Tan abi „wan krin ati” na ini a muilek ten disi

„WI ALAMALA sabi taki furu sma na ini a Kerki no e tyari den srefi na wan krin fasi na ini a ten disi.” Na so Vittorio Messori, wan nyunsuman fu a Lomsu Kerki, ben taki fu den syen tori di ben de fu yere no so langa pasa. Den tori dati ben abi fu du nanga memre fu a Kerki fu Italiakondre, di ben abi seks nanga trawan, aladi dati no ben fiti. „Èn awansi den puru a wet di e taki dati kerki fesiman no mag trow, toku wan kaba no sa kon na a problema disi, bika 80 procent fu den tori dati abi fu du nanga sma di e libi wan homo-sekslibi. Èn den sma dati, na priester di e tyari densrefi na wan fasi di no fiti, fu di den abi seks nanga man èn nanga boi.”—La Stampa.

Na ogridu di e pasa na ala sei, e sori krin taki wi e libi na ini „den lasti dei” fu a sistema disi (2 Tim. 3:1-5). Leki bakapisi fu dati, moro nanga moro sma e tyari densrefi na wan fasi di no fiti. Soleki fa nyunsu nanga koranti e sori, dan a sani disi abi krakti tapu furu sma, sosrefi tapu sma di e kari densrefi anbegiman fu Gado. Na fu di na ati fu den takru èn fu di a no krin, meki den e du ogri (Ef. 2:2). Dati meki Yesus ben abi leti fu warskow wi taki ’disi na den sani di e kon fu na ati: ogri prakseri, kiri, sutadu, hurudu, fufuru, leitori, èn a taki di wan sma e taki ogri fu trawan’ (Mat. 15:19). Ma Yehovah Gado wani taki den futuboi fu en musu du muiti fu abi „wan krin ati” (Odo 22:11). Sobun, fa wan Kresten kan tan abi wan krin ati na ini den muilek ten disi?

San a wani taki fu abi „wan krin ati”?

Na ini Bijbel, a wortu „ati” nofo tron e prenki wan sani. Soleki fa wan buku e sori, dan a wortu „ati” na ini Bijbel, abi fu du nanga „a sma di wi de fu inisei”. Soleki fa a buku dati e sori, dan „na a ati fu wan sma prenspari gi Gado. Te wan sma wani tron wan mati fu Gado, dan Gado e luku fa na ati fu a sma dati de”. A buku e sori tu taki „na a ati abi krakti tapu a fasi fa wan sma e tyari ensrefi”. Soleki fa a buku di kari dyaso e sori, dan na a „ati” disi Yehovah e ondrosuku èn e warderi na ini den futuboi fu en.—1 Petr. 3:4.

Na ini Bijbel, den wortu „soifri” nanga „krin” kan abi fu du nanga wan sani di no doti. Ma den wortu disi kan abi fu du tu nanga a krin fasi fa sma e tyari ensrefi, èn nanga na anbegi fu Gado di de sondro flaka, noso di no pori. Yesus ben taki na ini a Bergitaki fu en: „Koloku fu den sma di abi wan krin ati.” (Mat. 5:8). Den sma disi lobi sani di bun, èn den e winsi bun sani tu. Boiti dati, a denki fu den sma disi krin tu. Den sma disi lobi Yehovah nanga den heri ati, sondro fu hoigri, èn den e du dati fu di den abi warderi gi den sani di a e du gi den (Luk. 10:27). Yu wani de krin tu na a fasi dati, a no so?

A no makriki fu tan abi „wan krin ati”

Boiti taki wan futuboi fu Yehovah musu de wan sma „di no e bedrigi trawan”, a musu de wan sma tu „di e du sani nanga wan krin ati” (Ps. 24:3, 4). Ma na ini a ten disi, a e kon muilek moro nanga moro gi den futuboi fu Gado fu tan „du sani nanga wan krin ati”. Satan nanga a grontapu di de na ondro a makti fu en, èn sosrefi wi eigi sondu skin, e tesi wi doronomo fu drai baka gi Yehovah. Fu man kakafutu gi den tesi disi, dan a de prenspari trutru taki wi lobi fu de sma di „abi wan krin ati”, èn wi musu du ala san wi man fu tan den sortu sma dati. A sani disi sa de wan kibri gi wi, èn a sa yepi wi fu tan Gado mati. Fa wi kan tan abi wan krin ati?

Na Hebrewsma 3:12, wi e kisi a warskow disi: „Mi brada, luku bun taki nowan fu unu kisi wan takru ati di no e bribi èn taki unu no hari unsrefi puru fu a libi Gado.” Wi no man tan abi wan „krin ati” efu wi e kon abi wan ati di „no e bribi”. Sortu lei Satan Didibri e panya fu meki wi lasi bribi na ini Gado? We, a wani taki sma musu bribi na evolutie-leri, taki sma musu bribi taki ala sani bun fu du, èn taki iniwan bribi bun. Boiti dati, a wani meki sma tweifri efu na Gado meki sma skrifi den Santa Buku fu Bijbel. Wi no musu meki den lei dati abi krakti na wi tapu, fu di dati sa tyari dede kon gi wi (Kol. 2:8). Te wi e leisi Bijbel ibri dei, èn te wi e denki dipi fu den sani di wi e leri, dan dati na prenspari fasi fa wi kan kakafutu gi den tesi fu Satan. Te wi abi soifri sabi fu Gado Wortu, dan a lobi di wi abi gi Yehovah sa kon moro tranga, èn wi sa kisi moro warderi tu gi den sani di a du. Wi musu abi a lobi nanga a warderi dati efu wi wani kakafutu gi falsi leri èn efu wi wani tan abi wan tranga bribi na ini Yehovah. Na so wi kan tan abi wan krin ati.—1 Tim. 1:3-5.

Te wi e kisi fu du nanga den lostu fu a skin

Wan tra tesi di wi ben kan kisi te wi e pruberi fu tan abi „wan krin ati”, na den lostu fu wi skin, èn a lobi gi gudu (1 Yoh. 2:15, 16). Te wan Kresten lobi moni, noso te a e angri fu kon gudu, dan a sani dati kan pori na ati fu en. Te fu kaba a Kresten disi sa du sani di Gado no feni bun. Wan tu sma bedrigi a wrokobasi fu den, den bedrigi trawan, noso den fufuru moni noso sani di no de fu den.—1 Tim. 6:9, 10.

Ma te wi abi frede gi Yehovah, te wi lobi du san reti, èn te wi abi a fasti bosroiti fu tan abi wan bun konsensi, dan wi e sori taki wi lobi fu de sma di „abi wan krin ati”. A lobi dati e meki wi tan „du ala sani na wan opregti fasi” (Hebr. 13:18). Te wi e handri na wan reti fasi, dan wi o man gi wan bun kotoigi. Luku na eksempre fu Emilio, wan Kotoigi di e libi na ini Italiakondre. Emilio di e rèi wagi gi wan bedrijf, ben feni wan portmoni di ben abi 470 euro (680 Amerkan dala) na ini. Den sma na en wrokope no ben man bribi di a gi a basi fu en a portmoni. Bakaten, a man dati gi a portmoni na a sma di ben lasi en. A sani di Emilio ben du, naki na ati fu wan tu fu den wrokoman so te, taki den ben wani sabi moro fu Bijbel. Den wrokoman disi teki wan Bijbelstudie. Leki bakapisi fu dati, seibi sma fu tu famiri teki a tru anbegi. Iya, te wi e tyari wisrefi na wan reti fasi fu di wi na sma di abi wan krin ati, dan dati trutru kan meki trawan prèise Gado.—Titus 2:10.

Wan tra sani di kan pori na ati fu wan Kresten, na te a Kresten dati abi wan kruktu denki fu seks. Furu sma no e si en leki wan takru sani te trawan e libi nanga makandra sondro fu trow, te sma di trow abi seks nanga tra sma di no de den trowpatna, èn te sma e libi wan homo-sekslibi. Den sortu denki disi kan pori na ati fu wan Kresten. Wan sma di e du hurudu ben kan libi wan dobru libi, aladi a e kibri a sondu fu en na wan hoigri fasi. A no de fu taki, dati so wan sma no abi „wan krin ati”.

Gabriela ben teki dopu di a ben abi 15 yari, èn a bigin pionier wantewante. Ma bakaten, a bigin moksi nanga takru kompe èn te neti den ben e go na dansi (Ps. 26:4). Na so Gabriel bigin libi wan dobru libi, èn a ben e du sani di no fiti gi wan Kresten. Te fu kaba den ben musu puru en fu a Kresten gemeente. Di a kisi a trangaleri dati fu Yehovah, dan a bigin denki dipi fu sani. Gabriel e memre: „Mi bigin du ala den sani di mi no ben e si leki seryusu sani fosi. Mi bigin leisi Bijbel ibri dei, fu di mi ben wani kon sabi san Yehovah ben wani leri mi trutru. Mi bigin studeri den publikâsi fu wi finifini tu. Now mi ben si o furu wini nanga prisiri a e gi fu studeri Bijbel. Mi ben si tu fa a e gi krakti fu leisi Bijbel èn fu begi Gado fayafaya.” A sani disi yepi Gabriel fu drai baka gi a yayo libi fu en, èn fu kon abi wan matifasi baka nanga Yehovah.

Now Gabriel e dini baka leki pionier, makandra nanga a wefi fu en. A sani di pasa nanga en e sori krin taki te wan sma e studeri Bijbel nanga Bijbel publikâsi fu „a getrow èn koni srafu”, dan dati kan yepi en fu kon abi wan krin ati, èn fu kakafutu gi hurudu.—Mat. 24:45; Ps. 143:10.

Wi musu abi „wan krin ati” te wi e kisi tesi

Sonwan fu den futuboi fu Gado ben e kisi tesi fu sma di e gens den, den ben abi moni problema, noso den ben abi wan seryusu siki. Ten na ten, den sani dati ben abi krakti tu tapu na ati fu den. Srefi Kownu David ben ondrofeni so wan sani. A ben taki: „Mi lasi-ati srefisrefi. Mi ati kon lasi ala firi” (Ps. 143:4). San yepi David fu pasa den tesi dati? David ben memre fa Gado ben handri nanga den futuboi fu En, èn fa ensrefi ben ondrofeni taki Gado frulusu en. A ben denki dipi fu den sani di Yehovah ben du fu krin a bigi nen fu En. David tan poti prakseri na den sani di Gado du (Ps. 143:5). Na so wi musu denki dipi tu fu wi Mekiman èn fu ala den sani di a du èn e tan du gi wi. Dati sa yepi wi srefi te tesi e miti wi.

Te wan sma du wan hati sani nanga wi, noso te wi feni taki wan sma du so wan sani nanga wi, dan wi ben kan kisi bita-ati. Te wi e tan prakseri a sani dati, dan wi ben kan denki takru fu wi brada nanga sisa. Kande wi no o wani abi demakandra moro nanga trawan, kande wi sa hori wisrefi aparti fu sma, èn kande wi no sa poti so furu prakseri moro na trawan. Ma a ben o fiti te wan sma di wani abi „wan krin ati” e tyari ensrefi na a fasi dati? A de krin taki wan sma di abi wan krin ati, e libi bun nanga en Kresten brada nanga sisa, awinsi den no e agri nanga en fu wan sani.

Na ini a grontapu di e kon moro ogri dei fu dei, wi leki tru Kresten de heri tra fasi, fu di wi lobi fu de sma di abi „wan krin ati”. Fu di wi e du a wani fu Gado, meki wi abi wan korostu firi. Ma san moro prenspari, na taki wi abi wan bun matifasi nanga wi Mekiman, Yehovah Gado, di lobi den wan di „ati krin” (Ps. 73:1). Iya, wi kan tron koloku sma tu, fu di Yesus ben pramisi den sortu sma dati taki „den o si Gado”. Iya, den o si fa Gado e handri fu a bun fu den wan di lobi fu de sma di abi „wan krin ati”.—Mat. 5:8.

[Futuwortu]