Wan prenspari fisiti e meki wan èilanti prisiri
Cuba, wan kefalek moi èilanti na ini a Kribisi Se, no so langa pasa ben ondrofeni wan boen pisi ten pe den ben kisi deki-ati na jeje fasi leki oiti bifo. Na a kaba foe a jari 1998 den Kotoigi foe Jehovah na ini a kondre disi foe West-Indië ben kisi wan blesi di den ben howpoe langa ten kaba na tapoe. A fosi tron na ini moro leki 30 jari, den memre foe a Tiri Skin foe Jehovah Kotoigi ben fisiti Cuba èn ete 15 sma foe tra kondre ben kon nanga den. Den fisitiman ben de borgoe foe Australia, Belgia, Groot Britannië, Italiakondre, Njoen Zeeland, Oostenrijk nanga Porto Rico.
DISI ben de wan prenspari sani srefisrefi gi den 82.258 Kownoekondre preikiman drape èn den 87.890 sma di ben de makandra nanga den na a Avondmaal foe Masra na ini a lente foe 1998.
Foe 1 december te go miti 7 december 1998, Lloyd Barry, John Barr, nanga Gerrit Lösch ben fisiti a Bethel-oso na ini Havana èn ben fisiti wan toe „Gado pasi foe libi”-distrikt kongres na ini Cuba. Den ben prisiri foe man miti den owroeman di e rèis èn foe kon sabi den tiriman foe Cuba moro boen.
„Disi ben de wan bigi heimarki na ini a theokrasia gi mi nanga mi wefi”, John Barr ben taki. „Den lobi brada nanga sisa foe wi na ini Cuba abi foeroe faja gi a waarheid! A ben naki mi ati foe si taki wi bradafasi na heri grontapoe de wan warti sani troetroe!” „A toemoesi prenspari wiki disi ben jepi mi foe froestan moro boen sortoe situwâsi den brada foe wi drape e miti”, na so Lloyd Barry ben taki toe.
Na ini den feifi jari di pasa, den Kotoigi foe Jehovah kisi moro foeroe fri foe anbegi na ini Cuba, èn den sani di den tiriman foe Cuba ben taki e meki wi bribi taki den wani meki a fasi disi fa sani e go, tan go doro.
Na ini september 1994, a druk wroko ben bigin na a Bethel-oso na ini Havana. Agen den Kotoigi foe Jehovah ben man miti na poebliki èn gi kotoigi oso foe oso. Baka dati, na ini 1998, dan den tiriman ben gi primisi taki wan groepoe foe 18 Kotoigi foe Jehovah foe tra kondre, ben kan fisiti Cuba, èn so srefi dri memre foe a Tiri Skin.
Wan prisiri demakandra
Di den fisitiman foe tra kondre ben doro na a José Martí opolanigron na ini Havana, dan wan aparti groepoe foe tiriman èn wan groepoe foe a Bethel-oso ben ontfanga den, èn wan foe den ben de wan brada di ben memre a lasti fisiti foe wan memre foe a Tiri Skin — Milton Henschel — na ini Cuba na ini a jari 1961. Na a ten dati a brada ben abi 12 jari; now a de wan opziener di e rèis.
Di den fisitiman foe tra kondre ben doro na a Bethel-oso, dan den ben gi den wan switikon nanga bosoe bromki soleki gladiool, rowsoe, jasmijn, nanga geri èn redi margriet, di wan brada ben prani spesroetoe gi na okasi disi. Foeroe ai ben lon watra di a Bethelfamiri ben gi a groepoe wan switi kon. Baka ten, den ben njan losi agoe foe Cuba, aleisi nanga bonki, sra, yucca nanga mojo (wan sowsoe di meki nanga knofrokoe èn nanga olijf oli), nanga froktoe. Baka di den ben njan, dan ibri memre foe a Tiri Skin ben gi wan lezing di ben gi deki-ati èn di e sori a waarde foe Bethel diniwroko. Spesroetoe den sani di brada Lösch ben taki, ben naki den ati foe di a ben taki na ini Spanjoro nanga den brada. A Bethelfamiri abi 48 friwani wrokoman nanga 18 jepiman di de gi wan sjatoe ten nomo.
Ala di boekoe nanga Bijbel e druk gi Cuba na ini Italiakondre, den Waktitoren nanga Ontwaakt! tijdschrift di e druk na ini blaka nanga weti, e druk na ini Cuba srefi, na tapoe toe stensri masjin. Sma moesoe wroko foeroe joeroe èn so srefi moesoe doe a srefi sortoe wroko ibri tron baka, na ini pikin kamra foe druk ala den tijdschrift di den abi fanowdoe. Den friwani wrokoman e warderi a goedoe di den abi foe doe diniwroko gi Jehovah na wan kefalek spesroetoe fasi. — 2 Korentesma 4:7.
Heimarki foe a kongres
Den 18 fisitiman foe tra kondre ben prati na ini dri groepoe foe fisiti den difrenti distriktkongres di ben hori na dri presi — Havana, Camagüey, nanga Holguín. Na tapoe ibriwan foe den dri dei, wan bigi groepoe foe brada nanga sisa, so srefi foeroe owroeman nanga pionier, ben kisi a kari foe go na ibriwan foe den presi. Den Kotoigi foe a presi ben kisi foe jere taki disi ben o de wan spesroetoe okasi, ma den no ben sabi taki den memre foe a Tiri Skin ben o de drape. Prakseri fa den ben froewondroe foe si den lobi brada disi nanga den wefi foe den e saka foe den joeroe bus na tapoe freida mamanten!
Den kongres ben hori na presi di no ben tapoe lontoe èn di den brada ben bow nanga a primisi foe den tiriman. Na a kongres presi na ini Havana, Psalm 133:1 ben kerfoe na tapoe wan foe den ston na a dromofo. Disi ben memre den brada na den wortoe di de na ini a tekst dati: „Loekoe! O boen èn o switi a de te brada e libi makandra na ini wánfasi!” Foe troe, wan boen èn prisiri Kresten demakandra ben de na a kongres.
Den fisitiman ben taki wan sani foe a kefalek moi fasi fa den lezing nanga den interview ben hori, èn a fasi fa a drama ben doe ben naki den ati, di ben abi foe doe nanga a Bijbel tori na ini Danièl kapitel 3, na ini na owroeten Babilon. Wan sisa ben taki: „Ala den preiman ben boen kefalek, èn a doe di den ben doe neleki den ben taki ben doe so kefalek boen taki joe no ben sa sabi taki den sten ben teki na tapoe cassettelolo. . . . Na ogriman foe Babilon ben loekoe ogri troetroe, èn den dri Hebrewsma tanapoe kánkan èn den ben abi wan tranga bribi.”
Wrokoman foe a Kantoro foe Relisi Afersi èn tra lantiman di ben kon foe loekoe den kongres ben prèise den brada foe a fasi fa sani orga èn foe a boen fasi fa den ben tjari densrefi. Brada Barry ben taki en opregti tangi gi a fasi fa den tiriman foe Cuba ben handri na wan kefalek boen fasi nanga den fisitiman foe tra kondre. Den brada ben e tanapoe e klap na ini den anoe wan toe miniti langa foe sori den warderi gi den lezing èn so srefi gi den tiriman di ben gi primisi foe hori den kongres. „Disi de moro leki san wi ben froewakti — wan pikin internationaal kongres!”, na so wan Kresten osofamiri ben taki. „A ben moi kefalek, bika a ben sori a bigi makti di Jehovah abi foe meki den pramisi foe en kon troe.”
Den kongres ben gi tra sma na okasi toe foe kon sabi den Kotoigi moro betre. Wan foe den man di ben rèi a bus ben fisiti a kongres na tapoe satra èn agen na tapoe sonde. A ben taki dati a ben jere foeroe sani di sma ben taki foe Jehovah Kotoigi, ma now a sabi taki den na boen sma di lobi vrede.
„Sani di noiti wi sa frigiti”
Den sma foe Cuba ben naki na ati foe den fisitiman foe tra kondre nanga a waran èn a switifasi foe den. Den sma foe Cuba na sma di lobi wroko, di e hori densrefi na gronprakseri, èn di abi switifasi. Wan foe den fisitiman foe tra kondre ben taki dati „moro leki wán leisi, sma di wi no ben sabi srefisrefi, ben aksi foe jepi wi”.
A bribi, a prisiri, nanga a lobi di den kompe Kotoigi foe den na ini Cuba ben sori, ben naki na ati srefisrefi foe den Kotoigi di ben kon foe tra kondre. Ala di den ben abi kefalek bigi problema, den meki Jehovah de a fortresi foe den (Psalm 91:2). John Barr ben taki: „Foeroe sani ben de di ben froewondroe mi nanga prisiri na a fosi fisiti foe mi na ini Cuba — a moi foe a kondre, a switifasi foe den sma di mi miti, èn spesroetoe a kefalek bigi prisiri foe den Kotoigi na ini Cuba. Noiti na ini mi libi mi jere so wan opregti fasi foe singi wi Kownoekondre singi èn a klap di den ben klap na ini den anoe wan langa pisi ten, te tori na jeje fasi ben naki na ati foe den! Disi na sani di noiti wi sa frigiti. Wi sa tan prakseri den.”
Psalm 97:1 e taki: „Meki den foeroe èilanti prisiri.” Foe troe, Kotoigi foe Jehovah na tapoe na èilanti foe Cuba e prisiri foe a moro bigi fri di den kisi foe anbegi Gado, èn foe a prenspari fisiti di den fisitiman foe tra kondre ben tjari.
[Prenki na tapoe bladzijde 8]
Foeroe osofamiri ben fisiti a spesroetoe „Gado pasi foe libi”-distriktkongres na ini Cuba
[Prenki na tapu bladzijde 8]
A Bethel-oso na ini Havana ben opo baka na ini a jari 1994
[Prenki na tapu bladzijde 8]
Memre foe a Tiri Skin e skrifi den nen na ini den Bijbel di den gi den tiriman leki kado