¡Memre Yu Gran Kriaman!
„Memre now yu Gran Kriaman . . . bifo den muilek dei sa kon.”—PREIKIMAN 12:1.
1. Fa yongu sma di gi densrefi abra na Gado musu wani gebroiki den yongu yari nanga krakti fu den?
YEHOVAH e gi den futuboi fu en krakti fu du a wani fu en (Yesaya 40:28-31). A e du disi awansi o owru den de. Ma spesrutu den yongu sma di gi densrefi abra na Gado musu wani gebroiki den yongu yari èn a krakti fu den na wan koni fasi. Fu dati ede, den e arki a rai fu „a sma di e tyari sani kon na wán”, Kownu Salomo fu owruten Israèl. A ben gi deki-ati: „Memre, now, yu Gran Kriaman na ini den dei fu yu yongu yari, bifo den muilek dei sa kon, noso den yari doro te yu sa taki: ’Mi no e prisiri nanga den.’”—Preikiman 1:1; 12:1.
2. San den pikin fu Kresten di gi densrefi abra na Gado musu du?
2 A frumane di Salomo ben gi fu memre a Gran Kriaman na ini den yongu yari ben de na a fosi presi gi den yonkuman nanga yongu uma fu Israèl. Den ben gebore na ini wan nâsi di ben gi densrefi abra na Yehovah. Fa a de nanga den pikin fu den Kresten di gi densrefi abra na Gado na ini a ten disi? Trutru, den musu tan prakseri a Gran Kriaman fu den. Efu den e du dati, dan den sa gi en grani èn dati sa gi den wini.—Yesaya 48:17, 18.
Moi Eksempre fu Fositen
3. Sortu eksempre Yosef, Samuèl, nanga David ben gi?
3 Furu yongu sma di kari na ini Bijbel de moi eksempre, bika den ben de sma di ben memre a Gran Kriaman fu den. Yonguyongu kaba Yakob, a manpikin fu Yosef, ben memre a Gran Kriaman fu en. Di a wefi fu Potifar ben wani kori Yosef fu abi seks nanga en, dan Yosef ben weigri na wan krakti fasi èn a ben taki: „Fa mi ben kan du a bigi ogri disi èn trutru sondu na Gado?” (Genesis 39:9) A Leifisma Samuèl ben memre a Kriaman fu en no soso di a ben de wan pikin, ma en heri libi langa (1 Samuèl 1:22-28; 2:18; 3:1-5). A yongu David fu Betlehem trutru ben tan prakseri a Kriaman fu en. A ben de fu si taki a ben frutrow na ini Gado di a ben kisi fu du nanga a langa man Goliat èn a ben fruklari: „Yu e waka kon miti mi nanga wan feti-owru èn nanga wan lansri, ma mi e waka kon miti yu na ini a nen fu Yehovah fu den legre, a Gado fu den fetilin fu Israèl, di yu spotu. A dei disi Yehovah sa gi yu abra na ini mi anu, èn fu tru mi sa naki yu trowe èn puru yu ede na yu tapu; . . . èn libisma fu heri grontapu sa sabi taki wan Gado de di de fu Israèl. Èn ala den sma disi di kon makandra sa sabi taki Yehovah no e gi frulusu nanga feti-owru èn nanga lansri, bika a feti na fu Yehovah, èn a musu gi unu na ini wi anu.” Syatu baka dati, Goliat dede èn den Filisteasma ben lowe.—1 Samuèl 17:45-51.
4. (a) San e sori taki wan Israèl meisje di ben de na katibo na Siria èn a yongu Kownu Yosia, ben memre a Gran Kriaman fu wi? (b) Fa Yesus di ben abi 12 yari ben sori taki a ben memre a Kriaman fu en?
4 Wan tra yongu sma di ben memre a Gran Kriaman ben de wan Israèl meisje di ben de na katibo. A ben gi a wefi fu a Siria legre-edeman Na-aman so wan moi kotoigi taki a legre-edeman ben go na Gado en profeiti, èn ben kon betre fu en gwasi siki, èn a ben tron wan anbegiman fu Yehovah (2 Kownu 5:1-19). A yongu Kownu Yosia ben horibaka nanga deki-ati gi a soifri anbegi fu Yehovah (2 Kownu 22:1–23:25). Ma a moro moi eksempre fu wan sma di ben memre a Gran Kriaman fu en di a ben yongu ete, ben de Yesus fu Nasarèt. Luku san ben pasa di a ben abi 12 yari. En papa nanga mama ben tyari en go na Yerusalem gi a Paskafesa. Di den ben reis go na oso baka, dan den ben si taki Yesus no ben de; dati meki den ben drai go baka fu suku en. Na a di fu dri dei, den ben feni en ala di a ben e taki nanga den leriman na ini a tempel, fu aksi di ben abi fu du nanga den Buku fu Bijbel. Yesus, di ben piki na aksi fu en mama di ben broko en ede trutru, ben aksi: „Fu san ede unu ben musu go suku mi? ¿Unu no ben sabi taki mi musu de na ini na oso fu mi Tata?” (Lukas 2:49) A ben bun gi Yesus fu leri sani di ben abi waarde na yeye fasi èn di a ben leri na ini a tempel, ’na oso fu en Tata’. Na ini a ten disi, a Kownukondre zaal fu Yehovah Kotoigi na wan heri bun presi fu leri a soifri sabi fu a Gran Kriaman fu wi.
¡Memre Yehovah Nownow!
5. Taki nanga yu eigi wortu fa yu ben o taki den wortu na Preikiman 12:1, di a sma di e tyari sani kon na wán ben skrifi.
5 A sma di e anbegi Yehovah nanga en heri ati wani bigin nanga En diniwroko so esi leki a kan èn a wani dini Gado en heri libi langa. Ma san na a howpu fu wan sma di gebroiki den yongu yari fu en fu soso, fu di a no ben memre a Kriaman? A sma di e tyari sani kon na wán e taki nanga yepi fu Gado en santa yeye: „Memre, now, yu Gran Kriaman na ini den dei fu yu yongu yari, bifo den muilek dei sa kon, noso den yari doro pe yu sa taki: ’Mi no e prisiri nanga den.’”—Preikiman 12:1.
6. Sortu buweisi de taki na owru Simeon nanga Ana ben memre a Gran Kriaman fu den?
6 No wan sma e prisiri nanga „den muilek dei” na tapu den owrudei. Ma den owrusma di e tan prakseri Gado, e prisiri. Fu eksempre, na owru Simeon ben teki a beibi Yesus na ini en anu na ini a tempel èn a ben fruklari nanga prisiri: „Now, Soeverein Masra, meki a srafu fu yu go na ini vrede, neleki fa yu ben meki bekènti; fu di den ai fu mi si a fasi fa yu sa tyari frulusu kon, di yu sreka na fesi den ai fu ala pipel, wan leti di sa teki a duku puru na den nâsi èn wan glori fu yu pipel Israèl” (Lukas 2:25-32). Ana, di ben abi aititenti na fo yari, ben memre a Gran Kriaman fu en so srefi. A ben de ala ten na ini a tempel èn a ben drape di den ben tyari a beibi Yesus kon na a tempel. „Na a srefi yuru dati a ben kon krosibei èn ben bigin gi Gado tangi èn ben taki fu a pikin nanga ala den sma di e fruwakti a frulusu fu Yerusalem.”—Lukas 2:36-38.
7. San na a situwâsi fu den sma di kon owru na ini a diniwroko fu Gado?
7 Disiten Kotoigi fu Yehovah di kon owru na ini a diniwroko fu Gado, e firi a pen kande di e kon te den kon owru èn di e meki taki den no man du ala sani. ¡Ma luku o koloku den de, èn wi e warderi a getrow diniwroko fu den srefisrefi! Den abi „a prisiri fu Yehovah” fu di den sabi taki a teki a makti fu a grontapu disi na en tapu èn no wan sma no man puru disi na en anu, ala di a poti Yesus Krestes leki wan makti Kownu na hemel (Nehemia 8:10). Now na a ten gi yonguwan nanga owruwan fu arki a frumane: „Un yonkuman nanga un nyunwenke tu, un owru man makandra nanga den boi. Meki den prèise a nen fu Yehovah, bika en nen wawan hei srefisrefi. A wartifasi fu en hei moro grontapu nanga hemel.”—Psalm 148:12, 13.
8, 9. (a) Gi suma den „muilek dei” no e tyari bun kon, èn fu san disi de so? (b) Fa yu ben o fruklari Preikiman 12:2?
8 Gi den sma di no e prakseri a Gran Kriaman fu den èn di no e frustan den tumusi moi prakseri fu en, „den muilek dei” fu na owrudei no e tyari bun kon gi den — kande den dei e banawtu den trutru. Den no e frustan sani na yeye fasi di kan yepi den fu kakafutu gi den tesi fu na owrudei èn den helu di kon na tapu a libisma famiri sensi di Yesus ben trowe Satan komoto na ini hemel (Openbaring 12:7-12). Fu dati ede, a sma di e tyari sani kon na wán e gi wi deki-ati fu memre a Gran Kriaman fu wi, „bifo son nanga leti nanga mun nanga den stari e kon dungru, èn den wolku drai kon baka, èn alen fadon baka dati” (Preikiman 12:2). San den wortu disi wani taki?
9 Salomo e agersi a ten fu den yongu yari nanga a zomer fu Palestina pe son, mun nanga stari e skèin a leti fu den komoto na wan loktu di no abi no wan wolku. Na a ten dati sani e luku bun trutru. Ma te wan sma kon owru, dan den dei fu en de leki a kowru winterten èn alenten di e trowe soso problema kon (Yob 14:1). ¡A ben o de wan sari trutru fu sabi a Kriaman, ma fu no dini en na ini a zomerten fu a libi! Na ini a winterten fu na owrudei, sani e kon dungru, spesrutu gi den sma di no gebroiki den okasi fu dini Yehovah na ini den yongu yari fu den, fu di den ben feti na baka sani di de fu soso. Ma awansi o owru wi de, meki wi ’waka na baka Yehovah dorodoro’, neleki san a getrow Kaleb, wan loyaal kompe fu a profeiti Moses ben du.—Yosua 14:6-9.
San E Pasa Te wan Sma Kon Owru
10. San (a) „den sma di e luku na oso” èn (b) „den tranga man” wani taki?
10 Baka dati, Salomo e taki fu den problema di e kon „na tapu a dei te den waktiman fu na oso e beifi, èn den tranga man boigi densrefi, èn den uma di e mara sani ben tapu fu wroko bika den no de nanga furu moro, èn den uma di de na den fensre e luku go na dorosei, feni taki a kon dungru” (Preikiman 12:3). Na „oso” na a skin fu wan libisma (Mateus 12:43-45; 2 Korentesma 5:1-8). Den „waktiman” fu na oso na den anu, di e kibri a skin èn e gi en san a abi fanowdu. Nofotron te wan sma kon owru, dan a e beifi fu di a kon swaki, a e senwe, èn a malengri. „Den tranga man” — den futu — no de tranga pilari moro ma den kon swaki èn den e beni so taki den futu e skoifiskoifi nomo te den e waka. ¿Ma yu no breiti fu si den owru kompekresten na den Kresten konmakandra?
11. Suma na den „uma di e mara sani”, èn „den uma di de na a fensre e luku go na dorosei” te yu e taki en na agersi fasi?
11 „Den uma di e mara sani ben tapu a wroko bika den no de nanga furu moro” — ma fa? Kande den tifi pori noso den puru den, èn wan tu tifi de ete noso no wan tifi noso no wan no de moro. A muilek fu mara tranga nyanyan meki a kon fini, noso a sma no man du disi kwetikweti moro. „Den uma di de na den fensre e luku go na dorosei” — den ai di abi fu du nanga a frustan di wi e gebroiki fu si — kon dungru noso den no e si kwetikweti moro.
12. (a) Fa a du kon taki „den doro di e go na strati tapu”? (b) San yu e denki fu den Kownukondre preikiman di kon owru?
12 „Èn,” na so a sma di e tyari sani kon na wán e taki, „den tapu den doro di e go na strati, te a babari fu a miriston kon swaki, èn sma e opo te den yere a babari di wan fowru e meki, èn ala den umapikin di e singi, a no man yere bun” (Preikiman 12:4). Den tu doro fu a mofo — den mofobuba — no e opo furu moro noso den no e opo srefisrefi fu taki san de na ini na „oso”, noso a skin, fu den sma di kon owru èn di no e dini Gado. No wan sani den e seni go na tapu „strati” pe sma de. Ma fa a de nanga den fayafaya Kownukondre preikiman di kon owru? (Yob 41:14) ¡Kande den no e waka so esi te den e go oso fu oso èn wan tu fu den abi muiti kande fu taki, ma a de seiker taki den e prèise Yah!—Psalm 113:1.
13. Fa a sma di e tyari sani kon na wán e taki fu den tra problema di owrusma abi, ma san wi kan taki fu Kresten di kon owru?
13 A babari di a miriston e meki e kon swaki te den e kaw nyanyan sondro tifi. Te wan owru man de na tapu en bedi, dan a no e sribi switi. Srefi a singi di wan fowru e singi e wiki en. A no e singi furu singi moro, èn pikinmoro a no man memre poku bun moro. „Ala den umapikin di e singi” — den noot fu wan singi — a no man yere bun. Den owrusma no man yere bun te trawan e meki poku noso te den e singi. Ma den owru salfuwan nanga den kompe fu den, di wan tu fu den no de so yongu moro tu, e tan opo den sten fu singi prèisesingi gi Gado na den Kresten konmakandra. ¡Ai, wi breiti trutru taki wi abi den na wi sei, te den e gi Yehovah glori na ini a gemeente!—Psalm 149:1.
14. Gi sortu sani den owrusma frede?
14 ¡Den owruwan de trutru na ini wan situwâsi di e gi fu sari, spesrutu den wan di no prakseri a Kriaman! A sma di e tyari sani kon na wán e taki: „So srefi, den kon frede soso te den si wan hei sani kaba, èn sani di e frede den de na tapu pasi. Èn na amandrabon abi bromki, èn a sprenka e srepi ensrefi go na fesi, èn a kapperbes e panya opo, fu di libisma e waka go na en oso pe a sa tan wan langa ten èn den kragiman waka lontu na tapu strati” (Preikiman 12:5). Furu owrusma frede taki den o fadon te den de na tapusei fu wan hei trapu. Srefi te den e opo luku go na loktu na wan hei sani, dan dati e meki den ede e drai. Te den musu go na strati pe furu sma de, dan den frede fu di den e denki taki den o kisi mankeri noso taki fufuruman o du den ogri.
15. Fa a du kon taki „na amandrabon abi bromki” èn fa a sprenka e „srepi ensrefi go na fesi”?
15 Te a de wan owru man, dan „na amandrabon abi bromki”, kande fu sori taki a wiwiri fu en e kon weti pikinso, dan a e kon weti krinkrin. Den grani wiwiri e fadon komoto neleki den weti bromki fu na amandrabon. Te a „e srepi ensrefi go na fesi”, kande a e beni en baka èn den anu fu en e anga go na gron noso a e poti den anu fu en na tapu en dyonku, ala di den baka-anu e sutu go na loktu, dan a gersi wan sprenka. ¡Ma efu wan fu wi gersi a sani disi pikinso, meki trawan hori na prakseri taki wi de na ini Yehovah en legre sprenka di de fayafaya èn di e wroko esi-esi!—Luku A Waktitoren fu 1 mei 1998, bladzijde 8-13.
16. (a) San a wani taki dati „a kapperbes e panya opo”? (b) San na a ’oso pe wan sma sa tan wan langa ten’, èn san e sori taki dede de krosibei?
16 Na owru sma lasi lostu fu nyanyan, srefi te a nyanyan di de na en fesi switi leki a kapperbes. Wan heri pisi ten, sma gebroiki den froktu disi fu wiki lostu fu nyan. Taki „a kapperbes e panya opo” wani taki dati te wan owru man e lasi lostu fu nyan, dan srefi a froktu disi no man wiki en lostu fu nyan. Den sani disi e sori taki a e doro „en oso pe a sa tan wan langa ten”, a grebi. A sa de en oso fu têgo efu a no prakseri a Kriaman fu en èn a libi so wan takru libi taki Gado no e memre en na ini na opobaka. Wan sma kan si taki wan owrusma o dede te soso sari nanga kragi e komoto na den doro fu na owrusma en mofo.
17. Fa den puru „a solfru titei”, èn san „a gowtu komki” kan prenki?
17 Wi e kisi deki-ati fu memre a Gran Kriaman fu wi „bifo den e puru a solfru titei, èn den e naki a gowtu komki broko na pisipisi, èn den e broko a watrakan na a fonten, èn den e naki a watrawiel fu a peti broko na pisipisi” (Preikiman 12:6). A „solfru titei” kan de a senwe titei na ini a bakabonyo. Wan sma o dede seiker te a kefalek moi pasi disi fu seni boskopu go na a ede-tonton, e kisi mankeri so taki a no man kon bun moro. A „gowtu komki” kan de na ede-tonton na ini na edekrabasi èn a gersi wan komki, ala di a fasi na a senwe titei na ini a bakabonyo. Te na ede-tonton di den e agersi nanga gowtu fu di a de wan warti sani, no e wroko moro dan a sma e dede.
18. San na a agersi „watrakan na a fonten”, èn san e pasa te a broko?
18 „A watrakan na a fonten” na a ati, di e teki ala a brudu èn e seni en go baka fu waka na ini a heri skin. Te wan sma dede, dan na ati e tron leki wan watrakan di broko na pisipisi na a fonten, bika a no man teki a brudu di de prenspari fu gi a skin nyanyan nanga krakti moro, a no man hori a brudu moro èn a no man pompu en go na ini a skin. A ’watrawiel fu a peti di naki broko na pisipisi’ no e drai lontu moro, èn na so fasi a e tapu a waka di a brudu di e hori wan sma na libi, e waka na ini a skin. So bun, Yehovah ben sori Salomo taki brudu e waka na ini a skin, langaten bifo datra William Harvey fu a di fu 17 yarihondro ben sori sma taki a brudu e waka na ini a skin.
19. San den wortu fu Preikiman 12:7 abi fu du nanga dede?
19 A sma di e tyari sani kon na wán ben taki moro fara: „Dan a doti e drai go baka na a gron neleki fa a ben de fosi, èn a yeye srefi e drai go baka na a tru Gado di ben gi en” (Preikiman 12:7). Efu a „watrawiel” naki broko na pisipisi, dan a skin fu libisma, di fosifosi ben meki fu a doti fu gron, e drai go baka na a doti (Genesis 2:7; 3:19). A sili e dede, fu di a yeye, noso a libikrakti, di a ben kisi fu Gado e drai go baka na a Kriaman fu wi èn a de na En.—Esekièl 18:4, 20; Yakobus 2:26.
San na a Tamara fu Den Sma Di E Memre?
20. San Moses ben aksi di a ben begi den sani di skrifi na Psalm 90:12?
20 Salomo ben sori heri bun o prenspari a de fu memre a Gran Kriaman fu wi. Fu tru, wan libi di syatu, te yu teki disi gersi wan tra sani, èn di lai nanga problema, a no ala san de gi den sma di e tan prakseri Yehovah èn e du en wani nanga den heri ati. Efu den yongu noso den owru, den abi a srefi denki leki di fu Moses di ben begi: „Sori wi finifini fa fu teri den dei fu wi na so wan fasi taki wi kan kisi wan ati fu koni.” Gado en profeiti di ben abi sakafasi ben wani meki Yehovah sori en noso leri en nanga a pipel Israèl fu abi a koni fu warderi ’den dei fu den yari fu den’ èn fu gebroiki den na wan fasi di Gado feni bun.—Psalm 90:10, 12.
21. San wi musu du efu wi wani teri den dei fu wi fu gi Yehovah glori?
21 Spesrutu den yongu Kresten musu abi a fasti bosroiti fu arki a rai fu a sma di e tyari sani kon na wán, taki den musu prakseri a Kriaman. ¡Den abi tumusi moi okasi fu du santa diniwroko gi Gado! Ma awansi o owru wi de, efu wi e leri fa fu teri den dei fu wi fu gi Yehovah glori na ini „a ten [disi] fu a kaba”, dan wi sa man tan teri den fu têgo (Danièl 12:4; Yohanes 17:3). Ma fu du dati, wi musu memre a Gran Kriaman fu wi. Wi musu du wi heri fruplekti na Gado tu.
San Yu Ben Sa Piki?
◻ Fu san ede yongu sma e kisi deki-ati fu memre a Kriaman fu den?
◻ San na wan tu eksempre na ini Bijbel fu sma di ben memre a Gran Kriaman fu den?
◻ San na wan tu bakapisi fu na owru di wan sma e kon owru, soleki fa Salomo ben taki fu en?
◻ Sortu tamara de gi den sma di e prakseri Yehovah?
[Prenki na tapu bladzijde 15]
David, na Israèl meisje di ben de na katibo, Ana, nanga Simeon ben memre Yehovah
[Prenki na tapu bladzijde 16]
Den Kotoigi fu Yehovah di kon owru nanga prisiri e du santa diniwroko gi wi Gran Kriaman