Gado na wan trutru sma?
Sani di sma gwenti taki:
◼ „A de na ala sei, èn na ini ala sani. A de leki a winti.”
◼ „En a no wan trutru sma, ma a de wan koni noso tranga krakti.”
San Yesus ben taki?
◼ „Furu tanpresi de na ini na oso fu mi Tata” (Yohanes 14:2). Yesus ben taki na wan agersi fasi taki Gado abi wan oso, noso wan tanpresi.
◼ „Mi komoto fu a Tata èn mi kon na grontapu. Boiti dati, mi o gowe libi grontapu èn mi o go na a Tata” (Yohanes 16:28). Yesus ben bribi taki Gado na wan trutru Sma di abi wan presi pe a e tan.
NOITI Yesus ben taki fu Gado leki a de wan krakti. Na presi fu dati, a ben taki nanga Gado èn a ben begi en. Nofo tron a ben kari Yehovah en hemel Tata. Disi e sori taki a ben abi wan bun matifasi nanga Gado.—Yohanes 8:19, 38, 54.
A tru taki „noiti ete wan sma si Gado” èn taki „Gado na wan Yeye” (Yohanes 1:18; 4:24). Ma disi no wani taki dati Gado no abi wan skin. Disi na san Bijbel e taigi wi: „Efu wan libisma skin de, dan wan yeye skin de tu” (1 Korentesma 15:44). Sobun, Yehovah abi wan yeye skin?
Iya. Di Yesus kisi wan opobaka, a „go . . . na hemel srefi fu go na fesi Gado gi a bun fu wi” (Hebrewsma 9:24). Disi e leri wi tu prenspari sani fu Gado. A fosiwan na taki Gado abi wan tanpresi. A di fu tu na taki Gado na wan Sma, fu di Yesus no kan taki dati a e „go na fesi Gado”, efu Gado na wan krakti di de na ala sei.
Fa a kan taki Gado abi a krakti fu tiri sani na ala sei? Gado kan seni en santa yeye, noso a krakti di a e gebroiki fu du sani, go na iniwan presi na hemel nanga grontapu. Neleki fa wan papa e gebroiki en anu fu trowstu èn fu hori en pikin, na so Gado e gebroiki en santa yeye fu du san a abi na prakseri.—Psalm 104:30; 139:7.
Fu di Gado na wan Sma, meki a abi sani di a lobi èn sani di a no lobi. A abi firi tu. Bijbel e fruteri wi taki a lobi en pipel, a e prisiri fu den sani di a meki, a no lobi afkodrei, èn a e hati en te sma e du ogri (Genesis 6:6; Deuteronomium 16:22; 1 Kownu 10:9; Psalm 104:31). Na ini 1 Timoteyus 1:11 Bijbel e kari en „a koloku Gado”. A no e fruwondru wi taki Yesus taki dati wi kan leri fu lobi a Gado disi nanga wi heri ati!—Markus 12:30.a
[Futuwortu]
a Efu yu wani sabi moro fu a tori disi, dan luku kapitel 1 fu a buku San Bijbel e leri wi trutru? Yehovah Kotoigi tyari en kon na doro.
[Prenspari pisi na tapu bladzijde 5]
Neleki fa wan papa e gebroiki en anu fu hori en pikin, na so Gado e gebroiki en santa yeye fu du san a abi na prakseri