Meki a moro boen sani foe joe libi
A PAPA ben de na ini na oso, na ini bedi, a ben e dede foe di a abi kanker. A manpikin foe en ben de na ini a wrokopresi, a ben e seti den wrokosani foe a papa foe en di a ben gebroiki foe wroko oedoe nanga den. Di a ben teki den wrokosani e loekoe den na ala sei, a ben prakseri foe den heri moi sani di en papa ben meki nanga den. Ala di a wrokopresi ben de leti na sei na oso, a ben sabi taki noiti moro en papa ben o go drape na inisei, noiti moro a ben o hori den wrokosani dati di a ben man wroko so boen nanga den. A ten dati ben pasa.
A manpikin ben prakseri foe a bijbeltekst na Preikiman 9:10: „Ala san joe anoe feni foe doe, doe dati nanga joe krakti srefi, bika no wan wroko noso prakseri noso sabi noso koni no de na ini Sjeol, a presi pe joe e go.” A ben sabi a bijbeltekst dati heri boen. A ben gebroiki en foeroetron di a ben e leri tra sma a bijbel waarheid taki dede na wan situwâsi pe wroko no de. Now a krakti foe a tori disi di Salomo ben taki naki en ati — wi moesoe libi wi libi dorodoro èn njan boen foe den libi dei foe wi te wi kan, bika a ten o kon te wi no sa man moro langa.
Njan boen foe a libi
Na ini a heri boekoe Preikiman, a koni kownoe Salomo e gi den leisiman foe en a froemane foe njan boen foe a libi. Kapitel 3 foe eksempre, e taki: „Mi kon sabi taki no wan moro boen sani de gi den leki foe prisiri èn foe doe boen na ini a libi foe wan sma; èn so srefi taki ibri man moesoe njan èn dringi troetroe èn si a boen foe ala en tranga wroko. A de a presenti foe Gado.” — Preikiman 3:12,13.
Na ondro a krakti foe a santa jeje foe Gado, Salomo ben taki a prakseri disi agen: „Loekoe! A moro boen sani di misrefi si, di moi, na taki wan sma moesoe njan èn dringi èn si a boen foe ala en tranga wroko di a wroko tranga na ondro a son ala den dei foe en libi di a troe Gado gi en, bika dati na en porsi.” — Preikiman 5:18.
Na a srefi fasi a e froemane jongoe sma: „Prisiri, jonkoeman, na ini joe jongoe jari, èn meki joe ati firi boen na ini den dei foe joe leki jonkoeman [noso jongoe wenke], èn waka na tapoe den pasi foe joe ati èn ini den sani di joe ai e si” (Preikiman 11:9a). A de wan heri moi sani foe njan boen dorodoro foe a tranga èn krakti foe joe jongoe jari! — Odo 20:29.
’Memre joe Kriaman’
A no de foe taki, dati Salomo no e bedoel taki a de wan koni sani foe feti baka ala sani di kan wroko na tapoe wi ati noso di wi ai e si. (Teki gersi 1 Johanes 2:16.) Disi e kon krin na fesi foe a sani di a skrifi èn di e kon now: „Ma joe moesoe sabi taki foe den sani disi [sani di kan satisferi den lostoe foe joe] ede a troe Gado sa tjari joe kon na fesi kroetoe” (Preikiman 11:9b). Awansi o owroe wi de, wi moesoe memre taki Gado e loekoe san wi e doe nanga wi libi èn a o kroetoe wi akroederi dati.
A de wan don sani srefisrefi foe prakseri taki wi kan libi wan libi pe wi e prakseri wi eigi afersi nomo èn e skoifi a gi di wi kan gi wisrefi na ini a dini foe Gado go na den jari te wi kon moro owroe! A libi foe wi kan kon na wan kaba iniwan joeroe. Awansi dati no e pasa, tokoe a dini foe Gado no e kon moro makriki te wi e kon owroe. Foe di Salomo ben e erken a troe tori disi meki a e skrifi: „Memre now joe Bigi Kriaman na ini den dei foe joe jongoe jari, bifo den moeilek dei sa kon, noso den jari doro pe joe sa taki: ’Mi no e prisiri nanga den’ ” — Preikiman 12:1.
Den jari di e kren e aksi den paiman. Nanga simbôlis wortoe Salomo e taki moro fara san den jari di e kren e doe nanga sma. Anoe nanga tapoesei anoe e beifi, den bonfoetoe kon swaki, den tifi e kon weiniki. A wiwiri e kon weti èn e fadon. A sribi e kon so lekti dati wan sma e wiki kaba te a jere wan pikinfowroe meki wan pikin babari. Den sani foe si, foe jere, foe firi, foe smeri èn foe tesi — alamala e go na baka. A skin di kon swaki e meki sma e kon frede foe fadon èn tra „broko-ede” foe frede foe waka na poebliki presi. Te foe kaba a sma e dede. — Preikiman 12:2-7.
Owroedei e tjari rampoe kon spesroetoe gi den sma di no ben ’memre den Bigi Kriaman’ na ini den dei foe den jongoe jari. Foe di a sma dati froemorsoe en libi, dan so wan sma ’no abi prisiri’ na ini den jari baka ten. Wan libifasi sondro Gado kan meki moro problema nanga pen foe na owroedei kon toe (Odo 5:3-11). A de wan sari sani taki te den sortoe sma disi e loekoe go na fesi, dati den no e si no wan tra tamara leki a grebi nomo.
Prisiri na tapoe joe owroedei
Disi no wani taki dati owroe sma no man njan boen foe a libi. Na ini bijbel, „foeroe dei nanga foeroe jari foe libi” den e tjari kon kroederi toe nanga a blesi foe Gado (Odo 3:1, 2). Jehovah ben taigi en mati Abraham: „Joe foe joe sei, . . . den sa beri joe te joe doro wan boen owroe libimarki” (Genesis 15:15). Ala di Abraham ben abi den froefeiri sani foe den jari di kren, tokoe a ben kisi vrede èn wan korostoe firi na ini den jari foe en baka ten, ala di a ben e loekoe go baka nanga satisfaksi na wan libi pe a ben gi ensrefi na a dini foe Jehovah. A ben loekoe na fesi toe na ini bribi na „a foto di abi troetroe fondamenti”, Gado en Kownoekondre (Hebrewsma 11:10). So boen a ben dede „owroe èn libi ben nofo gi en”. — Genesis 25:8.
Foe dati ede Solomo ben gi a froemane: „Efoe wan man ben sa moesoe libi foeroe jari srefi, meki a prisiri na ini den alamala” (Preikiman 11:8). Awansi wi jongoe noso owroe, troetroe prisiri abi foe doe nanga wi matifasi nanga Gado.
Di a jonkoeman di ben de na ini a wrokopresi poeroe den lasti wrokosani foe en papa, a ben prakseri foe den sani disi. A ben prakseri foe ala den sma di a ben sabi, di ben meki moeiti foe meki a moro boen sani foe a libi foe den, ma di no ben feni prisiri foe di den no ben abi wan matifasi nanga a Kriaman foe den. Fa a ben gersi wan sani di fiti taki baka di Salomo gi deki-ati foe wan sma abi prisiri na ini en libiten, dan a ben taki sjatoe foe afersi nanga den wortoe disi: „A bosroiti foe a tori, now di sma jere ala sani, de: Frede a [troe] Gado èn hori den komando foe en. Bika disi na a heri plekti foe libisma!” — Preikiman 12:13.