Wi preiki na den bergi kontren fu Saba

WAN ten ben de di na èilanti Saba, di de ondro a tirimakti fu Bakrakondre, ben de wan kibripresi gi ogri-ati fufuruman di ben e waka nanga sipi na a Karibis Se, aladi den ben e suku pe den ben kan fufuru sani. A pikin èilanti disi de 240 kilometer go na a owstusei fu na èilanti Porto Riko, èn now a de a tanpresi fu sowan 1600 sma; feifi fu den na Yehovah Kotoigi. Ma den fayafaya preikiman disi e suku sani di warti moro leki den gudu fu trawan di den ogri-ati fufuruman ben wani fufuru. Den preikiman disi de fayafaya fu suku sma di „abi a yoisti denki fu man kisi têgo libi”​—Tori fu den Apostel 13:48.

A fosi leisi di a bun nyunsu fu Gado Kownukondre preiki na a èilanti disi, ben de 22 yuni 1952. Na a dei dati, Yehovah Kotoigi doro na a sesyoro fu Saba nanga wan sipi fu 18 meter, di nen Sibia (Mateyus 24:14). Den zendeling Gust Maki nanga Stanley Carter kren The Ladder, wan pasi fu ston di bow leki wan trapu di abi moro leki 500 tren. A pasi disi e kren go na The Bottom, a mamafoto fu Saba.a Furu hondrohondro yari langa, a smara pasi disi ben de a wan-enkri fasi fa sma ben kan doro den sma fu na èilanti.

A fosi leisi di sma skrifi fu a Kresten preikiwroko di e du na tapu Saba, ben de na ini a 1966 Yearbook of Jehovah’s Witnesses. Soleki fa a pisi tori na ini a buku disi e sori, dan na wán Kotoigi nomo ben e preiki na a èilanti disi. Bakaten, wan osofamiri fu Kanada froisi go tan wan tu yari na Saba fu preiki a bun nyunsu drape. No so langa pasa, Russel nanga Kathy, wan trowpaar fu Amerkankondre di go nanga pensyun kaba, go na Saba èn den teki prati na a preikiwroko drape. Disi na a tori fu den.

Di wi go na Saba

Mi nanga mi wefi e doro drape nanga opolani èn wi o tan na a oso fu Ronald, di ben de a wan-enkri Kotoigi na a èilanti, na ini a moro bigi pisi ten fu den yari na mindri 1990 nanga 2000. A e wakti wi na a opolanigron. A breiti nanga a pikin dosu gruntu di wi tyari kon gi en, fu di den sma fu na èilanti no e prani gruntu fu seri gi trawan. Wi e go sidon na ini wan pikin truck èn safrisafri wi e kren a kronkron pasi na a seibere fu a Scenery-bergi, fu doro na a tapusei fu a bergi disi di ben e spiti faya fositen.

Wi e stop na a dorpu Hell’s Gate (Portu fu hel), èn Ronald e go na wan bord pe sma e skrifi boskopu di den wani meki bekènti. A wani si efu a skrifi ete taki wan publikitaki o hori sonde. Wi breiti fu si taki a boskopu dati skrifi ete. Ronald e kon baka na ini a truck, èn wi e kren go moro fara, teleki wi doro a moro bigi dorpu fu na èilanti, namku Windwardside. Soleki fa a nen e sori, dan a moi dorpu disi de na a sei fu na èilanti pe a winti e wai kon, èn na èilanti disi hei sowan 400 meter moro leki a se. Te wi e rei go na ini a prâsi pe na oso fu Ronald de, dan wi e si wan moi bord nanga furu kloru na a fesisei balkon, èn na tapu a bord disi skrifi taki drape na a Kownukondre zaal fu Yehovah Kotoigi.

Te wi e nyan, dan mi e prakseri fu san ede wi kon na Saba, èn fu dati ede mi e poti na aksi disi gi en: „Fa a du kon taki yu na wan Kownukondre preikiman na Saba?”

Ron e taki: „Di a bijkantoro fu Yehovah Kotoigi na Porto Riko kaba bow na ini 1993, dan mi nanga mi wefi ben wani tan du wi diniwroko na ini wan tra kondre. Wan pisi ten na fesi, wi ben kon na Saba kaba, makandra nanga wan tra trowpaar di ben e pionier, èn na a ten dati wi kon frustan taki 1400 sma ben e libi na a èilanti disi, ma nowan enkri Kotoigi ben e tan drape. Sobun, wi aksi den brada fu a Bijkantoro Komte fu Porto Riko efu wi ben kan froisi go tan drape.

Ala sani waka bun, èn te fu kaba wi kisi primisi fu froisi. A sari fu taki dati tu yari baka dati, mi wefi kon siki seryusu, èn wi froisi go baka na Kalifornia. Baka di mi wefi lasi libi, mi drai kon baka na Saba, bika mi na wan sma, te mi bigin nanga wan sani, dan mi wani klari a sani dati.”

Na oso-fu-oso preikiwroko na Saba

Na oso fu Ron di de wán hondro yari kaba, abi wan foroisi di Ron e gebroiki sosrefi leki wan Kownukondre zaal.b Te wi e nyan na mamanten yuru èn e sreka wisrefi fu go na ini a preikiwroko, dan wan wolku di e pasa e meki alen fadon, èn a kukru di no abi daki e nati. Te wi kaba nyan, dan wi e go preiki oso fu oso na ini The Bottom, aladi wolku panya na hemel. Na ibri oso, Ron e kari den sma na den nen te a e taki den odi. Wi e taki fu sani di pasa na a èilanti, no so langa pasa. Furu fu den sma sabi Ron nanga a preikiwroko di a e du, èn furu fu den lobi fu teki Bijbel publikâsi.

Efu yu no sabi den sma fu den dorpu, dan a kan de wan problema fu skrifi den nen nanga adres fu den sma di wani sabi moro fu a Kownukondre boskopu. Fu san ede? Fu di „lantiwet e taki dati ala oso musu ferfi a srefi kloru”, na so Ron e taki. Te mi e luku lontu, dan mi e si taki disi de so trutru, bika ala den oso na Saba ferfi weti èn den abi redi daki.

Baka te wi taki fu Bijbel nanga wan sma, dan wi e gi en wan kari fu kon na a publikitaki di abi fu du nanga Bijbel, èn di o hori sonde na a Kownukondre zaal. Te Ron de na a èilanti, dan a e gi wan publikitaki ibri wiki. Now, 17 sma na Saba e studeri Bijbel. Na ini 2004, tutenti sma ben kon na a Memrefesa fu a dede fu Krestes. Èn aladi a nomru disi no sori fu de so furu, toku a de wán procent fu ala den sma di e tan na Saba!

Iya, Yehovah Kotoigi meki ala muiti fu preiki a boskopu di e taki dati Gado o frulusu sma, gi so furu sma leki den man. Awinsi a de na wan pikin èilanti leki Saba, noso awinsi a de na wan bun bigi pisi fu grontapu, Yehovah Kotoigi de getrow na ini a wroko di den kisi fu du, namku fu ’go na sma fu ala kondre èn fu meki den tron disipel’.​—Mateyus 28:19.

Wi e sari te wi musu gowe libi Saba. Te wi e go na ini na opolani, dan wi e wai anu fu taki Ron odi. Ala ten wi sa memre a pisi ten di wi ben de na Saba èn di wi ben e kren go na The Bottom!

[Futuwortu]

[Den karta tapu bladzijde 10]

(Efu yu wani si pe den sani disi skrifi, luku a tijdschrift)

PORTO RIKO

[Sma di abi a reti fu a prenki na tapu bladzijde 10]

Background: www.sabatourism.com