Fa fu meki Yehovah tron yu Gado

NA INI Bijbel ten, son sma ben abi so wan krosibei banti nanga Yehovah, taki trawan ben e kari Yehovah a Gado fu den sma disi. Fu eksempre, Bijbel e kari Yehovah „a Gado fu Abraham”, „a Gado fu David”, nanga „a Gado fu Elia”.​—Genesis 31:42; 2 Kownu 2:14; 20:5.

Fa ibriwan fu den man disi kon abi wan krosibei banti nanga Gado? San wi kan leri fu den, so taki wi tu kan kon abi èn kan tan abi wan tranga banti nanga a Mekiman?

Abraham „ben bribi na ini Yehovah”

Abraham na a fosi sma di Bijbel e taki dati a ben bribi na ini Yehovah. Bribi ben de a moro prenspari fasi fu Abraham di meki taki Gado feni en bun. Fu taki en leti, a bun-ati di Yehovah sori Abraham ben go so fara taki bakaten a Mekiman taigi Moses dati en na „a Gado fu Abraham”, fu en manpikin Isak, èn fu en granpikin Yakob.​—Genesis 15:6; Exodus 3:6.

Fa Abraham ben kon kisi so wan bribi na ini Gado? Na a fosi presi, Abraham ben kisi na overtoigi fu poti bribi na ini Gado. Sem, a manpikin fu Noa, ben si fa Gado frulusu sma, èn kande na en ben leri Abraham fu den pasi fu Yehovah. Sem ben si nanga en eigi ai taki Yehovah „kibri Noa, wan preikiman fu regtfardikifasi, makandra nanga seibi trawan, di a ben tyari wan frudu kon na tapu wan grontapu fu ogri sma” (2 Petrus 2:5). Abraham ben kan leri fu Sem taki te Yehovah pramisi wan sani, dan a sani dati o kon tru sondro misi. Awansi fa a no fa, di Abraham srefi ben kisi wan pramisi fu Gado, dan a ben breiti fu dati èn a fasi fa a ben libi ben de akruderi a sabi di a ben abi taki a pramisi o kon tru seiker.

Fu di Abraham ben kisi na overtoigi fu poti bribi na ini Gado, meki den sani di a du tranga a bribi fu en moro nanga moro. Na apostel Paulus ben skrifi: „Na fu di Abraham ben abi bribi, meki a gi yesi di Gado kari en fu go na wan presi di a ben o kisi leki gudu; ne a gowe libi a kondre fu en, aladi a no ben sabi pe a ben e go” (Hebrewsma 11:8). Fu di Abraham du san Gado aksi en, meki a kon kisi moro bribi. A disipel Yakobus ben skrifi fu a tori disi: „Yu e si taki a no bribi wawan a ben e bribi, ma a ben du sosrefi san a ben e bribi, èn na den sani di a du ben meki a bribi fu en kon volmaakti.”​—Yakobus 2:22.

Boiti dati, Yehovah ben gi pasi taki Abraham kisi tesi, so taki a bribi fu en ben kan kon moro tranga. Paulus ben go moro fara fu taki: „Na fu di Abraham ben abi bribi, meki yu kan taki dati a gi Isak leki ofrandi di Gado tesi en.” Te wan sma e kisi tesi, dan a bribi fu en e kon moro bun èn moro tranga, èn na so a bribi fu en o „warti moro leki gowtu”.​—Hebrewsma 11:17; 1 Petrus 1:7.

Aladi Abraham no ben de na libi moro fu si ala den pramisi fu Gado kon tru, toku a ben prisiri fu si taki trawan ben waka baka na eksempre fu en. En wefi Sara nanga dri tra memre fu en osofamiri, namku Isak, Yakob, nanga Yosef, na sma di Bijbel e kari leki bun eksempre, fu di den ben abi wan tranga bribi.​—Hebrewsma 11:11, 20-22.

Abi a srefi bribi leki di fu Abraham na ini a ten disi

Bribi na a moro prenspari sani gi iniwan sma di wani fu meki Yehovah tron en Gado. „Sondro bribi wan sma no man plisi [Gado] na wan bun fasi”, na so Paulus ben skrifi (Hebrewsma 11:6). Fa wan futuboi fu Gado na ini a ten disi kan kon kisi so wan tranga bribi leki di fu Abraham?

Neleki fa a ben de nanga Abraham, na so wi musu abi a tranga overtoigi fu poti bribi na ini Gado. A moro bun fasi fa wi kon kisi so wan bribi na te wi e studeri Bijbel nanga Bijbel publikâsi doronomo. Te wi e leisi Bijbel èn te wi e denki dipi fu den sani di wi leisi, dan dati kan gi wi a dyaranti taki den pramisi fu Gado sa kon tru. Disi sa meki taki wi e kenki wi libi na so wan fasi taki wi de seiker taki wi o kisi den sani di wi e fruwakti. A bribi fu wi sa kon moro tranga te wi e du sani di e sori taki wi e gi yesi, sani soleki fu teki prati na a preikiwroko èn fu go na den Kresten konmakandra.​—Mateyus 24:14; 28:19, 20; Hebrewsma 10:24, 25.

A no de fu taki dati wi sa kisi tesi tapu a bribi fu wi, kande fu di wi e kisi gens, fu di wi kisi wan seryusu siki, fu di wan lobiwan fu wi dede, noso na wan tra fasi. Efu wi tan loyaal na Yehovah te wi e kisi tesi, dan dati e tranga a bribi fu wi èn a e meki a bribi fu wi warti moro leki gowtu. Awansi efu wi de na libi fu si den kontru fu den pramisi fu Gado, noso efu wi dede, a bribi fu wi sa meki wi kon moro krosibei na Yehovah. Boiti dati, na eksempre fu wi sa gi trawan deki-ati fu waka baka a bribi fu wi (Hebrewsma 13:7). Na so a ben de nanga Ralph; a ben si èn a ben waka baka a bribi fu en papa nanga mama. A e fruteri:

„Di mi ben e libi na oso ete, dan mi papa nanga mama ben gi a heri osofamiri deki-ati fu opo fruku mamanten so taki wi ben kan leisi Bijbel makandra. Na so wi leisi a heri Bijbel.” Te now ete Ralph e leisi Bijbel ibri mamanten, èn disi e meki taki a e bigin a dei na wan bun fasi. Ibri wiki Ralph ben gwenti fu go nanga en papa na ini a preikiwroko. „Na so mi kon leri fa fu tyari gobaka èn fa fu hori oso-bijbelstudie.” Now Ralph e dini leki wan friwani-wrokoman na wan fu den bijkantoro fu Yehovah Kotoigi na ini Europa. Iya, a bribi di en papa nanga mama sori, ben abi bun bakapisi trutru!

Wan man di ben plisi na ati fu Yehovah

David, di gebore sowan 900 yari baka Abraham, na wan fu den tumusi moi eksempre fu dinari fu Yehovah di Bijbel e taki fu en. Di a profeiti Samuel ben taki fu David, a sma di Yehovah ben o teki fu tron kownu bakaten, dan a ben taki: „Sondro misi Yehovah sa feni wan man di e plisi en ati.” A banti na mindri Yehovah nanga David ben de so tranga, taki bakaten a profeiti Yesaya ben taigi Kownu Heskia fu „Yehovah, a Gado fu yu fositen tata David”.​—1 Samuel 13:14; 2 Kownu 20:5; Yesaya 38:5.

Aladi David ben plisi na ati fu Yehovah, toku wan tu leisi David gi pasi taki den firi fu en basi en. Dri leisi a ben meki seryusu fowtu, namku di a ben gi pasi taki sma ben tyari na Ark go na Yerusalem na wan fasi di no fiti; di a du sutadu nanga Batseiba èn ben suku fasi fu kiri Uria, a masra fu Batseiba; di a ben orga sani fu meki sma teri a pipel fu Israel nanga Yuda sondro taki Yehovah ben gi a komando fu du dati. Na ibriwan fu den leisi disi David ben pasa a Wet fu Gado.​—2 Samuel 6:2-10; 11:2-27; 24:1-9.

Ma di David ben kon si taki a sondu, dan a ben erken taki a ben meki fowtu, èn a no ben suku fu poti a fowtu tapu trawan. A ben erken taki den no ben tyari na Ark na wan fasi di fiti, èn a ben taki sosrefi dati „wi no ben suku yepi na [Yehovah] soleki fa wi ben gwenti fu du”. Di a profeiti Natan tyari kon na krin taki David du sutadu, dan David ben taki: „Mi sondu teige Yehovah.” Di David kon si taki a du wan don sani di a teri a pipel, dan a ben erken taki: „Mi sondu trutru di mi du a sani disi.” David ben abi berow fu den sondu di a du èn a ben tan krosibei fu Yehovah.​—1 Kroniki 15:13; 2 Samuel 12:13; 24:10.

Te wi meki fowtu

Te wi e du muiti fu meki Yehovah tron wi Gado, dan wi sa kisi deki-ati fu na eksempre fu David. Efu wan man di ben e plisi na ati fu Yehovah so te, ben man du den seryusu sondu disi, dan wi no musu lasi-ati te wi e meki fowtu son leisi noso te wi e du seryusu sondu srefi, aladi wi e du tranga muiti fu no du den sani dati (Preikiman 7:20). Wi kan kisi trowstu te wi e si taki David ben kisi pardon fu den sondu fu en, di a ben abi berow. Disi na san ben pasa nanga Uwea wan tu yari pasa.

Uwe ben e dini leki owruman na ini wan gemeente fu Yehovah Kotoigi. Wan leisi a gi pasi taki den takru firi fu en basi en èn disi meki taki a du hurudu. Neleki Kownu David, dan na a bigin Uwe pruberi fu kibri a tori, fu di a ben e howpu taki Yehovah no ben o poti prakseri na a sondu di a du. Te fu kaba, Uwe en konsensi bigin fon en so te, taki a fruteri wan tra owruman san pasa. Den owruman ben du san de fanowdu fu yepi Uwe so taki a ben kan kon bun baka na yeye fasi.

Uwe ben abi berow fu den sondu di a ben du èn a ben tan krosibei fu Yehovah nanga a gemeente. A ben de nanga tangi trutru taki a ben kisi yepi. Fu dati ede meki baka wan tu wiki a ben skrifi wan brifi gi den owruman fu taigi den taki a de nanga tangi trutru èn taki a abi dipi warderi gi a yepi di den brada gi en. „Unu yepi mi fu puru a porinen di Yehovah kisi”, na so a ben skrifi. Uwe ben kon kisi wan bun banti baka nanga Yehovah èn baka wan pisi ten a ben kisi a frantwortu fu dini baka leki wan dinari na ini a srefi gemeente.

„Wan man di abi den srefi firi leki wi”

Elia, di ben e libi wan hondro yari baka David, ben de wan fu den moro prenspari profeiti fu Israel. Elia ben e hori a tru anbegi hei na ini wan pisi ten di kruktudu nanga hurudu ben de na ala sei, èn a ben tan dini Yehovah getrow. A no de fu fruwondru taki Elisa, a sma di ben o teki a wroko abra fu Elia, ben kari Yehovah wan leisi „a Gado fu Elia”!​—2 Kownu 2:14.

Awansi fa a no fa, Elia no ben de wan aparti sma. Yakobus ben skrifi: „Elia ben de wan man di abi den srefi firi leki wi” (Yakobus 5:17). Fu eksempre, di a ben wini èn ben kiri den Bâal anbegiman na ini Israel, dan Uma-kownu Iseibel ben e suku fu kiri en. San Elia du? A ben kon frede èn a lowe go na ini a sabana. Na ini a sabana Elia go sidon na ondro wan bon, èn a ben kragi: „A nofo! Tyari mi sili gowe now, o Yehovah, bika mi no moro bun leki den fositen tata fu mi.” Elia no ben wani de wan profeiti moro, ma na presi fu dati a ben wani dede.​—1 Kownu 19:4.

Aladi dati ben de so, toku Yehovah sori taki a e frustan fa Elia ben e firi. Gado ben gi Elia deki-ati, fu di a ben gi en a dyaranti taki a no ben de en wawan, ma taki tra sma ben de sosrefi di ben de loyaal na a tru anbegi. Boiti dati, Yehovah ben tan frutrow Elia èn a ben wani gi en wroko fu du.​—1 Kownu 19:5-18.

Elia ben e firi brokosaka, ma dati no e sori taki Gado no ben feni en bun moro. Sowan 1000 yari baka dati, di Krestes Yesus ben kenki kon de heri tra fasi na fesi Petrus, Yakobus, nanga Yohanes, dan suma Yehovah poti na ini a fisyun makandra nanga Yesus? Moses nanga Elia (Mateyus 17:1-9). A de krin taki Yehovah ben e si Elia leki wan profeiti di de wan bun eksempre. Aladi Elia ben de „wan man di abi den srefi firi leki wi”, toku Gado ben warderi a tranga wroko di a ben du fu meki a tru anbegi kon bun baka èn fu santa a nen fu En.

A feti di wi e feti nanga den firi fu wi

Son leisi den futuboi fu Yehovah na ini a ten disi e lasi-ati noso den e broko den ede nanga son sani. A de wan bigi trowstu gi wi fu sabi taki Elia ben abi den srefi firi leki wi! Èn wi e kisi deki-ati sosrefi fu sabi taki neleki fa Yehovah ben frustan fa Elia ben e firi, na so A e frustan fa wi e feti nanga den firi fu wi.​—Psalm 103:14.

Na a wan sei, wi lobi Gado nanga tra sma èn wi wani fu du a wroko di Yehovah gi wi fu du, namku fu preiki a bun nyunsu fu a Kownukondre. Ma na a tra sei, wi kan lasi-ati te wi e si taki sma no wani arki te wi e preiki, noso wi kan broko wi ede tu te feanti fu a tru anbegi wani du wi ogri. Ma soleki fa Yehovah ben horibaka gi Elia so taki a ben kan go doro, na so Yehovah e horibaka gi den futuboi fu en na ini a ten disi. Luku fu eksempre fa a ben de nanga Herbert èn nanga Gertrud.

Herbert nanga Gertrud ben teki dopu na ini 1952 leki Yehovah Kotoigi na Leipzig, na ini a Doisri Demokrasia Republiek fu fositen. Na ini a ten dati, a libi ben tranga gi den futuboi fu Gado, fu di lanti ben tapu a preikiwroko fu den. Fa Herbert ben e firi te a ben musu go preiki oso fu oso?

„Son leisi wi ben e frede srefisrefi. Te wi ben e go oso fu oso, wi no ben sabi efu wi ben o miti nanga den skowtu sondro fu fruwakti dati, èn wi no ben sabi efu den ben o kon grabu wi.” San ben yepi Herbert nanga tra sma fu no frede moro? „Wi ben e studeri Bijbel furu. Èn Yehovah ben gi wi a krakti fu go doro nanga a preikiwroko.” Na ini a preikiwroko Herbert ben ondrofeni furu sani di gi en deki-ati; a kan lafu srefi fu son wan fu den sani disi di a ben ondrofeni.

Herbert ben miti wan uma di ben pasa 40 yari, èn na uma disi ben wani sabi moro fu Bijbel. Baka wan tu dei, Herbert go baka na a uma disi èn wan yonkuman ben de drape di ben e arki a takimakandra di Herbert ben abi nanga na uma. Baka wan tu miniti, Herbert si wan sani di meki a kon frede srefisrefi. Na tapu a sturu di ben de na a uku fu a kamra, wan skowtu-ati ben de. A ben de krin taki a skowtu-ati ben de fu a yonkuman di ben de wan skowtu èn a ben wani fu sroto Herbert.

„Yu na wan fu den Yehovah Kotoigi!” na so a yonkuman taki. „Kon meki mi si den papira fu yu.” Herbert langa den papira fu en gi a skowtu. Ne wan sani pasa di a no ben fruwakti srefisrefi. Na uma drai luku a skowtu èn a warskow en: „Efu wan sani pasa nanga a man disi fu Gado, yu no musu kon dya na ini na oso moro.”

A yonkuman tan tiri wan pisi ten, dan a gi Herbert den papira fu en baka, èn a libi en meki a gowe. Bakaten Herbert kon yere taki a skowtu ben e hori nanga na umapikin fu na uma. A de krin taki a yonkuman ben feni en moro bun fu hori nanga a meisje leki fu grabu Herbert tyari go sroto.

Meki Yehovah tron wi Gado

San wi kan leri fu den tori disi? Neleki Abraham, wi tu musu abi wan tranga bribi na ini den sani di Yehovah pramisi. Neleki David, wi tu musu go na Yehovah te wi sondu fu sori taki wi abi berow trutru. Èn neleki fa a ben de nanga Elia, dan wi musu frutrow taki Yehovah sa gi wi krakti na ini muilek ten. Te wi e du dati, dan wi kan meki Yehovah tron wi Gado now èn fu têgo, fu di en na „wan Gado di e libi, di de wan Frulusuman fu ala sortu sma, spesrutu den getrow wan”.​—1 Timoteyus 4:10.

[Futuwortu]

[Prenki na tapu bladzijde 25]

Fu di Abraham ben du sani di e sori taki a e gi yesi, meki a bribi fu en kon moro tranga

[Prenki na tapu bladzijde 26]

Neleki fa a ben de nanga David, dan wi musu abi berow tu te wi sondu

[Prenki na tapu bladzijde 28]

Neleki fa Yehovah ben frustan fa Elia ben e firi, na so a e frustan tu fa wi e firi