Yu kan kisi prisiri te yu e frustan Bijbel
BIJBEL abi warti tru tori fu Gado na ini. A e fruteri wi san na a marki fu a libi, san e meki taki libisma e pina so, èn fa a tamara fu a libisma famiri sa de. Bijbel e leri wi fa wi kan feni koloku, fa wi kan meki mati, èn fa wi kan lusu problema nanga bun bakapisi. Ma san de moro prenspari, na taki wi e kon leri sabi a Mekiman èn a hemel Tata fu wi, Yehovah. A sabi disi e gi wi prisiri, èn a e gi wi wan marki na ini wi libi.
Bijbel e agersi a teki di wi e teki sabi fu Gado, nanga a nyan di wan sma e nyan. Yesus ben taki: „Sma no musu libi fu brede wawan, ma fu ibri wortu di Yehovah mofo taki” (Mateyus 4:4; Hebrewsma 5:12-14). Neleki fa a de fanowdu taki wi nyan bun nyanyan ibri dei fu man tan na libi, na so a de fanowdu tu taki wi e leisi Gado Wortu doronomo fu man kisi wini fu a pramisi fu Gado, namku têgo libi.
Wi e prisiri te wi e nyan, fu di na so Yehovah meki wi, èn a nyanyan e gi a skin den prenspari sani di a abi fanowdu. Ma wi abi wan tra prenspari sani fanowdu efu wi wani de koloku. Yesus ben taki: „Koloku fu den sma di sabi taki den de na nowtu na yeye fasi” (Mateyus 5:3). Te wi e frustan a Wortu fu Gado, dan wi kan tapu a nowtu dati, èn dati sa meki taki wi de koloku.
A tru taki son sma feni en muilek fu kon frustan san Bijbel e taki. Fu eksempre, kande yu abi yepi fanowdu fu frustan den bijbeltekst di e taki fu gwenti di yu no sabi, noso di e taki fu sani na wan agersi fasi. Dan yu abi profeititori di e prenki wan sani, èn di yu kan frustan soso te yu e luku tra bijbeltekst di e taki fu den srefi tori dati (Danièl 7:1-7; Openbaring 13:1, 2). Ma awinsi dati de so, toku yu kan kon frustan Bijbel trutru. Fa yu kan de seiker fu dati?
Ala sma kan ondrofeni a prisiri dati
Bijbel na a Wortu fu Gado. Na ini Bijbel, Gado tyari kon na krin gi wi san na a wani fu en. A de so taki Gado ben o gi wi wan buku di wi no ben o man frustan, noso di ben o de soso gi sma di kisi hei skoroleri? Nôno, Yehovah no ben o handri so nanga wi. Krestes Yesus ben taki: „Suma fu unu di de wan papa o gi en manpikin wan sneki te a pikin aksi en wan fisi? Sosrefi, te a e aksi wan eksi, dan unu no sa gi en wan kruktutere, a no so? Fu dati ede, efu unu di abi takru fasi, sabi fa fu gi un pikin bun sani, dan a no abi misi taki a Tata di de na hemel sa gi santa yeye na den sma di e aksi en!” (Lukas 11:11-13) Sobun, yu kan de seiker taki yu o man frustan Bijbel, èn taki Gado sa yepi yu fu frustan a Wortu fu en, efu yu aksi en na wan opregtifasi. Fu taki en leti, srefi pikin kan frustan den prenspari leri fu Bijbel!—2 Timoteyus 3:15.
Aladi wi musu meki muiti fu kon frustan Bijbel, toku wi kan kisi deki-ati te wi e du dati. Baka di Yesus kisi wan opobaka, a sori ensrefi na tu fu en disipel, èn a taki nanga den fu Bijbel profeititori. Lukas e taki: „A bigin taki fu den buku fu Moses èn fu a leri fu ala den Profeiti, fu tyari kon na krin gi den san na den sani di skrifi fu en na ini Gado Buku.” San ben de a bakapisi fu dati? A neti dati, di den disipel ben prakseri den sani di den ben e leri, den taigi makandra: „A no dati meki wi ati ben prisiri trutru di a ben e taki nanga wi di wi ben de na pasi, èn sosrefi di a ben meki wi frustan finifini san skrifi na ini Gado Buku?” (Lukas 24:13-32) Fu di den tu disipel ben man frustan a Wortu fu Gado, meki den ben e prisiri, fu di a tranga a bribi di den ben abi na ini den pramisi fu Gado, èn a meki den kisi wan bun denki fu a ten di ben de na den fesi.
A no de wan hebi fu kon frustan a Wortu fu Gado, ma na presi fu dati a sani disi na wan moi sani di e tyari wini nanga prisiri kon gi sma, neleki te sma e nyan wan switi nyanyan. San yu musu du fu man frustan Bijbel? Na artikel di e kon now sa sori fa yu kan kisi „a sabi fu Gado srefi”.—Odo 2:1-5.
[Prenki na tapu bladzijde 4]
Leki wan lobi-ati papa, Yehovah e gi wi en santa yeye fu yepi wi fu frustan Bijbel