So foeroe pina

„FOE SAN EDE someni kefalek pina de gi aparti sma èn groepoe sma . . . ? Gado ben sa moesoe de a sma di e gi ala sani wan marki, ma tokoe so foeroe sani de di de foe soso na ini a grontapoe disi, so foeroe pina sondro wan marki èn so foeroe don sondoe di no de fanowdoe. A Gado disi na kande san Nietzsche ben kroetoe en foe de: wan ogri tiriman, bedrigiman, koriman, kiriman?” — On Being a Christian foe Hans Küng.

Joe kan si taki a Katolik theoloog Hans Küng e kari nomo wan problema di e broeja foeroe sma — foe san ede wan lobi Gado di abi ala makti, e gi pasi taki so foeroe pina de? Joe no jere sma aksi so wan sani? Ibri sma di abi sari-ati e sari foe san Küng e kari „wan bigi kriki di no e kaba lon nanga broedoe, sweti nanga watra-ai, pen, sari nanga frede, a firi di sma abi taki den de den wawan, nanga dede”. Foe taki en leti, a de moro leki wan bigi kriki, a de wan froedoe foe kefalek takroe sani èn hebi pina di pori a libi foe miljoenmiljoen sma na ini a heri historia. — Job 14:1.

Foeroe nanga „broko-ede nanga sani di e hati sma”

Prakseri a pina di feti e tjari kon, no wawan a pen foe den sma di e pina èn e dede na a momenti dati, ma so srefi foe den wan di tan abra èn e sari, soleki den papa nanga mama èn den famiriman foe pikin di dede èn tra sma di sma doe kefalek ogri. No so langa pasa, a Rode Kruis ben taki dati „na ini den lasti 10 jari di pasa, 1,5 miljoen pikin dede na ini feti”. Na Rwanda na ini 1994, a Rode Kruis froeteri taki „sma kiri hondrohondro doesoen man, oema nanga pikin-nengre na wan kefalek ogri fasi èn na wan orga fasi”.

Wi no moesoe frigiti so srefi a pen di e kon foe a takroe libi foe sma di e gebroiki pikin-nengre foe abi seks nanga den. Wan mama di e sari èn di ben taki dati en manpikin ben kiri ensrefi baka di wan sma di e sorgoe jongoe pikin ben mesbroiki en na seks sei, ben taki: „A man di ben mesbroiki mi manpikin na seks sei . . . pori en nanga wan toe tra boi na a moro kefalek morsoe orga fasi di oiti wan sma ben sa kan prakseri.” Èn prakseri so srefi foe a takroe pen di den sma ben firi foe kiriman di no abi firi srefisrefi di e kiri foeroe sma, soleki den sma di den ben kisi hori na Ingrisikondre èn di „ben tjari sma gowe, ben abi seks nanga den nanga tranga, ben gi den kefalek foeroe skin-ati èn ben kiri den, 25 jari langa sondro taki den ben kisi strafoe gi dati”. Na ini a heri historia a gersi taki wan kaba no de na a ogri di mansma nanga oemasma doe makandra nanga pen èn pina. — Preikiman 4:1-3.

Èn moro fara, joe abi a pina di e kon foe siki na emotioneel sei èn na skin sei èn a kefalek pen di e kon foe a sari di famiri e sari te den lobiwan foe den e dede toemoesi froekoe. Èn so srefi a hebi pen di sma e firi foe angriten noso tra so-kari natoeroe rampoe. Foeroe sma no sa strei nanga a froeklari foe Moses taki den 70 noso 80 jari foe wi, foeroe nanga „broko-ede nanga sani di e hati sma”. — Psalm 90:10.

A de wan pisi foe a prakseri foe Gado?

A kan de taki, soleki fa son sma froeklari, taki a doronomo pina disi na wan pisi foe wan prakseri foe Gado di wi no man froestan? A de fanowdoe taki wi moesoe pina now foe man froestan a libi ’na ini a tra grontapoe’? A troe, soleki fa a Fransi filosoof Teilhard de Chardin ben bribi, taki a „pina di e kiri èn e broko a libisma famiri, de fanowdoe gi a libisma so taki a kan libi èn kan tron wan jeje”? (The Religion of Teilhard de Chardin; na wi skrifi den wortoe skoinsi.) Kwetikweti!

Wan mekiman di e hori sma na prakseri, foe espresi ben sa meki wan kontren di kan kiri sma èn froeklari dan taki a abi sari-ati te a ben fri den foe den bakapisi foe dati? Kwetikweti! Foe san ede wan lobi-ati Gado ben sa doe so wan sani? So boen, foe san ede Gado e gi pasi taki pina de? Oiti wan kaba sa kon na pina? A tra artikel sa taki foe den aksi disi?

[Sma di abi a reti foe a prenki na tapoe bladzijde 3]

WHO fowtow foe P. Almasy