Waka na baka Jehovah — Sori retidoe nanga regtfardikifasi

„Mi na Jehovah, a Sma di e sori lobi boen-ati, retidoe nanga regtfardikifasi na grontapoe, bika na ini den sani disi mi abi prisiri.” — JEREMIA 9:24.

1. Sortoe toemoesi moi sani di wi kan froewakti, Jehovah e pristeri wi?

JEHOVAH ben pramisi taki a dei ben sa kon pe ibriwan sma ben sa sabi en. Nanga jepi foe en profeiti Jesaja, a ben taki: „Sma no sa doe no wan sortoe ogri èn no sa pori no wan sani na tapoe heri mi santa bergi; bika grontapoe seiker sa kon foeroe nanga a sabi foe Jehovah, soleki fa watra e tapoe se” (Jesaja 11:9). Fa dati na wan toemoesi moi sani di wi kan froewakti!

2. San a wani taki toe foe sabi Jehovah? Foe san ede?

² Ma san a wani taki foe sabi Jehovah? Jehovah ben tjari kon na krin gi Jeremia san ben e teri moro foeroe: „Taki a abi inzicht nanga sabi foe mi, taki mi na Jehovah, a Sma di e sori lobi boen-ati, retidoe nanga regtfardikifasi na grontapoe, bika na ini den sani disi mi abi troetroe prisiri” (Jeremia 9:24). So boen, foe sabi Jehovah abi na ini toe foe sabi fa a e sori retidoe nanga regtfardikifasi. So boen efoe wi e sori den eigifasi dati, dan Jehovah sa prisiri nanga wi. Fa wi kan doe dati? Na ini en Wortoe, bijbel, Jehovah kibri den tori pe a e sori fa a ben handri nanga onvolmaakti libisma ala den hondrohondro jari di pasa. Te wi e studeri dati, dan wi kan kon sabi Jehovah en fasi foe retidoe nanga regtfardikifasi èn na so wi kan waka na en baka. — Romesma 15:4.

Ma tokoe a abi sari-ati

3, 4. Foe san ede Jehovah ben abi reti foe pori Sodom nanga Gomora?

³ A kroetoe foe Gado na tapoe Sodom nanga Gomora na wan heri moi eksempre di e sori difrenti fasi foe a retidoe foe Jehovah. No wawan Jehovah ben tjari strafoe kon di de fanowdoe, ma a ben seti sani toe, so taki den wan di e froedini dati ben kan kisi froeloesoe. A ben de troetroe nanga reti taki den foto dati ben kisi pori? Na ini a bigin Abraham di soleki fa a sori ben sabi pikinso nomo foe na ogridoe di ben doe na Sodom, no ben denki taki dati ben de nanga reti. Jehovah ben gi Abraham a djaranti taki efoe tin regtfardiki sma nomo ben kan de foe feni, A ben sa kibri a foto dati. A de krin, taki a retidoe foe Jehovah noiti no de esi-esi noso sondro sari-ati. — Genesis 18:20-32.

⁴ Na ondrosoekoe di den toe engel ben ondrosoekoe sani, ben gi krinkrin boeweisi foe a go di Sodom ben go na baka na moreel sei. Di den man foe a foto, „foe boi te go miti owroe man” ben kon sabi taki toe man ben kon foe tan na ini na oso foe Lot, den ben feti foe go na ini en oso foe di nanga tranga den ben wani abi seks nanga den toe man dati. Foe troe, a takroefasi foe den ben kon lagi srefisrefi! Sondro tweifri, a kroetoe foe Jehovah gi a foto ben de wan regtfardiki kroetoe. — Genesis 19:1-5, 24, 25.

5. Fa Gado ben froeloesoe Lot nanga en osofamiri foe Sodom?

⁵ Baka di Petrus ben kari a pori foe Sodom nanga Gomora leki wan eksempre foe warskow wi, na apostel ben skrifi: „Jehovah sabi fa foe froeloesoe sma di gi densrefi na ini a dini foe en, komoto na tesi” (2 Petrus 2:6-9). Retidoe no ben sa doe na wan joisti fasi efoe a regtfardiki Lot nanga en osofamiri ben figi poeroe makandra nanga den sma foe Sodom di ben de sondro gado. So boen, den engel foe Jehovah ben warskow Lot gi a pori di ben de foe kon. Di Lot ben draidrai, dan „foe di Jehovah ben abi sari-ati gi en”, den engel ben graboe en, a wefi foe en, nanga den oemapikin foe en na den anoe, èn den ben tjari den go na dorosei foe a foto (Genesis 19:12-16). Wi kan de seiker taki Jehovah sa broko en ede na wan srefi fasi nanga regtfardikiwan ini a pori di na ogri seti foe sani disi sa pori heri esi.

6. Foe san ede wi no moesoe broko wi ede na wan fasi di no fiti ini a tori foe a kisi di na ogri seti foe sani sa kisi pori heri esi?

⁶ Ala di a kaba foe a seti foe sani disi sa de wan ten ’pe retidoe sa feni presi’, tokoe reide no de foe broko wi ede na wan fasi di no fiti (Lukas 21:22). A kroetoe di Gado sa tjari kon na Armagedon, ’alamala makandra sa sori taki a regtfardiki’ (Psalm 19:9). Neleki fa Abraham ben leri, dan wi leki libisma kan froetrow dorodoro na ini Jehovah en retidoe di hei moro a di foe wi. Abraham ben aksi: „A Kroetoeman foe heri grontapoe no sa doe san reti?” (Genesis 18:25; teki gersi Job 34:10.) Noso soleki fa Jesaja ben taki en na wan joisti fasi, „soema e leri [Jehovah] a pasi foe retidoe?” — Jesaja 40:14.

Wan regtfardiki sani di doe foe froeloesoe a libisma famiri

7. San Gado en retidoe nanga en sari-ati abi foe doe nanga makandra?

⁷ A retidoe foe Gado no de foe si wawan ini a fasi fa a e strafoe den sma di e doe ogri. Jehovah e taki foe ensrefi leki „wan regtfardiki Gado nanga wan Froeloesoeman” (Jesaja 45:21). Soleki fa a sori, dan wan kroederi de na mindri Gado en regtfardikifasi, noso retidoe, èn a wani di a wani froeloesoe a libisma famiri foe den bakapisi foe sondoe. The International Standard Bible Encyclopedia, 1982 editie ben gi komentaar tapoe a tekst disi èn e sori taki „Gado en retidoe e soekoe praktis fasi foe sori En sari-ati èn foe doe a froeloesoe foe En”. A no de so, taki a retidoe foe Gado moesoe safoe nanga sari-ati ma, na presi foe dati a de so, taki sari-ati na wan fasi fa Gado e sori retidoe. A seti foe Gado foe wan loesoe-paiman foe froeloesoe a libisma famiri, na a moro moi eksempre foe a fasi disi foe a retidoe foe Gado.

8, 9. (a) San ben de so srefi ini den wortoe „wan regtfardiki sani di doe”? Foe san ede? (b) San Jehovah e aksi baka foe wi?

⁸ A prijs foe a loesoe-paiman srefi — a diri libi foe Gado en wan-enkri gebore Manpikin, Jesus Krestes — ben de wan hei prijs bika den markitiki foe Jehovah de universeel èn ensrefi e hori ensrefi na dati (Mateus 20:28). Wan volmaakti libi, di foe Adam, ben lasi gowe, so boen wan volmaakti libi ben de fanowdoe foe bai libi baka gi den bakapikin foe Adam (Romesma 5:19-21). Na apostel Paulus e taki foe Jesus en waka nanga libi foe soifri retifasi èn so srefi a pai di Jesus ben pai a loesoe-paiman, leki „wan regtfardiki sani di doe” (Romesma 5:18, foetoewortoe). Foe san ede dati de so? Foe di foe a sei foe Jehovah, a ben de a reti èn a joisti sani foe doe foe froeloesoe a libisma famiri, ala di a ben o kostoe Gado srefi boen foeroe foe doe disi. Den bakapikin foe Adam ben de leki „wan ken di masi” èn di Gado no sa wani broko, noso leki wan „kokolampoe di a faja foe en e soekoe foe dede” èn di Gado no ben sa wani kiri (Mateus 12:20). Gado ben abi na overtoigi taki foeroe getrow man nanga oema ben sa kon foe den bakapikin foe Adam. — Teki gersi Mateus 25:34.

⁹ Fa wi moesoe handri na tapoe a moro hei fasi disi foe sori lobi nanga retidoe? Wan foe den sani di Jehovah e aksi baka foe oenoe na taki wi „doe retidoe” (Mika 6:8). Fa wi kan doe disi?

Soekoe retidoe, feti baka regtfardikifasi

10. (a) San na wán fasi fa wi e sori retidoe? (b) Fa wi kan soekoe Gado en regtfardikifasi fosi?

¹⁰ Na a fosi presi, wi moesoe hori wisrefi na den moreel markitiki foe Gado. Foe di den markitiki foe Gado reti èn regtfardiki, dan wi e doe reti te wi e libi ini akroederi nanga den markitiki dati. Dati na san Jehovah e froewakti foe a pipel foe en. „Leri foe doe boen; soekoe retidoe”, na so Jehovah ben taigi den Israèlsma (Jesaja 1:17). Jesus ben gi wan srefi sortoe rai na den arkiman foe en na ini a Bergitaki, di a ben leri den foe ’soekoe fosi a kownoekondre nanga a regtfardikifasi foe Gado’ (Mateus 6:33). Paulus ben gi Timoteus deki-ati foe „feti baka regtfardikifasi” (1 Timoteus 6:11). Te wi e libi na ini wánfasi nanga den markitiki foe a fasi fa Gado e handri èn wi e weri a njoen fasi fa wi moesoe de, dan wi e feti baka troe retidoe nanga regtfardikifasi (Efeisesma 4:23, 24). Nanga tra wortoe, wi e soekoe retidoe foe di wi e doe sani na a fasi foe Gado.

11. Foe san ede èn fa wi moesoe feti nanga a basi di sondoe wani basi wi?

¹¹ Soleki fa wi sabi heri boen, a no de makriki ala ten gi onvolmaakti libisma foe doe san joisti èn boen (Romesma 7:14-20). Paulus ben gi den kresten na Rome deki-ati foe feti nanga a basi di sondoe wani basi den, so taki den ben kan pristeri den skin di den gi abra na Gado leki „fetisani foe regtfardikifasi” di Gado kan gebroiki foe doe san a abi na prakseri (Romesma 6:12-14). So srefi, foe di wi e studeri Gado Wortoe doronomo èn e fiti en na ini wi aladei libi, meki wi kan teki na ini wi a „serjoesoe froemane foe Jehovah” èn kisi ’tranga leri ini regtfardikifasi’ — Efeisesma 6:4; 2 Timoteus 3:16, 17.

12. Foe san wi moesoe tan fara efoe wi wani taki a fasi fa wi e handri nanga tra sma, moesoe de a srefi fasi fa Jehovah e handri nanga wi?

¹² Na a di foe toe presi, wi e sori retidoe te wi e handri nanga tra sma na fasi fa wi wani taki Jehovah moesoe handri nanga wi. A de makriki foe abi wan dobroe marki — wan switi fasi gi wisrefi ma wan strak fasi gi trawan. Wi de klariklari foe gi pardon na den fowtoe di wisrefi e meki, ma tokoe wi de esi-esi foe kroetoe trawan te den e meki fowtoe, di kande de notinoti efoe joe teki en gersi nanga di foe wi. Jesus e sori krin san na a tori te a e aksi: „Foe san ede dan joe e loekoe a pikin splentri na ini na ai foe joe brada, ma joe no e si a barki na ini joe eigi ai?” (Mateus 7:1-3) Noiti wi no moesoe frigiti taki no wan foe wi ben kan tan tanapoe efoe Jehovah ben sa ondrosoekoe wi fowtoe finifini (Psalm 130:3, 4). Efoe Jehovah en retidoe e gi en pasi foe loekoe pasa den swakifasi foe wi brada, dan soema na wi foe kroetoe den na wan feantifasi? — Romesma 14:4, 10.

13. Foe san ede wan regtfardiki man e firi taki a de froeplekti foe preiki a boen njoensoe foe a Kownoekondre?

¹³ Na a di foe dri presi, wi e sori a retidoe foe Gado te wi abi faja foe doe a preikiwroko. „No tapoe joesrefi foe doe boen gi den wan di moesoe kisi dati, te a de ini a makti foe joe anoe foe doe dati”, na a rai di Jehovah e gi wi (Odo 3:27). A no ben sa de reti foe hori a sabi gi wisrefi, sabi di e gi sma libi èn di Gado lobi foe gi wi. A troe, a kan taki foeroe sma no wani teki a boskopoe foe wi, ma so langa Gado e sori den sma disi sari-ati, dan wi moesoe wani foe tan gi den na okasi foe „abi berow” (2 Petrus 3:9). Èn neleki Jesus, na so wi e prisiri te wi man jepi wan sma foe drai go na retidoe nanga regtfardikifasi (Lukas 15:7). Now na a boen ten gi wi foe ’sai siri ini regtfardikifasi’. — Hosea 10:12.

„Granman gi retidoe nomo”

14. Sortoe ròl owroeman e prei ini a tori foe retidoe?

¹⁴ Wi alamala moesoe waka na tapoe a pasi foe regtfardikifasi, ma den owroeman ini a kresten gemeente abi wan spesroetoe frantiwortoe ini a tori disi. A kownoe tirimakti foe Jesus e kon ’nanga jepi foe retidoe èn nanga jepi foe regtfardikifasi’. So srefi, a markitiki gi owroeman na a retidoe foe Gado (Jesaja 9:7). Den e hori a sani na prakseri di skrifi na wan profeitis fasi na Jesaja 32:1: „Loekoe! Wan kownoe sa tiri gi regtfardikifasi nomo; èn foe den sei foe den granman, den sa tiri leki granman gi retidoe nomo.” Leki opziener di a santa jeje poti na wroko, noso ’basja foe Gado’, owroeman moesoe doe sani na a fasi foe Gado. — Titus 1:7.

15, 16. (a) Fa owroeman e waka baka a getrow skapoeman na ini na agersitori foe Jesus? (b) Fa owroeman e denki foe den wan di lasi na jejefasi?

¹⁵ Jesus ben sori taki Jehovah en retidoe ben de nanga sari-atifasi èn ben reidelek. Boiti dati, Jesus ben proeberi foe jepi den wan di ben abi problema èn „foe soekoe èn foe froeloesoe san ben lasi” (Lukas 19:10). Neleki a skapoeman na ini na agersitori foe Jesus, di ben soekoe a lasi skapoe sondro foe kon weri, na so owroeman e soekoe den wan di e lasi pasi na jejefasi èn e meki moeiti foe tjari den sortoe sma disi kon baka na ini a skapoekoi. — Mateus 18:12, 13.

¹⁶ Na presi foe kroetoe den wan di doe serjoesoe sondoe kande, owroeman e soekoe foe jepi èn foe meki den sma dati abi berow efoe dati kan. Den e prisiri te den kan jepi wan sma di lasi pasi. Ma den e sari te wan ogri sma no e sori berow. Dan den regtfardiki markitiki foe Gado e aksi foe den taki den moesoe sluit a sma uit di no abi berow. Srefi dan, neleki a papa foe a boi di ben lasi, den owroeman e howpoe taki wan dei a sma di abi fowtoe sa ’kisi ensrefi’ (Lukas 15:17, 18). So boen, owroeman e go foe fisiti son wan di sluit uit foe memre den fa den kan drai kon baka na Jehovah en organisâsi.a

17. San na a marki di owroeman abi te den e ondrosoekoe wan kefal pe ogri ben doe, èn sortoe eigifasi sa jepi den foe doro a marki dati?

¹⁷ Owroeman moesoe waka spesroetoe na baka Jehovah en retidoe te den ondrosoekoe kefal pe ogri ben doe. Sondari „ben tan kon” na Jesus foe di den ben firi taki a ben sa froestan den èn ben sa jepi den (Lukas 15:1; Mateus 9:12, 13). A no de foe taki dati Jesus no ben gi pardon na a doe di sma e doe ogri. Wan brekten njanjan di Sakeus ben njan nanga Jesus, ben meki taki Sakeus, wan bekènti bedrigiman ben kisi berow èn ben seti sani foe meki en kon boen baka nanga ala den sma di a ben meki njan pina foe den sani di a ben doe (Lukas 19:8-10). Na ini a ten disi, owroeman abi a srefi marki te den e hori den kroetoe afersi foe den — foe tjari a sma di abi fowtoe kon so fara taki a sori berow. Efoe sma wani kon na den neleki fa den ben kon na Jesus, dan foeroe foe den sma di e doe ogri sa feni en moro makriki foe soekoe a jepi foe den.

18. San sa jepi owroeman foe de leki „wan kibripresi gi a winti”?

¹⁸ Wan ati di e firi finifini san e pasa, dati sa jepi owroeman foe doe Gado en retidoe, di no grofoe èn di no de sondro firi. A de moi foe si taki Esra ben sreka na ati foe en, no wawan en froestan, so taki a ben kan leri den Israèlsma retidoe (Esra 7:10). Wan ati di e froestan san e pasa, sa jepi owroeman foe gebroiki bijbel gronprakseri di e fiti èn foe hori a situwâsi foe ibri sma na prakseri. Di Jesus ben dresi na oema di broedoe ben lon komoto na en, dan Jesus ben sori taki Jehovah en retidoe wani taki foe froestan san a wet wani taki èn so srefi a letter foe a wet (Lukas 8:43-48). Owroeman di e doe retidoe nanga sari-ati, sma kan teki gersi nanga „wan kibripresi gi a winti” gi den wan di foe den eigi swakifasi noso foe na ogri seti foe sani disi pe wi e libi na ini, ben gi den mankeri. — Jesaja 32:2.

19. Fa wan sisa ben doe wan sani na tapoe a fiti di owroeman ben fiti a retidoe foe Gado ini a kefal foe en?

¹⁹ Wan sisa, di ben doe wan serjoesoe sondoe, ben kon froestan a retidoe foe Gado di ensrefi ben ondrofeni. „Foe troe, mi ben frede foe go na den owroeman”, a e erken. „Ma den ben handri nanga mi na wan sari-ati fasi nanga wan warti fasi. Den owroeman ben de leki papa, den no ben de leki strak kroetoeman. Den ben jepi mi foe froestan taki, efoe mi ben teki a bosroiti foe poti mi pasi reti baka, dan a no de so taki Jehovah no ben sa wani mi moro. Wantewante mi ben leri fa Jehovah e gi wi tranga leri neleki wan lobi-ati Tata. Mi ben man opo mi ati gi Jehovah, nanga a froetrow taki a ben sa jere den tranga begi foe mi. Te mi e loekoe baka san ben pasa, dan mi kan taki troetroe taki a konmakandra dati nanga den owroeman, seibi jari pasa, ben de wan blesi foe Jehovah. Sensi a ten dati, a matifasi foe mi nanga En kon moro tranga.”

Tan hori retidoe èn doe san regtfardiki

20. San na den winimarki te wi e froestan èn e sori retidoe nanga regtfardikifasi?

²⁰ Wi kan de nanga tangi, dati a retidoe foe Gado wani taki moro foeroe leki gi ibri sma san a e froedini. Jehovah en retidoe ben boeweigi en foe gi têgo libi na den wan di e sori bribi (Psalm 103:10; Romesma 5:15, 18). Gado e handri nanga wi na a fasi disi foe di a retidoe foe en e hori den situwâsi foe wi na prakseri, èn a e soekoe foe froeloesoe wan sma, na presi foe kroetoe wan sma. Foe troe, a froestan di wi e froestan a bradifasi foe Jehovah en retidoe e hari wi go moro krosibei na en. Èn ala di wi e meki moeiti foe teki na eigifasi disi abra foe a Sma di a de, tokoe a libi foe wi nanga di foe trawan sa kisi foeroe blesi. A feti di wi e feti baka retidoe, no sa de wan sani di wi hemel Tata no sa si. Jehovah e pramisi wi: „Doe reti, èn doe san regtfardiki. Bika mi froeloesoe de kaba foe kon, èn mi regtfardikifasi de foe tjari kon na krin. Kolokoe foe a libisma di e dede, te a doe disi.” — Jesaja 56:1, 2.

[Foetoewortoe]

Joe e memre disi ete?

◻ San a kisi di Sodom nanga Gomora ben kisi pori e leri wi foe a retidoe foe Jehovah?

◻ Foe san ede a loesoe-paiman na wan heri moi fasi foe Gado en retidoe nanga en lobi?

◻ San na dri fasi fa wi kan sori retidoe?

◻ Na sortoe spesroetoe fasi, owroeman kan waka na baka a retidoe foe Gado?

[Prenki na tapoe bladzijde 15]

Foe di wi e preiki, wi e sori a retidoe foe Gado

[Prenki na tapoe bladzijde 16]

Te owroeman e sori a retidoe foe Gado, dan den wan di abi problema e feni en makriki foe soekoe jepi na den owroeman