Fu San Ede Wi Musu Kweki Bunfasi?

WAN mansma fu Yapan ben pasa 40 yari kaba. A nen Kunihito, èn a froisi go na Amerkankondre no so langa pasa.a Wan tu wiki di a doro drape, wan sani ben pasa di ben kan pori en heri wroko. Kunihito e fruteri: „Di a basi fu mi ben aksi mi efu mi ben o man du wan tra frantwortu wroko, dan mi ben de seiker taki mi ben o man du dati. Toku, fu di mi ben leri fu si bescheidenfasi leki wan bun sani, meki mi ben piki: ’Mi no sabi efu mi o man du en, ma mi o du ala sani mi man fu du en bun.’ Nanga disi, na Amerkan basi fu mi ben denki taki mi no ben man du a wroko èn taki mi no ben de seiker efu mi o man du a wroko. Di mi ben kon sabi dati, dan mi ben kon si taki mi ben musu kenki pikinso.”

Wan uma di nen Maria, di e libi na ini a foto New York, ben de wan bun studenti di studeri na wan hei skoro, èn ala ten a ben wani yepi den tra studenti di ben sidon na ini a srefi klas fu en. Juan ben de wan kompestudenti di wanwan leisi ben aksi Maria fu yepi en. Ma Juan ben lobi Maria tu èn a ben pruberi fu prei kefalek gi Maria. Ala di Maria ben wani hori ensrefi fu tan krin na a sei fu bun gwenti nanga gronprakseri, toku a ben fadon gi Juan èn a go du hurudu.

A de wan tyalensi trutru fu sori bunfasi na ini a grontapu fu disiten pe so furu difrenti kulturu de, èn pe sma no e hori densrefi na bun gwenti nanga gronprakseri. So bun fu san ede wi musu kweki bunfasi? Bika bunfasi na wan sani di e plisi Gado, èn furu fu wi wani taki Gado feni wi bun.

Gado en Wortu, Bijbel, e frumane den leisiman fu en fu kweki bunfasi. Fu eksempre, na apostel Paulus e skrifi: „Sortu bunfasi de tu èn sortu sani [de tu di] musu kisi prèise, tan prakseri den sani disi” (Filipisma 4:8). Èn na apostel Petrus ben tranga wi fu ’du seryusu muiti fu moksi na wi bribi, bunfasi’ (2 Petrus 1:5). Ma san na bunfasi? Wi kan leri disi na skoro? Fa wi kan kweki disi?

[Futuwortu]