A Suku Di Sma E Suku Sani Di Taki na Fesi Èn Di Den Kan Poti Bribi na ini
SYATU baka di a kownu fu Masedonia di sma ben kon sabi leki Aleksander a Bigiwan ben kon tapu a kownusturu na ini 336 b.G.T., a ben fisiti a santapresi fu Delfi na a mindrisei fu Grikikondre, pe wan gado ben e tyari kibritori kon na krin. Den sani di Aleksander ben abi na prakseri fu du trutru na ini a ten di ben o kon, ben de noti moro leki fu wini a moro bigi pisi fu a grontapu fu a ten dati. Ma a ben wani abi a dyaranti fu den gado taki a kefalek bigi wroko di a ben wani du ben sa abi bun bakapisi. Soleki fa anansitori e taki, dan na a dei di Aleksander ben go na Delfi, dan sma no ben abi primisi fu go suku rai na a sma di wan gado ben e taki nanga yepi fu en. Fu di a no ben wani gowe sondro taki a ben kisi wan piki, meki Aleksander ben tan aksi nomonomo èn ben dwengi na uma-priester fu taki na fesi san o pasa. Na ini bruya na uma ben bari taki: „¡O, yonkuman, no wan sma kan wini yu!” A yongu kownu ben si a piki dati leki wan marki taki sani ben o waka bun — ¡wan marki di ben sori taki a ben o wini a srudati fetiwaka fu en!
Ma Aleksander ben o sabi moro bun fa a fetiwaka fu en ben o go efu a ben ondrosuku den profeititori di de fu feni na ini a Bijbel buku Danièl. Kefalek soifri, den profeititori disi ben taki na fesi fu a wini di Aleksander ben o wini kondre esi-esi. Soleki fa gwenti fu kondre e sori, dan te fu kaba Aleksander ben kisi na okasi fu si san Danièl ben skrifi fu en. Soleki fa a Dyu historia skrifiman Yosefus ben taki, dan di a kownu fu Masedonia ben kon na ini Yerusalem, den ben sori en a profeititori fu Danièl — kande a ben de kapitel 8 fu a buku dati (Danièl 8:5-8, 20, 21). Soleki fa sma e taki, dan fu disi ede den legre fu Aleksander di ben e wai sani puru, no ben pori a foto.
Wan Sani Di Libisma Abi Fanowdu èn Di A Gebore Nanga En
Awansi den de kownu noso gewoon sma, awansi den de fu fositen noso fu a ten disi — libisma firi taki a de fanowdu fu sabi sani di taki na fesi fu a tamara èn di den kan poti bribi na ini. Wi leki koni kriaturu e ondrosuku a ten di pasa, sabi san a ten disi wani taki, èn abi spesrutu belangstelling gi a tamara. Wan Sneisi odo e taki heri moi, taki: „A sma di ben kan si dri dei na fesi san o pasa, ben sa kon gudu fu dusundusun yari langa.”
Na ini den hondrohondro yari di pasa, milyunmilyun sma pruberi fu luku san o pasa na ini a tamara fu di den ben suku rai na sani di den ben si taki den kon fu Gado. Teki den Grikisma fu owruten leki wan eksempre. Den ben abi furu santapresi fu tyari kibritori kon na krin, soleki den di fu Delfi, Delos, nanga Dodona. Drape den ben go fu aksi den gado bodoi fu a fasi fa sani ben o waka na politiek sei noso na srudati sei, èn so srefi fu den sortu afersi fu densrefi soleki a go di den ben o go na waka, a trowlibi, nanga pikin. A no kownu nanga srudati fesiman wawan, ma heri lo nanga pikin foto di ben tiri kontren na lontu, ben suku tiri fu a yeye kondre nanga yepi fu den piki disi fu den gado.
Soleki fa wán profesor e taki, dan now „wantronso moro nanga moro organisâsi e kon di e ondrosuku a tamara”. Toku, furu sma e poti Bijbel — a wan-enkri soifri fonten fu profeititori — na wan sei. Taki a kan dati Bijbel profeititori abi den yoisti bodoi di den e suku na wan sani di den e skoifi poti na wan sei krinkrin. Son sabiman e go so fara taki den e poti Bijbel na tapu wán lin nanga wan sma di wan gado e taki nanga yepi fu en. Èn disiten sma di e tweifri, gwenti fu krutu Bijbel profeititori sondro reide.
Wi e kari yu fu ondrosuku a tori gi yusrefi. Efu yu e teki den sani di Bijbel e taki na fesi, gersi den piki di wan gado e gi na wan santapresi, dan san disi e sori? ¿Yu kan frutrow den profeititori fu Bijbel moro leki den piki di den gado fu owruten ben gi na ini wan santapresi? ¿Èn yu kan bow yu libi nanga wan fasti frutrow lontu Bijbel profeititori?
[Prenki na tapu bladzijde 3]
Bijbel ben taki na fesi fu a wini di Aleksander ben o wini kondre esi-esi
[Sma di abi a reti fu a prenki]
Cortesía del Museo del Prado, Madrid, Spain
[Prenki na tapu bladzijde 4]
Aleksander a Bigiwan
[Sma di abi a reti fu a prenki]
Musei Capitolini, Roma
[Sma di abi a reti fu a prenki na tapu a kafti]
KAFTI: Legre-edeman Titus nanga Aleksander a Bigiwan: Musei Capitolini, Roma