Kownukondre Preikiman E Fruteri

India—„Wánfasi De, Awansi Sma E Difrenti fu Makandra”

„WÁNFASI de, awansi sma e difrenti fu makandra”, na pôpi wortu di sma gwenti fu taki èn di e sori taki sma fu difrenti ras nanga kulturu moksi nanga makandra na India. A no makriki srefisrefi fu tyari wánfasi kon na ini a bigi kondre disi pe den abi someni difrenti kulturu, tongo, bribi, ras, nanga someni sortu fasi fu weri krosi, èn someni difrenti nyanyan. Ma a wánfasi disi de fu si na mindri den sma di e wroko na a kantoro fu pe den e tiri a wroko fu Yehovah Kotoigi na India. Ala di den friwani-wrokoman di e tan drape èn e wroko drape tu, e kon fu someni distrikt nanga kontren èn e taki someni difrenti tongo, toku den de na ini wánfasi.

• Meki wi kon sabi Rajrani — wan yongu uma fu a presi Punyab, di de te na a noord-westsei uku fu India. Di Rajrani ben de na skoro ete, dan wan fu den skoromati fu en ben bigin studeri Bijbel nanga Yehovah Kotoigi. A yongu meisje disi ben pruberi fu meki Rajrani wani sabi moro fu Bijbel. A skoromati no ben man taki na Ingrisitongo bun, èn A Waktitoren no ben de na ini a tongo Punyabi ete. Dati meki a aksi Rajrani fu yepi en. A ben aksi Rajrani fu fruteri en na ini a tongo Punyabi san skrifi na ini a tijdschrift. Den sani di Rajrani ben leisi na ini A Waktitoren ben bigin abi so furu krakti na en tapu taki awinsi a papa nanga mama fu en ben gens en, toku a ben go na fesi te a gi en libi abra na Yehovah Gado. Now a e dini na a Bethel na India èn a e du a srefi sani di ben opo en ai gi a waarheid. A e vertaal Kresten publikâsi na ini a tongo Punyabi!

• Meki wi poti prakseri now na Bijoe, di kon fu wan tra presi fu India — a distrikt Kerala na a zuid-westsei fu a kondre. Den ben puru Bijoe fu a middelbaar skoro, fu di a no ben wani abi noti fu du nanga seremonia di sma e hori fu gi grani na den eigi kondre bika den firi taki a moro bun leki tra kondre. Wan langa krutu afersi ben hori. A bakapisi ben de taki soifri anbegi ben wini ini na afersi dati, èn dati ben de wan heimarki gi a soifri anbegi. Baka dati, Bijoe ben go na skoro baka.a A ben go na hei skoro tu. Ma den sma na a hei skoro dati no ben tyari densrefi akruderi bun gwenti nanga gronprakseri èn Bijoe en konsensi ben bigin trobi en. Fu dati ede a gowe libi a skoro na ini a fosi pisi fu a skoroyari. Now baka tin yari na Bethel, a feni taki leki wan memre fu wan Bethelfamiri pe ala sortu sma e wroko makandra na ini wánfasi, a kisi moro wini leki te a ben sa go doro fu kisi moro skoroleri.

• Norma èn so srefi Lily abi 70 yari èn den de weduwe furu yari kaba. Ibriwan fu den de na ini a furuten diniwroko moro leki 40 yari kaba. Lily e wroko na a bijkantoro so wan 20 yari kaba leki wan vertaler fu a tongo Tamil. Norma kon na Bethel 13 yari pasa, baka di a lasi en masra na ini dede. Den de tumusi bun eksempre gi a heri Bethelfamiri, fu di den de fayafaya wrokoman èn den de seryusu te den e du a wroko fu den. Boiti dati, den sisa disi e yepi fu tyari wánfasi kon na ini a heri Bethelfamiri. Den lobi fu ontfanga sma na den tanpresi, èn den e prisiri fu taki nanga yongu memre fu a famiri. Na den okasi disi den e fruteri den fu den prisiri sani di den ondrofeni, fu di den tyari den libi na wan bun fasi leki Kresten furu yari kaba. Den yonguwan fu den sei, e aksi den fu kon na den kamra fu den fu abi prisiri demakandra, èn den e yepi den tu te dati de fanowdu. Den de tumusi bun eksempre fu tru!

Someni trobi nanga pratifasi de na furu presi, fu di sma e difrenti fu makandra. Ma fu di den friwani-wrokoman disi ben kakafutu gi den difrenti dati kaba, dati meki den de koloku te den e wroko makandra, èn e dini trawan leki memre fu a Bethelfamiri na India di de na ini wánfasi nanga makandra.—Psalm 133:1.

[Futuwortu]

[Sma di abi a reti fu a prenki na tapu bladzijde 8]

A prenki na bakasei: Mountain High Maps® Copyright © 1997 Digital Wisdom, Inc.