Gado Wortoe abi libi

Prakseri joe Mekiman ini joe jongoe jari

WI Mekiman wani taki wi njan boen foe na diri kado foe en èn dati de na libi. Ini na bijbelboekoe Prékiman a e taki: „Abi prisiri, jonkoeman ini joe jongoe jari, . . . èn koiri ini den pasi di joe ati e gi joe èn ini den sani san joe ai e si.” Ma na pasi di joe e waka na ini joe jongoe jari foe prisi den lostoe foe joe ati èn joe ai, sa abi krakti tapoe na fasi fa Gado sa kroetoe joe. Na foe dat’ede meki jongoesma e kisi na rai now trangatranga: „Foe dat’ede poeroe sari [réde foe brok’ede] na ini joe ati, èn wai rampoe poeroe na joe tapoe.”

Fa jongoesma kan ’wai rampoe poeroe a den tapoe’ èn kisi „tégo libi”, kroederi na kraktifasi kroetoe foe Jehovah? (Romeinisma 6:23) Fa jongoewan kan doe dati e kon na fesi ini na dek’ati di e gi moro fara: „Prakseri joe bigi Mekiman ini joe jongoe jari, bifo den dé foe bigi rampoe doro.”

San de den „dé foe bigi rampoe” na ini san den di no e prakseri den Mekiman e taki: „Mi no abi lostoe na ini?” Na skrifiman foe Prékiman ben méne den dé foe owroedé, te wan sma e kon swaki èn den pisi foe na skin no wani moro èn no e wroko so boen moro. Prékiman e skrifi na agersi-fasi foe na ’winterten’ foe na libi, na ten na ini san na son, na moen nanga den star e kon doengroe, te siki e kon leki doengroe wolkoe èn e meki wan sma moeilekheid kon moro foeroe.

Sosrefi toe a e kari a pisi ten disi foe libi dja „na dé te den waktiman foe na oso e bigin foe béfi, èn den tranga man e kron densrefi, èn den oema di e miri kaba foe wroko foe di den kon tron wéiniki, èn den oemasma di e loekoe na a fensre go a doro feni na doengroe; èn den doro di e go na strati sroto. . . . èn na sprinka e srepi ensrefi go na fesi”.

Joe e froestan na agersitori disi? Na agersi „oso” na a libisma skin. Den „waktiman” noso kibriman de den tapoesé anoe nanga den anoe, di e go béfi te den kon owroe. Den foetoe — „den tranga man” — kon kron na ini owroedé èn nanga moeiti den e tjari na skin. Den tifi — „den oemasma di e miri” — no man foe doe den wroko moro. Den „stop doe wroko foe di den kon de wéiniki”.

Fa a de nanga den ai foe wan owroe sma? Den „fensre” disi foe na skin ’feni na doengroe’ foe di na krakti foe si e go na baka. „Den doro” foe na mofo no e opo so meni tron moro foe taki san e psa na ini na oso noso skin. Ija, wan owroe sma e srepi ensrefi so foeroe tron nanga moeiti go na fesi foe di a abi someni mankeri dati a gersi wan sprenka pikinso.

We, efoe na dede e kon krosbé, na „solfroe tité . . . e poeroe, èn na gowtoe komtji e broko pispisi, èn na kroiki na a watrapeti e broko”. Na „solfroe tité” leki fa a gersi dan e agersi na bakabonjo èn na gowtoe „komtji” na edetonton. Na „kroiki” e agersi na ati, di e kisi na broedoe di e ondrow na libi èn e meki a lon na ini na skin. Owroe dé e kisi den alamala. Te foe kaba wan sma e drai go na ini dede go tron doti baka. — Prékiman 11:9–12:7.

Den bigi rampoe dé foe owroedé e kon gaw gi wan sma di trowe en libi na ini a feti baka soso sani — „a moro bigi soso sani” (Prékiman 12:8) Foe dat’ede de so koni foe prakseri joe Mekiman ini a ten te joe de tranga nanga joe abi ete joe krakti na ini joe skin. Wroko foe kisi wan bericht foe getrow dienst gi Gado, di sa memre joe nanga wan boen kroetoe, ija, a sa gi joe tégo libi. — Mattéus 6:19-21; Hebrewsma 6:10-12; Prékiman 12:13, 14.