Kresneti nanga Nyun-Yari—Den sa waka soleki fa yu e fruwakti?
„Petrus [a Bigiwan] ben gi a komando taki tapu 1 yanuari na a ten fu a Nyun-Yarifesa, sma musu hori spesrutu seremonia na ini ala kerki. A ben taigi sma tu fu teki taki fu bon di e tan grun a heri yari, èn fu gebroiki den fu moi den doropostu nanga na inisei fu den oso fu den. Boiti dati, a gi komando taki ala borgu fu Moskow ben musu ’fristeri makandra nanga furu opo-opo fu sori taki den ben e firi koloku’ fu di wan Nyun-Yari bigin.”—Peter the Great—His Life and World.
FA YU wani taki sani waka na Kresnetiten èn na a Nyun-Yarifesa? A de wan pisi ten fu difrenti fesadei. Kande papa, mama, nanga pikin abi fakansi na a pisi ten disi, èn fu dati ede a ben o de wan bun okasi gi osofamiri fu du sani makandra. Ma tra sma e kari a pisi ten disi „Kresnetiten”, fu di den wani gi grani na Krestes na a ten disi fu a yari. Kande yusrefi feni tu taki dati na a moro prenspari sani di e pasa na a ten fu den fesa disi.
Efu na fu di den wani gi grani na Krestes, efu na fu di den wani abi wan prisiri ten nanga na osofamiri, noso efu na gi ala tu, awansi fa a no fa, milyunmilyun masra, wefi, nanga pikin na heri grontapu no man wakti teleki a ten disi doro. Fa sani sa waka a yari disi? A de so taki den fesa disi sa de prenspari gi yu osofamiri, èn a de so tu taki den prenspari gi Gado? Te yu e kon makandra nanga den famiriman fu yu, dan sani sa waka soleki fa yu e fruwakti, noso sani sa waka tra fasi?
Furu sma di wani gi grani na Yesus, e si taki wan lo sma no e hori Kresneti nanga a Nyun-Yarifesa na wan fasi di Krestes ben o feni bun. Na presi fu dati, den e si den fesadei disi leki wan ten fu kisi kado, èn leki wan okasi fu hori fesa pe sma kande sa tyari densrefi na wan fasi di e gi Krestes syen. Ma moro furu a de so taki sma e teki den dei disi leki wan okasi fu kon makandra nanga famiriman. Furu tron a de so taki sma e pori den sortu fesa disi fu di wán noso moro famiriman e nyan tumusi furu èn e dringi tumusi furu sopi. A sani disi e tyari trobi kon di e meki nofo tron taki sma e bigin feti. Kande yu si dati tu, noso kande yu ondrofeni dati srefi.
Efu dati de so, dan kande yu sa feni taki furu sani no kenki sensi a ten fu Petrus a Bigiwan, a Gran Kownu fu Rosiakondre, soleki fa dati e kon na krin na a bigin fu na artikel. Fu di furu sma no lobi fa sani e waka na a ten fu den fesadei disi, meki den e winsi taki sma poti seryusu prakseri na a libi fu Krestes, èn taki den abi bun demakandra nanga famiriman. Son organisâsi nanga grupu e du muiti srefi fu tyari wan kenki kon, fu di den e gebroiki spesrutu wortu fu meki reklame taki den fesadei na fu memre Yesus. Ma wan kenki o kon? Èn a kenki disi o gi grani trutru na Krestes? A de fanowdu taki wi kisi wan tra denki fu Kresnetiten èn fu a Nyun-Yarifesa?
Fu man kisi bun piki tapu den aksi disi, wi o go luku fa sma fu wán spesrutu nâsi e si den fesadei disi, bika efu wan nâsi de di abi bun reide fu sori warderi gi den fesadei disi, dan na den sma fu a nâsi disi.