Fu san ede?—’Gado, fu san ede yu gi pasi meki a sani disi pasa?’

RICARDO sabi ete fa a ben e sidon nanga en wefi e wakti na ini a kamra fu a datra.a Nowan fu den tu ben abi deki-ati fu leisi san den nyun ondrosuku ben tyari kon na krin fu a gosontu fu Maria. Baka wan pisi ten, Ricardo opo na envelop, èn esi-esi den luku san ben skrifi na tapu a papira. Den leisi a wortu „kanker”, èn den ala tu bigin krei fu di den ben frustan krinkrin san a wortu dati ben wani taki.

„A datra ben abi switifasi trutru”, na so Ricardo e memre ete, „ma a ben frustan krinkrin o seryusu a siki fu mi wefi ben de, fu di a ben e taigi wi doronomo taki wi ben musu frutrow tapu Gado.”

Bifo den bigin yepi Maria, dan a datra kon si taki Maria no ben man buweigi a reti futu fu en soleki fa a ben wani. Wan tu tra ondrosuku ben sori taki a kanker ben panya go te na ini en edetonton. Maria ben e kisi datrayepi wán wiki nomo, ne datra kon si taki den no ben kan du noti moro gi en. Maria go ini coma (a no ben man wiki moro), èn tu wiki baka dati a dede. „Mi ben breiti taki a no ben e pina moro”, na so Ricardo e fruteri, „ma mi ben e misi en so te taki misrefi ben wani dede tu. Furu tron mi ben e krei e aksi Gado: ’Fu san ede yu gi pasi meki a sani disi pasa?’”

Te rampu e miti sma, dan wan lo aksi e opo kon

Neleki Ricardo, bun furu sma na heri grontapu e nyan pina, èn den no man du noti fu wai pasi gi dati. Furu tron, den sma di e kisi mankeri noso e dede na ini orloku, na den sma di no abi noti fu du nanga na orloku. Prakseri a bigi sari di libisma e kisi leki bakapisi fu ogri-ati feti di e feti doronomo. Noso prakseri den someni sma di e sari fu di trawan ben abi seks nanga den nanga tranga, noso fu di sma meshandri den di den ben pikin. Prakseri sosrefi den sma di e sari fu di sma na ini na osofamiri e feti nanga den, èn sosrefi den tra takru sani di libisma e du. Na ini den hondrohondro yari di pasa, man nanga uma du makandra bun furu ogri, èn den gi makandra bun furu sari sosrefi (Preikiman 4:1-3). Boiti dati, yu abi sma tu di e pina fu di rampu miti den, noso fu di den brokosaka tumusi, fu di den e siki na den frustan, noso fu di den skin e siki. A no de fu fruwondru taki furu sma e aksi: „Fu san ede Gado gi pasi taki sma e pina so?”

Srefi gi den sma di abi wan bribi, a no de wan makriki sani fu ondrofeni pina. Kande yusrefi wani sabi fu san ede wan lobi-ati Gado di abi ala makti, ben sa gi pasi taki libisma e pina. A de tumusi prenspari taki wi e kisi wan bun piki tapu a dangra aksi disi, èn taki wi e kon sabi krin san tru. Dati sa meki wi firi korostu, èn wi sa man abi wan bun banti nanga Gado. Bijbel e gi wi a piki dati. Grantangi luku san Bijbel e taki, soleki fa na artikel di e kon e tyari dati kon na fesi.

[Futuwortu]

[Prenki na tapu bladzijde 3]

A datra ben e taigi wi doronomo taki wi ben musu frutrow tapu Gado