Joe e memre disi ete?

Joe ben feni en wan prisiri foe leisi den uitgave foe A Waktitoren di ben kon na doro no so langa pasa? Efoe dati de so, dan joe sa feni en moi foe memre den sani disi:

◻ Foe san ede wi kan abi froetrow na ini den sma di Jehovah e froekisi foe tiri en pipel?

Jehovah e froekisi gi spesroetoe sortoe frantiwortoe wroko, den sma di abi eigifasi di de fanowdoe foe tiri En pipel na a fasi fa En wani taki den moesoe go na wan spesroetoe momenti. — 15/8, bladzijde 14.

◻ San wi kan leri foe na ondrofeni foe Jona?

Jona ben prakseri toemoesi foeroe foe ensrefi èn pikinso nomo foe tra sma. Wi kan leri foe Jona, foe no poti wisrefi nanga den firi foe wi na a fosi presi. — 15/8, bladzijde 19.

◻ Na sortoe fasi wi kan taki dati „a nen foe Jehovah na wan tranga toren”? (Odo 18:10)

Efoe wi e soekoe kibri na ini a nen foe Gado, dan dati e sori taki wi e poti wi froetrow na ini Jehovah srefi (Psalm 20:1; 122:4). A wani taki dati wi moesoe horibaka gi en soevereiniteit, hori den wet nanga gronprakseri foe en hei, bribi den pramisi foe en èn dini en wawan (Jesaja 50:10; Hebrewsma 11:6). — 1/9, bladzijde 10.

◻ Fa a fasi fa Paulus ben gi kotoigi na fesi hei lantiman e gi wi wan eksempre?

Di Paulus ben e taki nanga kownoe Agripa a ben gebroiki konifasi, èn a ben poti krakti na tapoe penti di en nanga Agripa ben e agri. Na a srefi fasi, wi moesoe sori sma den positief sei foe a boen njoensoe, èn wi e poti krakti tapoe howpoe di wi abi a srefi leki den (1 Korentesma 9:22). — 1/9, bladzijde 31.

◻ Soema e kisi wini foe a pasensi foe Jehovah?

Foe Jehovah en pasensi ede, meki miljoenmiljoen sma moro na ini a ten disi e kisi na okasi foe kisi froeloesoe pasa a „dei foe Jehovah” di e kon (2 Petrus 3:9-15). A pasensi foe en e gi ibriwan foe wi na okasi toe foe ’tan wroko gi wi eigi froeloesoe nanga frede èn nanga beifi’ (Filipisma 2:12). — 15/9, bladzijde 20.

◻ O foeroe waarde a Septuaginta vertaling foe bijbel ben abi?

A vertaling disi ben doe foeroe foe panja a sabi foe Jehovah Gado nanga en Kownoekondre, di abi Jesus Krestes leki kownoe. Nanga jepi foe a Septuaginta, wan moi fondamenti ben seti gi den djoe di ben e taki Grikitongo èn den heiden na ini a fosi jarihondro foe teki a boen njoensoe foe a Kownoekondre. — 15/9, bladzijde 30.

◻ San na agersitori foe a lasi manpikin e leri wi foe Gado?

Na a fosi presi, taki Jehovah „abi sari-ati nanga boenfasi, no e kisi atibron esi-esi èn [a] abi lobi boen-ati nanga waarheid pasa marki” (Exodus 34:6). Di foe toe, taki a „de klariklari foe gi pardon”, te sma e kenki den ati, so taki a ben sa abi wan gron foe sori sari-ati (Psalm 86:5). — 1/10, bladzijde 12, 13.

◻ O ten den vrede situwâsi soleki fa Gado ben pramisi dati na ini Jesaja 65:21-25 sa kon troe?

Leki Jehovah en anbegiman di de na ini wánfasi na ini a jeje paradijs na ini a ten disi, den salfoewan èn den „tra skapoe” e feni a vrede foe Gado nownow (Johanes 10:16). Èn a sortoe vrede disi sa kon moro foeroe na ini a troetroe paradijs, te ’Gado wani sa pasa na heri grontapoe, soleki fa a e pasa na ini hemel’. Na a ten dati den wortoe foe a profeiti Jesaja sa kon troe dorodoro (Mateus 6:10). — 15/10, bladzijde 24.

◻ Foe san ede kresten e memre a trowdei foe den èn no a frijaridei foe den?

Bijbel no e taki takroe foe trowlibi. A de wan sani di kresten moesoe bosroiti gi densrefi efoe den o memre a trowdei foe den, foe prakseri a prisiri foe na okasi èn foe prakseri a bosroiti foe den foe doe moeiti foe meki sani waka boen leki trowpaar. Ma den wan-enkri frijari-oso di skrifi na ini bijbel na foe heiden èn den abi foe doe nanga ogri-ati sani di sma ben doe na den okasi dati. — 15/10, bladzijde 30, 31.

◻ Na tapoe san a faja na ini na eksempre foe Paulus di skrifi na ini 1 Korentesma 3:12, 13, e sori go, èn gi san ala kresten moesoe de na ai?

Wan faja de di wi alamala e kisi foe doe nanga dati na ini a libi — den tesi di e kon tapoe a bribi foe wi (Johanes 15:20; Jakobus 1:2, 3). Iniwan sma di e leri waarheid foe wi, sa kisi tesi. Efoe wi no e gi so boen leri na trawan, dan dati kan abi sari bakapisi, soleki fa Paulus ben warskow (1 Korentesma 3:15). — 1/11, bladzijde 11.

◻ Fa Noa ben ’waka nanga a troe Gado’? (Genesis 6:9)

Noa ben waka nanga Gado foe di a ben doe san Gado ben taigi en foe doe. Foe di Noa ben gi en libi foe doe a wani foe Gado, dati meki a ben abi wan waran, krosibei matifasi nanga Gado. — 15/11, bladzijde 10.

◻ Sortoe okasi opo gi wi foe di wi no sabi a soifri ten te na atibron foe Gado sa kon na tapoe den ogriwan?

A sani disi e gi wi na okasi foe boeweisi taki wi lobi Jehovah troetroe èn taki wi wani waka den pasi foe en foe têgo. A e sori toe taki wi de loyaal na Gado èn taki wi abi froetrow na ini a fasi fa en e handri den afersi. Boiti dati, disi e jepi wi foe tan wikiwiki èn tan na ai na jejefasi (Mateus 24:42-44). — 15/11, bladzijde. 18.

◻ San a wani taki foe poti bribi „na ini a nen foe a Manpikin foe Gado”? (1 Johanes 5:13)

Disi wani taki dati wi moesoe gi jesi na ala den komando foe Krestes, so srefi en komando foe „lobi makandra” (Johanes 15:14, 17). Lobi e proeberi foe doe boen gi tra sma. A e poeroe a kroetoe di sma e kroetoe trawan sondro reide, foe den ras ede, den relisi, èn den posisi na ini a libimakandra. — 1/12, bladzijde 7.

◻ Foe san ede Jehovah Kotoigi na ’sani di sma no wani si na ai’? (Mateus 10:22)

Sma no wani si Jehovah Kotoigi na ai foe den srefi sani ede di ben meki taki trawan ben froefolgoe den fosi jarihondro kresten. Na a fosi presi, Jehovah Kotoigi e doe san den e bribi èn dati e meki taki den no de pôpi sma gi trawan. Na di foe toe presi, den na sma di trawan e kragi na wan falsi fasi — langalanga leitori èn a drai di trawan e drai den sani di den e bribi. — 1/12, bladzijde 14.