Na Inwijding fu a Waktitoren Skoro Centrum—Wan Fesa gi Yehovah

FU SENSI owru ten, prisiri fesa ben de wan pisi fu a tru anbegi. Wan tu fu den fesa di ben hori na ini na owruten Israèl ben teki furu dei èn dusundusun anbegiman fu Yehovah ben fisiti den. Na inwijding fu a tempel fu Salomo ben teki seibi dei, èn baka dati den ben abi a Wiwirikampu-fesa di ben teki wan heri wiki. Disi ben gi den Israèlsma wan okasi fu prakseri a kefalek moi fasi fa Yehovah ben handri nanga den. Den ben drai go baka na oso ala di den „ben breiti èn ben abi prisiri na ati fu ala den bun sani di Yehovah ben du”.—1 Kownu 8:66.

Den sani di ben feni presi na a Wachttoren-Onderwijscentrum (Waktitoren Skoro Centrum) na ini Patterson, New York, Amerkankondre, na tapu 17-22 mei 1999, ben meki den fisitiman prakseri den prisiri fesa dati na ini owruten. Disi ben de wan wiki fu spesrutu aktiviteit, pe furu prakseri ben poti na a inwijding fu den 28 gebow di ben meki spesrutu fu horibaka gi a Bijbel leriprograma na heri grontapu. Sani ben sreka fu meki ala den 5400 sma di e wroko na a edekantoro, na Brooklyn, na Wallkill, nanga na Patterson, teki wan koiri fu luku den gebow na Patterson finifini na ini a prenspari wiki dati. Na mindri den fisitiman yu ben abi moro leki 500 sma di wan leisi ben abi wan prati na a bow-wroko fu a skoro centrum, èn so srefi sma di ben kon fu 23 bijkantoro fu a Waktitoren Genootschap, èn tra sma fu gemeente ini a birti — no moro mendri leki 8100 sma, ala nanga ala.

Den Sani Di Ben De fu Si te den Ben Koiri fu Luku a Presi, Ben Leri Den wan Sani

Fu meki den fisitiman kon sabi a skoro centrum, den ben sreka spesrutu tentoonstelling, video di ben kan leri den fisitiman wan sani, èn den fisitiman srefi ben kan teki wan koiri fu luku a presi. Na ini a bigi kantoro pe den e ontfanga fisitiman, den ben poti wan pikin eksempre fu a tempel di ben de na ini Yerusalem na a ten fu Yesus en diniwroko na grontapu, èn dati ben hari a prakseri fu den fisitiman wantewante. Tra tentoonstelling ben sori a bigin fu a Waktitoren Bijbelskoro Gilead, den prenspari kongres, den gemeente konmakandra, a disiten fasi fu hori oso-bijbelstudie — èn milyunmilyun fu den e hori now ibri wiki — èn a wroko di a Juridische Afdeling e du so taki den sortu aktiviteit disi kan tan go doro soleki fa Yesus ben komanderi.—Mateus 28:19, 20.

Na ini a krosibei zaal di abi presi gi 1700 sma fu sidon switi, den fisitiman fu na inwijding fesa ben man si wan video fu 33 miniti, di nen „Not by Power—By My Spirit!” (¡No Nanga Krakti—Ma Nanga Yepi fu Mi Yeye!) A video disi ben sori fa a Waktitoren Skoro Centrum ben du kon. Den interview ben sori situwâsi pe sma ben kan si krinkrin fa Yehovah ben tiri sani èn fa a ben blesi den muiti di ben du 15 yari langa fu kaba a wroko disi nanga bun bakapisi. Dusundusun sma ben abi wan prati na a wroko fu bow a centrum disi. Wan leisi na ini 1994, 526 wrokoman ben de na a presi, dati na 350 furuten friwani wrokoman, 113 pisi ten wrokoman, nanga 63 sma di ben kon ibri dei fu yepi. Furu sma moro ben horibaka gi a wroko nanga bijdrage. Den alamala e frustan taki disi noiti ben sa man du sondro a yeye fu Yehovah.—Sakaria 4:6.

Den wan di ben teki wan koiri fu luku a presi ben kan si taki a prenspari marki fu a wroko di e du na tapu a skoro centrum, na fu horibaka gi a leri di Gado e gi. Den tentoonstelling di hori na a dromofo fu go na a Gileadskoro, na tapu a fosi sodro fu a skoro gebow, ben sori san na den furu sani na yeye fasi di a skoro ben du èn a ben sori a historia fu a skoro. Fu sensi a fosi klas na ini a yari 1943, na a fosi skoro dyari na ini South Lansing, New York a Gileadskoro leri moro leki 7000 studenti gi a zendingwroko . Den tentoonstelling na a di fu tu sodro fu a skoro gebow ben meki sma si a Skoro gi den Memre fu Bijkantoro Komte èn a Skoro gi Opziener Di E Reis, èn ala tu skoro e hori drape. Sensi a bigin fu a bijkantoro skoro na ini november 1995, a bijkantoro skoro ben gi moro leri na den 360 memre fu den Bijkantoro Komte fu 106 kondre.

Den fisitiman di ben teki wan koiri fu luku a presi ben kon si heri esi taki na moro furu kontren den ben kan si moro leki soso fowtow nomo. Den ben man go langalanga na den difrenti afdeling, èn fisiti den kantoro nanga tra wrokopresi, èn den ben man si finifini fa a wroko e du. Wan heimarki fu a koiri di den ben teki fu luku a presi ben de a gebow pe na Audio/Video Service de. ¡Den e gebroiki kefalek moi wrokosani fu horibaka gi Bijbel leri! Den tentoonstelling èn den syatu video di leri den fisitiman wan sani, yepi den fisitiman fu frustan fa sten e poti na tapu cassette èn fa den video e meki. Den ben leri wan sani fu a kefalek finifini ondrosuku di den brada e du fu sreka den attribuut èn den krosi di den e gebroiki. Den ben si fa den decor ben meki nanga pikinso moni nomo, ala di den ben poti prakseri na ala pikinpikin sani. Den ben si fa den brada e gebroiki poku fu meki sma firi taki den de trutru na ini a situwâsi di den e si. Fu sensi 1990 a Genootschap meki tin video na ini 41 tongo, di ben poti krakti na tapu difrenti Bijbel thema, èn so srefi tra video gi den wan di e gebroiki na Amerkan Gebarentaal.

Furu sma di ben teki wan koiri fu luku a presi ben go na a Wrokopresi pe den e meki fowtow, a Teken-en Ontwerpstudio, na Informatiedienst di e leri èn e yepi sma fu wroko nanga wan computer, a Dienstafdeling di e hori ai na tapu a wroko fu den 11.242 gemeente èn den 572 opziener di e reis, èn a pisi fu a Schrijversafdeling pe den e gi piki na tapu brifi èn pe den luku so wan 14.000 aksi ibri yari. Den fisitiman ben lobi na ondrosuku di den brada e du bifo den e seni den brifi gowe èn a trutru belangstelling di den brada abi gi den wan di abi aksi èn di e sori taki den e pruberi fu kakafutu gi seryusu problema.

Doronomo den sma ben teki koiri fu luku a Vertaalservice. Den ben fruwondru fu kon sabi taki na ini den feifi yari di pasa, a Genootschap vertaal Bijbel publikâsi na ini ete 102 tongo boiti den tongo di den ben vertaal kaba. Na heri grontapu, so wan 80 procent fu den Kotoigi fu Yehovah e leisi den publikâsi fu a Genootschap na ini wan tra tongo boiti Ingrisitongo. Fu sorgu gi den sani di den Kotoigi abi fanowdu, moro leki 1700 friwani wrokoman na ini 100 kondre e du vertaalwroko. Tentoonstelling ben sori A Waktitoren na ini den tongo fu Noord-Amerika nanga Zuid-Amerika, Europa, Asia, nanga Afrika. Den fisitiman ben kan si a Nieuwe-Wereldvertaling (Nyun-Grontapu Vertaling) fu Bijbel na ini 31 tongo di tyari kon na doro kaba. Den ben kon sabi tu taki den Waktitoren publikâsi de fu kisi now na ini 332 tongo èn taki a brochure San Gado e aksi foe wi? tyari kon na doro na ini 219 fu den tongo disi.

Den fisitiman di ben go na a Juridische Afdeling ben si den difrenti kontren pe prakseri musu poti nanga yepi fu wet, na heri grontapu. Na ini wan video den ben si wan trutru krutu-afersi pe wan afkati di de wan Kotoigi ben taki fu wan tori di abi fu du nanga brudu transfusie. Den ben kon sabi tu san den brada e du fu sorgu taki a wroko fu preiki a bun nyunsu na publiki kan tan go doro (Filipisma 1:7). Den ben poti prakseri tu na a bosroiti di a krutubangi fu lanti ben teki na ini maart fu a yari disi, taki a birti fu Oradell, na ini New Jersey, Amerkankondre, musu kenki den wet fu en so taki den Kotoigi fu Yehovah no abi primisi noso wan karta fanowdu moro na ini a publiki diniwroko di den e du oso fu oso na ini a birti dati.

Dati no ben de ala sani kwetikweti di den fisitiman ben si. Den ben ondrosuku bow tentoonstelling na ini a Wrokopresi pe den e meki pisi fu den gebow na fesi, èn den ben teki koiri fu luku a sistema di e krin Dotiwatra, a Centrale gi stroom, a presi pe den e krin a watra, èn den furu tra wrokopresi pe den e repareer sani, èn tra sani moro. A ben de wan tumusi spesrutu okasi.

Na Inwijding Programa E Sori O Prenspari a Leri De Di Gado E Gi

A trutru inwijding programa ben hori na tapu dridewroko, 19 mei, èn a ben bigin fo yuru bakadina. Den 6929 sma di ben de nanga prisiri, ben de den sma di e wroko na a edekantoro, den fisitiman fu a Genootschap, nanga 372 sma di ben kon makandra na a Kanada bijkantoro di ben man arki a programa tu nanga yepi fu telefon sistema.

A publiki ben breiti trutru fu yere den switi wortu di brada Milton G. Henschel, a presidenti fu a Waktitoren Genootschap ben taki fu bari den wan switikon. Baka dati, Theodore Jaracz, wan memre fu a Tiri Skin èn a fesiman fu na okasi, ben kari William Malenfant kon. Di a ben pristeri a lezing „Den Heimarki fu a Bow Programa”, dan a ben interview dri brada di ben abi a prenspari frantwortu fu meki bowtekening, èn fu bow a Waktitoren Skoro Centrum. Na ini den interview den ben taki dati na ini den yari di den ben e bow trutru, moro leki 8700 pisiten wrokoman ben kon nanga den eigi moni fu du a bow-wroko. ¡Dati ben de wan moi buweisi fu a wánfasi èn a lobi di den sma disi lobi fu gi, fu di Gado leri den!

Baka dati, wan symposium ben de di ben nen „Leri fu Gado Di E Gi na Heri Grontapu”. Fo memre fu a Tiri Skin ben hori en. John E. Barr ben sori krin taki a leri fu Gado e kon fu a Wortu fu Gado, Bijbel, di e gi Kresten deki-ati fu „tan tyari froktu ini ibri bun wroko èn e tan gro ini a soifri sabi fu Gado” (Kolosesma 1:10). Daniel Sydlik ben taki fa a leri fu Gado orga na wan theokrasia fasi, fu na ede fu a Kresten gemeente, Yesus Krestes, te na ibri memre fu a bradafasi na heri grontapu (1 Korentesma 12:12-27). Den lasti tu pisi fu a symposium, di Gerrit Lösch nanga Carey Barber ben hori, ben sori fa a leri fu Gado e meki den bedinari kon de bekwaam fu miti sma na ala presi èn fu leri den so taki den tu kan waka a pasi fu Gado.—Yesaya 2:1-4; 2 Korentesma 3:5.

Fu meki den arkiman sabi den difrenti skoro di e hori na a skoro centrum disi, dan den ben hori interview nanga takimakandra nanga den leriman fu den skoro disi èn nanga tra sma di abi fu du nanga den skoro disi. Den ben sori san ibri skoro e du so taki a leri fu Gado kan gi na heri grontapu. Den ben sori taki a Gileadskoro e poti prakseri na a studeri di den studenti musu studeri ibri buku fu Bijbel, a disiten historia fu a pipel fu Yehovah, èn a e sreka den gi a zendingwroko. A bijkantoro skoro na wan kefalek moi èn finifini studie fu den furu kontren di abi fu du nanga a wroko di den memre fu den Bijkantoro Komte e du. A Skoro gi den Opziener Di E Reis no de soso fu sorgu gi den sani di den abi fanowdu, ma so srefi fu sreka den fu man gi a yepi na yeye fasi di sa abi wini spesrutu gi den gemeente.

Na a kaba fu a moi programa, Lloyd Barry fu a Tiri Skin ben gi na inwijding lezing di e taki fu a thema „Bow Nanga a Gran Kriaman fu Wi”. A ben sori taki a Kriaman, Yehovah, e prisiri nanga ala den sani di a kria èn a e aksi wi fu prisiri nanga en (Yesaya 65:18). Fu di a de so taki „a sma di meki ala sani, na Gado”, meki ala grani gi a heri bow-wroko disi musu go na Yehovah Gado (Hebrewsma 3:4). Baka di a takiman ben taki den sani disi, dan a ben taki wan opregti begi, fu gi a Waktitoren Skoro Centrum abra na Yehovah, a Gran Kriaman fu wi.a

A de seiker taki a heri wiki disi fu a fesa sa de wan sani di den fisitiman sa memre langa ten ete. Fu san ede yu no e luku efu yu kan go fisiti a Waktitoren Skoro Centrum? Wi de seiker taki te yu e fisiti èn koiri kon luku den, dan a sa de wan deki-ati gi yu te yu e du muiti fu leri moro fu wi lobi-ati Kriaman èn te yu e libi akruderi den regtfardiki markitiki fu en.

[Futuwortu]

[Prenki na tapu bladzijde 10]

Wan stampu zaal nanga wan nyanyan kamra di span nanga arkiman

[Prenki na tapu bladzijde 10]

A ben de wan tumusi prisiri sani fu man teki wan koiri fu luku a presi