a libimakandra foe tide?’ èn ’Bijbel, wan boekoe foe owroeten e agri nanga a disiten sabidensi?’ Di Jehovah Kotoigi ben kon na en oso èn ben gi en piki di ben gron na tapoe bijbel, tapoe den aksi disi, dan Eddy ben arki heri boen. A ben skrifi den sani srefi na tapoe papira so taki a ben sa kan go ondrosoekoe den froeklari foe den Kotoigi.
Fosi, Eddy ben de na wan relisi di ben leri en taki libisma na a lasti pisi foe a kenki di Gado tjari kon na ini kesikesi. So boen, di den Kotoigi ben pristeri en a poeblikâsi Leven — Hoe is het ontstaan? Door evolutie of door schepping? (Libi — Fa a doe kon? Nanga jepi foe evolutie noso foe di Gado meki sani?) a ben teki en nanga ala prisiri. A krin fasi fa a boekoe ben froeklari a verslag foe bijbel foe a kria di sani kria, ben naki en ati. Nanga jepi foe a studie foe bijbel foe en, a ben kon de seiker taki a ben feni a waarheid!
Ma now a ben kisi foe doe nanga wan tesi. Eddy ben e libi na ini wan oso pe foefoeroe nanga bedrigifasi ben de a fasi foe libi. So boen, a ben moesoe teki wan bosroiti: waka na baka a kroeka fasi foe libi foe den kompe foe en na ini na oso, noso weigri a fasi dati foe libi gi wan fasi foe libi di e gi Gado glori. Na wan koni fasi, Eddy ben teki a lasti wan. A ben stòp nanga ala takroe demakandra èn ben froisi komoto foe na oso. — 1 Korentesma 15:33, 34.
Eddy ben go na fesi esi-esi, baka di a ben bigin fisiti konmakandra na a Kownoekondre zaal. A ben go na fesi toe na ini en fasi foe weri krosi èn en fasi foe sorgoe en skin èn a ben bigin taki nanga den mati nanga famiriman foe en foe den sani di a ben e leri. Baka ten, a prisiri foe Eddy ben kon moro foeroe di den ben feni en boen foe teki prati na a preiki foe a „boen njoensoe” na poebliki (Mateus 24:14; Tori foe den Apostel 20:20). Na ini december 1996 a dei di a ben wakti langa ben doro, di a ben teki dopoe na ini watra leki wan simbôl foe a gi di a ben gi ensrefi abra na Jehovah.
Ibri jari, hondrohondro doesoen opregti sma e doe wan sani na tapoe a kari foe „soekoe Jehovah”. Te den e doe dati, dan den e ondrofeni o troe Odo 22:4 de, di e taki: „A bakapisi foe sakafasi nanga a frede gi Jehovah, na goedoe èn glori èn libi.” Ija, te wi e fiti wisrefi na wan saka fasi na a pasi foe Jehovah, dan den sma di lobi waarheid e ondrofeni den sortoe blesi dati now èn nanga froetrow den e loekoe go na fesi foe kisi têgo blesi leti djaso na tapoe grontapoe. — Psalm 37:29.
[Karta na tapoe bladzijde 18]
(Efoe joe wani si pe den sani disi skrifi, loekoe a tijdschrift)
Kribisi Se
GAJANA
SURINAME
FRANSI GAJANA
BRASJONKONDRE
[Sma di abi a reti foe a prenki]
Grontapoe: Mountain High Maps® Copyright © 1997 Digital Wisdom, Inc.