Joe libi — San na a marki foe en?

„Mi ben tjari mi ati nanga koni . . . te leki mi ben kan si sortoe boen de gi den manpikin foe libisma . . . na ini a nomroe foe den dei foe a libi foe den.” — PREIKIMAN 2:3.

1, 2. Foe san ede a no de wan fowtoe sani foe abi wan seiker belangstelling gi wisrefi?

JOE abi belangstelling gi joesrefi, a no so? Dati na wan gewoon sani. Dati meki wi e njan ibri dei, wi e sribi te wi e kon weri, èn wi lobi foe de nanga mati èn nanga lobiwan. Son leisi wi e prei wan sani, wi e swen, noso wi e doe tra sani di wi abi prisiri na ini, èn dati e sori taki na wan balansi fasi wi abi belangstelling gi wisrefi.

² So wan belangstelling gi wisrefi de akroederi san Gado ben meki Salomo skrifi: „Ini a tori foe wan libisma, no wan moro betre sani de leki taki a e njan èn troetroe e dringi èn e meki a sili foe en si a boen foe a tranga wroko foe en.” Foe di Salomo ben abi na ondrofeni, meki a ben taki moro fara: „Disi toe mi si, ija mi, taki disi e kon foe na anoe foe a troe Gado. Bika soema e njan èn e dringi moro betre leki mi?” — Preikiman 2:24, 25.

3. Na tapoe sortoe aksi di e broeja sma, moro foeroe sma no man gi wan piki?

³ Tokoe joe sabi taki libi de moro leki foe njan, dringi, sribi, èn doe wan toe boen sani nomo. Wi abi pen, wi e lasi-ati, èn abi broko-ede. Èn a gersi leki wi abi toemoesi foeroe foe doe, foe kan sidon prakseri foe san a libi foe wi wani taki. Dati no de so nanga joe? Baka di Vermont Royster di fosi ben de skrifiman foe The Wall Street Journal, ben si omeni koni nanga bekwaamfasi libisma abi, a ben skrifi: „Djaso wi e si wan freimde sani. Te wi e prakseri foe libisma srefi, den moeilek problema foe en, èn foe a presi di a abi na ini na universum disi, dan wi sabi pikinso moro leki san wi ben sabi di ten ben bigin. Te now ete wi e aksi wisrefi soema wi de èn foe san ede wi dja èn pe wi e go.”

4. Foe san ede ibriwan foe wi wani foe man piki na tapoe den aksi di abi foe doe nanga wi?

⁴ Fa joe ben o piki na tapoe den aksi: Soema wi de? Foe san ede wi dja? Èn pe wi e go? Juli di pasa de, masra Royster dede. Joe denki taki na a ten dati a ben feni piki di ben gi en satisfaksi? Foe taki en moro krin: Wan fasi de taki joe kan feni den piki di e gi satisfaksi? Èn fa disi kan jepi joe foe njan boen foe wan moro kolokoe libi di wani taki moro? Kon meki wi si.

Wan toemoesi prenspari fonten foe kisi inzicht

5. Foe san ede wi moesoe loekoe go na Gado te wi e soekoe foe kisi inzicht na tapoe aksi di abi foe doe nanga a marki foe a libi?

⁵ Efoe wisrefi ben sa soekoe san na a marki foe wi libi, dan wi no ben sa abi foeroe boen bakapisi, soleki fa dati de nanga moro foeroe mansma nanga oemasma, srefi den wan di kisi foeroe skoroleri èn ben abi foeroe ondrofeni. Ma wan jepi de gi wi. A Mekiman foe wi gi wi jepi. Te joe e prakseri foe disi, dan a no de so, taki en na a moro prenspari Fonten foe inzicht nanga koni, foe di a de „foe ten di no skotoe te ten di no skotoe” èn foe di a sabi ala sani foe na universum nanga a historia? (Psalm 90:1, 2) A ben meki libisma èn a si ala sani di libisma ondrofeni, dati meki en na a Sma pe wi moesoe soekoe inzicht, èn no na onvolmaakti libisma, di no abi foeroe sabi nanga inzicht. — Psalm 14:1-3; Romesma 3:10-12.

6. (a) Fa a Mekiman ben gi na inzicht di wi abi fanowdoe? (b) San Salomo abi foe doe nanga a tori?

⁶ Ala di wi no kan froewakti taki a Mekiman e froeteri wi persoonlijk san a libi wani taki, tokoe a gi wi wan fonten foe inzicht — en Wortoe di skrifi na ondro a krakti foe santa jeje (Psalm 32:8; 111:10). A boekoe Preikiman abi spesroetoe waarde ini a tori disi. Gado ben meki a skrifiman foe a boekoe skrifi en, so taki „a koni foe Salomo ben de moro bigi leki a koni foe ala den Owstoesei sma” (1 Kownoe 3:6-12; 4:30-34). „A koni foe Salomo” ben abi so foeroe krakti na tapoe wan oema-kownoe di ben fisiti en, dati a ben taki dati afoe foe san a ben si, sma no ben froeteri en èn taki den sma di ben o arki a koni foe Salomo ben o de kolokoe troetroea (1 Kownoe 10:4-8). Wi so srefi kan kisi moro inzicht nanga kolokoe foe a koni foe Gado di wi Mekiman ben gi nanga jepi foe Salomo.

7. (a) Na sortoe bosroiti Salomo ben kon foe moro foeroe foe den wroko di sma e doe na ondro hemel? (b) San e sori taki Salomo ben loekoe sani leki fa den de troetroe?

⁷ Preikiman e sori a koni di Gado gi, di ben abi krakti na tapoe na ati nanga denki foe Salomo. Foe di Salomo ben abi a ten, a moni, nanga na inzicht foe doe disi, meki a ben ondrosoekoe „ala sani di sma ben doe na ondro hemel”. A ben si taki moro foeroe foe disi „ben de foe soso èn wan feti di sma e feti foe kisi winti”, èn a ben kon na a bosroiti dati na ondro a krakti foe santa jeje, wan sani di wi moesoe hori na prakseri te wi e prakseri foe a marki na ini wi libi (Preikiman 1:13, 14, 16). Salomo ben de eerlijk, a ben si sani leki fa den ben de troetroe. Foe eksempre, prakseri foe den wortoe foe en di de foe feni na Preikiman 1:15, 18. Joe sabi taki na ini ala den jarihondro, libisma proeberi difrenti fasi foe tiri, èn son tron den ben proeberi opregti foe loesoe problema èn foe meki a libi foe sma kon moro betre. Ma wan foe den tiri troetroe ben poeroe ala den „kroeka” sani foe na onvolmaakti sistema disi? Èn kande joe si taki o moro sabi wan sma abi, o moro krin a e froestan taki na ini wan sjatoe libiten, sma no man poti ala sani reti dorodoro. A sabi di foeroe sma sabi disi, e broeja den, ma a no abi foe de so nanga wi.

8. Sortoe sistema fa sani e waka, ben de langa ten kaba?

⁸ Wan tra sani di wi moesoe loekoe, na den foeroe sistema fa sani e waka lontoe èn di abi krakti na wi tapoe, soleki son-opo nanga sondongo noso a fasi fa a winti nanga watra e boeweigi. Den ben de na ini den dei foe Moses, Salomo, Napoléon, nanga den afo foe wi. Èn den tan de. Na so „wan geslakti e go, èn wan geslakti e kon” (Preikiman 1:4-7). Soleki fa libisma e si en, dan no foeroe sani kenki. Sma foe owroeten èn foe a ten disi ben abi den srefi sortoe sani di den doe, den srefi sortoe howpoe, froewakti, nanga wroko. Srefi efoe na ondro libisma, wan sma kisi barinen noso ben moi noso ben koni kefalek, pe a sma dati de now? A dede èn kande sma frigiti en. Dati a no wan takroe prakseri. Moro foeroe sma no kan froeteri srefi soema na den afo foe den noso froeteri pe den ben gebore noso ben beri. Joe kan si foe san ede Salomo ben si a tori leki fa a ben de troetroe, taki den sani di libisma ben doe èn den moeiti foe den, ben de foe soso. — Preikiman 1:9-11.

9. Fa wi kan kisi jepi, foe di wi abi inzicht foe a fasi fa sani de troetroe, na ini a situwâsi pe a libisma famiri de na ini?

⁹ Na presi taki na inzicht disi foe Gado di abi foe doe nanga a situwâsi pe libisma de na ini moro foeroe, e broeja wi, a kan de wan wini, èn a kan boeweigi wi foe no poti fowtoe waarde na marki noso sani di sma e feti na baka èn di heri esi no sa de moro èn di sma sa frigiti. A moesoe jepi wi foe ondrosoekoe san wi e meki foe a libi èn san wi e proeberi foe doro. Foe eksempre, na presi taki wi de asceetsma, wi kan feni prisiri te wi e njan èn e dringi na wan balansi fasi (Preikiman 2:24). Èn soleki fa wi sa si, dan Salomo e kon na wan heri boen bosroiti. Foe taki en sjatoe, dan wi troetroe moesoe warderi a matifasi di wi abi nanga wi Mekiman, di kan jepi wi foe abi wan têgo, kolokoe tamara nanga wan marki. Salomo ben sori krin: „A bosroiti foe a tori, now di sma jere ala sani, de: Frede a troe Gado èn hori den komando foe en. Bika disi na a heri plekti foe libisma.” — Preikiman 12:13.

San a marki na ini wi libi moesoe de baka te wi loekoe a fasi fa a libi e waka

10. Na sortoe fasi Salomo ben agersi meti nanga libisma?

¹⁰ A koni foe Gado di de foe si na Preikiman, kan jepi wi moro fara foe loekoe san na wi marki na ini a libi. Fa so? Foe di, leki fa sani de troetroe, Salomo ben poti prakseri na tapoe tra waarheid di pikinmoro noiti wi e prakseri foe den kande. Wán waarheid abi foe doe nanga a gersi di libisma nanga meti gersi makandra. Jesus ben agersi den bakaman foe en nanga skapoe, ala di sma moro foeroe no lobi en te sma e agersi den nanga meti (Johanes 10:11-16). Ma tokoe Salomo ben kon nanga wan toe tori di wi no kan tweifri na dati: „A troe Gado o piki [den manpikin foe libisma] poeroe, so taki den kan si taki den srefi na meti toe. Bika wan kaba de gi den manpikin foe libisma èn wan kaba gi meti, èn den abi a srefi kaba. Soleki fa a wan e dede, na so a trawan e dede, . . . so taki a libisma no hei moro a meti, bika ala sani de foe soso. . . . Den alamala e kon foe doti, èn den alamala e drai go baka na doti.” — Preikiman 3:18-20.

11. (a) Fa wi kan taki foe a gewoon fasi fa a libi foe wan meti e waka? (b) San joe e denki foe so wan ondrosoekoe?

¹¹ Prakseri foe wan meti di joe lobi foe loekoe, kande wan klipdas noso wan konikoni (Deuteronomium 14:7; Psalm 104:18; Odo 30:26). Noso joe kan prakseri foe wan boniboni; moro leki 300 sortoe de na grontapoe. Fa a libi foe en e waka? Baka te a gebore, en mama e gi en bobi wan toe wiki. Sjatoe baka dati a e kisi wiwiri èn a kan go dorosei foe a nesi. Joe kan si fa a e lonlon ala di a e leri foe feni njan. Ma nofo tron a gersi leki a e prei nomo, èn e prisiri foe den jongoe jari foe en. Baka te a gro so wan jari, dan a e feni wan patna. Dan a moesoe bow wan nesi noso wan sribipresi èn sorgoe gi pikin. Efoe a boniboni e feni nofo froktoe, noto, nanga siri, dan na osofamiri foe a boniboni kan gro kon fatoe èn abi ten foe meki na oso foe den kon moro bigi. Ma baka soso wan toe jari, a meti e kon owroe èn a kan kisi mankeri nanga siki moro makriki. Te a abi wan sani foe tin jari, a e dede. Sani kan difrenti pikinso na mindri den difrenti sortoe boniboni, ma dati na a fasi fa a libi foe en e waka.

12. (a) Te joe e loekoe sani leki fa den de troetroe, dan foe san ede a fasi fa a libi foe foeroe sma e waka, de neleki di foe wan meti? (b) San wi ben sa kan denki te wi e si a meti baka di wi ben abi na prakseri?

¹² Moro foeroe sma ben sa agri taki dati na a fasi fa a libi foe wan meti e waka, èn pikinmoro den no e froewakti taki wan boniboni sidon denki foe wan marki na ini a libi. Ma a libi foe foeroe libisma no e difrenti foeroe foe dati, a no so? Den e gebore èn sma e sorgoe den te den de wan beibi. Den e njan, e gro, èn e prei leki jongoewan. Fosi joe denki den tron bigisma, den e feni wan patna, èn den e soekoe wan presi foe libi èn wan fasi fa den kan kisi njanjan. Efoe sani e waka boen, dan den e gro boen kande èn e meki na oso (nesi) foe den kon moro bigi pe den kan kweki pikin. Ma den someni tenti jari e pasa gowe esi, èn den e kon owroe. Efoe den no e dede moro froekoe, dan den kan dede baka 70 noso 80 jari di ben foeroe nanga „broko-ede èn nanga sani di e hati sma” (Psalm 90:9, 10, 12). Joe ben sa kan denki kande foe den serjoesoe tori disi te joe e si wan boniboni baka (noso wan tra meti di joe ben abi na prakseri).

13. Sortoe bakapisi e sori taki a de troe gi libisma nanga meti?

¹³ Joe kan si foe san ede Salomo ben agersi a libi foe sma nanga di foe meti. A ben skrifi: „Gi ala sani wan fasti ten de, . . . wan ten foe meki pikin èn wan ten foe dede.” A lasti kaba dati, dede, de a srefi gi libisma nanga meti, „soleki fa a wan e dede, na so a trawan e dede”. A ben taki moro fara: „Den alamala e kon foe doti, èn den alamala e drai go baka na doti.” — Preikiman 3:1, 2, 19, 20.

14. Fa son libisma e proeberi foe kenki a fasi a libi e waka moro foeroe, ma nanga sortoe bakapisi?

¹⁴ Wi no moesoe si na ondrosoekoe disi fa sani de troetroe, leki wan takroe prakseri. A troe taki, son sma e proeberi foe kenki a situwâsi, foe di den e teki moro wroko foe meki a situwâsi di den de na ini na materia sei, kon moro betre leki san den papa nanga mama ben abi. Kande den e teki moro jari foe skoroleri foe sorgoe taki den kan libi moro bigi, ala di den e proeberi foe kon froestan a libi moro boen. Noso kande den e poti prakseri na tapoe oefening noso spesroetoe sortoe njanjan, foe kisi wan moro betre gosontoe èn foe kan libi pikinso moro langa. Èn den moeiti disi kan abi son winimarki. Ma soema kan de seiker taki den moeiti dati sa abi boen bakapisi? Srefi efoe den abi boen bakapisi, dan o langa den sa tan?

15. Sortoe eerlijk ondrosoekoe foe a libi foe moro foeroe sma de wan warti sani?

¹⁵ Salomo ben aksi: „Foe di foeroe sani de di e tjari someni sani kon di de foe soso, sortoe wini libisma abi? Bika soema sabi sortoe boen wan libisma abi na ini a libi na ini a nomroe foe den dei foe en soso libi ede, te a e gebroiki den leki wan skaduw? Bika soema kan taigi libisma san sa pasa baka en?” (Preikiman 6:11, 12) Foe di dede e meki den moeiti foe wan sma e kon na wan kaba toemoesi esi, dan foeroe wini de troetroe na ini a feti di wan sma e feti foe kisi moro materia sani, noso na ini a teki foe moro jari foe skoroleri soso foe kisi moro goedoe? Èn foe di a libi sjatoe so, e pasa gowe leki wan skaduw, dan foeroe sma e froestan taki ten no de moro foe doe moeiti foe feni wan tra marki di libisma wani doro, te den e si taki a no ben doro a fosi marki foe en; èn wan libisma no kan de seiker toe san sa pasa nanga den pikin foe en, „baka en”.

A de a ten foe kisi wan boen nen

16. (a) San wi moesoe doe, san meti no kan doe? (b) Sortoe tra waarheid moesoe abi krakti na tapoe a libi foe wi?

¹⁶ Tra fasi leki meti, wi libisma man prakseri na wisrefi: ’San a wani taki dati mi dja?’ A de soso wan fasti sistema fa sani e drai kon ibri tron baka, nanga wan ten taki mi e kon gebore, èn wan ten foe dede?’ Nanga disi na prakseri, memre a troe di de na ini den wortoe foe Salomo di ben taki foe libisma nanga meti: „Den alamala e drai go baka na doti.” Disi wani taki dati dede seiker e kaba a de di wan sma de? We, bijbel e sori taki libisma no abi wan sili di no e dede, èn di e tan na libi dorosei foe a skin te wan sma dede. Libisma na sili, èn a sili di e sondoe, e dede (Esekièl 18:4, 20). Salomo ben taki finifini: „Den libiwan sabi ete, taki den sa dede; ma foe a sei foe den dedewan, den no sabi notinoti, èn den no abi wan paiman moro, bika sma frigiti srefi foe memre den. Ala san joe anoe feni foe doe, doe dati nanga joe krakti srefi, bika no wan wroko noso prakseri noso sabi noso koni no de na ini Sjeol, a presi pe joe e go.” — Preikiman 9:5, 10.

17. Na sortoe sani Preikiman 7:1, 2 moesoe meki wi prakseri?

¹⁷ Nanga a troe tori dati na prakseri, denki foe den wortoe disi: „Wan nen betre moro leki oli, èn a dei foe dede betre moro leki a dei te wan sma e kon gebore. A moro betre foe go na a oso pe sari de, leki foe go na a oso pe wan fesa de, bika dati na a kaba foe ala libisma; èn sma di de na libi moesoe poti prakseri na en tapoe” (Preikiman 7:1, 2). Wi moesoe agri taki dede ben de „a kaba foe ala libisma”. No wan libisma man dringi wan wondroe dringi, njan iniwan vitamine, njan spesroetoe njanjan, noso doe iniwan sortoe oefening di abi têgo libi leki bakapisi. Èn nofo tron ’sma frigiti foe prakseri den’ no langa baka te den dede. So boen, foe san ede wan nen „betre moro leki oli, èn a dei foe dede betre moro leki a dei te wan sma e kon gebore”?

18. Foe san ede wi kan de seiker taki Salomo ben bribi na ini na opobaka?

¹⁸ So leki fa wi si kaba, dan Salomo ben taki sani leki fa den de troetroe. A ben sabi foe den afo foe en, Abraham, Isak, nanga Jakob, di seiker ben meki wan boen nen na wi Mekiman. Jehovah Gado, di ben sabi Abraham boen, ben pramisi foe blesi en èn a siri foe en (Genesis 18:18, 19; 22:17). Ija, Abraham ben abi wan boen nen na Gado, èn a ben tron wan mati foe Gado (2 Kroniki 20:7; Jesaja 41:8; Jakobus 2:23). Abraham ben sabi taki a libi foe en nanga a libi foe a manpikin foe en no ben de wan pisi foe wan sistema nomo pe sani no e kaba noiti, èn e drai kon baka ibri tron baka, pe sma e gebore èn e dede. A de seiker taki moro ben de ini a tori leki dati nomo. Den ben abi a seiker froewakti foe libi baka, no foe di den ben abi wan sili di no e dede, ma foe di den ben o kisi wan opobaka. Abraham ben abi na overtoigi taki „Gado ben man opo [Isak] baka na dede srefi”. — Hebrewsma 11:17-19.

19. Sortoe inzicht wi kan kisi foe Job, te wi e loekoe san Preikiman 7:1 wani taki?

¹⁹ Dati na a sroto foe froestan fa „wan nen betre moro leki oli, èn a dei foe dede betre moro leki a dei te wan sma e kon gebore”. Neleki Job di ben libi fosi en, na so Salomo toe ben abi na overtoigi taki a Sma di ben meki a libi foe libisma, kan gi den a libi disi baka. A kan tjari libisma di dede, kon na libi baka (Job 14:7-14). A getrow Job ben taki: „Joe [Jehovah] sa kari, èn misrefi sa piki joe. Joe sa angri foe a wroko foe joe anoe” (Job 14:15). Prakseri foe disi! Wi Mekiman „e angri foe” den loyaal foetoeboi foe en di dede („Joe ben sa wani si den wroko foe joe anoe ete wan leisi.” — The Jerusalem Bible.) Foe di a Mekiman e gebroiki a loesoe-ofrandi foe Jesus Krestes, meki a kan opo libisma baka (Johanes 3:16; Tori foe den Apostel 24:15). A de krin, taki libisma kan difrenti foe den meti di e dede.

20. (a) O ten a dei foe dede de moro betre leki a dei te wan sma e kon gebore? (b) Fa na opobaka foe Lasarus ben moesoe abi krakti na tapoe foeroe sma?

²⁰ Disi wani taki dati a dei foe dede kan de moro betre leki a dei te wan sma e kon gebore, efoe a sma na a ten dati bow wan boen nen na Jehovah, di kan opo getrow sma di dede. A Moro Bigi Salomo, Jesus Krestes, ben boeweisi dati. Foe eksempre, a ben tjari a getrow man Lasarus kon na libi baka (Lukas 11:31; Johanes 11:1-44). Soleki fa joe kan prakseri, dan a si di den ben si na opobaka foe Lasarus ben abi foeroe krakti na tapoe foeroe foe den sma di ben de drape, èn den ben poti bribi na ini a Manpikin foe Gado (Johanes 11:45). Joe denki taki den ben abi a firi taki a libi no abi wan marki, èn taki den no ben sabi kwetikweti soema den ben de èn pe den ben o go? Kontrari foe dati, den ben kan si taki den no ben abi foe de leki meti di gebore, e libi foe wan pisi ten, èn baka dati e dede. A marki foe a libi foe den, ben abi langalanga èn foeroe foe doe nanga a sabi di wan sma sabi a Tata foe Jesus èn a doe foe a wani foe En. Fa a de nanga joe? A takimakandra disi ben jepi joe foe si, noso foe si moro krin fa joe libi kan èn moesoe abi wan troetroe marki?

21. Sortoe sani di abi foe doe nanga a feni di wi moesoe feni san a libi foe wi wani taki, wi wani go loekoe ete?

²¹ Tokoe, foe abi wan troetroe marki na ini a libi di wani taki wan sani, de moro betre leki foe prakseri foe dede èn a libi di joe kan libi agen, baka dede. A abi foe doe nanga san wi e doe nanga a libi foe wi ibri dei. Salomo ben tjari dati kon na krin toe na ini Preikiman, soleki fa wi sa si na ini a tra artikel.

[Foetoewortoe]

Joe kan memre disi ete?

◻ Na sortoe fasi meti nanga libisma de a srefi?

◻ Foe san ede dede e poti krakti na tapoe, taki foeroe foe a moeiti foe libisma èn den sani di den e doe, de foe soso?

◻ Fa a dei foe dede kan de moro betre leki a dei te wan sma e kon gebore?

◻ Foe sortoe matifasi a e anga foe abi wan marki na ini a libi di wani taki wan sani?

[Prenki na tapoe bladzijde 10]

Fa a libi foe joe e difrenti foeroe foe di foe meti?