Tatianus​—Wan trutru bribiman noso wan sma di suku fu drai kerkileri?

NA A kaba fu a di fu dri preikiwaka fu na apostel Paulus, dan a ben kon makandra nanga den owruman fu a gemeente Efeise. A ben taigi den: „Mi sabi taki baka te mi gowe, dan wolfu di e kwinsi sma sa boro kon na un mindri èn den no sa handri na ipi na wan safu fasi, èn na un mindri man sa opo kon di e taki kruktu sani fu hari den disipel kon na den baka.”​—Tori fu den Apostel 20:29, 30.

Te yu luku en bun, dan a di fu tu yarihondro G.T. ben de wan ten fu bigi kenki, soifri leki fa Paulus ben taki na fesi. Dati ben de a pisi ten di sma fadon komoto na bribi soleki fa Paulus ben taki. Na a ten dati a Gnostik bribi ben e gro srefisrefi. A bribi dati ben de wan pôpi fasi fu anbegi di ben moksi nanga filosofia èn di ben e pori a bribi fu son bribiman. Den Gnostiksma ben e bribi taki ala sani di abi fu du nanga yeye, na bun sani, ma taki ala sani di abi fu du nanga sani di sma kan si, fasi, noso firi, na takru sani. Fu di den ben feni taki ala sani di abi wan skin, na takru sani, meki den ben e taki dati trow na wan takru sani, èn taki a no ben bun fu meki pikin. Den ben feni taki den sani disi komoto fu Satan. Den ben e bribi taki ibriwan sma abi wan yeye na ini en skin èn taki a yeye dati na a wán-enkri bun na ini wan sma. Fu dati ede sonwan fu den sma disi ben e feni taki a no abi trobi san wan sma e du nanga en skin. Den sortu denki disi ben meki taki sma go libi ala sortu fromu libi. Son leisi den ben e pina densrefi tumusi, tra leisi baka den ben e gi densrefi abra na den lostu fu den skin. Den Gnostiksma ben e taki dati a wán-enkri fasi fa wan sma ben kan kisi frulusu ben de nanga yepi fu a gnostik bribi di ben lai kibritori, noso nanga yepi fu a sabi di wan sma sabi ensrefi bun. A bribi disi no ben gi sma deki-ati kwetikweti fu kon sabi den tru tori fu Gado Wortu.

San sma di ben e taki dati den na Kresten ben du di a gnostik bribi ben de fu pori a bribi fu den? Son koniman ben sori krin taki den no ben e agri nanga a leri fu a Gnostik bribi, aladi trawan ben e brokokindi gi a falsi leri dati. Irene-us na wan fu den man di kakafutu gi den sortu falsi leri disi, en heri libi langa. A ben kisi leri fu Polikarpus, wan man di ben libi na a srefi ten leki den apostel. Polikarpus ben taigi Irene-us fu hori ensrefi soifri na den leri fu Yesus Krestes nanga den apostel fu en. Irene-us ben abi wan mati Florinus èn den ala tu ben kisi leri fu Polikarpus. Toku Florinus ben bigin anga go na a sei fu den leri fu Valentinus, a moro barinen fesiman fu den sma fu a gnostik bribi. A pisi ten dati ben de wan bruya ten trutru.

Tatianus ben de wan prenspari skrifiman fu a di fu tu yarihondro. Den sani di a man disi skrifi fu a pisi ten dati e yepi wi pikinso fu kon frustan san sma ben e bribi. Suma ben de Tatianus? Fa a ben du tron wan sma di ben e kari ensrefi wan Kresten? Fa Tatianus tyari ensrefi na a pisi ten di a Gnostik bribi ben abi furu krakti tapu sma? Sma di e suku waarheid noyaso kan leri furu fu den moi piki di ensrefi e gi èn fu na eksempre fu en.

A ben leisi „wan tu buku fu trakondre sma”

Tatianus ben gebore na ini Siria. Fu di a ben de wan man di ben lobi teki waka go na tra presi èn fu di a ben gwenti leisi furu, meki a ben kon sabi a kulturu fu den Romesma nanga den Grikisma fu a ten dati. Tatianus ben go na Rome leki wan takiman di e go na difrenti presi fu hori lezing. Ma di a ben de na Rome, dan a Kresten bribi hari en prakseri. A ben bigin abi demakandra nanga Justinus Martyr. Kande a ben tron en studenti srefi.

Tatianus ben skrifi fu a fasi fa a teki a Kresten bribi na ini a ten dati. A ben fruklari: „Mi ben wani kon sabi fa mi ben kan feni a waarheid.” Dan a e taki san a ondrofeni di a kisi na okasi fu leisi den Buku fu Bijbel. A e taki: „A ben pasa so, taki mi kon si wan tu buku fu trakondre sma. Den buku disi ben owru tumusi fu sma teki den gersi nanga a denki fu den Grikisma, èn den ben kefalek tumusi fu sma teki den gersi nanga den soso sani di skrifi na ini den buku fu den Grikisma. Mi bigin poti bribi na ini den buku disi fu di san skrifi na den ini, na krin-taki. Den skrifiman na opregtisma èn den buku disi e taki na fesi fu sani di musu pasa na ini a tamara. Mi poti bribi na ini den buku disi sosrefi fu di den abi tumusi bun gronprakseri na ini, èn fu di den e fruklari taki wán Sma nomo e tiri ala sani na ini hemel nanga grontapu.”

Tatianus no ben draidrai fu gi den sma fu en ten a deki-ati fu ondrosuku a Kresten bribi fu a ten dati. A ben wani den fu kon si taki a Kresten bribi ben de makriki èn krin fu frustan, èn taki a ben de trafasi leki den fromu leri fu den heiden. San wi kan leri fu den sani di a skrifi?

San den sani di Tatianus skrifi e sori wi?

Den sani di Tatianus skrifi e tyari kon na krin taki a ben de wan trutru bribiman, wan man di ben e opo taki gi a bribi fu en. A ben e krutu den filosofia fu den heiden na wan tumusi hebi fasi. Na ini a buku fu en di nen Address to the Greeks (Wan boskopu gi den Grikisma), Tatianus e poti krakti na tapu taki a heiden bribi na wan soso sani, èn taki a Kresten bribi di en ben sabi, ben de soifri. Sondro fu kibri wan sani, a fruteri fa a ben e tegu fu den gwenti fu den Grikisma. Luku leki eksempre san a e taki fu a filosofiaman Herakleitus. A e taki: „A dede fu a man disi e sori krin taki a ben e siki na en ede; a man disi ben de wan sma di ben kisi leri fu man dresi sma, wan sma di ben sabi filosofia, ma di a ben kisi wan siki pe en skin bigin sweri, dan a go teki kaw pupe poti na en heri skin. Di a pupe kon drei, a buba fu en heri skin bigin krempi, na so fasi a drei pupe hari en skin priti, so taki a dede te fu kaba.”

Tatianus ben e bribi tranga taki wán Gado nomo de, namku a Mekiman fu ala sani (Hebrewsma 3:4). Na ini a buku Address to the Greeks, a e sori taki Gado na „wan Yeye” èn a e taki: „En na a wán-enkri sma di no abi bigin, aladi Ensrefi na a bigin fu ala sani” (Yohanes 4:24; 1 Timoteyus 1:17). Fu di Tatianus ben e krutu a gwenti di sma ben abi fu gebroiki popki na ini na anbegi fu den, meki a skrifi: „Fa mi kan taki dati udu nanga ston na gado?” (1 Korentesma 10:14) A ben e bribi taki a Wortu, noso a Logos, ben de a fosi geborewan fu ala den sani di a Tata meki na ini hemel, èn taki bakaten a Tata gebroiki a manpikin disi fu meki ala den tra sani di de lontu wi (Yohanes 1:1-3; Kolosesma 1:13-17). Tatianus ben poti prakseri tu na a opobaka di o pasa na a fasti ten, èn a taki: „Wi e bribi taki baka te ala sani kon na wan kaba, dan den dedeskin sa kisi wan opobaka.” Di Tatianus fruteri fu san ede wi e dede, dan a skrifi: „Wi no ben meki fu dede, ma wi e dede fu wi eigi fowtu ede. A de a friwani fu wi di pori wi; fosi, wi ben de fri, ma now wi kon tron srafu fu di wi abi sondu.”

San Tatianus e taki fu a sili, bruyabruya pikinso. A e taki: „O un Grikisma, a no de so taki a sili na wan sani di no e dede, ma a sili e dede. Toku a de so taki a sili no abi fu dede. Efu a sili no sabi a waarheid, dan a e dede, èn a e pori gowe nanga a skin. Ma na a kaba fu grontapu a e opo baka nanga a skin, èn dan a no e dede moro fu di a e kisi krutu fu nyan pina fu têgo.” Wi no sabi soifri san Tatianus ben wani taki nanga a pisi tori disi. A kan taki a ben e hori ensrefi na wan tu fu den leri fu Bijbel, ma taki na a srefi ten a ben wani taki den sma fu en ten ben musu lobi en. A kan taki dati na fu san ede a moksi a leri fu Bijbel nanga wan tu heiden filosofia.

Ete wan tra buku di Tatianus skrifi na a Diatessaron (Den fo evangelie na ini wán). Tatianus ben de a fosi sma di meki taki den gemeente na ini Siria ben man leisi den Evangelie na ini den eigi tongo. Diatessaron ben de wan buku di sma ben e si leki wan prenspari sani fu di a ben e moksi den fo Evangelie kon na ini wán tori. A Diatessaron na a buku di a Kerki fu Siria ben e gebroiki.

A man disi ben de wan Kresten noso a ben de wan sma di ben e suku fu drai kerkileri?

Te wi teki ten fu ondrosuku den sani di Tatianus skrifi, dan wi e si taki a ben sabi den Buku fu Bijbel èn taki a ben abi bigi lespeki gi den. Luku san a e taki fu a krakti di den buku disi ben abi na en tapu: „Mi no e feti fu kon gudu; mi no wani tron srudati; mi e tegu gi hurudu; mi no wani tron wan botoman di e go na se fu di a gridi fu kisi furu gudu; . . . mi no e angri fu kisi barinen . . . A srefi son e skèin gi ala sma, èn den alamala e dede, awinsi den na gudusma noso den pôti.” Tatianus e gi sma a rai: „De wan dedesma ini tori di abi fu du nanga grontapu. Tan farawe fu a lawfasi fu grontapu. Libi gi Gado, èn du muiti fu kon frustan En moro bun, so taki yu kan poti na owru fasi fu libi, na wan sei.”​—Mateyus 5:45; 1 Korentesma 6:18; 1 Timoteyus 6:10.

Ma poti prakseri tu na a buku fu Tatianus di nen On Perfection According to the Doctrine of the Savior. Na ini a buku disi a e taki dati a trowlibi na wan seti fu Didibri. Tatianus taki dati a no bun kwetikweti fu trow fu di sma di e trow e tai densrefi na wan sani fu grontapu di o pori te fu kaba.

Leki fa a sori, dan wan pisi ten fu 166 G.T., baka di Justinus Martyr dede, a pasa so taki Tatianus ben seti na enkratik bribi, noso ben abi demakandra nanga sma fu a grupu dati. Den Enkratiksma ben e bribi taki a prenspari fu man dwengi yusrefi dorodoro èn fu man basi yu skin dorodoro tu. Den ben dwengi densrefi so te, taki den no ben e dringi win kwetikweti, den no ben e trow, èn den no ben wani abi gudu.

San wi kan leri fu a tori disi?

Fu san ede Tatianus drifi gowe so fara fu den Buku fu Bijbel? A de so taki a ben kon tron ’wan sma di frigiti san a ben yere’? (Yakobus 1:23-25) A de so taki Tatianus ben misi fu tapu en yesi gi falsi tori èn taki fu dati ede a brokokindi gi den filosofia fu libisma? (Kolosesma 2:8; 1 Timoteyus 4:7) Kande den fowtu di a ben e poti prakseri na tapu ben bigi so te, taki wan heri pisi ten a no ben sabi san a ben e du.

Awinsi fa a no fa, den sani di Tatianus skrifi èn sosrefi na eksempre fu en, e sori wi pikinso fa a ben de nanga na anbegi fu Gado na ini a ten di a man disi ben e libi. Den e sori taki den filosofia fu grontapu kan pori sma trutru. Meki a de so, fu dati ede, taki wi teki a rai fu na apostel Paulus fu drai wi baka gi den „soso takitaki di e pori santa sani èn gi leitori di den e kari ’sabi’”.​—1 Timoteyus 6:20.