Si na bribi
Son sma feni taki „wan sma no man kon sabi den tru tori di abi fu du nanga Gado èn nanga a tamara. Nanga den tori disi a Kresten bribi, nanga tra bribi e broko den ede. Èn efu oiti wi sa man kon sabi dati, dan a no now.”—FILOSOFIAMAN BERTRAND RUSSELL, 1953.
WAN sma di ben abi a denki disi, na Thomas Huxley, wan sabiman di ben e ondrosuku meti. Huxley di gebore na ini 1825, ben e libi na a ten fu Charles Darwin, èn a ben e horibaka gi na evolutie-leri. Na ini 1863, Huxley ben skrifi taki a no ben man si nowan buweisi di e sori taki wan Gado de di „lobi wi èn di e broko en ede nanga wi soleki fa a Kresten bribi e taki”.
Na ini a ten disi, furu sma e agri nanga a denki fu den prenspari man dati, fu di den sma disi e taki dati den e bribi soso san den man si. Kande den feni taki wan sma di e bribi wan sani sondro fu abi buweisi taki a sani dati de trutru, na wan sma di de gaw fu bribi iniwan sani.
A de so taki Bijbel e leri wi taki wi musu bribi na ini Gado, awansi wi no abi buweisi taki a de? Nôno, kwetikweti. Bijbel e sori taki a de wan don sani fu bribi sani di sma e taki, efu buweisi no de gi den sani dati. Bijbel e taki: „Wan sma di no abi ondrofeni, e bribi ibri wortu, ma a koniwan e luku pe a e poti en futu.”—Odo 14:15.
Ma fa a de nanga a bribi di sma e bribi na ini Gado? A de so trutru taki Gado de, taki a lobi wi èn taki a e broko en ede nanga wi?
Den fasi fu Gado de fu si
Di a Bijbel skrifiman Paulus ben e taki nanga den koniman fu Ateine, dan a taigi den taki Gado „meki grontapu nanga ala sani na en tapu”. Paulus ben taigi den man dati di ben e tweifri efu Gado de trutru, taki A e broko en ede nanga libisma, èn taki „a no de fara fu nowan fu wi”.—Tori fu den Apostel 17:24-27.
Fu san ede Paulus ben abi na overtoigi taki Gado de trutru èn taki A e broko en ede nanga den libisma di a meki? Di Paulus ben skrifi wan brifi gi den Kresten brada nanga sisa fu en na ini a foto Rome, dan a kari wán reide fu san ede a ben abi na overtoigi dati. Disi na san a ben taki fu Gado: „A de krin fu frustan san na den eigifasi fu Gado di sma no man si nanga den ai, bika den eigifasi fu en de fu si na den sani di a meki.”—Romesma 1:20.
Den artikel baka a wan disi o taki fu dri fasi fu Gado di wi kan si krin na ini den sani di a meki. Te yu e poti prakseri na den eksempre disi, dan aksi yusrefi: ’Now di mi kon sabi den fasi disi fu Gado, dan fa den abi krakti na mi tapu?’
[Prenspari pisi na tapu bladzijde 3]
Bijbel no e leri wi fu bribi na ini Gado sondro taki wi abi buweisi