¿Yu Lobi a Libi?

„MEKI mi si a leti.” Sma e fruteri taki na den wortu disi Giacomo Leopardi, wan puwema skrifiman fu Italiakondre, ben taigi den sma di ben kon na en syatu bifo a dede. Den wortu e sori o tranga libisma lobi a libi, di leti na wan prenki fu en.

A lobi di sma lobi a libi na wan tranga firi na ini sma èn di e meki taki moro furu sma no wani poti den libi na ini kefar èn du ala san den man fu tan na libi. Na ini disi, libisma no e difrenti furu nanga meti, di abi wan tranga firi na ini den fu wani tan na libi.

¿Ma sortu libi warti trutru fu abi èn fu lobi? A no de soso a de di a skin de na libi — a bro di a e bro èn e buweigi nomo. Èn a no e gi satisfaksi tu te den e prakseri nomo fu prisiri fu a libi someni leki den kan. Nofotron, a filosofia fu den Epikuriasma, di e taki „meki wi nyan èn dringi, bika tamara wi o dede”, no gi sma satisfaksi (1 Korentesma 15:32). Ala di a tru taki sma abi wan lo prenspari sani na materia sei fanowdu, toku den lobi sani tu na kulturu sei èn na sociaal sei, èn den abi sani na yeye fasi fanowdu tu, di abi fu du nanga a bribi di den e bribi na ini wan Moro Hei Sma. Na wan sari, taki hondrohondro milyun sma èn kande milyardmilyard sma srefi no abi den sani di den abi tranga fanowdu, fu di na furu presi na grontapu, den sma e libi na ini wan takru libimakandra èn a kontren pe den e libi no bun kwetikweti. Yu kan taki dati ala sma di e satisferi soso den sani di a skin fu den abi fanowdu — fu nyan, fu dringi, fu abi gudu, noso fu satisferi den seks lostu — e libi na skin fasi, èn dati e gi den pikinso satisfaksi nomo. Fu taki en leti, den no e gebroiki den moro warti sani di a libi e gi fu satisferi a koni nanga den firi fu libisma. Boiti dati, ibriwan sma di wani satisferi soso den eigi firi, no wawan man kisi furu satisfaksi fu a libi, ma den e pori a libimakandra tu pe den e libi, èn den no e horibaka gi den afersi fu tra sma.

Wan krutuman di e kisi fu du nanga yongu ogri sma, e agri nanga disi èn a e taki dati a gersi leki „a de di markitiki de ini kefar, a gi di sma e gi glori na sma di no de wan bun eksempre, èn den sani di sma e du fu kon gudu esi-esi èn na wan makriki fasi . . . e meki sma hori strei nanga makandra pasa marki”. Disi meki taki sma e du sani di e pori a libimakandra èn di abi ogri bakapisi gi yonguwan, spesrutu te den e go gebroiki drug.

Yu sabi taki a libi abi furu sani di sma lobi — fakansi na moi presi, moimoi sani fu leisi noso fu go ondrosuku, mati di e gi prisiri, moi poku. Èn tra sani de tu di e gi furu noso pikinso satisfaksi. Den sma di e bribi trutru na ini Gado, èn spesrutu na ini Yehovah, a Gado fu Bijbel, abi moro reide fu lobi a libi. Trutru bribi na wan sani di e gi krakti nanga kowru-ati di kan yepi sma fu kakafutu gi muilek ten. Sma di e bribi na ini a tru Gado kan taki nanga ala frutrow: „Yehovah na mi yepiman; mi no sa frede” (Hebrewsma 13:6). Sma di sabi a lobi fu Gado e firi taki a lobi den. Den e handri na tapu a lobi fu en, èn dati e gi den furu prisiri (1 Yohanes 4:7, 8, 16). Den kan du furu na ini a libi èn e du bun gi tra sma, èn dati e gi den furu satisfaksi. A de neleki fa Yesus Krestes ben taki: „Moro koloku de ini a gi fu sani, leki ini a kisi fu sani.”—Tori fu den Apostel 20:35.

A de wan sari, taki wan tra sei de na a libi fu a ten disi. Furu pina, onregtfardikifasi, pôtifasi, siki nanga dede de, èn dati na soso wan tu fu den sani di e hati sma èn di e meki nofotron taki pikinmoro sma no man horidoro na ini a libi. A gudu, makti èn koni Kownu Salomo fu na owruten nâsi Israèl ben abi ala sani di kan meki sma koloku. Toku wan sani ben de di ben moro en — a ben sabi taki te a ben o dede, dan a ben sa abi fu libi ala den sani di ’a tranga wroko fu en’ di a ben du „nanga koni èn nanga sabi èn na wan bekwaam fasi”, ben tyari kon gi en, na baka gi wan tra sma.—Preikiman 2:17-21.

Furu sma sabi neleki Salomo taki a libi syatu èn e pasa gowe tumusi esi. Bijbel e taki dati Gado ’poti srefi têgo ten na ini wi frustan’ (Preikiman 3:11, Byington). Fu di sma sabi taki den kan libi fu têgo, meki den e sidon denki fu a syatu di a libi syatu so. Te fu kaba, wan negatief denki èn a firi taki ala sani de fu soso kan tron wan hebi gi en, sondro taki a feni piki di kan overtoigi en san a libi èn san dede wani taki. Disi kan meki a libi tron wan sari sani.

¿Piki de na tapu den aksi di libisma abi èn di e trobi den? ¿Wan ten sa kon taki wan situwâsi de di sa meki a libi moro switi èn di sa tan?