Fu San Ede Yu E Dini Gado?
Wan kownu di ben abi frede gi Gado ben gi a manpikin fu en a rai disi wan leisi: „Sabi a Gado fu yu tata èn dini en nanga yu heri ati èn nanga wan prisiri sili” (1 Kroniki 28:9). A de krin, taki Yehovah wani den futuboi fu en dini en nanga ati di de nanga tangi èn di abi warderi.
LEKI Kotoigi fu Yehovah, wi e erken wantewante taki a fosi leisi di wi kon frustan den Bijbel pramisi, dan wi ati ben furu nanga tangi srefisrefi. Ibri dei wi ben leri wan tra sani di ben abi fu du nanga den prakseri fu Gado. O moro wi ben leri fu Yehovah, o moro wi ben wani fu dini en „nanga [wi] heri ati èn nanga wan prisiri sili”.
Furu sma di e tron Yehovah Kotoigi, e go doro fu dini Yehovah nanga bun furu prisiri den heri libi langa. Ma son Kresten di e bigin bun, baka wan pisi ten e frigiti den bun reide di e meki taki wi wani dini Gado. A sani dati pasa nanga yu? Efu a de so, no lasi-ati. Sma kan feni a prisiri baka di den ben lasi. Fa den kan du dati?
Poti Prakseri na den Blesi Di Yu Kisi
Na a fosi presi, denki dipi fu den blesi di Gado e gi yu ala dei. Prakseri den bun sani di Yehovah e gi yu: den furu wondrusani di a meki — di ala sma kan gebroiki awansi sortu posisi den abi na ini a libimakandra noso awansi den gudu efu no — nyanyan nanga dringi di a poti na grontapu gi wi, a bun gosontu di yu abi, a sabi di yu abi fu a Bijbel waarheid, èn a moro prenspari sani, a presenti fu en Manpikin. Na fu di Gado en Manpikin dede, meki yu kan dini Gado nanga wan krin konsensi (Yohanes 3:16; Yakobus 1:17). O moro yu e denki dipi fu a bunfasi fu Gado, o moro a warderi di yu abi gi en sa gro. Dan, yu ati sa buweigi yu fu dini en, fu di yu de nanga tangi fu ala den sani di a du. A de seiker taki yu sa bigin firi a srefi fasi baka neleki a psalm skrifiman di ben skrifi: „Furu sani yusrefi du, O Yehovah, mi Gado, srefi den tumusi moi wroko fu yu èn den prakseri fu yu gi wi; No wan sma no de di kan gersi yu. . . . Den tron kefalek furu, moro leki mi man fruteri.”—Psalm 40:5.
Na David ben skrifi den wortu disi, wan man di ensrefi ben abi furu problema ini en libi. Leki wan yonkuman, David ben libi wan heri pisi ten leki wan loweman fu di a godelowsu Kownu Saul, makandra nanga den waktiman fu en, ben suku fu kiri en (1 Samuèl 23:7, 8, 19-23). David ben abi swakifasi fu ensrefi tu di a ben musu kakafutu gi. A ben erken a sani disi na ini a di fu 40 Psalm: „Furu rampu ben lontu mi teleki mi no ben man teri den moro. Den sondu fu mi ben kon tron so furu taki mi no ben man si den moro; den ben kon tron moro furu leki den wiwiri na tapu mi ede” (Psalm 40:12). Iya, David ben abi problema, ma den no ben meki taki a ben lasi-ati dorodoro. A ben poti en prakseri na den fasi fa Yehovah ben e blesi en, ala di a ben abi problema, èn a ben feni taki den blesi ben bigi furutron moro leki den problema fu en.
Te problema noso den swakifasi fu yu di e meki yu firi taki yu no man du noti bun, e dangra yu, dan a bun fu teki ten fu poti prakseri na den blesi di yu kisi, soleki fa David ben du dati. A de seiker taki a warderi di yu ben abi gi den blesi dati buweigi yu fu gi yusrefi abra na Yehovah; den prakseri dati kan yepi yu tu fu kisi a prisiri baka di yu ben lasi èn a sa yepi yu fu dini Gado nanga wan ati di abi warderi.
Gemeente Konmakandra Kan Yepi
Boiti taki wisrefi e denki dipi fu a bunfasi fu Yehovah, a de fanowdu tu fu abi demakandra nanga tra kresten. Wi e kisi deki-ati te wi e miti doronomo nanga man, uma, èn so srefi yongu sma di lobi Gado èn di abi a fasti bosroiti fu dini en. Na eksempre fu den kan buweigi wi fu du diniwroko gi Yehovah nanga wi heri sili. Wi fu wi sei kan gi den deki-ati tu fu di wi de na a Kownukondre zaal.
A tru taki te wi doro oso baka di wi wroko tranga wan heri dei noso te wi e firi brokosaka fu wan problema noso wan swakifasi ede, dan kande wi no sa wani go na a konmakandra na a Kownukondre zaal. Te dati de so, dan kande wi no musu meki spotu nanga wisrefi, ma taki wi musu ’fon wi skin’, fu taki en so, so taki wi sa gi yesi na a komando fu kon makandra nanga tra kresten.—1 Korentesma 9:26, 27; Hebrewsma 10:23-25.
Efu dati e kon de fanowdu, a de so dan taki wi musu denki taki wi no lobi Yehovah trutru? Kwetikweti. Lepi Kresten fu a ten di pasa di ben lobi Gado trutru, ben musu du tranga muiti fu du a wani fu Gado (Lukas 13:24). Na apostel Paulus ben de wan fu den Kresten dati. A ben taki krinkrin fa a ben firi na a fasi disi: „Mi sabi taki na ini mi, dati wani taki, na ini mi skin, no wan sani no de di bun; bika a man di mi man winsi de na ini mi, ma a man di mi man du sani bun no de na ini mi. Bika a bun di mi wani du, mi no e du, ma na ogri di mi no wani du, na dati mi e du” (Romesma 7:18, 19). Èn a ben taigi den Korentesma: „Now, efu mi e meki a bun nyunsu bekènti, dan dati a no wan reide gi mi fu dyaf, bika a fruplekti poti na mi tapu. . . . Efu mi e du disi nanga prisiri, dan mi sa kisi pai, ma efu mi e du en sondro taki mi wani, toku wan frantwortu de na mi tapu.”—1 Korentesma 9:16, 17.
Neleki furu fu wi, Paulus ben abi sondu firi di ben tapu a wani di a ben wani fu du san bun. Ma a ben feti wan tranga feti fu kakafutu gi den firi dati, èn furu leisi a ben abi bun bakapisi. A no de fu taki, dati Paulus no ben man du dati nanga en eigi krakti. A ben skrifi: „Gi ala sani mi abi a tranga fu en di e gi mi krakti” (Filipisma 4:13). Yehovah, a sma di ben gi Paulus krakti, sa gi yu krakti tu fu du san bun efu yu aksi en fu yepi yu (Filipisma 4:6, 7). Fu dati ede „feti wan tranga feti gi a bribi”, èn Yehovah sa blesi yu.—Yudas 3.
Yu no abi fu feti a feti disi yu wawan. Na ini den gemeente fu Yehovah Kotoigi, lepi Kresten owruman, di densrefi e horidoro na ini „a feti gi a bribi”, de klariklari fu yepi yu. Efu yu go aksi wan owruman fu yepi yu, dan a sa du muiti fu „taki [nanga yu] fu gi [yu] trowstu” (1 Tesalonikasma 5:14). A sa abi leki marki fu de „leki wan kibripresi gi a winti èn wan kibripresi gi a sibibusi”.—Yesaya 32:2.
„Gado na lobi”, èn a wani taki den futuboi fu en e dini en fu di den lobi en (1 Yohanes 4:8). Efu a lobi di yu abi gi Yehovah musu wiki baka, dan soleki fa a skrifi na tapusei, du san de fanowdu so taki dati kan pasa. Yu sa breiti taki yu du dati.